LUKA 23
23
Yesu kuwa huúw dír geeraá Pilato
(Mat 27:1-2, 11-14; Marko 15:1-5; Yoh 18:28-38)
1Boo/aay sleémeero iri sihhiít, Yesu kuri huúw ay dír Pilato. 2Kuri sakwasleemuút ta kaahi, «Heewí una araán iwa xooroorén sageqwaaremisi, asma i múk ila/án oo koódír hanmiís dír waawutmoó múk Roma, slám i kaahi, ‹Aníng a Kristo, waawutmo.› »
3Aluuwo Pilato guri yaahaás, «Kuúng an waawutmoó múk Yahudíro?»
Yesu iri oó', «A adoosíng kuúng ta kat.»
4Aluuwo Pilato kaahamuusér uren ar Mungú nee boo/aay giri báy, «Aníng gár heewí ngus sakwasleemuut a ara'araaká.»
5Inooín tari ló'wa buúhh axweesanto, ta kaahi, «Inós i tlaahhír qamín dír muko ar intsaahhatimisuuwós, iimír Galilaya ay Yudea sleémeero tam ay amoorí.»
Yesu kuwa huúw geeraá Herode
6Pilato adoodá' ngiwa axaás iri oó', «Heewí a heé yaamaá Galilayáro?» 7Nee ngiwa tsaáhh adór amór i dahhi tar amór yaamaá waawuti'iimár Herode, guri waarahhaás amór Herode. Asma Herode sleeme deeloodae i baraá Yerusalemúr i dirii'. 8Qoomár Herode Yesu nguwa ár, iri ló'wa qwalaá/, asma guna artá wa slaá' iimír deelór yaariire, asma kángw yaariír gwa axamaamiís daanduú Yesuwo. Nee tlehhmuú waa/oo/amo oo Yesu i tleehhi guna haraxuú'. 9Herode yaahamisuú yaariír guri yaahamiís, ala Yesu gár aa oó' i káhh. 10Kaahamuusér uren ar Mungú nee intsaahhatuusér hara'ayár Mose tari sihhiít, kuri sakwasleemuút ar /ayma'aá xaraaslá'. 11Herode nee askaárirós Yesu kuri waaqaqaá' kuri niqimís. Kuri inqwaarír hhoohhoó' i tsiitiís, kuri ki/ís amór Pilato. 12Nee iimír baldá' Herode nee Pilato tari mulqe, asma inooín geeraawo a múk ta wakawaak.
Kwasleemár Yesu kuwa gaasi
(Mat 27:15-26; Marko 15:6-15; Yoh 18:39—19:16)
13Pilato kaahamuusér uren ar Mungú nee geeraharuuseero nee muko giri burumbuúr, 14giri báy, «Heewí nguna dir'eéní hubé' as iwa múk sageqwaaremisi. Aníng una yaahamiís dír geeraahúng wa ale, ala án dakuúsár ni ara'ar baraá muruuwí kuwa sakwasleemuta' i káhh. 15Tam Herode sleeme dakuúsár aa ár i káhh, asma ngwa ki/ís amor'eéní ale. Looeemaawo gár gwa'arár wa hariim ar aa tleéhh i káhh. 16Gawaá adoorihe án u muúx, ngway gweér.»
[ 17Pilato adoorí gana oó', asma inós gár kuwa hariím deelór ur ar Pasaákuwo, a heé wák gun gweer oo taa tseék.]
18Sleémeero tari tseeamín tari káh, «Heewí hingeeseek, nee Baraba na gweerang.» 19Baraba a heé serikaáli gaa sii', nee tam tlaahhi gari qaás baraá gixsár wa aleeró, nee muu guri tsuú/. Gawaá adoorihe inós kuri tseék.
20Pilato iri malé ilawaáts dír múk i alé, asma iwa Yésú gweerár wa slai. 21Ala muu iri tsimahhuús tari káh, «Kikiieek! Kikiieek!»
22Pilato giri i axweés malé alé sagaáwa tame, iri oó', «Asma milá? Heewí tlakweemaá aa tleéhh a milá? Aníng gár gwa'arár wa hariim aga ariiká gawaá heewihe. Gawaá adoorihe aníng muxtaaro bura hhe'eés, u gweér.»
23Ala tana tseeamín ar afór ló'wa ur ta kaahi, «Kikiieek!» Afor'ín tidá' iri baaliín. 24Pilato Yesu guri sakwasleemuút ar adoodá' inooín ta slai. 25Kudá' ta slai guri dir'íní gweér, kudá' taa tseék as tlaahhi nee tsu/uta. Ala Yesu guri dir'íní haniís as adoodá' kur slai kawa tleehhi.
Yesu kuwa kikií' gawaá msalaába
(Mat 27:32-44; Marko 15:21-32; Yoh 19:17-27)
26Yesu kurir tláy, heeko ta bay Simon nee inooín tiri doogiyé'. Inós a heé yaamaá Kirene. Inós i aykú daahh, i baraá gixsár káy. Kuri óh, kuri msalaábár i tsa/aás as ngiwa gagaari alaá Yésú wa ale.
27Boo/oó úr oo muu guri aluú wa eehár. Baraá tla/angw'ine /ameenarka i deer ar de/eewer'ín pupuxuumiis nee inós gu al/aa/amiim. 28Yesu /ameenadá' gari i warqáy gari báy, «Aá /ameenár Yerusalému, aníng mi al/aa/amiimara'. Ala kuungá' kiloohúng ti al/aa/amiinde', nee na/iihúng. 29Asma deelo i hardát ar tawa ooi, ‹Múk amohhoó' a /ameenadár kaamper, tidá' aa laqwaliká, nee ar aa du'umisiká.› 30Nee qoomaadae muu tlom'i gi bay, ‹Atén ti i hue',› nee dindirma' kay bay, ‹Atén ti tuntuke'.› 31Asma bar muruuwí kuna tleéhh dír xa'anoó naá/ i alé, xáy, dír xa'anoó kaahaare gár ta may?»
32Yesu nee múk hatlá' tsár oo tlakuuse kiri alhuúw, as kiwa kiki'in. 33Nee tawa hardáh dirka ta babay «Fartá saga», Yesu nee mukduú tlakuuse kiri alkiki'ín, oo wák dákw doó /iyáy oo Yesu nee kuqá' dákw doó basáy. 34Yesu iri oó', «Baabá, inooín gurtlaweek, asma ar i tlehhiitiya' ngi xuiaaká.»
Tlabaawós kiri kilooín qasmiís ar loohír tsawdo. 35Nee muu i didá' wa sihhimiit as tidá' tleehharuumiit ngiwa ga/ay. Mukdá' urén Yesu guri niqimís ta kaahi, «Muu guna ba/amiimís, inós ti kilós ba/amisi, inós bar Krístó Munguhe, kudá' taa tsawaár nee Mungú.»
36Askaári sleeme guna niqimís, guri harasáp, guri ma'aá qarqaár i hanís, awa taa tsoó/ gawaá mamaá sabiíbuú wa ale. 37Kuri babáy, «Kuúng barnaxes a waawutmoó múk Yahudiro, ti ba/amis kilók alé.»
38Nee gawaá msalaábarose /aymi'iiká' kina gawaadií gooín, «Heewí a waawutmoó múk Yahudi.»
39Nee oo wák baraá tlakuuseedae Yesu gway /ooslín, iri káh, «Kuúng a Kristówoóke? Ti kilók ba/amis, nee atene!»
40Ala heedaáduú tsár nee inós taa alkikií' guri iigahhaát iri oó', «Kuúng tam Mungú u ilaiwawa/akáhe? Slám kuúnguú kilá' a baraá sakwasleemadár kilá' i dirí'. 41Asma sakwasleemarí atene a hariima. Asma tí taa slawaán a tidá' atén wa hariim asma tlehhemi'iirén. Ala kwí gár tlaakw aa tleéhh i káhh.» 42Tí ooaro ngiwa hhe'eés, iri oó', «Yésu, án inslawáng qoomár bara dát baraá waawuti'iimarók.»
43Yesu iri oó', «Án a kah, laarír kilá' án nee kuúng a al dinkwa didár amohhooaro.»
Gwa'arár Yesu
(Mat 27:45-56; Marko 15:33-41; Yoh 19:28-30)
44Qoomár looár lahhoó' iwa xeér, yaamu sleémeero niri giwiyé' ay looár gwaleél. 45Tsee/amá gwa/aateema giri máy. Inqwaarír baraá Doó Mungú, ar do' gwa qasis, iri tla/a feehhít. 46Yesu iri tseé' ar afór ur, iri oó', «Baabá, qeeruueé' ngu dabaawók i qaás.» /Aymi'iiká' ooaro ngiwa hhe'eés, iri tsatiít.
47Nee geeraharusmoó askaári adoodá' ngiwa ár, Mungú guri xirfayeemiís iri oó', «Ar ló', heewí i dakuúsár konká.»
48Múk yaariír aa didí burumburiít as tidá' tleehharuumiit kawa ga/ay. Nee tidá' aa tleehharut kawa ár, tari waátl, ta hara da/ewer'ín pupuxuumiis as gurhaami. 49/Ameenadá' nee inós ti alkoomá' iimír Galilayár wa ale, nee kudá' sleémeero nee inós ti xuá', ta sihhimiit amorqá' saáw wa ale, muruuwí sleémeero kuri ga/áy.
Foolár Yesu
(Mat 27:57-61; Marko 15:42-47; Yoh 19:38-42)
50Nee heeko wák i deer, umuuwós a Yosefu. Inós a heé hota ganaá'. Inós a heé wák oo doó kwasleema, 51ala axweesanay'ín kudá' taa tsaát nee tlehhemuuín gwaa ya/aniká. Inós a heé yaamaá Arimataya, gixsár wák ar múk Yahudi. Nee inós waawuti'iimár Mungú gan daamaarán. 52Heewí ina daqáy dír Pilato as slaqwtá Yesu ngiwa slay. 53Slaqwtadá' gari aweeriís, gari untsuús ar inqwaarír ta kitánír tleéhh, gari qaás baraá baa'ár taa baraá tlaa/ár i foól, ar taa baloó tuuaár i qaasiiká. 54Baalaadá' a deelór tiwa amohhe'eemisiya', asma looaytleérós a deelór Sabaáto.
55/Ameenadá' nee Yesu ti al koomá' iimír Galilayár wa aleeró, tari eeharín, /aanta kari ár, nee adór slaqwtá Yesu kara qaás baraá /aantár i alé. 56Tari waátl, mooyaangw kuri amohhe'eés nee di/i.
Nee bál deelór Sabaátoro tari hungu/uús, ar adoodá' kara hara'ayín.
Dewis Presennol:
LUKA 23: IRQW
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible in Iraqw © Bible Society of Tanzania, 2004.