Juanasiup Aglangit 13
13
Jiisusiup Ilinniaqtimi Itiganginnik Uasarninga
1Qaangiqtauvingmik nalliunniqsiurviksaup sivuningani, Jiisusi qaujimagami Ataataminut aullarviksanga silarjuarmit nalliutilirmat, nangminiq inuqutini nagligigamigit silarjuarmiittut, isulittivigijani tikillugu nalligiinnalauqpait.
2Unnugummitaqatigiiktillugit, Saataanasi isumataaqtitsisimaliriirmat Juutasi Iskariatimik, Saimuuniup irninganik, Jiisusimik pijaukkaiqullugu, 3Jiisusi, qaujimagami Ataataup sunalimaanik tunisivigingmagu, Guutimillu pilaurami Guutimullu ainiarami. 4Nirivingmit nikuvinnami, annuraani silalliit piirlugit, allarutimik qitirminut qilaksilluni. 5Uasarvingmut imirmik kuvisilluni, ilinniaqtit itiganginnik uasaliqpuq, allarutimut qitirmiutarijaminut allaqtirlugit. 6Tavva Saimuuni Piitturuusimut tikiutingmat; Piitturuusiup uqautivaa: “Ataniq itigakka uasarniaqpigit?” 7Jiisusiup kiuvaa, “Maanna tukisinngikkaluaqputit sungmat taimailiurmangaarma, kingurngagulli tukisijumaaqputit.”
8Piitturuusiup uqautivaa, “Itigannik uasalauqsimanianngilatit.”
Jiisusiup kiuvaa, “Itigatit uasarnianngigukkit, ilagijunniirniaqparma.”
9Tavva Saimuuni Piitturuusiup uqautivaa, “Ataniq, itigakkali taakkutuunngittut aggakkali niaquralu uasaqasiutilikkit!”
10Jiisusiup uqautivaa, “Nalliat timiminik iluunnaannik uasaqsimajuq salumalirami uasakkanniriaqanngilaq, itigangituaq uasarialituuvut, tamassi salumavusi atausirli ilagijasi salummaqsariaqaqtutuuvuq.” 11Jiisusi qaujimalaurmat nalliatta pijautinniarmangaagu; taimaimmat uqaqpuq, “Ilasili salummaqsariaqaqtutuuvuq.”
12Itigangit uasariiramigit, annuraani silalliit Atigivait, utirluni inigijaminut, uqautillugit, “Tukisivisi qanuiliurmangaarma ilissinnut? 13Ajuriqtuijimik Atanirmiglu taivassinnga; nalaagut uqaqpusi, taannaugama. 14Uvanga tavva Atanisi Ajuriqtuijisilu, itigassinnik uasaqpunga, ilissittauq itigassinnik uasaqattautijuksaugivusi. 15Maligaksassinnik pinasuarvigivassi, taimailiuqullusi suurlu pinasuarvigigassi. 16Sulijumik uqautivassi, piji anginiqsaunngilaq angajuqqaaminit; tilijausimajurlu anginiqsaunnginnivuq tilijiminit. 17Tamanna qaujigassiuk, saimanaqtumiilirajaqpusi atulirussiuk.
18“Tamatuminga uqautijainnarinngilassi; qaujimagakkit niruaqsimajakka; aglailli nalautsijariaqarmata uqaqtut: ‘Niriqatigijama akiraqtuliqpaanga.’ 19Maanna tamatuminga uqautivassi, suli pijuqalauqtinnagu, tamanna atuliqpat uvannut ukpiliqullusi, ‘Uvanga Taannaugama.’ 20Sulijumik uqautivassi, tilijannik ilaliuqsijuq taanna uvannik ilaliuqsigivuq; uvannigli ilaliuqsijuq tilijinnik ilaliuqsigivuq.”
Jiisusiup Nalunaiqsininga Pijaukkaqtauniarnirminik
Maatiusi 26:20-25; Maakusi 14:17-21; Luukasi 22:21-23
21Jiisusili tamakkuninga uqariirami, anirnikkut qiksaangnirmut angijumut tikitauvuq, nalunaiqsiliqpuq, “Sulijumik uqautivassi, ilassi ilangatta pijautinniaqpaanga.”
22Ilinniaqtiit immingnut takusaqattautivut, nalullutik nalliannik uqausiqarmangaat. 23Ilinniaqtingitali ilangat, Jiisusiup nagligijanga,#13:23 Iksivavuq taanna tukiqarmijuq aurjungajumik iksivautaunngittumi paammangajaaqtuq iksivavuq Jiisusiup kiglingani; 24Saimuuni Piitturuusiup ijimminut nalunaiqsivigilluniuk uqautivaa, “Apirilauruk nalliannik uqausiqarmangaat.”
25Taassuma ilinniaqtiup Jiisusi iigarvigilluniuk uqautivaa, “Ataniq kinauva?”
26Jiisusiup kiuvaa, “Niaquujamik misuksilunga tunisivigijara taannauniaqpuq.” Tavva Jiisusi niaquujamik aviksilluni misukpaa, tunillugu Juutasimut, Saimuuniup Iskariatiup irninganut. 27Juutasiup niaquujaq tigungmagu, Saataanasiup itirvigivaa. Jiisusiup uqautivaa, “Tuavirlutit pijariaqaqtait, pinasualiruk.”
28Nirivingmiiqatigijangilli tukisijuqanngilat sungmat Jiisusiup taimaak uqautingmangaagu. 29Juutasi kamajigijaungmat kiinaujaqautingannik ikpiarjungmik; ilinniaqtiit ilangit isumavut Jiisusi niuviriaqujinasugillugu aturiaqaqtanginnik nalliunniqsiulirutik; uvvaluunniit tunisijaqtuqujaunasugivaat ajuqsaqtunut.
30Juutasiup niaquujaq iigamiuk tavvainnaq anivuq; unnuanguvurlu.
Piqujaq Nutaaq
31Juutasi aningmat, Jiisusi uqaqpuq, “Maanna Inuup Irninga niqturnaqtitauvuq, Guuti taassumuuna niqturnaqtitaugivuq; 32Guuti niqturnaqtitaukpat taassumuuna, tavva Inuup Irninga Guutiup niqturnaqtinniarivaa immigut, niqturnaqtikautiginiaqpaalu. 33Qiturngakka, akuniunngittuq najuliqpassi. Qinirumaaqpassinnga; suurlu Juutinut uqalaurama, taimaaktauq ilissinnut maanna uqaqpunga, ‘Upangniaqtannut aijunnannginnassi.’ 34Piqujamik nutaamik tunisivigivassi, nagliktigiiqullusi; suurlu nagligilaurassi, taimaaktauq ilissinnut nagliktigiiktuksaugivusi. 35Ilissinnut nagliktigiigussi, tamatumuuna inulimaat tukisijumaaqput uvannut ilinniaqtiunissinnik.”
Jiisusiup Nalunaiqsininga Piitturuusiup Qaujimannginnirarniarninganik
Maatiusi 26:31-35; Maakusi 14:27-31; Luukasi 22:31-34
36Tavva Saimuuni Piitturuusiup uqautivaa, “Ataniq namunngarniaqpit?”
Jiisusiup kiuvaa, “Upangniaqtannut maanna maligunnanngilarma; kingurngagulli maligumaaqparma.”
37Piitturuusiup uqautivaa, “Ataniq sungmat maanna maligunnanngilagit? Ilingnik tuqutaujjutiqaraluaruma qanuiksanngilanga.”
38Jiisusiup kiuvaa, “Tuqutaunirmut atuinnauliqpit pijjutigilunga? Sulijumik uqautivagit, angutiviaq nilliqqaaqtinnagu, pingasuiqturlutit uvannik qaujimannginnirarniaqputit.”
Dewis Presennol:
Juanasiup Aglangit 13: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.