Luukasiup Aglangit 15
15
Siipi Asiusimajuq
Maatiusi 18:12-14
1Taissumani Ruumamiut kiinaujaiqtitsijiqutingit piunngittulininginnullu narrugijaujut Jiisusimuaqput tusaajumallutik. 2Paarisit piqujaniglu ilisaijit uqarnirluutiliqput uqarlutik, “Uuma piunngittulijut ilaliuqpait niriqatigillugillu.” 3Ajjiujumik uuminga uqautivait:
4“Naliqsi siipiqutiqaruni 100-nik, ilangat atausiq asiukpat, taakkua 99 inuqanngittumut qimakkajanngilait, tainna atausiq qiniriarlugu qiniinnarajanngilauk naniqqaarnagu? 5Naniguniuk, quviasugluni iqsulirajaqpaa. 6Angirraruni, ilannaarijani inuuqatinilu qaiqugajaqpait, uqautilugit, ‘Quviasuqatigisinnga siipiqutiga asiusimalauqtuq nanigakku.’ 7Taimaaktauq uqautivassi, anginiqsamik qilangmi quviasuutigijauniaqpuq ajuqtulijuq atausiq saagiaqpat aglaat taikkunanngat 99-nit iluaqtunit saagiariaqanngittunit quviasuutauniqsauvuq.”
Kiinaujaq Asiusimajuq
8“Uvvalu arnaq, 10-nik kiinaujaqutiqaqtuq, atausirmik asiujiguni, naniruamik ikitsigajanngilaq, iglu sanirlugu qinitsiarajanngilauk naniqqaarnagu? 9Naniguniuk, ilannaarijani inuuqatinilu qaiqugajaqpait uqautilugit, ‘Quviasuqatigisinnga, kiinaujara asiujisimalauqtara nanigakku.’ 10Taimaaktauq uqautivassi, Guutiup aingiliqutingit angijumik quviasuktitauvut ajuqtulijuq atausiq saagiaqpat.”
Irniq Asiusimajuq
11Jiisusi uqaqpuq, “Angutitaqalauqpuq marruungnik irniqaqtumik. 12Nukaqtliup ataatani uqautivaa, ‘Ataataak, piqutitit inuujunniiruvit pitaaksakka maanna qailikkit.’ Ataatangata piqutini avikpait tunillugit atunit irniingminut. 13Ulluit ununngittut kingurngagut, irningata nukaqtliup piqutilimaani katillugit nunamut ungasiktumut aullaqpuq, tauvani piqutilimaani nunguppait isumaqsuuluarnirmut. 14Piqutilimaaminik nungutisimaliqtillugu, nunalingni najuqtangani kaangnaqturjuaqaliqpuq, tavva ajuqsanaqturjuamiiliqpuq. 15Najuqtami nunalit inungita ilangannut iqqanaijariaqtuqpuq, taassuma upaktangata tilivaa piruqsiiviqutiminut kuukkuusiqutiminik kamajiuqullugu. 16Kuukkuusit nirijaksanginnik nirijumagaluaqpuq; niriniaqtaminik tunisiviuvannginnami. 17Taimali iqqailirami isumaliqpuq, ataatama iqqanaijaqtiqutingit niqiksamik amigaqsingitsiaqput, uvangali maani pirliliqpunga! 18Utirnialiqpunga ataatannut, uqautilugu, ‘Ataataak ajuqtulilauqpunga Guutimut qilangmiittumut ilingnullu; 19irnirnik taijaujuksaujunniirama; iqqanaijaqtiqutiktut taimaak pilaunnga.’ 20Aullarami ataataminut utiliqpuq.
“Suli ungasiktumiitillugu ataatangata takuvaa, ilatsugilirlugu, ataatanga ullaksilluni parriaqpaa, tikinnamiuglu iqippaa kuniglugulu, 21irningata uqautivaa, ‘Ataataak ajuqtulilauqpunga Guutimut qilangmiittumut ilingnullu; irnirnik taijaujuksaujunniiqpunga.’ 22Ataatangata pijini uqautivait, ‘Tuavirlusi annuraanik piuniqpaanik qaitsilirissi, annuraarlugu; nagguarmiktauluni,#15:22 Nagguarmik uvvalu qitiqsirmik uvvalu mikilirarmikitigagusi itigagusiqtaulunilu; 23immuksiugaup nurranga quiksitsiangujuq tuqusiuk, nirivigjuarluta quviasuqatigiiliqta; 24una irnira tuqungalauqtuq uummarmingmat; asiusimalauqtuq nanijaungmat.’ Tavva quviasuqatigiiliqput.
25“Irningali angajuktliq piruqsiivingmiilauqpuq; angirralirami iglumut qaglilluni, tusaaliqpuq nijjausijaqtunik taanisiqtuniglu. 26Pijit ilangannik qaiqujivuq apirilluni sujuqarmangaat. 27Pijiup kiuvaa, ‘Nukait tikimmat, ataatavit immuksiugaup nurranga quiksitsiangujuq tuquttauquqqauvaa, nukait qanuigani utiqsimalirninga pijjutigillugu.’ 28Angajuktlirli ninngakpuq iglumut itirumajunniirluni. Ataatanga anigami itiquliqpaa, 29taassuma ataatani kiuvaa, ‘Takugit, arraagunik amisunik pijitsiliqpagit, qanutuinnaq tusaanngisalauqsimananga#15:29 Anngaanngittuulauqsimannginnama piqujitillutit; kisiani tunisilauqsimanngittutit guutsiup nurranganik#15:29 guutsit siipiup aipparutangit ajjipalugillunigit ilannaarijakka quviasuqatigilugit niriqatiginiarakkit. 30Irniit utirmat, piqutingnik nunguutsijuq arnanut angunniaqtinut, immuksiugaup nurranganik quiksitsiangusimajumik tuqutautitsivutit!’ 31Ataatangata kiuvaa, ‘Irniik, uvannik najuutiinnaravit, pigijalimaakkalu pigivatit, 32maanna akaunaatsiarmat quviasuqatigiigluta sirilutalu, nukait tuqungalauqtuq, uummarmingmat; asiusimalauqtuq maanna nanijaungmingmat.’”
Dewis Presennol:
Luukasiup Aglangit 15: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.