Hebreaid 5
5
1Mae pob archoffeiriad yn cael ei ddewis i wasanaethu Duw ar ran pobl eraill. Mae wedi’i benodi i gyflwyno rhoddion gan bobl i Dduw, ac i aberthu dros eu pechodau nhw. 2Mae’n gallu bod yn sensitif wrth ddelio gyda phobl sydd ddim yn sylweddoli eu bod nhw wedi pechu ac wedi cael eu camarwain. Dyn ydy yntau hefyd, felly mae’n ymwybodol o’i wendidau ei hun. 3Dyna pam mae’n rhaid iddo gyflwyno aberthau dros ei bechodau ei hun yn ogystal â phechodau’r bobl.#Lefiticus 9:7 4Does neb yn gallu dewis bod yn Archoffeiriad ohono’i hun; rhaid iddo fod wedi’i alw gan Dduw, yn union yr un fath ag Aaron.#Exodus 28:1
5Wnaeth y Meseia ei hun ddim ceisio’r anrhydedd o fod yn Archoffeiriad chwaith. Duw wnaeth ei ddewis e, a dweud wrtho,
“Ti ydy fy Mab i;
heddiw des i’n dad i ti.” #Salm 2:7
6Ac yn rhywle arall mae’n dweud,
“Rwyt ti’n offeiriad am byth,
yr un fath â Melchisedec.” #Salm 110:4
7Pan oedd yn byw ar y ddaear, buodd Iesu’n gweddïo gan alw’n daer ac wylo wrth bledio ar Dduw am gael ei achub rhag marw. A dyma Duw’n gwrando arno am ei fod wedi ymostwng yn llwyr iddo. 8Ond er ei fod yn Fab Duw, roedd rhaid iddo ddysgu bod yn ufudd drwy beth wnaeth e ddioddef. 9Ac ar ôl iddo wneud popeth roedd ei angen, dyma achubiaeth dragwyddol yn tarddu ohono i bawb sy’n ufudd iddo. 10Cafodd ei benodi gan Dduw yn archoffeiriad “yr un fath â Melchisedec.”
Rhybudd rhag syrthio i ffwrdd
11Mae cymaint y gellid ei ddweud am hyn, ond dych chi mor araf i ddysgu, ac felly mae’n anodd esbonio’r cwbl. 12Erbyn hyn dylech fod yn gallu dysgu pobl eraill, ond mae angen i rywun eich dysgu chi eto am y pethau mwya syml yn neges Duw. Dych chi fel babis bach sydd ond yn gallu cymryd llaeth, a heb ddechrau bwyta bwyd solet! 13Dydy’r un sy’n byw ar laeth ddim yn gwybod rhyw lawer am wneud beth sy’n iawn – mae fel plentyn bach. 14Ond mae’r rhai sydd wedi tyfu i fyny yn cael bwyd solet, ac wedi dod i arfer gwahaniaethu rhwng y drwg a’r da.
Dewis Presennol:
Hebreaid 5: bnet
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Cymdeithas y Beibl 2023