Juan 14
14
I Jesús are i b'e chi k-e ru' i Ta chikaj
1“Mixk'achirik, chikub'a ik'ux che i Dios xaq chikub'a ik'ux chwe yin. 2Chila ru' Inqajaw lik k'i k'ijib'al olik, wetene qatzij taj, keje tene kinb'iji chiwe chi kin-e ru' Inqajaw chuyijb'axik ik'ijib'al yix. 3Are in enaq chik chuyijb'axik i k'ijib'al te'uri kink'un chik'amik man kixink'am b'i wu', ipa kink'iji wi Yin xaq chila kixk'iji wi yix. 4Yix iweta'am chik i b'e chi k-e chila ipa kin-e wi Yin.”
5Are uri ma Tomás xub'ij che i Jesús:
—Ajwal, qeta'am taj ipa kat-e wi, ¿Wach retamaxik uri i b'e kqa'ano?
6I Jesús xub'ij che:
—Yin in b'e, Yin in saq laj tzij, xaq Yin in k'aslemal. Xwi wumal Yin k-an okik ru' i Ta. 7Yix we iweta'am inwach Yin xaq iweta'am uri uwach Inqajaw. Yix ax iweta'am wi uwach man lik arewi iwilom uwach —keje ile xub'ij i Jesús chke.
8Are uri ma Felipe xub'ij che:
—Nim laj winaq, chaya chqe chi kqil uwach i Ta, ru' ile kkub'i qak'ux —xecha.
9I Jesús xula' uwach che:
—Ma Felipe, lik o tan chi'ij chi in o iwu' ¿K'amaja kawetamaj inwach? Jun we kril inwach Yin, xaq kril uri uwach Inqajaw. ¿B'uchak uri kab'ij chwe chi kink'ut uwach Inqajaw chiwe? 10¿Kakoj ti ile chi Inqajaw o chwe Yin, xaq Yin in o che Inqajaw? I tzij chi kinb'ij chiwe, Yin ti kinnojiwik; xwiri are Inqajaw chi o chwe Yin, are Ire k-anaw uchak. 11Lik chinikojo chi Yin in o che Inqajaw xaq Inqajaw o chwe Yin. We kinikoj taj, xwi chikojo uri rumal i nimaq taq il chi kin-ano. 12Lik saq laj tzij kinb'ij chiwe, pachin jun kinukojo, lik ku'an ni uri ni'pa i anik chi kin-an Yin. Xwi ta la ile, xaq o ni anik chi mas nimaq ku'an na, man Yin kin-e ru' Inqajaw chikaj. 13Ronojel ni'pa kitz'onoj yix pinb'i Yin, lik kinya ni chiwe, man keje ile k-iltaj ni u'ij uchomal Inqajaw wumal Yin chi in Uk'ojol. 14We o i kitz'onoj pinb'i Yin, kin-an na.
I Jesús xusujuj utaqik li Lo'laj Utewal i Dios
15“We k'ax kinina'o, kixkojon uri che intzij inpixab'. 16Yin k'iyal mul kintz'onoj utzil che i Dios chi are Inqajaw kuya chik jun ajchajil iwe chi are Ajkub'sanel K'uxij chi kk'iji ni iwu' ronojel ij saq. 17Ni'pa i to' winaq re uwach i jyub' ta'aj, ike kkik'ulaj ti ku' man kkil ti uwach xaq keta'am ti uwach. Xwiri yix iweta'am uwach man Ire lik o iwu' xaq lik arewi kk'iji ni pik'ux.”
18“Yin kixwo'taj ti kan itukel ak'alab' chi nti chik iqajaw ichuch; man kintzalij chaloq keje ile kink'iji ni iwu'. 19K-on panoq lik naj ti chik, i winaq chi je re uwach i jyub' ta'aj kkil ti chik inwach, xwiri yix kiwil ni inwach xaq kixk'asi ni ronojel ij saq, man Yin in k'aslik. 20Che taq i ij le yix kiwetamaj na chi Yin in o che i Inqajaw, yix ix o chwe Yin xaq Yin in o chiwe yix. 21Jun winaq chi kuk'am intzij inpixab' xaq we kkojon che, kuk'ut uri chi lik k'ax kinuna'o. Xaq Inqajaw k'ax ni kuna i jun chi k'ax kinuna Yin, xaq Yin lik k'ax ni kinna i lok'anij le xaq kink'ut ni wib' che.” Keje ile xub'ij i Jesús.
22Are uri ma Judas, are ti ma Iscariote, xutz'onoj che i Jesús:
—Nim laj winaq, ¿B'uchak chi chqe yoj kak'ut wi awib', b'uchak chi chke ti i winaq re uwach i jyub' ta'aj?
23I Jesús xula' uwach che:
—Jun we k'ax kinuna'o kkojon uri che intzij xaq lik k'ax kna' ni uri rumal Inqajaw, Inqajaw xaq yin kojk'un na kojjeqi puk'ux. 24Jun we k'ax ti kinuna'o, kkojon ti che intzij. I tzij chi kixtijin yix chutayik we Yin taj, ile utzij Inqajaw chi xintaqaw loq.
25“Kintijin chub'ixkil ronojel iri chiwe tz'aqat k'a in o iwu'. 26Xwiri i Ajkub'sanel K'uxij chi are Lo'laj Utewal i Dios, chi kutaq li Inqajaw pinb'i, kuk'ut ni ronojel i jalajuj taq b'iroxik xaq kukuxtaj ni ronojel ni'pa inb'im chiwe.”
27“I uxlanb'al k'uxij kinya kanoq; kinya kan i uxlanb'al ink'ux chiwe, keje taj pacha i uxlanb'al k'uxij chi kkiya i winaq chi to' je re uwach i jyub' ta'aj. Rumali, mixk'achir pik'ux xaq mixij iwib'. 28Inb'im chik chiwe chi kin-ek xwiri kintzalij chaloq kink'un chik iwu'. We lik saq laj tzij k'ax kinina'o, lik kixkikot uri are kita chi kin-e ru' Inqajaw chikaj; man Inqajaw lik mas nim u'ij chinwach Yin. 29Xinb'ij ile chiwe chuxe'el man are kuk'ulmaj kikoj na.”
30“Naj ti chik kinlapan iwu' man kk'un i jun chi ku'at tzij puwi i jyub' ta'aj. Tupu ire nti pu'ab' ku'at tzij pinwi Yin. 31Xwiri lik keje ni ile kuk'ulmaj man kketamaj ni konojel i winaq chwach i jyub' ta'aj chi Yin k'ax kinna Inqajaw xaq kin-an ronojel wach kinutaq che.”
“Chixwalijoq man chojel b'i chi.” Xcha.
Dewis Presennol:
Juan 14: ACHICUB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Biblia Achí de Cubulco, Derechos reservados de Sociedad Bíblica de Guatemala