मति 6
6
धर्म-कर्मको बारेता सिक्स्या
(लुक 11:2-4)
1चङख जेङतेङ हिसु! नेलाइ द्याङगेलाइहेङ तिङपालिको भाअ्सिङ ताइको रेम्का काम मापासु, माकुनुते नेलाइको स्वर्गिय परमेस्वर आबासो हिदोइ बुङ इनाम मानिङस्वाना।
2ओदोङ भाअ्सिङ जेलाउ नेलाइ हाइ दोङ दान पिलाउ ढोल माबेसु, इसिकाते कपटिगेलाइ द्याङगेलाइसो बाखिन निङलि यहुदिगेलाइको चाउघारा साअ्ता कालाउ दामाता पाखे। का नेलाइहेङ सत्ये दोअ्खा, कि इम्बालाइ ताइको इनाम निङलि दोका हि, जेदोङ चाहि द्याङगेलाइको बाखिनसो हि। 3कालाउ नेलाइ हासुहेङ बुङ दान पिलाउ आरु द्याङगेलाइ थाहा मानिनाको। 4नाङको पिका दान मातिङकाता ह्याको, कालाउ नाङको स्वर्गिय आबा जाइ मातिङकाता बुङ तिङलि दोअ्खे, कालाउ नासेहेङ इनाम प्यावा।
प्रार्थानाको बारे सिक्स्या
5जेलाउ नेलाइ प्रार्थाना पालाउ कपटिगेलाइ पाका भाइपा प्रार्थाना मापासु, हाइपालिपानु इम्बालाइते द्याङगेलाइ तिनाको कालाउ वाको बाखिन पाको दोअ्तेङ, यहुदिगेलाइको चाउघारा साअ्गेलाइता कालाउ दामाको आलि-आलिता जाअ्तेङ प्रार्थाना पालि मन्दा ताखे। का नेलाइहेङ सत्ये दोअ्खा, कि इम्बालाइ ताइको इनाम निङलि दोका हि जेदोङ चाहि द्याङगेलाइको बाखिनसो हि। 6कालाउ नाअ् चाहि जेलाउ प्रार्थाना पाना, ताइको कोठा लिता दुल्तेङ फिनु गि कालाउ ताइको आबा परमेस्वर दोफा प्रार्थाना पाअ्, जाइ चाहि मातिङन्हाका हि, नाङको आबा मातिङका थामेता पाका काम तिङलि दोहोइ आबा नासेहेङ इनाम प्यावा। 7जेलाउ नेलाइ प्रार्थाना पालाउ गैर-यहुदि भाइपा ओदोङ काथा घुरि-घुरि दोअ्तेङ प्रार्थाना मापासु। हाइपालिपानु इम्बालाइते ओदोङ काथा घुरि-घुरि प्रार्थाना पातेङ उत्तारा निनाङबे दोअ्तेङ बिचार पाखे। 8ओदोङ भाअ्सिङ ओबालाइ भाइपा नेलाइ माजेङसु, हाइपालिपानु नेलाइ वाको दोफा ह्रेकाको लाम्फाङ नेलाइहेङ हाइ-हाइ गोइका हि, दोअ्तेङ गोताङ नेलाइको स्वर्गिय परमेस्वर आबा गिखे। 9नेलाइ चाहि एसा दोअ्तेङ प्रार्थाना पासु:
हे स्वर्गता हिका, केलाइको आबा परमेस्वर, नाङको मिङ जेलाउलाउ बुङ पबित्तरो जेनाको।
10नाङको सासन ल्वाको स्वर्गता हिसिका हि, इन्सिकाङ नाङको इच्छा इदोङ सुमिङता पुरा जेनाको।
11नानि केलाइको दिनाङको चाका-आम्का पि।
12केलाइको पापगेलाइ स्यामा पापि, जेसाङ केलाइ बुङ केलाइको बिरोधता पाप पाकालाइहेङ स्यामा पिका हिनाहि।
13केलाइहेङ बार्का जाचिकाता माताअ्पि। कालाउ केलाइहेङ साइतानसो जोगाइ। हाइपालिपानु सासन, पराक्रम कालाउ महिमा जेलाउलाउको भाअ्सिङ नाङको दोङ। आमेन।
14हाइपालिपानु नाङको बिरोधता पाप पाकाहेङ स्यामा पापिनु स्वर्गता हिका नाङको आबा परमेस्वर बुङ नाङको पाप स्यामा पाप्यावा। 15द्याङगेलाइको पाप नेलाइ स्यामा मापापिनु नेलाइको आबा परमेस्वर बुङ नेलाइको पाप स्यामा मापाप्यावा।
बारिका को बारेता सिक्स्या
16जेलाउ नेलाइ बारि सुखेना, कपटिगेलाइ भाइपा मुइका ह्राइ माबानाइसु। हाइपालिपानु कपतिगेलाइते बारिका हिनाहि दोअ्तेङ आरु द्याङगेलाइहेङ तिङपालि मुइका ह्राइ बानाइतेङ हिखे। का नासेहेङ जातिङ भारि दोअ्खा, कि इम्बालाइ ताइको इनाम निङलि दोका हि, जेदोङ चाहि द्याङगेलाइको बाखिनसो हि। 17जेलाउ नेलाइ बारितेङ हिलाउ ताइको पुरिङता चुइति लागाइसु, कालाउ मिधुतेङ हिसु। 18एन्सा पालाउ द्याङगेलाइ माको, कालाउ मातिङन्हाका थामेता हिका आबा खिनिङ नेलाइको बारितेङ हिका तिनावा, कालाउ नेलाइहेङ नाङको स्वर्गिय आबा मातिङका थामेता पाका काम तिङलि दोका नासेहेङ इनाम प्यावा।
स्वर्गता जोम्पालि गोइका धन-सम्पति
(लुक 12:33-34; 16:13)
19प्रिथिबिता ताइको भाअ्सिङ धन सम्पति माजोम्पासु, जेता पेसा कालाउ पाचितेङ नासाखे, जेता खुकालाइ साअ् ह्रातेङ खुपुखे। 20भरु ताइको भाअ्सिङ रेम्का काम पातेङ स्वर्गता इनाम निङसु। जेता ना ते पेसा पेकावा ना ते पाचियावा कालाउ ना ते खुकालाइ दोङ खुवावा। 21हाइपालिपानु जेता नाङको धन हिखे, इन्ता नाङको मन बुङ ह्यावा।
22मिसियाँ जिउको भाअ्सिङ गेसा भाइका हि। ओदोङ भाअ्सिङ नाङको मिसियाँ रेम्का हिनुते, गोताङ नाङको जिउ थाअ्साइका जेनावा। 23जेसापा नाङको मिसियाँ बिगिरका हि पानु, गोताङ जिउ दोङ कितिकितितावा। जेसापा नाअ् गलत सोचिखेना कि नाङको हृदयता थाअ्साइका जेङका हि, कालाउ बास्ताबता चाहि नाङको हृदय कितिकितिका दोङ हि। इन्सिका जेङनु नाङको हृदयता हेन्जा कितिकितिका हि।
24हासु बुङ एनोङ दोङ सोमोइता न्हेमि गिह्रिको सेवा पालि मादावा। हाइपालिपानु वा दोङ एमिहेङ प्रेम पावा कालाउ भेनेङहेङ खाङलि माकितावा। कि त वा एमिको दोअ्का कितावा कालाउ भेनेङहेङको दोअ्का चाहि हाइ दोङ वास्ता मापावा। ओदोङ भाअ्सिङ, नेलाइ बुङ परमेस्वर कालाउ धन न्हेमिको सेवा एनोङ दोङ सोमोइता पालि मादोस्वाना।
चिन्ता मापालि
(लुक 12:22-31)
25ओदोङ भाअ्सिङ का नेलाइहेङ दोअ्खा, ताइमि बान्चिलिको भाअ्सिङ हाइ चालि, हाइ आम्लि, हाइ होङलि दोअ्तेङ बिसोइता पिर मापासु। निसित रुपता जिबन चाका-आम्का खान्तेङ हेन्जाङ मुल्यवान हि। 26आकासता उराइका जिहाँ-जुइलेङगेलाइहेङ खाङसु, ना ते इम्बालाइ चालाइ दोङ बिअ्खे, ना ते सिसा दोङ चेखे ना ते भाकारता जोम्पाखे। कालाउ बुङ स्वर्गता हिका नेलाइको आबा परमेस्वर दोङ ओबालाइहेङ चापाखे-आम्पाखे। कालाउ नेलाइ जिहाँ-जुइलेङगेलाइ खान्तेङ हेन्जा दामको हिसुन्हा। 27नेलाइ मध्येसो हासु बुङ चिन्ता पातेङ ताइको आयु आतुइसा बुङ थोअ्पिलि मादोस्वाना, कि वा हेलाउ थेकापा बान्चिलि द्वावा।
28कालाउ नेलाइ हाइ पालि लोखोन धाबाको भाअ्सिङ चिन्ता पासुखेना? खाङसु, इङको मिलिङता हिका लिलि ल्हेहेङ, इङको हेसा बाराखे। वाते नाअ् मेहेनत पाखे, ना ते वा धाबा दोङ थिर्खे। 29कालाउ बुङ का नेलाइहेङ दोअ्खा, राजा सोलोमोन वाको वथे हेन्जा धन-सम्पति हिलाउ बुङ इङको लिलि ल्हेगेलाइ भाइपा धाबा लोखोन मालागाइहि। 30ओदोङ भाअ्सिङ परमेस्वर दोङ मिलिङको घासि जेदोङ नानि हि, जुम्नि मेता थाइगिल्न्हावा पानु इसिका घासिहेङते परमेस्वर साजाइतेङ ताअ्खे, झन परमेस्वर नेलाइहेङ निसित रुपता रेम्फा सामाराइयावा। हाइ पालि नेलाइको खाङधुरि कमि हि? 31ओदोङ भाअ्सिङ नेलाइ हाइ चालि, हाइ आम्लि, हाइ होङलि दोअ्तेङ पिर मापासु। 32सुमिङको झाराङ द्याङगेलाइ इदोइ आमेनेगेलाइको लेसारा पिताइखे, कालाउ नेलाइको स्वर्गको आबा परमेस्वर गिखे, कि नेलाइहेङ इदोइ गोताङ गोइखे। 33ओदोङ भाअ्सिङ झाराङ खान्तेङ लाम्फा परमेस्वरको सासन भोसु, कालाउ एनोङ धार्मिक जिबनता जियाइसु कालाउ इङको गोताङ आमेनेगेलाइ नेलाइहेङ थोपि प्यावा। 34कालाउ जुम्निको भाअ्सिङ नेलाइ फिकिरि मापासु, हाइपालिपानु जुम्निको सामास्या जुम्नि दोङ सुल्झिखे। नानिको दुख नानि दोङ थेमाङ।
Dewis Presennol:
मति 6: DHINT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Dhimal New Testament, by The Love Fellowship is licensed under Creative Commons Attribution-ShareAlike 4.0 License.