Micha 1:1-7

Dyma’r neges roddodd yr ARGLWYDD i Micha o Moresheth. Roedd yn proffwydo pan oedd Jotham, Ahas, a Heseceia yn frenhinoedd ar Jwda. Dyma ddangosodd Duw iddo am Samaria a Jerwsalem. Gwrandwch, chi bobl i gyd! Cymrwch sylw, bawb sy’n byw drwy’r byd! Mae’r ARGLWYDD, y Meistr, yn dyst yn eich erbyn; mae’n eich cyhuddo chi o’i deml sanctaidd. Edrychwch! Mae’r ARGLWYDD yn dod! Mae’n dod i lawr ac yn sathru’r mynyddoedd! Bydd y mynyddoedd yn dryllio dan ei draed, a’r dyffrynnoedd yn hollti. Bydd y creigiau’n toddi fel cwyr mewn tân, ac yn llifo fel dŵr ar y llethrau. Pam? Am fod Jacob wedi gwrthryfela, a phobl Israel wedi pechu. Sut mae Jacob wedi gwrthryfela? Samaria ydy’r drwg! Ble mae allorau paganaidd Jwda? Yn Jerwsalem! “Dw i’n mynd i droi Samaria yn bentwr o gerrig mewn cae agored – bydd yn lle i blannu gwinllannoedd! Dw i’n mynd i hyrddio ei waliau i’r dyffryn a gadael dim ond sylfeini’n y golwg. Bydd ei delwau’n cael eu dryllio, ei thâl am buteinio yn llosgi’n y tân, a’r eilunod metel yn bentwr o sgrap! Casglodd nhw gyda’i thâl am buteinio, a byddan nhw’n troi’n dâl i buteiniaid eto.”

Cynlluniau Darllen am ddim a Defosiynau yn ymwneud â Micha 1:1-7