Dmak 7
7
O Pipakimad ni Stifano
1<<So'linay, mahaenay kora dmak haw?>> han no sakakaay a citodongay to ta'ong ci Stifano a milicay.
2Saka, pasowal sato ci Stifano, <<Mamaaw, salikakaaw, tngilen ko sowal ako. I 'ayaw no nika maro' no tato'asan ita ci Apraham i Haran, yo i tiraho i Misopotamiya cingra i, pa'araw i cingraan ko tadamaanay a Kawas. 3Pasowal sa i cingraan, <Liyasen ko niyaro' iso ato malininaay iso a tayra i niharatengan Ako a malokamaro'an iso a pala,> han Ningra. 4Saka, liyas hanto ni Apraham ko Kaltiya a niyaro' a tayra i Haran a maro'. Namapatay ko mama ningra i, pakalinahen no Kawas cingra nanitira a pakamaro' i tini tonini a kamaro'an ita a sra i matini. 5Awaay ko niparocekan no Kawas i ci Aprahaman itiya to mamamamang aca a sra. Nikawrira, yo caho ka ciwawa cingra i, maktonto no Kawas ko sowal i cingraan to sapafliaw tonini a sra to mamaloningra ato tloc ningra. 6Mahaen ko sowal no Kawas i cingraan, <O mamafolaw ko tloc iso a tayra i roma a kitakit a maro'. O mamalakoli cangra itira to spat a so'ot (400) a mihcaan. O mamasamsam cangra. 7Nikawrira, o tatfocen Ako koya mipalakoliay i cangraan a finawlan. I ikoray i, o mamiliyas cangra nanitira a tayni a mita'ong i Takowanan,> saan. 8Patirengen no Kawas ko malodado^doen ni Apraham a krit a lisin to malokacipinangan to nika tatlek nangra. Saka, yo ciwawa ci Apraham ci Isakan, nahofocen saka falo a romi'ad i, do^doen ningra ko lisin a mikrit cingraan. Nanoya, do^doen ni Isak ko lisin a mikrit ci Yakopan. Do^doen ni Yakop ko lisin a mikrit to tosaay ko safaw a wawa ningra. Onini a wawa ko tatapangan no tosaay ko safaw a ngangasawan.
9<<Ma'inap ko salikaka ni Yosif cingraan saka, pacakayen nangra cingra ta mapatayra cingra i Icip. Nikawrira, mikapot ko Kawas i cingraan. 10Mapaliyas no Kawas cingra i masamaamaanay a pades. Yo tomireng cingra i ka'ayaw no hongti no Icip i, mapalmed no Kawas cingra a mapafli to taneng ato nga'ayay a pinangan. Saka, patirengen no hongti cingra a papikowan toya kitakit haloloma' ningra o hongti. 11Nanoya, ira ko kdal i polong no Icip ato Kanan. Saka, tata'ang ko pades itiya. Awaayto ko pialaan no tato'asan ita to kakaenen. 12Nikawrira, matngil ni Yakop ko nika ira no kakaenen i Icip saka, ocoren ningra ko wawa ningra o tato'asan ita a patayra. 13Yo sakinatosato nangra a tayra i, pakafana'ento ni Yosif ko salikaka ningra to tireng ningra. Saka, mafana'to ko hongti no Icip to paro no loma' ni Yosif. 14Orasaka, ocor hanto ni Yosif ko salikaka ningra a papitahidang to mama ningra ci Yakopan atoya pito a polo' ira ko lima a paro no loma' ningra a ma^min a patayra i Icip. 15Saka, loklon sa ca Yakop a tayra i Icip. Itira ci Yakop ato romaroma a tato'asan ita a mapatay. 16Nanoya, mapatayra ko mapatayay a tireng nangra i Sikim. Ta tademen nangra itira i nani'acaan ni Apraham i tloc ni Hamor a tadem.
17<<Yo mangatato ko pilahcian no Kawas to niktonan Ningra a sowal ci Aprahaman i, matongal a matongal ko 'aloman no finawlan ita o Israil i Icip. 18Nanoya, o caayto ka fana' ci Yosifan ko tomirengay a malahongti no Icip. 19Safana'en ningra ko finacadan ita. Pasemsemen ningra ko tato'asan ita. Paci^ci han ningra cangra a papifalah to nihofocanho a wawa nangra to saka^caaw ka 'orip noya wawa. 20Itiya a mahofoc ci Mosian. Tada o makapahay a wawa cingra. Tolo a folad a madipot cingra i loma' no mama ningra. 21Namafalah ci Mosi i, makra no fafahiyan a wawa no hongti no Icip cingra. Saka, kalawawa hanto ningra ci Mosi a midipot. 22Mapakafana' cingra to masamaamaanay a sifana' no Icip. Saka, tadamaan ko sowal ningra ato dmak ningra.
23<<Yo spatto a polo' ko mihcaan ni Mosi, safaloco' sa cingra to sapiliso'aw to salikaka ningra a Israil. 24Tayra sa cingra i, ma'araw ningra ko nipisamsam no Icip a tamdaw to ccay no finacadan ningra saka, co'ay han ningra koya Icip a tamdaw a mipa'ading toya masamsamay a tamdaw, ta paloen ningra a mipatay koya Icip a tamdaw. 25(Latek mafana'to ko salikaka ako to nika pakayni i takowanan ko sapipa'orip no Kawas i cangraan nasa ko harateng ningra. 'Arawhani, caay ka fanafana' cangra.) 26Cila sato a romi'ad, ma'araw ningra ko tatosa a mala'odotay a Israil. Palali'ayen ako cangra, saan cingra. Saka, sowal han ningra, <Salikakaaw, o malikakaay kamo. Nawiro marari'ang kamo saw?> han ningra. 27'Arawhani, ckroh sa a miwanik ci Mosian koya padoka'ay to tatihi a tamdaw, sowal sa, <O maan kiso iro citodong kiso a mikowan a misawkit tamiyanan saw? 28Sapipatayan kiso i takowanan a matiya o nipipatay iso inacila toya Icip a tamdaw haw?> han ningra. 29Mitngil ci Mosi tonini a sowal i, laliw sato a tayra i Mitiyan a pala a maro'. Ciwawa cingra itira to tatosa a fa'inayan.
30<<Yo spatto a polo' a mihcaan ko aro' ningra i, ira i ngata no Sinay a lotok a kohkohan a pa'araw ci Mosian ko coyoh, itira i marengrengay a malikatay a fadal. 31Minengneng ci Mosi tonini i, safahka' sa. Hapinangaw ako a minengneng sa cingra a miraod, itiya i, ira a matngil ningra ko ngiha' no Tapang. 32Sowal sa, <O Kawas no tato'asan iso Kako. O nita'ongan ni Apraham, ni Isak, ni Yakop Kako,> han Ningra. Orasaka, mirmir#7.32 mirmir -- o roma i, tirtir (ka'amis). sa a matalaw ci Mosi. Caayto ka sapinengnengan cingra. 33Itiya i, pasowal sa ko Tapang i cingraan, <Hlongen ko cokap iso. Nawhani o fangcalay a sra kora katomirengan iso. 34So'linay ma'araw Ako ko pisemsem no finawlan Ako i Icip, matngilay Ako ko picdaah nangra. O sapa'oripaw Ako i cangraan a pasadak nai Icip saka, tayni Kako. Ocoren Ako kiso a patayra i Icip. Olili, katayrato,> han Ningra.
35<< <O maan kiso iro citodong kiso a mikowan a misawkit tamiyanan saw?> han no tamdaw ci Mosi a mina'ay. Nikawrira, pakaynien no Kawas toya pa'araway i cingraan a coyoh itira i cifadalay ko nipipatireng cingraan a palakakridan a palapa'oripay a miocor. 36Saka, kriden ni Mosi cangra a pasadak nai Icip. Yo i Icipho, yo i Kahngangay hananay a riyar ato nika itira nangra i kohkohan to spat a polo' a mihcaan i, adihay ko nidmakan Ningra to kafahka'an a dmak. 37Ona ci Mosi ko pasowalay i finawlan no Israil toya, <O papalowaden no Tapang a Kawas namo ko ccay a salikaka to mamalopali'ayaway to sowal, matiya o pipalowad Ningra i takowanan,#7.37 O papalowaden no Tapang a Kawas namo ko ccay a salikaka to mamalopali'ayaway to sowal, matiya o pipalowad Ningra i takowanan, -- ano ^ca i, O papalowaden no Tapang a Kawas namo ko ccay a milcaday i takowanan a mamalopali'ayaway to sowal.> sanay. 38Yo masa'opo ko finawlan i kohkohan i, onini a tamdaw ko mikapotay to pasowalay cingraan a coyoh i Sinay a lotok a pakayakay to tato'asan ita a milayap to pa'oripay a sowal to sapafli i titaanan.
39<<Nikawrira, caay ka sapihaklongan ko tato'asan ita i cingraan. Siikor han nangra cingra a caay pikihar. Pasayra i Icip ko faloco' nangra. 40Saka, sowal sa cangra ci Aronan, <Sanga'en ko mamikrid titaanan a kawakawas. Nawhani ano mamaanayto ci Mosi oya namikriday titaanan a pasadak nai Icip,> han nangra. 41Itiya i, sanga'en nangra ko faco no tofor a kolong. Patayraen nangra tonini a samiyay ko sapato'aya. Lipahak cangra a maacang to nisanga'an nangra. 42Orasaka, siikor hanto no Kawas cangra. Pakonira hanto Ningra ko nipita'ong nangra to fo'is no kakarayan. Mato nika tilid i cudad no pali'ayaway to sowal no Kawas toya,
<Kamo o Israil, yo i kohkohan kamo to spat a polo' a mihcaan i,
Caay ko saki Takowanan ko pipacok namo to 'a'adopen a mipato'aya.
43'Orongen namo ko talo'an ni Molik ato fo'is ni Rifan a kawas,
Oya nisanga'an namo a samiyay to malotata'ongen namo.
Orasaka, o papakafolawen Ako kamo a patayra i ti:raw no Papilon,> sanay.
44<<Ira i kohkohan ko Talo'an no tato'asan ita to tatodong no nipikapot no Kawas i cangraan. Mado^do ko nano sowal no Kawas ci Mosian a misanga' toya, <Haenen o ninengnengan iso a faco ko pisanga' tonini,> sanay. 45Nanoya, yo kriden ni Yosuwa ko tato'asan no mita a micomod to pala noya nilaplapan no Kawas i ka'ayaw nangra a kasafinacadan i, itiya cangra a patayra tonini a Talo'an. Ta itira sa koya Talo'an tangasa i nikalahongtian ni Tafiti. 46Kaolahan no Kawas ci Tafiti saka, mingitangit cingra to sapatirengaw to maloloma' no nita'ongan ni Yakop a Kawas. 47Nikawrira, ci Solomon ko patirengay to maloloma' no Kawas.
48<<Nikawrira, caay ka maro' ko Isatakaraway a Kawas i nisanga'an no tamdaw a loma'. Mato sowal no pali'ayaway to sowal no Kawas toya,
49<Pasowal ko Tapang,
O kamaro'an Ako ko kakarayan.
O pasaripa'an Ako ko sra.
O masamaanay a loma' ko sasanga'en namo saw?
I cowa ko mamalokamaro'an Ako saw?
50Caay ko nano nisanga'an Ako konini a ma^min saw?> sanay.
51<<Kamo o 'atkakay ko faloco', o caay pita'ong to Kawas, o caay pitngil to sowal no Kawas a tamdaw, mararid kamo a pacoli to Fangcalay 'Adingo! Matiya o tato'asan namo kamo! 52Cima ko caay ka kari'angen no tato'asan namo a pali'ayaway to sowal no Kawas saw? Patayen nangra koya aira a mo^celay a Koli, sanay ko sowal no pali'ayaway to sowal. Anini sa i, o kamo ko mipacakayay a mipatay toya Koli. 53Malayapto namo ko nipatorodan no coyoh a rikec no Kawas. 'Arawhani, caay pido^do kamo tonini!>> han ningra.
O Saki Patnak ko Patay ni Stifano
54Mitngil ko lomaocay i pilaocan tonini i, tata'ang ko kter nangra. Saka, pasayra sa cangra ci Stifanoan a mingric to wadis. 55Nikawrira, mapa'icel no Fangcalay 'Adingo ci Stifano, nengneng sa a pamotek to kakarayan i, ma'araw ningra ko 'dil no Kawas ato ma'araw haca ningra ko nika tomireng ni Yis i kawanan no Kawas. 56Saka, sowal sa cingra, <<Ma'araw ako ko nika fawah no kakarayan ato nika tomireng noya Wawa no Tamdaw i kawanan no Kawas!>> saan cingra.
57Saka, alaclicli' saan koya lomaocay a mipo^et to tangila nangra. Laccay sa cangra a mikilomot ci Stifanoan. 58Ta taroh han nangra ci Stifano a pasadak i papotal no niyaro', ta paloen nangra to fokloh a mipatay. Oya paka'araway a tamdaw tonini a dmak i, hlongen nangra ko kafafang nangra a patorod ci Sawloan hananay a kapah. 59Yo mitkol#7.59 mitkol -- o roma i, mipontoh (ka'amis). cangra to fokloh ci Stifanoan i, lkal sa ci Stifano a mitolon, <<Tapang Yisaw, layapen ko 'adingo ako!>> saan. 60Ta pitosor sa a misatata'ang to ngiha' a micli', <<Tapangaw, aka patamorongen cangra tonini a raraw!>> saan. Ta patay sato cingra.
Dewis Presennol:
Dmak 7: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019