Matta 9
9
Yesu a̱ creng a̱ntyok ta̱ruk nkap
(Markut 2:1-12; Luka 5:17-26)
1Yesu a̱ brek a̱ nwa kpongo nu a̱ byyek a̱ nat ka̱ma̱nyyi ka̱nkrang nu ka. 2Ba̱yanyet a̱ cot a̱yanyet na̱ myyi tazwa a̱ngbrak a̱ ba mi di Yesu. A̱tuba a̱ywu a̱ yin yya hywu ta̱ruk nkap. Yesu na̱ bu ryi ntyyi rya ba̱nyet iya, a̱ hywa da̱ a̱ntyok ta̱ruk nkap u, “Ka̱won nzuk, tyyi rya nwan yring. Ba na̱ tssu a̱ka̱tukyya nwan nu.”
3To, ba̱malam Truwang ba̱yaan ba shyi ka̱rek ka ni, ba ya hywuk a̱ hywa, “A̱yin a̱ni a̱ ya breng ba̱cicrak bu Ka̱za.”
4Yesu a̱ bvwo kyang a ba hwa ni, a̱ ba̱ zzim a̱ hywa, “A̱nzan a̱ ya ba da̱ a̱ka̱tuk a̱huhwa a̱ni? 5A̱nzan a̱ wa yet a̱hyom u, ba hywa da̱ a̱yin, ‘Ba na̱ tssu a̱ka̱tukyya nwan nu o?’ ki ba hywa da̱ nu, ‘Ta̱za cong?’ 6N ya tyyei a̱mi ka̱sak ka nzuk Ka̱won A̱neywu n byyi cet n tssu a̱ka̱tukyya i ka̱sa kani ni.” A̱ si hywa da̱ a̱ntyok ta̱ruk nkap u, “Ta̱za, gut a̱ngbrak nwan nu i sook nat ka̱ryi.”
7A̱tuba a̱ywu a̱ ta̱za a̱ nat ka̱ryi. 8Ba̱nyet ba ba bu ryi, ka̱wun a̱ ba̱ pyyem, ba dyep Ka̱za mi ka̱sak ka kan wrak ba̱nyet taka̱i cet nani ni.
Yesu a̱ yei Matta
(Markut 2:13-17; Luka 5:27-32)
9Yesu na̱ drok ka̱ yemi a̱ cong a̱ si ryi a̱ntyok ssang diga̱ndu a̱yaan, ba yin ku yei Matta, na̱ swat ka̱rek mpfong nu ka. Yesu a̱ hywa da̱ nu, “N tssup.”
Matta a̱ ta̱za a̱ brak a̱ rot a̱ tssup Yesu.
10Yesu na̱ si swrang gbang Matta ka a̱ shyi i ya kyangya, ba̱nyet ssang diga̱ndu ba̱yaan bu ba̱nyet a̱ka̱tukyya a̱ gbit a̱ bu nwa ya na bu Yesu bu na̱won pfong nu na. 11Ba̱nyet Farisa a̱yaan a̱ ryi nkyang iya a̱ zzim na̱won pfong nu na a̱ hywa, “A̱nzan a̱n byyi a̱ntyok ka̱ryi nyin nu na̱n za bu ba̱nyet ssang diga̱ndu nta̱mak bu ba̱ka̱tuk ba̱nyet?”
12Yesu a̱ ba̱ hok a̱ hywa da̱ mba, “Ba̱nyet ba a̱ swat zizrak ni a̱ cat a̱ntyok dikan ba, seko ba̱nyet nhywu. 13Yi nat si cyang ba̱ryat Ka̱za ba i gi bvwo kyang a n byyi ban hywa, ‘N cat ba̱hyum ba, se a̱ntyok pfong dizot.’ Ba nzuk a yet nying bu yei ba̱nyet ba a̱ maai ba̱nyet i ba, se ba̱nyet ba ba rak a̱ wwon ni.”
Ba̱ryat yya a̱zumi
(Markut 2:18-22; Luka 5:33-39)
14Nom yaan na̱won pfong Yohana A̱yya Baptisma a̱ nyyai a̱ ba di Yesu a̱ bu ku zzim a̱ hywa, “Njit bu ba̱nyet Farisa na zi yya a̱zumi, ma a̱nzan a̱n byyi na̱won pfong nwan na ban wi yya na?”
15Yesu a̱ hywa da̱ mba, “Yi hwa di ba̱nyet ba a̱ shyi ka̱bvwa song nyreng ni a̱ ni shyi bu byyan rya a̱ nat ka̱nu ka̱ kwot o? Ku ni myim ba. Ma ka̱ram a̱n shyi a̱ bai ba ni yen drok bu a̱ntyok nyreng u. Ka̱ram iya a̱mi ba si nin yya a̱zumi nu.
16“A̱yin a̱n sook a̱hwai nwwang a̱tro a̱n tywei dibvong a̱kukwo a̱tro ba, se na̱ wa kut-kut, wwon dibvong ti i sin seyak nta̱mak. 17Da̱ a̱yin na̱ nin sook a̱hwai nkwwa a̱ krok a a̱gugwak dong ba. Ki a̱ yya a̱mi, a̱gugwak dong u a̱ ni ta̱kyak, nkwwa na i tyong weyang. Seko ba tyyi a̱hwai nkwwa a a̱hwai dong, a ryi di nkwwa na di dong a kyang yring ni byyan ba.”
Yesu a̱ shyek ka̱won a̱gba̱dang ba̱nyet Yahuda
(Markut 5:21-43; Luka 8:40-56)
18Yesu na̱ shyi i ba̱ryat ba, a̱yanyet ka̱yat ba̱cecet ba̱nyet Yahuda a̱ nyyai a̱ bu ta̱gbok a̱ hywa da̱ nu, “Ka̱won ka̱neyang nzuk a̱ kwu ba̱nyying, ma ki a ba bu ka̱ sak mbvak ka ni shyek.”
19Yesu a̱ ta̱za a̱ ku tssup nta̱mak bu na̱won pfong nu na.
20A̱mbyring a̱yaan na̱ yya hywu bvei mbvak a̱rya swak ba̱ a̱hwa. Na̱ tssup Yesu a̱maryim a̱ si byram jwun a̱tro nu ji. 21A̱ yin hywa ka̱tak mpfwa, “Ki n shya ba̱ a̱tro nu nu n byram n ni creng.”
22Yesu a̱ brak a̱ ku ryi a̱ hywa da̱ nu, “Tyyi rya nwan yring ka̱won nzuk, ntyyi rya nwan na na̱ creng.” Bu ka̱baram iya a̱mbyring a̱ywu a̱ hok na̱ creng.
23Yesu na̱ bu nwa ka̱ryi a̱gba̱dang ba̱nyet Yahuda ka a̱ si shya ba̱nyet tyap a̱gba ba bu kpikpit ba̱nyet a ba tyyi ba̱tai bu ka̱nak. 24Na̱ hywa da̱ mba, “Yi wruk sa̱rei nyin. Ka̱baneyang ka a̱ kwu ba, ka shyi nda a̱mi.”
Ba nwa ku mai sa̱rei mba. 25Ba̱nyet ba ba bu wruk a̱ tyak, Yesu a̱ nwa i bat a ka̱baneyang ka ka yin shyi ni, a̱ si ka̱ pyyem mbvak ka ta̱za. 26Nkhang a i si tyak sa̱rei ka̱byen ka.
Yesu a̱ creng ba̱nyet a̱tutwan ba̱hwa
27Yesu na̱ bu drok ka̱ yemi a̱ naat, ba̱nyet a̱tutwan ba̱hwa a̱ ku tssup a̱ ku yei ba̱ ntazwa a̱ yya, “Yesu Ka̱mbvon Dawuda, hok dizot njit.”
28Yesu na̱ bu nwa ka̱ryi ka̱yaan, ba̱nyet a̱tutwan iya a̱ nyyai a̱ ba da̱ nu, na̱ bu ba̱ zzim, “Yi shim a ndya nyin, ki n drok n ya creng o?”
Ba hywa, “Zi shim, A̱ntyok Ka̱ryi.”
29Yesu a̱ byram a̱ssi mba na a̱ hywa, “Ku ni ryi di shim nyin na ni.” 30A̱ssi mba na a̱ yrang. Na̱ ba̱ gbang di cet a̱ hywa, “Yi ryok tyyei a̱yin ba!”
31Ma bu drok mba na ba tyyei nkhang Yesu na a̱ tyak ka̱byen ka.
Yesu a̱ creng momom
32To, ba̱nyet a̱tutwan ba ba wwut, ba̱yanyet a̱ nyyai ba̱ a̱yanyet a̱ yin dyat ba rot a̱ yin byyi a̱ka̱tuk tswa. 33Yesu na̱ bu nyying tswa ji, a̱tuba a̱ywu a̱ nwa ryat. Ba̱nyet ba a̱ yya ka̱hat ba̱t a̱ hywa, “Kai, zi ka̱n dyi taka̱i ani i ka̱byen Isreila ba.”
34Ma ba̱nyet Farisa na i hywa, “Nu Yesu a̱ shya cet nyying ba̱ka̱tuk tswa da̱ A̱gwam ba̱ka̱tuk tswa.”
Yesu a̱ hok dizot ba̱nyet
35Yesu a̱ nwai na̱nkrang a̱ swrap, a̱cecet ba̱ a̱cwwang. A̱ ba̱ zzek a a̱bat a̱duwa mba na, a̱ yya wa'azi Ka̱sham Ba̱ryat tazwa Dityok Tazwa ti, a̱ bo creng ba̱nyet kozan taka̱i nhywu. 36Na̱ cyang ka̱tswa ba̱nyet kani, dizot i ku pyyem rot ba yin dwan di ba byyi a̱ntyok ba̱ brang ba, da̱ni di bvon-tsaap ji sang a̱ntyok a̱tsaai ni, 37na̱ hywa di na̱won pfong nu na, “Yak a ri sseng ba̱gingang, ma ba̱nyet yya ba a̱ shii ba. 38Yi naai a̱ntyok byyi yak u na̱ ga bvwa ba̱nyet ba̱t, ba bu yya yak nu na a̱ tyak.”
Dewis Presennol:
Matta 9: kaj
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2011, Wycliffe Bible Translators, Inc. All rights reserved.