Matta 12
12
A̱gwam nom A̱sa̱ba̱t
(Markut 2:23-28; Luka 6:1-5)
1Ba bvwa nom ba̱cincong, Yesu a̱ bo shyi i cong bu na̱won pfong nu na, ba cong a̱ swrap ka̱byen yak alka̱ma ka̱tuk A̱sa̱ba̱t. Cihywat i pyyem na̱won pfong nu na, ba nwa shwam alka̱ma nu. 2Ba̱nyet Farisa i ba̱ ryi i hywa di Yesu, “Kyang a ba tyong yya ka̱tuk A̱sa̱ba̱t ka ni, nkpa a̱mi na̱won pfong nwan na ba yya!”
3Yesu a̱ hywa da̱ mba, “Yi ka̱n twang kyang a Dawuda bu ba̱nyet ka̱cyet nu ba ba yin hok cihywat a̱ yya ni baa? 4Na̱ nwa bu ba̱nyet ka̱cyet nu ba i bat Ka̱za na, ba si ya burodi ba̱hyum Ka̱za na ba tyong ya na ni. Se bu ba̱gado Ka̱za a̱mi ba yin ba̱ wwon ba ya burodi iya. 5Ki yi ka̱n twang Truwang Musa ji ka̱sak ka kozan ka̱tuk A̱sa̱ba̱t ba̱gado Ka̱za ba a̱ cong pfong ka̱yat bat Ka̱za ka nnom iya, ma mba a̱ ba̱ tyyak tara byyi a̱bvun ba. 6Kyang a n cat yi bvwo ni nkpa yet: A̱yin nu a̱ ra̱u bat Ka̱za na ni a̱ shyi kyi. 7Ba̱ryat Ka̱za a̱ hywa, ‘Ba̱sok nyam a̱mi n cat ba, pfong dizot ba̱yaan a̱mi.’ Yi da nbvwo kyang a ba̱ryat bani ba yet i, se nyin ba saai ba̱nyet sang hywak hywak ba. 8Nzuk Ka̱won A̱neywu a̱mi n yet a̱gwam nom A̱sa̱ba̱t u.”
Yesu a̱ creng a̱ntyok a̱ta̱kwu mbvak
(Markut 3:1-6; Luka 6:6-11)
9Yesu a̱ drok ka̱ yemi a̱ si nwa i bat a̱duwa mba. 10A̱yanyet a̱ yin shyi ka̱ yemi a̱ byyi a̱ta̱kwu mbvak. Ba̱yanyet a̱ bo ma̱n shyi ka̱rek ka a̱ cat shya Yesu bu hywak. Ba ku zzim a̱ hywa, “Truwang ji shim ba creng a̱yin i nom A̱sa̱ba̱t o?”
11Yesu a̱ hywa da̱ mba, “Ka̱ a̱yin nyin a̱ byyi bvon-tsaap zi kpa i bvong ka̱tuk A̱sa̱ba̱t, a̱ ni za̱ pyyem a̱ kwwat a̱ wruk i baa? 12Ma a̱neywu a̱ ran bvon-tsaap ji, rot a̱mi Truwang njit ji shim zi yya a̱tsatsak ka̱tuk A̱sa̱ba̱t ka.” 13A̱ si brak a̱ hywa da̱ a̱tuba a̱ywu, “Neyak bvak nwan na.”
Na̱ kpo neyak ku creng i brek ba ba̱cicrak bu yring a. 14Ba̱nyet Farisa na i kam i nwa cat diwat ti ba nin hywat Yesu ni.
A̱yin nu Ka̱za ka tssa i dikwwa nka ni
15Yesu na̱ bu hok, a̱ drok ka̱ yemi, ba̱nyet ba̱gingang a̱ ku tssup na̱ si ba̱ creng ba̱nyet nhywu mba ba. 16A̱ ba̱ gbang ba ryok tyyei a̱yin, a̱yin nu na̱ yet ni ba. 17Ku cong ba̱cicrak bu kyang a a̱ntyok tyyei ba̱ryat Ka̱za nu ba yin yei Ishaya na̱ yin hywa ni. A̱ yin jem a̱ hywa,
18“A̱kwwa nzuk u n tssa ni a̱nunini.
Nu a̱mi n cat, n bo pfong ansham nu.
N ni tun Tswa nzuk ji n ku tyyi mi,
na̱ tyyei sa̱rei nwap nzaan na shirya nzuk ji.
19A̱ naat a̱cecet ba̱ a̱yin ba,
di na̱ ni ryat a̱cwrya ba;
a̱yin na̱ ni hok diwan nu a̱zi ryen ba.
20A̱ ni gwwak ba̱bubvot ba̱nyet ba, di na̱ ni bvut gbam sang cet ba,
di na̱ ni hywwak ka̱bacincong nsak rya ba, di na̱ ni rryik rong fitila na shyi i kwi ni ba.
A̱ ni kwak ka̱son se ka̱ram ka shirya nu ji zin za nasara ni.
21Sa̱rei nwap nzaan na brak a̱ ni tyyi ndya mba na a̱za̱ nu.”
Yesu bu Ba'alzabul
(Markut 3:20-30; Luka 11:14-23)
22Ba nyyai ba̱ a̱yanyet a̱ ba mi di Yesu, na̱ yet momom a̱ bo kpa a̱tutwan rot a̱ shyi ba̱ a̱ka̱tuk tswa. Yesu a̱ si ku creng na̱ ryat a̱ bo nwa cyang na̱bvwa. 23Sa̱rei ba̱nyet ba ba bu ryi a̱ yya ka̱hat a̱ hywa, “Ka̱ nu a̱ yet ka̱mbvon Dawuda ka?”
24Ba̱nyet Farisa na ba bu hok a̱ hywa, “A̱gwam a̱ka̱tuk tswa Ba'alzabul a̱mi a̱ ku ryi cet ba̱ nyying a.”
25Yesu a̱ bvwo kyang a ba hwa ni, a̱ hywa da̱ mba, “Dityok ti ya wop i shyi an zwang bu ba̱yaan ni a̱ ni sseng ba. Ka̱nkrang ka ko ka̱ryi ka a̱ ya wop a̱ shyi an zwang bu ba̱yaan ni a̱ ni hwwei. 26A̱mi meyang ki ba̱nyet Ka̱ta̱nyrang ba a̱ nwa zwang bu ba̱yaan, to, ba ni maai sseng ba. 27Ki yi hywa di n shya cet nyying a̱ka̱tuk tswa na di Ba'alzabul, a̱nyan a̱mi a̱ wrak na̱won nyin na cet ba̱ nyying a? To, ba̱nyet ya tssup ba a̱ ya tyyi a̱bvun. 28Ma ki yi shim Tswa Ka̱za a̱mi n nang cet nyying a̱ka̱tuk tswa nu, naanini yi ni bvwo Dityok Ka̱za ka̱n ba da̱ nyin.
29“A̱yin a̱ ni maai a̱ si nwa ka̱ryi a̱ntyok ncet ba, se a̱ yen dan a̱ntyok ka̱ryi nu a̱ ku pyyem a̱ rop a̱ si nwa a̱ kok nkyang ka̱ryi na.
30“A̱yin nu a̱ shyi ba̱ nzuk ni ba a̱ yya dira̱ndwan ba̱ nzuk, a̱yin nu a̱ ma̱ n brang tung a ni ba a̱ yet a̱ntyok ka̱wop. 31Nkpa n ni hywa kozan a̱ka̱tukyya bu ditok ti ba̱nyet ba ryat ni, ba ni ba̱ tssu mi. Ma a̱yin nu a̱ pfwei Tswa Ka̱za ni, ba ni ku bring ba. 32A̱yin nu a̱ ryat a̱ka̱tuk ba̱ryat tazwa nzuk Ka̱won A̱neywu ni ba ni ku tssu mi, ma a̱yin nu a̱ ryat Tswa Ka̱za a̱ka̱tuk ba̱ryat i, ba byyi ku bring ba, har a̱ba̱da.”
Ka̱kon bu disum nka
(Luka 6:43-45)
33“Ki ka̱kon a̱ yet a̱tsatsak, disum nka ti ni yet a̱tsatsak. Ki ka̱kon a̱ ma̱n yet a̱bibyyi, disum nka ti ma̱ ni yet a̱bibyyi. Kozan ka̱kon ba ka̱ bvwo zi disum nka ti. 34Ba̱bvop bani, yi ni yya ni n dyat a̱tsatsak nkyang, ndya nyin na na byin a̱ yet a̱ka̱tuk. Kyang a shyi mpfwa a̱yin na ni, nkpa a̱mi wwut ka̱nu nu ka. 35A̱tsatsak a̱yin a̱ wwut da̱ a̱tsatsak nkyang, rot a̱tsatsak a̱mi na̱ tung a̱ saai. A̱ka̱tuk a̱yin a̱ wwut da̱ a̱ka̱tuk nkyang, rot a̱ka̱tuk nkyang ami na̱ tung a̱ saai.
36“Ryok n ya tyyei: ka̱tuk shirya ka se koyan a̱ twang sa̱rei ba̱ryat sang kpungtun ba a̱ ka̱n wwut ka̱nu nu ni. 37Se yi bvwo: kyang a yi ryat i nkpa ba ni brak a̱ ya yya shirya ji, ko ba si ya shya bu hywak, ko ba si ya tun a̱ wwon.”
Ba cat Yesu a̱ yya kyang ka̱hat
(Markut 8:11-12; Luka 11:29-32)
38Ba̱malam Truwang ba̱yaan bu ba̱nyet Farisa a̱ ya wup a̱ hywa, “Malam, zi cat a za tyyei a̱lama.”
39Yesu a̱ hywa, “Ba̱ka̱tuk ba̱nyet zamani bani a̱ pfong ka̱wun Ka̱za ba. Yi cat n ya yya a̱lama a? Kaai. A̱lama nu yi ni ryi ni nu a̱ ni yet a̱nying Yunana nu a̱ yin yet a̱ntyok tyyei ba̱ryat Ka̱za nu ni. 40Da̱ni di na̱ yin tyak nom tat bu ka̱tuk ka̱tat i ka̱hwa a̱gba̱dang nhwon ni, a̱mi meyang nzuk Ka̱won A̱neywu n ma̱ nin yya nom tat bu ka̱tuk ka̱tat ka̱yat ka̱byen. 41Ka̱tuk nom shirya ka ba̱nyet Ninawi a̱ ni tyyi zamani nani hywak, rot mba ba yin wwon a̱ka̱tukyya mba nu ka̱ram ka ba yin hok wa'azi Yunana ji ni, naanini a̱yanyet a̱nunini kyi a̱ ra̱u Yunana. 42Ka̱tuk nom shirya ka a̱gwam a̱ra̱mbyring u a̱ yin nyyai ka̱tak ni a̱ ni sseng a̱ tyyi zamani nani hywak, rot a̱ yin cong a̱ tra ka̱sa ka a bu hok bvwo Solomon na; to, naanini a̱yanyet a̱nunini kyi a̱ ra̱u Solomon!”
A̱ka̱tuk tswa nu a̱ brek ni
(Luka 11:24-26)
43“Ka̱ram ka a̱ka̱tuk tswa na̱n wruk i rwam a̱yin ni, a̱ ni cong kat ka̱yit cat ka̱rek pfwi; ki a̱ si shya ba 44a̱ hywa, ‘N ni brek nat ka̱ryi ka n nin wruk ni.’ To, ki a̱ brek a̱ bu shya ka̱ryi ka ka swat kwot, kozan kyang ba jyi a̱ wwon. 45A̱ si nat a̱ si yei ba̱ka̱tuk ba̱yaan ba̱ mba a̱tiyring ba a̱ ba̱ mba a̱tiyring ba a̱ yet a̱ka̱tuk ku ra̱u ni, ba nyyai a̱ bo bu nwa a̱ swrang. A̱yin a̱ywu a̱ngbom nu nu a̱ ni ryi bibyyi a̱ ra̱u ka̱tsitsrang ka. A̱mi ku nin dyi bu ba̱ka̱tuk ba̱nyet zamani ba ni.”
A̱naa Yesu bu ba̱wumbeyang nu a̱ ba da̱ nu
(Markut 3:31-35; Luka 8:19-21)
46Yesu na̱ ri shyi i ryat bu ba̱nyet ba, ba̱wumbeyang nu ba ba̱ a̱naa nu nu a̱ nyyai a̱ ba. Ba bu sseng a̱ta̱sa a̱ tyyei di ba cat ryat bu Yesu. [ 47A̱yanyet a̱ nat a̱ si hywa di Yesu, “Dii ba̱wumbeyang nwan a̱ yemi ba̱ a̱naa nwan a̱ na̱ pfong a̱ta̱sa, ba cat ryat ba̱ nwan.”]
48Yesu a̱ hywa, “A̱nyan a̱ yet a̱naa nzuk u? Ki ba̱nzan a̱ yet ba̱wumbeyang nzuk ba?” 49A̱ ta̱twang bvak a di na̱won pfong nu na, a̱ hywa, “Dii, ba̱nyet bani a̱mi a̱ yet a̱naa nzuk u bu ba̱wumbeyang nzuk ba. 50A̱wumba nzuk ba̱ a̱naa nzuk ba̱ a̱nap nzuk mba a̱ yet ba̱nyet ba a̱ yya kyang a myim A̱tyyi nzuk u a̱ shyi Tazwa ni.”
Dewis Presennol:
Matta 12: kaj
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2011, Wycliffe Bible Translators, Inc. All rights reserved.