Dmak 4
4
Masawkit no Milaocay ci Pitiro aci Yohani
1Yo somowalho ci Pitiro aci Yohani i finawlan i, fahal ira a miraod i cangraan ko citodongay to ta'ong ato kakridan no midipangay a tayring no Fangcalay Pita'ongan ato Satukay a tamdaw. 2Tatiih ko harateng nangra to pipasifana' na Pitiro to finawlan ato nipipatnak nangra to pakayniay i nika lomowad ni Yis a ma'orip nai patay. Nawhani o pahapinangay konini a dmak to nika o lalomowad ko tamdaw a ma'orip nai patay saan. 3Orasaka, rpet hanto nangra ci Pitiro aci Yohani a mirofo a tahadafak. Nawhani to'manto itiya. 4Nikawrira, o mitngilay to sowal no Kawas a tamdaw i, 'aloman a 'aloman ko paso'linay. Saka, sa'osi han ko polong no fa'inayan aca i, ma^deng lima a patek (5,000) ko tamdaw.
5Dafak sato i, masa'opo i Yirusalim ko kakrikridan no Yutaya a tamdaw ato kalas no niyaro' ato pasifana'ay to Rikec. 6Ira ci Anas o sakakaay no citodongay to ta'ong, ira ci Kayafas, ci Yohani, ci Aliksantor ato paro no loma' no sakakaay a citodongay to ta'ong. 7Patireng han nangra i ka'ayaw nangra ko tarokos. <<O nima a 'icel, o nima a ngangan ko sapidmak namo tonini?>> han nangra a miliclic.
8Itiya i, mapa'icel no Fangcalay 'Adingo ci Pitiro saka, sowal sa i cangraan, <<Kamo o kakrikridan no finawlan ato kalas no niyaro', 9o pakayniay i nga'ayay a dmak niyam a miadah tonini a adadaay ko sakaliclic niyam anini. 10Kafana' kamo a mapolong ato finawlan no Israil a ma^min, o sakaadah nonini a tamdaw a tanektek a tomireng i ka'ayaw namo i, o nano 'icel ni Yis Kristo no Nacali oya nipacekan namo i ciwcika a mipatay, oya nipalowadan no Kawas a pa'orip nai patay. 11O pakayniay ci Yisan ko nisowalan i Fangcalay Cudad toya,
<O kinafalah a fokloh namo o misaloma'ay a tamdaw i,
malata'enenganto no loma',> sanay.
12Deng Cingra a ccay ko papakapa'orip to tamdaw. Awaayto i cowacowa no hkal ko roma a ngangan no Kawas to papakapa'orip titaanan,>> han ni Pitiro.
13Safahka' sa koya milaocay a minengneng to nika ^ca paska ni Pitiro aci Yohani a somowal ato nika caay ko nao mitiliday, o kalotamdaw cangra. Saka, mahapinang nangra ko nika nao mikapotay cangra ci Yisan. 14O romasato, ma'araw nangra ko nika tomireng noya niadahan nangra a tamdaw i tatihi nangra saka, awaayto ko sapacawicawi nangra a pasowal. 15Saka, papiliyas hanto nangra ca Pitiro nai pilaocan. Ta sasowasowal sato cangra, 16<<Maanen ita koya tatosaay. Nawhani kafana'anto no polong no i Yirusalimay a finawlan ko nidmakan nangra a kafahka'an a dmak. Saka, awaay ko pakayraan ita a mipalasawad tonini. 17Nikawrira, to saka^caaw ka tnak nonini a sowal i finawlan saka, Akato pakaynien i ngangan ni Yis ko nipipasowal i cimacimaan, hanaw ita cangra a palimo'ot,>> saan cangra.
18Saka, tahidang hanto nangra koya tatosaay. <<Akato pakaynien i ngangan ni Yis ko pipasowal ato pipasifana',>> han nangra cangra a milalang. 19Paca'of sa ci Pitiro aci Yohani i cangraan, <<O nipitngil a mihaklong to sowal no Kawas ato nipitngil a mihaklong to sowal namo i, i cowaay ko nga'ayay i ka'ayaw no Kawas saw? Kamo ko mamihapinang tonini. 20Maanen niyam ko nika ^ca ka somowal to ninengnengan ato nitngilan niyam saw?>> han nangra a paca'of. 21Orasaka, mahrek a mipatalaw ko lomaocay i, tdal hanto nangra cangra. Nawhani, awaayto ko pakayrakayraan nangra a mitfoc i cangraan, pakayni tonini a dmak mipahmek to Kawas ko 'alomanay. 22Onini a maadahay a tamdaw to nano kafahka'an a dmak i, mata'lif ko spat a polo' no mihcaan ningra.
Malaccay ko Salikaka a Mitolon
23Yo matdalto koya tatosaay i, nokay sato cangra i kapot nangra a pakafana' to nano sowal no kakridan no citodongay to ta'ong ato kalas no niyaro'. 24Mitngil ko mitooray tonini a sowal i, laccay sa ko faloco' nangra a pasayra i Kawas a pangiha' a mitolon, <<Tapangaw, o misanga'ay Kiso to kakarayan ato sra ato riyar ato i laloma'ay nonini a maamaan a ma^min. 25Nano pakaynian Iso i Fangcalay 'Adingo ato tato'asan niyam ci Tafiti o matayalay Iso ko nika somowal toya,
<Nawiro mafirang ko roma a finacadan?
Nawiro misafaloco' ko kasafinawlan to awaay ko ^poc a dmak?
26Alatiretireng sa a misa'imer ko polong no hongti no hkal.
Masa'opo ko mikowanay a mipacoli to Tapang ato nipaloso'an Ningra to simal a Kristo,> sanay.
27So'linay malakapot ci Hiroti aci Pontius Pilato ato roma a finacadan ato finawlan no Israil a masa'opo i tini tonini a niyaro' a pacoli ci Yisan, oya nipili'an Iso a mipatireng a palaKristo a fangcalay a matayalay. 28Pakayni tonini a sa'opo ko nipilahci nangra to nafaloco'an Iso to dadmaken Iso pakayni i 'icel Iso. 29Saka, Tapangaw, tapalen ko pipatalaw nangra. Pa'icelen kami o matayalay Iso to saka^caaw paska niyam a pasowal to sowal Iso. 30Laya'en ko kamay Iso a miadah to adadaay. Pakaynien Iso i ngangan no fangcalay a matayalay Iso ci Yis ko nipidmak to kafahka'an a dmak,>> saan cangra a mitolon.
31Mahrek cangra a mitolon i, mangernger koya kasa'opoan nangra. Mapa'icel no Fangcalay 'Adingo cangra a ma^min. Saka, caayto paska cangra a pasowal to sowal no Kawas.
Sakapolongan han no Mitooray ko Dafong Nangra a Ma^min
32Malaccay ko faloco' no paso'linay ci Kristoan a tamdamdaw. Awaay ko misatkeday nangra to dafong no tireng. Sakapolongan han nangra ko dafong nangra a ma^min. 33Tadaci'icel ko pipawacay no tarokos to pakayniay i nika lomowad no Tapang ci Yis a ma'orip nai patay. Tadamapakalmed no Kawas cangra a ma^min.
34Awaay i cangraan ko cango'otay to maan. Nawhani mapacakayto no ciomahay ato ciloma'ay a tamdaw ko dafong nangra, 35ta patayraen nangra i tarokos ko 'aca nonini, o kacango'otan no kahaccaccay ko pi'arawan a mipakilac.
36Ira ko ccay a Lifi a tamdaw. O i Sayprusay ko hofoc ningra. Ci Yosif ko ngangan ningra. Nikawrira, ci Parnapas han no tarokos cingra a mitahidang. (O tatodong no Parnapas hananay i, o mihinomay,) sanay. 37Pacakayen ningra ko omah ningra. Ta patayraen ningra i tarokos ko 'aca nonini.
Dewis Presennol:
Dmak 4: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019