Mata 17
17
Diir eyaya ge Zeso ne
Mrk 9.2-13; Luk 9.28-36; 2Pi 1.16-18
1Guwa̰ ge dwam kale menengal go, Zeso wan Piyer, Jak mage na na̰ van Yohana, mbo ge num ge njal a̰me ge haal pagal digi yà, gezi yà hini caɗ ge nda ge ɓase ma. 2Ne diir mbo ya eya ge num ndwa zì. Ne ndwa ɗege ka seeya dinna ge gyala see go, ne ba̰a̰ ma seŋe saal taɗag dinna ge kɔn̰al go. 3Ne nda ge ame hateya ma ɗege tan ta ɗe, Moyiz mage Eli wa ya ka siɗigi fare ge ne ɓal. 4Sok mbe go, Piyer hee fare jan Zeso go: Bagezok-goo, a kwaɗa ge go nè kaɗ ge sok mbe no go. Kaɗɗa mo vin vin, mbi ge pool ɗùu gur ma taa, ɗu ge mo pe, ɗu ge Moyiz pe, ɗu ge Eli pe me. 5Ḛ za̰a̰ gale, a ge Zeso sok jan ta fare go, pḭḭ ge saal taɗag mbo ya laa num se. Ka̰a̰l a̰me ɗege faa fare mbe ma no ge pḭḭ mbe zì ya go: Ano, a mbi Van ne, mbi laa wa̰a̰ ne gḛḛ, mbi sḛ kee tii gḛḛ ge ne pe me. Ḛ ke tèmel ne fare janna ma pagal. 6Sok ge nda ge ame hateya ge taa ma za̰a̰ fare mbe go, voo wan num gḛḛ ge go, àa deɗ se ndwa kubiya ge suwa pagal. 7Ɗaŋɗe, Zeso gwan tene ya num ta, dabe num, jan num go: Ḛ chiya voo to! Ḛ ɗege digi. 8Sok ge àa hê maa ndwa digi ndil sok, Zeso gaa ya ne hini ɗu.
9Sok ge àa ka ndee ge njal pagal digi ya se, Zeso hoɗ num na wa go: Ḛ jin̰a ndu kaŋ ge ḛ kuwa ne mbe to, ɗiŋ ge go mbi, Van ge Ndu ne, mbi gale ta̰a̰ ne ɓiya ge nda ge swày ma buwal zì. 10Guwa̰, nda ge ame hateya ma ele ne fare mbe no go: Ge dape, nda ge hate eeya ge Moyiz ne ma wa ka janna go, Eli mbo mbo ya zḛḛ gale ne ɓiya de? 11Gwan ge num janna go: A fareba, Eli mbo mbo ya ne nuusi kaŋ ma peɗ ge maa byalam ma go. 12Ɗaŋɗe, mbi jan ḛ go: Eli mbo dee ja sok zoo, àa be kuwa go ne huɗi ne de to, àa kê ne yal ge maa laa ɓyareya pagal no tem. Go mbe no me, àa mbo kee mbi, Van ge Ndu ne sḛ yal mbe go waɗme. 13Guwa̰, nda ge ame hateya ma kuwa gezi hetel go, sok jan maa fare ge Eli ne go, Zeso zane ka jan maa fare ge Yohana ba ge kee nda baptem ne.
Zonna ge bogol ge no ge on̰om ge sone na zì ne
Mrk 9.14-32; Luk 9.37-45
14Sok ge Zeso mage na nda ge ame hateya ge taa ma mbo ya se ge ɓase ma ta, ndu a̰me ɗu mbo ya guu na ko ge ne ndwa se, jan ne go: 15Bagezok, kuwa mbi van ge son a̰se nde, ge dape, mbuɗuɗum pil ne zazan̰, ka dol ne ndwa wowol, ge ol zì de koo ge mam se de. 16Mbi gene ne ya ge mo nda ge ame hateya ma ta, num pool be mbyaɗ ge yan ne to. 17Zeso ɗege num pagal, jan go: Ḛ nda ge doŋ pe ge màge mbe ge no be hoɗ fareba mage kee sone ma! Mbi gaa kaɗ ge ḛ dagre ɗiŋ mbo diya ga de? Mbi in ḛ dṵṵl ma mbo diya ga me de? Ḛ gene mbi van mbe ya. 18Guwa̰ ge àa gene ne van mbe ya, Zeso ngwabe on̰om ge mbuɗuɗum mbe, ne sḛ ndage zum, ge sok mbe go baba, van mbe seɗ zonna. 19Guwa̰, nda ge ame hateya ma mbo ya ge Zeso ta hini jan, àa ele ne go: Ge dape, i wa mbyaɗ yan on̰om ge mbuɗuɗum mbe zum to de? 20Zeso gwan ge num janna go: A ge hoɗ fareba hoɗege guwa ge ḛ ḛ pe. Fareba mbi jan ḛ ne no: Koo kaɗɗa go ḛ ge hoɗ fareba hoɗege guwa ge mojo̰o̰ sugu ge àa tol ne mutard ndwa go puy, ḛ ge pool hoɗ njal ḛ wa go, ne ndage ge sok mbe no go, mbo ge sok ge ɗogle yà, a ngaɗ go ne ke mbe go tem. A̰me ge tane ḛ ndwa mbo kaɗ to. 21[Ɗaŋɗe, on̰om ge sone ge go mbe pe no, waɗ zum ge kaɗeya mage wan mam njuwal ta mbḛḛ.]
Zeso gwan wuwage na swày mage na tanna
22Dwam a̰me go ɗu, Zeso mage na nda ge ame hateya ma wa ya mɔɗwag ge suwa ge Galile ne go, Zeso jan num go: Àa gaa ɓyan mbi, Van ge Ndu ne ge nda duwana ma tok go, 23àa mbo hun mbi, ɗaŋɗe, dwam taa guwa̰, Dok mbo tan mbi ge swày se. Ge fare mbe no pagal, kiimi ge ga̰a̰l kale wan ne nda ge ame hateya ma gaw.
Zeso faa fare ge siyal ge zok ge Dok ne pe
24Sok ge Zeso mage na nda ge ame hateya ma guwa̰ ya ge suwal Kapernawom diŋ, nda ge chal siyal ge zok ge Dok ne pe ma mbo ya ge Piyer ta, àa ele ne go: Ḛ Ba ge hateya poɗ siyal ge zok ge Dok ne pe poɗ ɗer ɓade? 25Piyer vin, jan num go, poɗ ne poɗ. Sok ge wuwa zok diŋ yà, Zeso hee fare zḛḛ, ele ne go: Mo dwaɗ gyana ge fare mbe no pagal de, Simo̰? A huɗi ma mbiya poɗ gan ga̰a̰l ge suwa pagal ma siyal ne de? A num van suwal ma koo gɔswal ma de? 26Simo̰ gwan ne janna go, ne van gɔswal ma. Ge ne fare mbe pagal, Zeso jan ne go: Van suwal ma zane poɗ a̰me to. 27Ɗaŋɗe, ge go ne seŋe kaŋ chal ko ge num ta to pe ɗe, mbo sol kòo mangaɗam ga̰a̰l se, sini ge zḛḛge ge mo ma min ne ya, hage ne wa digi, mo mà seɗ bware ge poɗ nè ge mo pagal jwàg, he ne mo hon num.
Dewis Presennol:
Mata 17: kiaGRB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017 Wycliffe Bible Translations, Inc. All rights reserved.