मत्ती 6
6
तोःबलमात पीन्थोब बी येसुचे लोप्जेत्पल
1ओसेम् येसुचे सुङ्ज्यी, “होसीयार् तउ, एङ्यीमाचे म्हीमाकी ङोन्री र्हङ्त धर्मी ङोन्बे लक् थस्य्हेङो। अय्हीन् पङ्सम् स्वर्गरी स्य्हुःबे पर्मेस्वर् अप ग्यम्से एङ्यीमाचे तइ बक्सीस्एनो यङ्स्ये अरे।
2 “होत्तज्यीम्, एङ्यीमाचे तोःबलमात पीन्बे बेलोरी कपटीमाचे पीन्ब र्हङ्ले ङोन्ज्यीम् थपीनो। तलेपङ्सम् थेङ्यीमाचे म्हीमाचे थेङ्यीमात तोप्खइ बी यहुदीमा र्हुब् तबे दीम्मातेङ् ग्यम्मारी पीन्ब स्य्हेङ्ब। देमेन्नो ङ एङ्यीमात पङ्ब, थेङ्यीमाचे यङ्थोस्येकी बक्सीस् यङ्ज्यीन्बल मुब। 3तर एचे पीन्बे बेलोरी एइ केत् याचे ता स्य्हेङ्टीब हुजु ल्होम् याचे अस्येःखइ। 4होत्तज्यीम् अछोर्नले पीनो ओसेम् अछोर्नले पीन्बल स्हीःजेत्पे पर्मेस्वर् अपचे एत बक्सीस् न्हङ्जेत्स्ये मुब।
प्रार्थना स्य्हेङ्बे बारेरी लोप्जेत्पल
(लुका ११:२-४)
5 “एङ्यीमाचे प्रार्थना स्य्हेङ्बे बेलोरी कपटीमाचे र्हङ्ले थस्य्हेङो। तलेपङ्सम् थेङ्यीमा म्हीमाचे म्रङ्खइ बी यहुदीमा र्हुब् तबे दीम्मातेङ् ग्यम्की चोःतेङ् गुःमारी रप्ज्यीम् प्रार्थना स्य्हेङ्बरी तङ्ब। देमेन्नो ङ एङ्यीमात पङ्ब, थेङ्यीमाचे यङ्थोस्येकी बक्सीस् यङ्ज्यीन्बल मुब। 6तर एचे प्रार्थना स्य्हेङ्बे बेलोरी र्हङ्की कोठन्हङ् वङ्ज्यीम् म्रप् दुङो ओसेम् अम्रङ्नले स्य्हुःबे पर्मेस्वर् अपत प्रार्थना स्य्हेङो। ओसेम् एचे र्होचे अम्रङ्नले स्य्हेङ्बे लक् स्हीःजेत्पे अपचे एत बक्सीस् न्हङ्स्ये मुब।”
7 “ओसेम् प्रार्थना स्य्हेङ्बतेङ् पर्मेस्वर्त अस्येःबे म्हीमाचे र्हङ्ले अतोःबे य्हक्को छीःमा तेत्ज्यीम् थस्य्हेङो। तलेपङ्सम् थेङ्यीमाचे र्हीङ्बे प्रार्थना स्य्हेङ्ज्यी पङ्सम् ख्लचे थ्येःब बी म्हेन्ब। 8होत्तज्यीम् एङ्यीमा थेङ्यीमा र्हङ्ब थतउ। तलेपङ्सम् एङ्यीमात ता-ता तोःब हुजु एङ्यीमाचे पर्मेस्वर् अपत र्हीत्प बीम ङोन्ग्यम्नो थेङ्चे खेम्जेत्प। 9एङ्यीमाचेम् चोले प्रार्थना स्य्हेङो-
‘स्वर्गरी स्य्हुःजेत्पे ङ्यीमाकी पर्मेस्वर् अप,
थेङ्की छेन् पबीत्र तखइ।
10 थेङ्की य्हुल् खखइ,
थेङ्की थुः स्वर्गरी खतेब मुब, होतेब चु जम्बुलीङ्री टोप् तखइ।
11 तीङ्यी ङ्यीमात दीनइलनो तोःबे चबे स्हेः न्हङ्जेतो।
12 ओसेम् ङ्यीमाचे स्य्हेङ्बे पाप्मात क्षमा स्य्हेङ्जेतो,
खले ङ्यीमाचेएनो ङ्यीमाइ बीरुद्दरी पाप् स्य्हेङ्बलमात क्षमा पीन्बल मुब।
13 ङ्यीमात परीक्षारी दोःन थलजेतो,
तर ङ्यीमात सैतान् ग्यम्से थर्नलजेतो।
[तलेपङ्सम् य्हुल्तेङ् सक्ती ओसेम् महीमा खेमपङ्लेनो थेङ्लनो य्हीन्ब, आमेन्।’]
14 “एङ्यीमाचे एङ्यीमाकी बीरुद्दरी पाप् स्य्हेङ्बलमात क्षमा पीन्ज्यी पङ्सम् स्वर्गरी स्य्हुःबे पर्मेस्वर् अपचेएनो एङ्यीमात क्षमा न्हङ्स्ये मुब। 15तर एङ्यीमाचे ल्हो-ल्हो म्हीमाकी पाप् क्षमा अस्य्हेङ्ज्यी पङ्सम् पर्मेस्वर् अपचेएनो एङ्यीमात क्षमा न्हङ्स्ये अरे।
ङ्यीम्बु टीबे बारेरी लोप्जेत्पल
16 “एङ्यीमा ङ्यीम्बु टीबे बेलोरी कपटीमाचे र्हङ्ले छेर्बे लीः थोःज्यीम् थटीउ। तलेपङ्सम् कपटीमाचे म्हीमात र्हङ् ङ्यीम्बु टीबल ङोन्बे लागीरी लीः म्हुन्दुङ् लज्यीम् टीब। देमेन्नो ङ एङ्यीमात पङ्ब, थेङ्यीमाचे यङ्थोबे बक्सीस् यङ्ज्यीन्बल मुब। 17तर ए ङ्यीम्बु टीबे बेलोरीम् र्हङ्की क्ररी छ्युकु फोरो, ओसेम् लीः ख्रुज्यीम् टीउ। 18ओसेम् ए ङ्यीम्बु टीबल म्हीमाचे म्रङ्स्ये अरे, तर अम्रङ्नले स्य्हुःबे पर्मेस्वर् अपचेकीनो म्रङ्जेत्स्ये मुब, ओसेम् एत बक्सीस् न्हङ्जेत्स्ये मुब।
स्वर्गरी सोःथोबे सम्पत्ती
(लुका १२:३३-३४; १६:१३)
19 “र्हङ्की लागीरी जम्बुलीङ्री सम्पत्ती र्हुब्ज्यीम् थेन्बे सेम् थलउ। चु जम्बुलीङ्री सोःबे सम्पत्तीमा बुलुङ्तेङ् चेःजे चब, ओसेम् य्होमा वङ्ज्यीम् य्होलब। 20तर र्हङ्की लागीरी स्वर्गरी सम्पत्तीमा र्हुब् लउ। हुजुरी बुलुङ्तेङ् चेःजे अच, ओसेम् य्होचेएनो वङ्ज्यीम् य्होअल। 21तलेपङ्सम् खन एइ सम्पत्ती तब, हुजुरी एइ सेम्एनो तब।
22 “एइ मीः ल्हीःकी बत्ती य्हीन्ब। एइ मीः छ्यर्ब मुसम् एइ जम्म ल्हीःरी य्हल् तस्ये मुब। 23तर एइ मीः अछ्यर्बल मुसम् एइ ल्हीः ल्हुङ्बनो म्हुन्दुङ् तस्ये मुब। ओसेम् एतेङ् मुबे य्हल् म्हुन्दुङ् तज्यी पङ्सम्, हुजु म्हुन्दुङ् झेन् गत्ते य्हक्को म्हुन्दुङ् तल!
24 “खल्चेएनो मालीक् ङ्य्हीकी स्य्हप्तो स्य्हेङ्ब अखम्। थेचे गीत खोस्ये मुब, ओसेम् गीबत अखोस्ये मुब। ओसेम् गीचे पङ्बे तम् ङ्येन्स्ये मुब, गीबचे पङ्बे तम्मी अङ्येन्स्ये मुब। होलेनो एङ्यीमाचेएनो पर्मेस्वर्तेङ् टङइ स्य्हप्तो स्य्हेङ्ब अखम्।
थछेरो
(लुका १२:२२-३१)
25 “होत्तज्यीम् ङ एङ्यीमात पङ्ब, र्हङ्की ल्हीःकी लागीरी ता चल, ता थुङ्ल ओसेम् ता येन्ल पङ्ज्यीम् थछेरो। तलेपङ्सम् चब थुङ्बतेङ् येन्बे येन् बीमम् म्हीइ जीवन् ङ्हच्छ्यङ् अय्हीनो स्यीम्? 26मुरी फ्यङ्बे ङ्यम्ङ्यमात च्याको। थेङ्यीमाचे ब्लु अब्लुत् ओसेम् अन्न दुत्ज्यीम् बर्मा जुःज्यीम्एनो अथेन्। होलेतलेनो एङ्यीमाकी स्वर्गरी मुबे अपचे थेङ्यीमात ख्वाजेत्प। एङ्यीमा हुजु ङ्यम्ङ्यमा बीमम् य्हक्को सेइल अय्हीनो स्यीम्? 27एङ्यीमान्हङ्री खल्चे पङ्लेनो छेर्ज्यीम् र्हङ्की छे चेक्पजाकी पङ्लेनो र्हीङनलब खम्ब स्यीम्?
28 “ओसेम् येन्बे येन्की लागीरी एङ्यीमा तले छेर्ब? सरी सर्बे लीली म्हेन्दोमात च्याको, थेङ्यीमा खले छर्ब। थेङ्यीमाचे तइ लक्एनो अस्य्हेङ् ओसेम् येनेनो अरा। 29तर ङ एङ्यीमात पङ्ब, सोलोमन् ग्यल्बो थेइ जम्म स्य्हेसमा यङ्ज्यीम् ज्यबे गोइल येन्लेनो म्हेन्दोमा न्हङ्री गी गदेएनो ज्यब अरेबल मुबल। 30तीङ्यी सर्ज्यीम् न्हम्स्य्होनो मेन्हङ् ख्लास्येकी म्रातेङ् म्हेन्दोत पर्मेस्वर्चे चोले छ्येपीन्जेत्प पङ्सम् झेन् एङ्यीमात य्हक्को थेङ्चे न्हङ्अजेत्ल स्यीम्? खइ एङ्यीमाकी बीस्वास्?
31 “होत्तज्यीम् ‘ता चल, ता थुङ्ल ओसेम् ता येन्ल?’ पङ्ज्यीम् थछेरो। 32पर्मेस्वर्त अस्येःबे म्हीमाचे चोतेबे स्हेःमा म्हइज्यीम् छेर्ब। ओसेम् एङ्यीमात तोःबे जम्म स्हेःमा स्वर्गरी मुबे एङ्यीमाकी पर्मेस्वर् अपचे खेम्जेत्प। 33तर ङोन्ग्यम् थेङ्की य्हुल्तेङ् धार्मीक्ता म्हयो, ओसेम् चु जम्म स्हेःमा एङ्यीमात न्हङ्जेत्स्ये मुब। 34होत्तज्यीम् न्हम्स्य्होइ लागीरी थछेरो। न्हम्स्य्होइ लागीरी न्हम्स्य्होइ दुखनो योःस्ये मुब। तीङ्यीइ लागीरी तीङ्यीइ दुखनो योःबल मुबल।”
Dewis Presennol:
मत्ती 6: WTDG
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2025 by Mother Tongue Translators Society, Nepal Bible Society
and Wycliffe Bible Translators, Inc.