Yohani 14
14
O Lalan, o So'lin, o 'Orip ci Yis
1Sowal sa ci Yis i cangraan, <<Aka ka rawraw ko faloco' namo. Ti'eren ko Kawas,#14.1 Ti'eren ko Kawas, -- ano ^ca i, paso'linen ko Kawas. ti'eren Kako. 2Adihay ko rawang i loma' no Wama Ako. O tatayra Kako a mipatala to malokamaro'an namo. Ano caay ka hatini i, kona caay pasowal Kako i tamowanan tonini.#14.2 O tatayra Kako a mipatala to ... kona caay pasowal Kako i tamowanan tonini. -- ano ^ca i, Ano caay ka hatini, mimaan Kako a pasowal i tamowanan to nika o tatayra Kako a mipatala to malokamaro'an namo saw? 3Ano mahrek Kako a mipatala to malokamaro'an namo i, o mamiliyaw Kako a tayni a miala i tamowanan a panokay i Takowanan. Ta malaccay ko aro' ita itira. 4Mafana'to kamo to katayraan Ako a lalan,>> han Ningra.
5Pasowal sa ci Tomas ci Yisan, <<Tapangaw, caay ka fana' kami to katayraan Iso. Saka, samaanen niyam ko nika fana' toya lalan saw?>> han ningra.
6Pasowal sa ci Yis i cingraan, <<O lalan Kako, o so'lin Kako, o 'orip Kako. Ano caay pakayni i Takowanan ko cimacima i, awaay ko tatahira i ci Wamaan. 7Ano mafana' kamo i Takowanan i, mafana' kamo to Wama Ako. Mafana'to kamo anini to Wama Ako. Ma'arawayto namo Cingra,>> han Ningra.
8Pasowal sa ci Filip ci Yisan, <<Tapangaw, pa'arawen kami to Wama ta rahker kami,>> han ningra.
9Pasowal sa ci Yis, <<Filipaw, halafinto Kako a mikapot i tamowanan i, caayho ka fana' kiso i Takowanan saw? O paka'araway i Takowanan i, o paka'araway to Wama. <Nawiro Pa'arawen kami to Wama saan kiso saw?> 10Caay paso'lin kiso saw to nika o malaccayay Kako ato Wama? O sowal Ako i tamowanan to ha:tiniay i, caay ko no Mako a niharatengan. Pakaynien no Wama i Takowanan ko pilahci to tayal Ningra. Saka, mahaen ko sowal Ako i tamowanan. Nawhani o malaccayay Kami. 11Paso'linen ko sowal Ako to nika laccay Niyam ato Wama. Ano ^ca i, o dmak Ako ko kacipinangan namo a paso'lin. 12So'linen Ako a somowal kamo, o paso'linay i Takowanan i, o mamilcad to dmak Ako ko dmak ningra. O a ikaka no nidmakan Ako ko nika tadamaan no dadmaken ningra. Nawhani o tatayra Kako i ci Wamaan. 13O ningitangitan namo pakayni i ngangan Ako i, o lalahcien Ako a ma^min. Ta malatadamaanay ko Wama pakayni i Takowanan o Wawa. 14Orasaka, ano pakaynien namo i ngangan Ako ko pingitangit to maan i, o lalahcien Ako.
O Pipali'ayaw a Pasowal to Pakayniay i Fangcalay 'Adingo
15<<Ano o maolahay kamo i Takowanan i, o mamido^do kamo to limo'ot Ako. 16Ngitangiten Ako ko Wama, ta paflien Ningra kamo to ccay a roma a Padamaay a papida'oc a mikapot i tamowanan. 17Onini a so'linay a 'Adingo Cingra. Caay pilayap ko tamdamdaw i Cingraan, caay paka'araw cangra, caay ka fana' ko tamdamdaw i Cingraan. Nikawrira, mararid a ira i 'orip namo Cingra.
18<<Caay liyasen Ako kamo a pakaccay a matiya o pakoyoc a Wawa. O mamiliyaw Kako a tayni i tamowanan. 19Caayto ka halafin ta o a awato a ma'araw no tamdamdaw Kako. Nikawrira, o mama'araw namo Kako. Nawhani o mamiliyaw Kako a ma'orip. Saka, haloamo a o mamiliyaw a ma'orip. Ta o mamaka'araw kita. 20Itiya toya romi'ad i, o mamafana'to kamo to nika laccay Ako ato Wama ato nika laccay ita.
21<<O mica'dongay to limo'ot Ako ato mido^doay to limo'ot Ako a tamdaw i, o maolahay i Takowanan. O maolahay i Takowanan i, o kakaolahen no Wama Ako, o kakaolahen Ako koya tamdaw. O papahapinangen Ako Cingra to tireng Ako,>> han Ningra.
22Pasowal sa ci Yuta (o caay ko no Iskariyot), <<Tapangaw, sapahapinangan kiso i tamiyanan to tireng iso i, nawiro caay ka sapahapinangan kiso to tireng i tamdamdaw saw?>> han ningra.
23Paca'of sa ci Yis, <<Ano maolah ko tamdaw i Takowanan i, o mamido^do cingra to sowal Ako. Ta maolah ko Wama Ako i cingraan. Tayra Kami i cingraan a mikapot a maro'. 24Nikawrira, o caay ka olah i Takowanan a tamdaw i, caay pido^do to sowal Ako. Oya nitngilan namo a sowal to ha:tiniay i, caay ko no Mako a sowal, o sowal no miocoray Takowanan a Wama Ako konini.
25<<Yo mikapotho Kako i tamowanan i, mapasowalto Ako kamo tonini. 26Nikawrira, o papakafana' i tamowanan to polong no dmak koya a ocoren no Wama pakayni i ngangan Ako a Padamaay hananay a Fangcalay 'Adingo. Papiharatengen Ningra kamo to nano sowal Ako i tamowanan a ma^min.
27<<O sakarihaday namo Kako. Saka, parihadayen Ako kamo. Caay ka lcad ato no hkalan ko piparihaday Ako. Aka ka rawraw ko faloco' namo. Aka ka talaw kamo. 28Matngilto namo ko sowal Ako toya o tatayra Kako ta miliyaw haca a tayni i tamowanan yasanay. Ano o maolahay kamo i Takowanan i, kona lipahak kamo to nika tayra Ako i ci Wamaan. Nawhani ikakaay Ako ko nika tadamaan no Wama Ako. 29I 'ayaw no nika lahci nonini a dmak i, mapali'ayawto Ako kamo a pasowal. Ta ano malahcito konini a dmak i, paso'lin kamo to sowal Ako. 30Caay ka nga'ay a adihay ko sowal Ako i tamowanan. Nawhani iraayto a tayni ko mikowanay tonini a hkal. Caay pakapimaamaan cinira i Takowanan. 31Nikawrira, o sapakafana'aw Ako i tamdamdaw to nika olah Ako to Wama Ako saka, lahcien Ako ko limo'ot no Wama i Takowanan.
<<Kalomowad, tata. Tayrato kita.>>
Dewis Presennol:
Yohani 14: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019