Mata 12
12
Fare pee ta ge dwam sabaɗ, dwam ɗwabe ta pagal
Mrk 2.23-28; 3.1-6; Luk 6.1-11
1Guwa̰ swag, deɗ-ɗa ge dwam sabaɗ a̰me go ɗu, Zeso mage na nda ge ame hateya ma ka kale mboya ge gaaso ge geme ne ma pul zì. Sok ge camal wa̰a̰ num, ne nda ge ame hateya ma ɗege hal swa pagal ma sulla. 2Sok ge Farisi a̰me ma kuwa num kee ano mbe go, àa mbo ya jan Zeso go: Mo kuwa kaŋ ge mo nda ge ame hateya ma kee ne go ɓade! Àa kee kaŋ ge vin̰a tele go, ndu kê ne dwam sabaɗ go to. 3Ɗaŋɗe, Zeso gwan ge num janna go: Ḛ be isi maktub ge Dok ne pul sok ge jin̰a fare ge Daviɗ kaŋ ge ke ne to de? Dwam a̰me go ɗu, sok ge camal wa̰a̰ num ge na nda ma go, 4wuwa ge gur seɗ ta ge Dok ne zì no, zâ dupḛ ge àa nuusi num ge Dok pe ma no ɓanna ge na nda ma. Zane no, àa be ee dupḛ mbe ma ge num pe to, ɗeŋew, a nda ge kee tuwaleya ma ne ge vin̰a ge zam num. 5Koo ḛ be isi maktub ge Dok ne pul ge no eeya ge Moyiz ne ma zì go, nda ge kee tuwaleya ma, sok kee maa tèmel ma ge dwam sabaɗ go, ge zok ge Dok ne zì, àa hele eeya ma pagal, be ge fare wan num to kade? 6Fareba mbi jan ḛ ne no: Kaŋ a̰me ge ne hormo waɗe zok ge Dok ne ge go go. 7Fare ge Dok jin̰a ne ge na Maktub zì go: «Mbi ɓyare kuwa a̰se, be tuwaleya to, daa go ḛ wa̰a̰ ne pe kwaɗa, ḛ daa mà wan mbi nda ge ame hateya ge tok fare zì to mbe ma ge sariya to.»#Oze 6.6. 8Ago mbi, Van ge Ndu ne, mbi ne ge pool ge faa fare ge dwam sabaɗ pagal.
Zonna ge ndu ge tok looɗeya ne ge dwam sabaɗ go
9Guwa̰ ano mbe no go, Zeso ɗege ge sok mbe go, mbo ge zok kee kaɗeya ge Yahuɗ ma way zì yà, 10kuwa ndu ge tok looɗeya a̰me ɗu ge zok mbe zì. Ge sok mbe go, nda a̰me ma ele Zeso go: Vin̰a a̰me hage go ge eeya ge Moyiz ne pagal go, àa zo̰o̰ ndu ge dwam sabaɗ go de? Àa ele ne fare mbe ndwa go maa wa wan ne ge fare. 11Gwan ge num janna go: Mà kaɗɗa go ndu a̰me ge ḛ buwal zige, a ge tame ɗu, ne tame mbe deɗ ge tugul se ge dwam sabaɗ go no, mà mbo wan ne ya digi to de? 12Ndu duwana waɗe kaŋ kogor ndwa gyana ga de! Go mbe no, vin̰a hage hage ge eeya ge Moyiz ne pagal go, àa kê ndu kwaɗa ge dwam sabaɗ go. 13Sok mbe go, Zeso jan ndu mbe go: Mwaɗe mo tok se yà. Ne sḛ mwaɗe na tok se yà, ne tok mbe mbo ya zonna, haɗ pool ge ne tok gegene go.
14Sok kuwa ano mbe go, Farisi a̰me ge kaa sok mbe go ma waɗ zum seɗ ta. Àa mbo ya vwal wa ge Zeso pagal ndwa seɗ fare ge ban ne gezi.
Ndu ge Dok taa ne go ne ke na tèmel
15Sok ge Zeso za̰a̰ num fare mbe ma go, n̰a sok mbe, mbo. Ɓase ma kàre ne pe ya, zon nda ge ka kee tuguɗi ma mɔɗwag me. 16Ɗaŋɗe, Zeso mḛḛre num go, ne kaa ge num jin̰a fare ge na ne mbe zum to. 17Kê ano mbe ndwa huy fare ge Dok dee jin̰a ndu ge zwagre na wa Ezay ne go:
18«Za̰a̰ gale! Ano a mbi ndu ge tèmel ge mbi taa nee ne,
Ndu ge mbi laa wa̰a̰ ne gḛḛ, ge mbi sḛ za̰a̰ tii ge ne pe ne,
Mbi mbo biri ne ge mbi On̰om,
Mbo jan nda ge no rusu Yahuɗ zì to ma vin̰a ge mbi haɗ ndu temel taɗ.
19Mbo ka pee fare koo goɗ tene ge nda to,
Ndu mbo ka za̰a̰ ne oyya ge vin̰a ma pul go to.
20Mbo kee nda ge tuguɗi mage nda ge no pool to ma fare ge pool to.
Go mbe no ca, mbo hal tiiya ge ngwageya se gezi to,
Koo piri lampe ge ne kɔn̰al haɗɗa tḭḭl to,
Ɗiŋ ge go nda duwana ma dee ya ge vin̰a ge mbi haɗ ndu temel taɗ go.»#Eza 42.1-4.
21Pe rusu ge dunin̰a zige ma mɔɗwag mbo ee maa jobreya ma ge ne pagal me.
Halla ge Zeso ne ge Saytan pagal
Mrk 3.20-30; Luk 11.14-23; 12.10; Heb 6.4-8; 10.26-29
22Guwa̰ go, àa gene Zeso ndu ge ɓaal ge ɗel taɗɗa se ge no ge on̰om ge sone na zì ya. Ge sok mbe go, yan on̰om mbe zum, ndu mbe mbo ya seɗ zonna ge go gaa za̰a̰ fare mage faa wa. 23Ɓase ma peɗ kee ajab, àa ka ele ta ta buwal zì go: A ndu mbe ge nda tol ne go, gan ga̰a̰l Daviɗ Baŋ ne ɗer ɓade? 24Sok ge Farisi ma za̰a̰ num fare mbe ma go, àa ɗege janna go: Ndu mbe yan on̰om ge sone ma ge pool ge Belzebul, ga̰a̰l ge on̰om ge sone ma way ho̰ ne ta.
25Ajo̰o̰ Zeso ka kuwa num dwaɗɗa ma kuwa, jan num go: Muluk ge diige, ge ne nda ma kee ta ho̰o̰l ge ta ta buwal zì burmi gezi. Nda ge no suwal ga̰a̰l ge ɗu koo ge zok ge ɗu diŋ ma kaɗ-ɗa kee ta ho̰o̰l, suwal ga̰a̰l koo zok mbe vḛḛne gezi. 26Mà kaɗɗa go, on̰om ge sone ge no Saytan muluk zì ma kee ta ho̰o̰l ɗe, ago ne pool va se vaa, kee pe gyana ne muluk mbe mà gwan mḛḛ digi de? 27Kaɗɗa mbi sḛ yan on̰om ge sone ma ge pool ge Belzebul#12.27 Belzebul a Saytan dḭḭl ne waɗme., ga̰a̰l ge on̰om ge sone ma way ta, ḛ van ma yan num ge huɗi ta no me de? A ge pe, kaŋ keeya ge num way ma ngay go, fare ge ḛ jan num mbe ma, num ge maa vin̰a go to. 28Ɗaŋɗe, kaɗɗa ne On̰om ge Dok ne ho̰ mbi pool ge kee kaŋ mbe ma ne, ɓyare ḛ kuwa go, Dok kee muluk go ge sego ḛ buwal zì. 29Ndu a̰me ge vin̰a ge waɗ ge ndu ge pool zok diŋ ɔwabe ne kaŋ ma to. Zḛḛ ge go ne ɔwabe ne kaŋ ma, ɓyare go ne vuwa ndu ge pool mbe se vwal ɓiya, ne wa ɗege seɗ vin̰a ge ɔwabe ne kaŋ ma go. 30Kaɗɗa ndu sal tèmel ge mbi kee, a ho̰o̰l ge mbi, ndu ge ɓan nda duwana ma pagal digi dagre ge mbi to, ɓasare se num.
31Ge ano mbe no pe, mbi jan ḛ go: Dok mbo pore nda duwana ma num kaŋ keeya ge sone ge diige ge àa kee num no ma, koo num fare janna ge sone kakatag ge diige ge àa jan num no ma me. Ɗaŋɗe, mbo pore num ge jan fare ge sone kakatag ge On̰om ge Harcal pagal ma to baɗ. 32Dok mbo pore nda ge jan fare sone kakatag ge Van ge Ndu ne pagal ma, ɗaŋɗe, mbo pore num ge jan fare sone kakatag ge On̰om ge Harcal pagal ma to baɗ. Ne sḛ mbo pore num koo ge zaman ge màge no go koo ge zaman ge Dok ne ge mbo no ya ma go to baɗ.
33Ɓyare go ḛ vḭḭ go ɔwara ge kwaɗa ne ndwa tolla kaɗ kwaɗa me, koo ḛ vin go ɔwara ge sone ne ndwa tolla kaɗ sone me. Ago, a ge ndwa tolla ge ɔwara ne ta, ḛ deɗ-ɗa kuwaya no go ne kwaɗa koo ne sone. 34Maŋan̰ van ma! Ajo̰o̰ ḛ nda ge sone ma ne, fare ge kwaɗa mà ndage ge ḛ wa zì ɗaŋ de? Ago fare ge ndage no ge mo wa zì ee nda ne kuwa fare ge mo dul zige. 35Ndu ge kwaɗa fare ma kaɗ kwaɗa, ge dape, ne dul wa kwaɗa me. Ndu ge sone fare ma kaɗ sone, ge dape, ne dul wa sone me. 36Ɗaŋɗe, mbi jan ḛ ne no: Ge dwam kun sariya go, nda duwana ma mbo wan fare ge bàŋ yag ge diige ge maa jin̰a num ma pe peɗ ge Dok ndwa se. 37Ago, mo mbo seŋe ndu ge temel koo ndu ge sariya wan ne, ge fare ge ndage no ge mo wa zì ma ta.
Kaŋ ngayya ge Zeso kuri be kee ne
Luk 11.24-32
38Guwa̰ ano mbe go, nda ge hate eeya ge Moyiz ne a̰me mage Farisi a̰me ma mbo ya ele Zeso fare go: Ba ge hateya, i ɓyare go mo ke kaŋ ngayya a̰me ɗu, ge wa mbo ee i kuwaya go, Dok hon mo pool mbe ne. 39Zeso gwan ge num janna go: Ḛ ge doŋ pe ge màno mbe go ma, ḛ nda ge kee sone mage mbo laa ɓyareya ge Dok ne pagal to ma, ḛ gwan ɓyare kaŋ ngayya a̰me ge Dok ta ya! Gaa ɗeŋew go, àa kê ḛ kaŋ ngayya ge àa dee kê ndu ge zwagre Dok wa Jonas ne pe. 40Ago, dinna ge ndu ge zwagre Dok wa Jonas kê dwam taa gyala mage ɗaal ge sini ge ga̰a̰l laa zì go, Van ge Ndu ne mbo kee dwam taa gyala mage ɗaal ge suwa laa zì mbe go me.#Jon 2.1.
41Go no me, ge dwam kun sariya go, nda ge suwal ga̰a̰l Niniv ma mbo kan fare ge nda ge doŋ pe ge màno mbe ma pagal, ndwa go maa seŋe ta se sok za̰a̰ fare ge ndu ge zwagre Dok wa Jonas dee oy maa ne go. Ge sego, mbi jan ḛ go, ndu ge waɗe Jonas no ge go go no. 42Ge dwam kun sariya go, gan ga̰a̰l ge gwale ge kee muluk no ge suwa ge lee ham-ge go, mbo ɗege digi kan fare ge nda ge doŋ pe ge màno mbe ma pagal, ge dape, ne sḛ dee mbo ge sok kaal ya ge gan ga̰a̰l Salomo̰ ta ndwa za̰a̰ fare andaŋ ge waɗ ge ne wa zì ma. Ge sego, mbi jan ḛ go, ndu ge waɗe gan ga̰a̰l Salomo̰ gale no go go no.
Fare ge on̰om ge sone ge ndage zum ne
43Sok ge on̰om ge sone ndage zum ge ndu zì ya, aa babur pul nanna na pagal, ndwa ɓyare sok ɗwabe tene. Sok ge seɗ sok to, jan tene go: Mbi gwan ge sok ge mbi mbô no ge ne ya. Sok ge gwan-na, seɗ ndu mbe ge zok ge a̰me no ne zì to go, pul pella ɗaɗaŋ, kaŋ ma nuusiya kwaɗa, 44vin tene go, na gwan mbo ge na sok kàɗɗa ge wal, ge na n̰a ne yà. Sok ge guwa̰ ya, seɗ go a̰me ne zì to, ne kɔn̰al, ne nuusiya kwaɗa me, 45ago, ne guwa̰ mbo ɔwabe na ka̰a̰m ge sone waɗe na ma ya ɓỳala, àa ge num ɓan-na mbo kaɗ ɗagleya ge ndu mbe zì. Go mbe no, kàɗɗa ge ndu mbe ne ge guwa̰ go ge kaɗ sone kakatag waɗe ne kàɗɗa ge wal. Mbo kaɗ mbe go ca, ge nda ge doŋ pe ge màno mbe ma pe me.
Nda ge mbiya kaɗ Zeso na̰ mage ne na̰ van ge gag ma
Mrk 3.31-35; Luk 8.19-21
46Zeso gale sok jan ɓase ma fare go, ne na̰ mage ne na̰ van ma yan-na. Àa mbo ya mḛḛya zok wa zum, àa ka ɓyare vin̰a ge go maa wa jan ne fare. 47Guwa̰, [ndu a̰me ɗu ge ɓase ma buwal zì, jan ne go: Mo na̰ mage mo na̰ van ma mḛḛ go zum, àa ɓyare go maa jan mo fare] 48Ɗaŋɗe, Zeso gwan ge ne janna go: A huɗi mbiya kaɗ mbi na̰ mage mbi na̰ van ma ne de? 49Guwa̰, tare na tok ge na nda ge ame hateya ma ta, jan ndu mbe go: Za̰a̰ gale, num mbe ma no, àa mbiya kaɗ mbi na̰ mage mbi na̰ van ma ne. 50Ago, ndu ge diige ge kee laa ɓyareya ge mbi Ba ge no pḭḭ ma zì yà ne, mbiya kaɗ mbi na̰ van ge son ne, kaɗ mbi na̰ van ge gwale mage mbi na̰ me.
Dewis Presennol:
Mata 12: kiaGRB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017 Wycliffe Bible Translations, Inc. All rights reserved.