Matie 8

Zezwii yɛ 'zlalɩbhänyɔ yɛmanɩ

(Maakö 1.40-45; Lwiikö 5.12-16)

1‑Mä ‑gägaa 'wlu, 'n Zezwii yiɛ ‑mä 'bhöö. Ɔ kwliɛ, 'n nɩkpa 'kɔkɔmlɛ yoo 'bɩwʋ bhlinɩ. 2'N 'zlalɩbhänyɔ ‑bhlʋ yoo yɔwʋ 'dio, 'n ɔ yiɛ ‑lɛ ɔ dlɩ 'mö ‑kokomïladigbï glu 'pä. Ɔ lɛ naa: «‑Alowli, n bhiamö, ‑n ‑kä 'wʋ ngluu, ‑n mlɩnɩ ‑n ‑kaa yɛmanɩ n 'kä 'wlɩlɩ plɛ.» 3Nɩkpɛ nʋä sa'aa, 'n Zezwii yiɛ sɔ 'mö plu 'n ɔ yoo kɛ zɩ, ɔ lɛ naa: «N ngulu 'wʋ, zaa yɛmanɩ.» Ɔ gbää sa'a cuu, 'n zlaa yiɛ nɩkpɛ yɔwʋ bhɩɛ 'n ɔ yiɛ 'wlɩlɩ plɛ. 4'N Zezwii yoo 'dɩ 'nyɛ nɩɩ: «‑Pʋnɩ sasɛ 'yukwli. Tɩa sɛ ‑n yɛmanɩɛ a 'tɩtɩ nɩkpɛ 'nyɛ. ‑Maa mö ‑n 'kä ‑nanyɩ Lagɔbʋbɔnyɔɔ 'ylimö tulanɩ, 'wë, bʋbɔnɩlii Moyizɩ gbä a‑a nɩɩ, 'zlalɩbhänyɔ ‑kä yɛmanɩ ɔ nɩ bʋbɔnɩ, nzɩɩ ɔ 'kä 'wlɩlɩ plɛ Lagɔ a 'yila 'klʋ a dɔ'wʋʋ, ‑n 'kɩ Lagɔ bʋbɔnɩ, yɩ 'kä nɩkpabhë 'ylimö tulanɩ nɩɩ, ‑n yɛ yɛmanɩ.»

Zezwii yɛ 'slʋjeyi a libhonʋnyɔ yɛmanɩ

(Lwiikö 7.1-10)

5Zezwii plɛɛ ‑mä Kapɛnaɔmö glɔ 'möö, 'n Ghlʋmɛɛwaa a 'slʋja a 'kifi ‑bhlʋ yoo yɔwʋ 'dio. 6Ɔ lɛ naa: «‑Atʋ, na libhonʋnyɔ ‑bhlʋ pö ‑mä ‑budu 'mö, ɔ 'wuë, ɔ yɛ 'kɔtɔ, ɔ ‑gbapö tenyii.» 7Zezwii lɛ naa: «‑Amö n 'kɔ yɛmanɩ.» 8‑Maa Ghlʋmɛɛwaa a 'slʋja a 'kifii lɛ naa: «‑Atʋ, n'n‑ä ‑na pälapälasɛ ‑wʋ. ‑Maa bhïla wɛlɩkïbhë ‑bhlʋ cuu, nzɩɩ 'na libhonʋnyɔɔ 'kä yɛmanɩ. 9Ɛ'ɛ ‑bhö nyɩasɛ, ‑maa na'bhë, dɛ n glɩɛ dɛ'ɛɛ, ‑mumuë 'kämanɩɩ, 'n n 'kämanɩ'ɛɛ na a ‑mumuë. Na ‑nʋa n 'kämanɩɛ, n ‑kä ‑mɔ 'dɩ 'nyɛ nɩɩ: Mö! ‑Sɩkaa mö ɔ möä. N ‑kä'ɛ ‑mɔmɔɔ 'dɩ 'nyɛ nɩɩ: Yi! ‑Sɩkaa yi ɔ yiɛ. 'N n ‑kä na libhonʋnyɔ ‑bhlʋ 'dɩ 'nyɛ nɩɩ: 'Zʋ sɛ'ɛ! ‑Sɩbhä ɔ zʋä.» 10Zezwii 'nʋä nɩkpɛ 'la a ngli a wɛlɩɩ, 'n ngli yoo tenyii mla. 'N ɔ yiɛ ‑wa ‑gänɔɔ 'yi gö, ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ, ‑ɔ 'tɛɛnɩɛ nɩkpɛ nɩ a saa Lagɔ dlɩɩ, tɛɛnɩ ‑mä Yizlaɛlɩ 'a ngëyii 'mö a ‑nʋa gla'mö, n 'nɔɔ ‑bhlɛ tɛkäsɛ ‑mä 'ylɩmö. 11Nza n gbää nɩɩ, ‑mä mä'a 'yuku mää ylʋʋ 'wlʋnɩɛ glu a pɩɔ 'yli, nɩkpa a ‑bɛ yi ‑mä 'bhöönɩ. Mä wʋ bhlinɩɛ a pɩɔ 'yli, nɩkpa a ‑bɛ yi'ɛ mä 'bhöönɩ. Wa 'wuë, 'pɩwʋ mää Lagɔ 'kämanɩɛ, Ablaamö mɔ, Yizaakö mɔ 'n Zakɔɔbö, wa ‑nyʋä 'sɔ wa yi ‑mä 'wʋ linɩ. 12‑Maa Yizlaɛlɩ a nʋa ‑wa sa‑a a‑a wabhlɩ ‑lɛ 'kɩ wa 'kä ‑mä 'bhle ghlɩɩ, ‑mä 'pɩwʋ, ‑mä guylukwëa 'mö, ‑mä wa 'kʋä 'pä mä'a ‑mä wa 'kää 'winɩ, wa 'kä 'klʋ 'slu.» 13Ɔ gbää sa'a 'wëë, 'n ɔ yia'aa Ghlʋmɛɛwaa 'a 'slʋja a 'kifii 'yi gö nɩɩ: «Mö 'ligbë 'mö ‑maa sɛ ‑n 'tɛɛnɩ Lagɔ dlɩ a za, 'saa ‑n 'yɩbhänɔɔ da'aa, ɔ ‑kamu 'nyɛ 'wë.» ‑Lɛ a 'tɛnyɩ 'la ‑bhlʋ ‑kpɔ 'mö 'n Ghlʋmɛɛwaa a 'slʋja 'a 'kifii a libhonʋnyɔɔ yiɛ yɛmanɩ.

Zezwii yɛ guzuwa a ‑bɛ yɛmanɩ

(Maakö 1.29-34; Lwiikö 4.38-41)

14Zezwii 'bhööä ‑lɛ, 'n ɔ yiɛ ‑mä Piɛlɩ a 'ligbë 'mö mö. Ɔ lɛ 'bhöö 'lɛ Piɛlɩ a 'wʋtɛnglɛ wëtlokwëë lɩbhɔɔ zaa ɔ pö dʋdʋ 'wʋ. 15'N Zezwii yiɛ 'ɔ kätɩkpaa kɛ zɩ. 'N wëtlokwëa yoo ku 'mö bhɩɛ 'n ɔ yiɛ 'wʋ ‑sɔ 'n ɔ yoo 'wʋ pi. 16‑Kidosɛ ghlɛɛ, nɩkpa a ‑bɛ ‑wa kää zuzukuzoku ‑gömöö, 'n wa yuëë Zezwii ‑lɛmö, 'n ɔ yuënyɩɛ 'ɔ ngli a wɛlɩɩ 'mö ‑gömö kpëtɩnɩ. Nɩkpa 'wuë gwi 'lɩbhää, 'n ɔ yuëë yɛmanɩmö. 17Lagɔ a 'möbhïlanɩnyɔ Ezayii 'a wɛlɩɩ ɔ bhïla a‑a nɩɩ:

Ɔ ‑kanyɩ ‑a'a yɔlɔylʋʋ ‑gömö ‑sɛ.

Ɔ ‑kanyɩ ‑a'a 'lɩbhägwii ‑gömö ‑sɛ. # 8.17 Ezayii 53.4.

Wɛlɩ 'la mɩɩ 'wlʋnɩɛ da'a 'yli.

Sɛ ‑a kää ‑a 'kä Zezwii ‑gänɩɩ

(Lwiikö 9.57-62)

18'Ylɩ ‑bhlʋ 'mö, ‑mä Galilee‑bhölɩɩ 'mö a 'nyubäda 'kädaa yɔwʋ, Zezwii ‑wʋ ‑mä. Nɩkpaa ‑wa soo yɔwʋʋ, wa'aa muënɩ. Ɔ 'yuëë 'ylɩmöö, 'n ɔ yiɛ 'ɔ ‑gänɩwaa 'dɩ 'nyɛ nɩɩ: «A‑a nɩ 'plɩnɩ ‑mä nyuu a kïkë ‑mä'la ‑gömö.» 19'N Moyizɩ 'a Gböö a 'cɩanyɔ ‑bhlʋ yoo yɔwʋ 'dio. Ɔ lɛ naa: «'Cɩanyɔɔ, dɛ ‑n ‑kä mö ‑kë, n ‑yimö ‑gänɩ.» 20Zezwii lɛ naa: «‑Gätlɩzlɛya mɩɩ kää 'mögʋʋvïli, 'zɩ mɩɩ kää 'lwɩlwɩ. ‑Maa Nɩkpɛ a 'Yu, dɛ a'bhë ɔ 'kä sɛ'ɛ 'ɔ 'wukpëlea sɛ 'pïlaa, ɔ'ɔɔ ‑lɛ ‑kä.» 21‑Mi'la 'plɩɛ 'wëë, ‑wa ‑gänɔɔ a gla'mö a ‑nɔ ‑bhlʋ, 'n ɔ yo'ɛɛ ɔbhlɩ 'dɩ 'nyɛɛ mö, ɔ lɛ naa: «‑Alowli, n yɩbhä nyɩasɛ n ‑kamö 'kwädlɩ ‑gänɩ, ‑maa 'nɩgbö 'tikïyie 'wʋ 'mö n ‑kä na dɩba ziza 'wëë, n 'kä yi.» 22Zezwii lɛ naa: «'Tatinɩ ‑gäzɩɩ 'yi, yɩ 'kä zizazizanɩ, ‑maa ‑nmö ‑naa, yi ‑n ‑kaa ‑gänɩ.»

Zezwii yɛ 'vuu 'kɔdʋ 'nigba

(Maakö 4.35-41; Lwiikö 8.22-25)

23Zezwii ‑nyɛ 'ɔ ‑gänɩwaa 'sɔ, 'n wa yia'aa gɔlʋ 'wʋ 'libhï 'n wa yiɛ mö. 24Wa ‑wʋ mö dɔ'wʋ cuu, 'n 'vuu 'kɔdʋ yiɛ yi, 'n nyuu a ‑gbɔkwälɩ bhlinɩɛ ‑mä gɔlʋʋ 'mö. ‑Maa Zezwii ngämö ɔbhlɩ. 25'N 'ɔ ‑gänɩwaa yoo yɔwʋ 'dio 'n wa yoo gäla. Wa lɛ naa: «‑Alowli, yiinyɩ 'wʋ, ‑maa ‑abhʋa 'kuaa!» 26Zezwii lɛ naa: «Sɛ yɩ ‑wʋ bhä 'mö 'n a ngänɩ bhä sa'a 'nɩ? 'A Lagɔ a dlɩtɛɛnɩtɛnɛɛ 'nɩɛ ‑zu.» 'N ɔ yia'aa 'wʋ ‑sɔ 'n ɔ yiɛ 'vuu ‑nyɛ nyuu 'sɔ 'wʋ 'kpanɩ, 'n saa 'wuë yiɛ vlɩɩ plɛ. 27Wa 'wuë 'n wa yiɛ wölɩya ngli 'pä, wa lɛ naa: «'Ɔ! 'Saa‑nɩkpɛ bhä sɛ ‑ma nɩ dɛ'ɛ, 'n 'vuu a'bhë ‑nyɛ 'nyu 'sɔ zo bhä 'klʋkpamö 'nɩ?»

Zezwii yɛ nɩkpa 'sɔ zuzukuzoku ‑gömö kpëti

(Maakö 5.1-20; Lwiikö 8.26-39)

28Wa möä, ‑mä nyuu a kïkë ‑mä'la ‑gömö, ‑mä Gadala‑bhölɩɩ 'mö, Zezwii ghlɛɛ ‑mä cuu, 'n nɩkpa 'sɔ yoo gbanɩɛ yi, wa 'bhöönɩ ‑mä lesikpï jijo'wʋ. Zuzukuzoku wa kää ‑gömö zaa, yɔwʋ wa kälɩɛ tenyii. ‑Sɩbhä a za, 'yioo wa ‑wʋä 'wʋʋ, ‑bɛ 'nɩ ghlɛnuu 'wʋ. 29'N wa yiɛ 'mö 'kpa, wa lɛ naa: «Lagɔ a 'Yu Zezwii sɛ ‑n ‑kanyɩ bhä 'wʋ gbänɩ? ‑N ‑kanyɩ 'klɩ 'yɩa a za ‑n yi bhä ‑a? ‑N ‑yi sɛ nɩɩ ‑a'a 'klɩyɩatɛnyɩɩ 'nɩɛ ‑bhlɛ ghlɛ.» 30Dɛɛ nɩkpa 'la möä Zezwii gbanɩɛ a 'yukudeyie, ‑lɛ a ‑gäga ‑bhlʋ 'wlu, kokotie a ‑zɩkpa 'käda ‑bhlʋ ‑wʋ a ‑lɛ. Yɩ ‑wʋ ‑mä 'wʋ li dɔ'wʋ. 31Zuzukuzokuu ‑yɩ ‑wʋä nɩkpa 'la ‑gömöö, 'n yɩ yiɛ Zezwii yɔwʋ bhibhe, yɩ lɛ naa: «‑Yayaya, ‑n ‑kanyɩ kpëtii, 'tatinɩnyɩ 'yi ‑a 'kä ‑mä kokotie 'la 'mä plɛ.» 32Ɔ lɛ naa: «A nɩ mö a 'kɩ 'mö plɛ.» 'N yɩ yiɛ nɩkpa 'sɔ ‑kpɔ ‑gömö 'bhöö, 'n yɩ yiɛ kokotiea 'mö plɛ. Yɩ plɩɛ 'mö cuu, kokotiea 'wuë, 'n yɩ yiɛ ‑mä ‑gägaa 'wlu 'bhöö, 'n yɩ yiɛ ‑mä 'nyu 'mö sɛ 'sulo. 'N nyuu yiɛ 'lɩbhä. 33Yɩ ‑gänɩwaa 'yɩɛ ‑sɩbhä 'ylɩmöö, 'n wa yiɛ futo 'n wa yiɛ ‑mä glɔ 'mö mö. Wa ghlɛɛ ‑mä, sɛ yɩ 'plɩɛ 'wʋ, 'n zuzukuzokuu yiɛ nɩkpa 'la 'sɔ ‑kpɔ ‑gömö 'bhöö a tɩtɩɩ, 'n wa yiɛ ‑sɩbhä ‑sɛ. 34Zaa, ‑mä ‑glɔ 'la 'mö a ‑nʋa 'wuë, wa 'nwiɛ, 'n wa yiɛ 'wʋ ‑sɔ, wa 'kä Zezwii 'ylɩmöä mö. Wa ghïloo ‑mä, 'n wa yoo yɔwʋ bhibhe, wa lɛ naa: «‑Yayaya, 'bhöö mä'ä ‑a'a bhlɩɩ 'mö.»

Dewis Presennol:

Matie 8: bet

Uwcholeuo

Rhanna

Copi

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda

Dysgu mwy am BdG2

Matie 8

Adnodau Beiblaidd Poblogaidd o
Matie 8

Gwranda ar Matie 8

Beibl:

Bété, Guiberoua

Fersiwn: BdG2 - bet

Matie 8

Matie 8

Adnodau Beiblaidd Poblogaidd o Matie 8

Gwranda ar Matie 8

Beibl:

Bété, Guiberoua

Fersiwn: BdG2 - bet

Matie 8

Adnodau Beiblaidd Poblogaidd o
Matie 8