Mata 18
18
Ndu ge waɗe ga̰a̰l ge muluk ge Dok ne zì yà
Mat 5.29-30; Mrk 9.33-50; Luk 9.46-50
1Sok mbe go gaw, nda ge ame hateya ma gwan ta ya ge Zeso ta zì, àa ele ne go: A huɗi ge waɗe ga̰a̰l ne ge muluk ge Dok zì yà de? 2Zeso tol van jiyale a̰me ya ɗu, ee ne mḛḛya ge maa tuwal zì, 3jan num go: Fareba mbi jan ḛ ne no, kaɗɗa go ḛ seŋe ta ya se, ḛ kaɗ dinna ge nda jabso go to, ḛ mbo waɗ ge muluk ge Dok ne zì to. 4Go mbe no, ndu ge diige ge mbo gwan na pagal ya se dinna ge ndu jiyale mbe no go, mbo kaɗ ndu ge waɗe ga̰a̰l ne ge muluk ge Dok ne zì yà. 5Ndu ge diige ge mbo ame van jiyale ya ɗu ge na diŋ, ge mbi pe, ago ame mbi sḛ ge mbi pagal. 6Nda jabso mbe ge ho fareba mbi ta ma no, ndu ge mbo ee a̰me ya ɗu deɗɗa ge sone zì, ne nde-nde ge àa vwal njal ga̰a̰l ge ne ka̰a̰l zì, àa ɗigli ne ge mam ga̰a̰l nuwam se yà.
Wa vḛḛneya ge ndu ge ee nda deɗɗa pagal
7Guwa̰, Zeso jan na nda ge ame hateya ma go: Woo ge ḛ ge no suwa pagal ma pe! Ago kaŋ chal ko ge ee ḛ mbo deɗ ge sone zì ma mbo kaɗ gḛḛ ge ḛ pe! A ngaɗ go kaŋ ge gene ko challa ya ma num kaa, ɗaŋɗe, woo ge ndu ge fare ge ee nda deɗɗa mbe ma mbo mbo ya ge ne ta. 8Kaɗɗa mo tok koo mo ko ee mo ne mbo deɗ ge sone zì, kṵṵ num gezi, mo dol num gezi yà kaal. A kwaɗa ge mo pe go mo seɗ ndwa ge fareba tok duul, ko duul, ge go mo kaɗ ge mo tok mage mo ko ma jwàg, àa mbo dol mo ge ol ge ɗiŋ ge din zì. 9Kaɗɗa mo ndwa ee mo mbo deɗ ge sone zì ne, zagle ne, mo dol ne gezi yà kaal. A kwaɗa ge mo pe go mo seɗ ndwa ge fareba ndwa lee ɗu, ge go mo kaɗ ge mo ndwa ma jwàg, àa mbo dol mo ge sok njoɗ yal zì. 10Ḛ koy ta kwaɗa ge sen ndu jiyale a̰me ɗu ge num mbe ge deŋe ta no mbi ta ma buwal zige. Mbi jan ḛ go, malayka ge koy num ma ge vin̰a ɗaɗag ge mbo ge mbi Ba ge no pḭḭ ma zì yà ndwa se yà. 11[Ago Ndu ge Dok teme ne ya mbo ya mon nda ge ba̰a̰ ma.]
Fare sḭḭ ge tame ge ba̰a̰ ne
Luk 15.4-7
12Mà kaɗɗa go, ndu ge tame ma kis (100), ɗu ge num buwal zige ban no, kee mà gyana de? Mà n̰a ge kis wa gezi ɗu pɔgwa wa gezi ɗu (99) ma ge sok haal digi, mbo ɓyare ge ɗu ge ba̰a̰ mbe to de? 13Fareba mbi jan ḛ ne no, kaɗɗa seɗ ne ya, kee laa saal gḛḛ ge ne pe waɗe ge kis wa gezi ɗu pɔgwa wa gezi ɗu ge gaa ma. 14Go mbe no ca, ḛ Ba ge no pḭḭ ma zì yà ɓyare go, nda jabso mbe ge deŋe ta na ta ma, a̰me ɗu ba̰a̰ to.
Mo mbaa mo na̰ van ge dee sone zì pe gyana de
15Kaɗɗa mo na̰ van kee sone ya ge mo ta, mbo ne ta mo sḛ hini ɗu, mo jan ne, ne sone ge kê, kaɗɗa kuwa na sone ya, mo gwan ge ne ja kee baan dagre ge mo. 16Kaɗɗa kuwa na sone ya to, guwa̰ ne ta ge na̰ van ɗu koo zi ge mo pe go. «Mo kee ano mbe ndwa go, àa nuusi fare ma peɗ ge nda zi koo nda taa ndwa se.»#Dwa 19.5. 17Gwan kuwa na sone ya ge num ndwa se to, jin̰a ɓase ge Krist ne ma fare mbe, gwan kuwa na sone mbe ya num ndwa se to iya ɗe, ndi ne ge mojo̰o̰ ndu ge no rusu Yahuɗ zì to mage ndu ge chal siyal go. 18Fareba mbi jan ḛ ne no, kaŋ ge ḛ mbo tele num ya ma peɗ ge suwa pagal, àa mbo kaɗ teleya ge Dok ta pḭḭ ma zì yà, kaŋ ge ḛ mbo hage num vin̰a ma ya peɗ ge suwa pagal, àa mbo kaɗ hageya ge Dok ta pḭḭ ma zì yà me. 19Iya ɔwale, mbi jan ḛ no, kaɗɗa ḛ buwal zì, nda zi vin ta ya kaɗe Dok ge fare a̰me pe ge suwa pagal, mbi Ba ge no pḭḭ ma zì yà, mbo hon num kaŋ mbe. 20Ago, kaɗɗa ḛ vin ta ya nda zi koo taa kee kaɗeya ge mbi dḭḭl, mbi ge ḛ buwal zì me.
Ndu ge tèmel ge kuri be pore nda
21Sok mbe go, Piyer gwan tene ya ge Zeso ta zì, ele ne go: Bagezok, mà kaɗɗa go mbi na̰ van kaɗ ka dwage sone keeya ge mbi ta no, mbi mbiya pore ne ndwa gyana ga de? Mbi mà pore ne ya ɗiŋ mbo ndwa ɓỳala no mbiya to de? 22Zeso gwan ge ne janna go: Mbi jan mo go ndwa ɓỳala bàŋ to, ɗaŋɗe, ndwa ɓỳala pe wol, ta ndwa ɓỳala, ge kon pagal. 23A go mbe no, sok ge Dok mbo ɗege ya kee muluk, ne fare keeya mbo kaɗ ge mojo̰o̰ gan ga̰a̰l a̰me ɗu ge ɓyare go, na ame digi na wul ma ge na nda ge tèmel ma tok go. 24Sok ee pe ame na wul ma go, àa gene ne ya, ne ndu ge tèmel a̰me ɗu, ge ne bware no gḛḛ ne pagal, ge ne sḛ mbyaɗ poɗ ne to. 25Ajo̰o̰ na kaa be a̰me ge poɗɗa ɗe, gan ga̰a̰l mbe hoɗ na wa go, àa yiya ne gezi ɓanna ge ne gwale, ne van ma, ge kaŋ ge ne diŋ-ge ma peɗ ndwa poɗ ne wul mbe. 26Sok mbe go, ndu ge tèmel mbe mbo ya guu na ko ne ndwa se, jan ne go: Gan ga̰a̰l, mà kaɗ ge mo da̰a̰re mbi dwam ge dogle ɗoo, mbi wa seɗ vin̰a ge poɗ mo kaŋ mbe ma ge ɓul mɔɗwag nde de. 27Sok ge gan ga̰a̰l kuwa ano mbe go, kuwa na ndu ge tèmel mbe a̰se, pore ne, ne wul mbe, n̰a ne mboya.
28Ɗaŋɗe, sok ge ndu ge tèmel mbe wuwa ya zum go, seɗ na kon ge tèmel a̰me ɗu ge na wul no fyalag ge ne pagal, wan ne, cemse ne ka̰a̰l ormol zì ndindiŋ, jan ne go: Poo mbi mbi wul. 29Ne kon ge tèmel mbe guu na ko ne ndwa se kaɗe ne go: Mà kaɗ ge mo da̰a̰re mbi dwam ge ɗogle ɗoo, mbi mà seɗ vin̰a ge poɗ mo nde de. 30Ɗaŋɗe, kuri, mbo dol na kon ge tèmel mbe daŋay zì, ɗiŋ ge go ne poo na na wul mbe mbḛḛ.
31Ɗaŋɗe, sok ge ne ka̰a̰m ge tèmel ma kuwa kaŋ ge ne kê mbe, num laa vḛḛne gḛḛ, àa mbo gan ga̰a̰l ta jan ne fare ge maa kon mbe kê num ma mɔɗwag. 32Sok mbe go, gan ga̰a̰l ee tèmel tol na ndu ge tèmel ge na wul no ne pagal gḛḛ mbe ya, jan ne go: Mo ndu ge laa pisil ne, mbi daa pore mo ge mo wul ma mɔɗwag, ge mo fiya tene mbi ta pe kade. 33Mbiya go mo sḛ waɗme, mo kuwa mo kon ge tèmel a̰se dinna ge mbi kuwa mo a̰se go to de? 34Gan ga̰a̰l laa mbo ya vḛḛneya, ge ne twam juliliya zì, hoɗ na wa go, àa doo ne daŋay zì za̰a̰ yal ɗiŋ ne poɗ kaŋ ge na pagal ma mɔɗwag mbḛḛ. 35Zeso sok aa na fare go, jan num go: Mbi Ba ge no pḭḭ ma zì yà mbo kee ndu ge diige mbe go, kaɗɗa ne pore na na̰ van ya ge na dul wa zì ya mɔɗwag to.
Dewis Presennol:
Mata 18: kiaGRB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017 Wycliffe Bible Translations, Inc. All rights reserved.