G%E9nesis 3
3
Adán xaq i al Eva xekojon ti che i Dios
1I kumatz, lik saqlej chkiwach konojel i chikop aj pa taq es chi je u'anom i Ajwal Dios; i kumatz le xub'ij che ixoq:
—¿Qatzij uri chi xub'ij i Dios chiwe chi kitij ti uwach i jalajuj taq che' pa tikonb'al?
2I ixoq xub'ij che i kumatz:
—I Dios xuya chqe chi kqatij uwach i jalajuj taq che' chi o pa tikonb'al, 3xwiri uwach i che' chi o pa nik'aj che i tikonb'al, i Dios xub'ij chqe: Mitij uwach i che' le xaq mitene kiyinya, man we kitijo xaq we kiyinya, saq laj tzij uri lik kixkamik.
4Xwiri i kumatz xub'ij che ixoq:
—Qatzij ti ile, yix kixkam taj; 5man i Dios reta'am we kitij uwach i che' le, lik kjaqtaj uri ib'a'wach, xaq kix-on na pacha Ire, kiwetamaj i utz xaq i utz taj.
6Are uri i ixoq xrilo chi lik chom uwach i che' le re ktijawik, rumali xpe urayixik che man lik ch'umb'al k'uxij re riqb'al no'oj, rumali xuch'up an jun uwach i che' le, xutijo xaq xuya re i rachijil. I achi xaq xutijo pacha xu'an i rixoqil. 7Are uri lik juntir xjaqtaj kib'a'wach, xkil ub'e chi je ch'analik, rumali xkit'is uxaq che' higuera re ch'uqb'al kib'.
8Are xutikb'a jorob'ik i ij, i achi ru' i rixoqil xkita chi i Dios kmalkat pa tikonb'al, are uri xe'e la pa'anem chruwaxik kib' chuxol taq che', man kkaj taj chi ke'iltaj rumal i Dios. 9Xwiri i Ajwal Dios xusik'ij i achi, xub'ij che:
—¿Ipa at o wi? 10I achi xub'ij: —Wuwam wib' chawach, man are xinta chi katmalkat pa tikonb'al lik xinxij wib' man in ch'analik.
11I Dios xutz'onoj che:
—¿Pachin taq xb'in chawe chi at ch'analik? ¿Xatab'a xatij uwach i che' chi xinb'ij chawe chi katij taj?
12I achi xub'ij:
—Are i ixoq chi xaya chwe re wixoqil, are ire xuya uwach i che' le chwe, rumali xintijo.
13Are uri i Ajwal Dios xutz'onoj che i ixoq:
—¿Wach usuk' i xa'an yet le?
I ixoq xub'ij:
—Are i kumatz xinut'oro rumali xintij uwach i che' le.
14I Ajwal Dios xub'ij che i kumatz:
—Rumal i xa'ano le, wo'or lik nim ni k'oq kaweqaj chkixol konojel i chikop je manxo, xaq chkixol konojel i chikop. Ru' uwach ak'ux katjukuk na, xaq uk'aj ulew katij ni ronojel ij re ak'aslemal. 15Kinkoj ni ch'oj chixol ru' ixoq le, xaq chkixol amuq axikin ku' umuq uxikin ixoq le; i umuq uxikin i ixoq le kkiwach' ni ajolom, xwiri yet karaxij ni kixtixil. Keje ile xub'ij i Dios che i kumatz.
16Te'uri xub'ij che ixoq:
—Saq laj tzij, kintz'ab'ij ni uk'axk'ol atujanik, ru' uk'axk'ol keawalaj ni awak'al; xwiri tupu lik katij uk'axk'ol le, lik kamayij ti urayixik awachijil, xaq are ire krajawin ni pawi.
17Xaq xub'ij che i achi:
—Rumal xatkojon che awixoqil xaq xatij uwach i che' chi xinb'ij chawe chi katij taj, wo'or lik nim i k'oq kreqaj ni ulew awumal yet, ru' i k'ax laj taq chak kach'ak ni awa ronojel ij re ak'aslemal. 18To' k'ix xaq itzel taq k'ix kuya ni ulew chawe, xaq jalajuj taq ichaj aj pa taq es katij na. 19Kturuw ni ak'atanal chuch'akik awa ronojel ij re ak'aslemal, k'a are kat-on chik ulew, man xa at uk'aj ulew rumali puk'aj ulew kattzalij wi chik. Keje ile xub'ij i Dios che achi.
20I achi xuya pub'i rixoqil al Eva, man ire are ni kichuch konojel i winaq chwach i jyub' ta'aj. 21I Ajwal Dios, xu'an u'u' a Adán xaq xu'an u'u' al Eva che i tz'um. 22Are uri i Dios xub'ij: “Saq laj tzij i winaq wo'or x-ono pacha jun chqe yoj, reta'am i utz xaq i utz taj. Muk'ulmaj chi kuch'up tan chik uwach i che' re k'aslemal, kutijo xaq kk'asi ronojel ij saq.”
23Are uri i Ajwal Dios xeresaj b'i i winaq le pa tikonb'al Edén, man keje ile i achi kchakun chwach i ulew chi antal uch'akul che. 24Are xe'elsax b'i i winaq le, i Dios xeukoj jub'an querubín prelb'al ij che i tikonb'al Edén, xaq xukoj jun ch'ich' chi k'ulala o uware chi ktoqow a' che, chi k'ulala k-ek, tz'apb'al re i b'e chi k-e ru' i che' re i k'aslemal.
Dewis Presennol:
G%E9nesis 3: ACHICUB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Biblia Achí de Cubulco, Derechos reservados de Sociedad Bíblica de Guatemala