Juanasiup Aglangit 11
11
Laasaruusiup Tuquninga
1Angummik qanimajuqaqpuq, Laasaruusimik Pitanimi nunalingmik, Miariup Maataullu nukariik nunangani. 2Miari taannauvuq Ataniup itiganginnik minguaqsilauqtuq tipitsiariksaummut nujarminullu allaqtiqtlugit, taassuma aninga Laasaruusi qanimavuq. 3Tavva najangik tilisivuuk Jiisusimut, uqaujjauqullugu, “Ataniq, nagligijait qanimmakpuq.”
4Jiisusi tamatuminga tusarami uqaqpuq, “Tamanna qanimmasiq tuqumut ilinganngilaq; Guutiulli niqtuqtauniksanganut, Guutiup Irninga tamatumuuna niqturnaqtitauqullugu.”
5Jiisusiup taakkua ilagiit nagligivait Maata, Miarilu, aningallu Laasaruusi. 6Laasaruusiup qanimaninganik tusaqsimalirluni, najuqtaminiilauqpuq suli ulluungnik marruungnik. 7Kingurngagut ilinniaqtinut uqaqpuq, “Juutiamut ailaurmita.”
8Ilinniaqtingita kiuvaat, “Raappai, Juutit ujaqqanut taikani millurumalauqpaatit; taikunga utirumalirivit?”
9Jiisusiup kiuvait, “Ulluq 12-nik ikarraqanngilaq? Nalliat ullukkut qaumatillugu pisuktuq paallangnianngilaq, silarjuup tamatuma qaumaninganut tautuktitaugami. 10Unnuangutilluguli pisuktuq paallangniaqpuq, qaumasiunnginnami.” 11Taimaak uqariirami, uqautikkanniqpait, “Ilannarijavut Laasaruusi siniliqpuq, upangniaqparali tupaariaqturlugu.”
12Tavva ilinniaqtingita uqautivaat, “Ataniq, sinikkuni piusivallianiaqpuq.”
13Jiisusili uqausiqaqpuq Laasaruusiup tuquninganik, taakkuali isumaqaqput sinituinnaqturiksillutik. 14Tavva Jiisusiup tukisitiliqpait uqautillugit, “Laasaruusi tuquvuq; 15pijjutigillusili quviasukpunga najulaunnginnakku, ukpiliqullusi. Maanna upalaurlavut.”
16Tuumasi, Marruliavinirmik taijauvaktuq, ilinniaqtiuqatiminut uqaqpuq, “Tamatta malilirlavut, tuquqatiginiarattigu.”
Jiisusiup Makijjutiksauninga Inuujjutiksauningalu
17Jiisusi tavvunga tikinnami, qaujivuq Laasaruusi ulluni sitamanik iluviqtausimaliriirmat. 18Pitani Jiruusaliup qanigijaaniippuq, 2-mailiup qanigijaani ungasingniqarluni, 19Juutillu amisut upagutisimalauqput Maatamik Miarimiglu ikajuqsiriaqturumallutik aningatta inuujunniirninga pijjutigillugu.
20Maata tusarami Jiisusiup qailirninganik, anilluni parriaqpaa, Miarili iglumi nuulaunngilaq. 21Maataup Jiisusi uqautivaa, “Ataniq, uvaniilauruvit, aniga tuqugajalaunngilaq. 22Sulilu maanna qaujimagivunga sunatuinnarmik Guutimut tuksiaruvit, Guutiup tunisiviginiarmatit.”
23Jiisusiup uqautivaa, “Aniit makinniarivuq.”
24Maataup uqautivaa, “Qaujimavunga, makittumaarmat makivviksami ulluit kingulliqpaanganni.”
25Jiisusiup uqautivaa, “Uvanga makijjutiksaullungalu inuujjutiksauvunga; nalliat uvannut ukpiqtuq, tuqugaluaruni, suli inuujumaaqpuq, 26inuujurlu, uvannut ukpirluni tuqulauqsimanianngilaq. Tamanna ukpiriviuk?”
27Taassuma uqautivaa, “Ataniq, ilaak ukpiqpunga Christuusiugavit, Guutiup Irninga, silarjuarmut tikisimajuq.”
Jiisusiup Quvviurninga
28Maatali taimaak uqariirami, angirraulluni nukani Miari inutuuqatigilluniuk uqautivaa, “Ilisaiji tikimmat taassuma qaiquvaatit.” 29Miari tamatuminga tusarami, tuavirluni taassumunga upagutivuq. 30Jiisusi iglugasangnut suli tikisimanngimmat, nuulaunngilarli suli Maatamut upaktauvigiqqaujamini. 31Juutilli iglumiittut, ikajuriaqsimajut taassuminga, Miari takugamijjuk tuavirluni aningmat, maliksaqpaat, qiajaqturasugillugu iluvirmut.
32Miari Jiisusimut tikiutigami takugamiuglu itigangita saanganut paammakpuq, uqarlunilu, “Ataniq, uvaniilauruvit, aniga tuqugajalaunngilaq.” 33Jiisusiullu qiajuq takugamiuk, Juutillu qaiqatigijangit qiangmingmata, aktuqtaummarikpuq anirnirmigut saimajunniirluni; 34uqarlunilu, “Namut iluvilauqpisiuk?”
Uqautivaat, “Ataniq, qailutit takujaqturuk.”
35Jiisusilu qiavuq. 36Tavva Juutit uqaqput, “Takugit angijumik nagliginniqpaa!” 37Ilangilli uqaqput, “Tautunngittumik tautuliqtitsijunnarluni, taassuminga tuquttailititsijunnalaunngilaq?”
Laasaruusiup Makititauninga Tuqungajunit
38Jiisusi, angijumik aktuqtaukkannirivuq, iluvirmut tikinnamik; iluviq qaiqtumi iluliuqsimalauqpuq, itiqtarvingalu ujarangmik matusimalluni. 39Jiisusi uqaqpuq, “Ujarak piiqsiuk.”
Maata, tuqungajuup najanga uqaqpuq, “Ataniq tipiluliriiqpuq, ullunik sitamanik iluviqsimalirami.”
40Jiisusiup uqautivaa, “Uqautilaunngilagit ukpiruvit Guutiup niqturnarnirjuanga takujunnaraviuk?” 41Tavva ujarak piiqpaat iluvirmit. Jiisusi qummut takusarluni, uqaqpuq, “Ataatak, qujagivagit tusalauravinga. 42Qaujimavungali tusatsainnaravinga, taimaagli uqaqpunga ukua uvaniittut pijjutigillugit, ukpiliqullugit tililauravinga.” 43Jiisusi taimaak uqariirami, nipiqquqtulluni uqaqpuq, “Laasaruusi, anigit.” 44Laasaruusi anivuq, aggangit itigangillu tuqujumut immutigijausuunik nimiqsimallutik, kiinangalu qallunaaqtamik nimiqsimagilluni. Jiisusiup uqautivait, “Immutingit piijaqsiuk, pisulirli.”
Jiisusiup Tuqutaksauqujauninga
Maatiusi 26:1-5; Maakusi 14:1-2; Luukasi 22:1-2
45Juutit amisut Miarimut pulaariaqsimajut Jiisusiup piniarnirijanganik takujut, Jiisusi ukpiriliqpaat. 46Ilangilli Paarisinut utirlutik unikkaaqput Jiisusiup piniarnirijanganik. 47Tavva Paarisit tunirrusiqtitsijiillu angajuqqaangit katimajinik katimaqatiqarlutik uqaqput, “Qanuiliuriaqaliqpita? Taanna amisunik nalunaikkutarnik pinasuaqattarmat. 48Kamaginngillugu isumaqsuqtinniaruttigu, tavva inulimaat ukpilirniaqput taassumunga, Ruumamiullu uvattinnut qailutik asiruijumaaqput Tuksiarvigjuattinnik inuqutittinniglu.”
49Taakkua ilangat, Kaiapaasimik atilik, arraagumi tamatumani tunirrusiqtitsijinut Angajuqqaammariujuup, uqautivait, “Suli qaujimanngilasi; 50tukisinnginnassi ilissinnut piuniqsaugajarmat inuk atausiq tuqukpat inuuqatigiit pijjutigilugit, inuuqatigiit asiruqtaugajarninginnit?” 51Tamatuminga imminik uqalaunngilaq; arraagumili tamatumani tunirrusiqtitsijinut Angajuqqaammarigijaugami Guutiup uqaqtauqujanganik uqausiqalauqpuq Jiisusi tuqutaujuksaungmat inuuqatigiigjuat pillugit, 52inuuqatigiigjualli taakkuatuaq pinagit, Guutiulli qiturngangit namutuinnaq siammaqsimajut katiqsuqtauqullugit atausirmut.
53Ullumit tavvanngat pigiarlutik isumaksaqsiuqatigiiliqput Jiisusimik qanuiliurlutik tuqutsigajarmangaarmik. 54Taimaimmat Jiisusi qaujimajauluni ingirraqattarunniiqpuq Juutit nunangagut, inuqanngittuulli qanigijaani iniqaliqpuq, nunalingni Ivuraimmik atilingni; tavvaniililauqpuq ilinniaqtini ilagillugit.
55Juutit nalliunniqsiurvingat Qaangiqtauvingmik qaglilirmat, inugasagjuat nanituinnaq nunaliit Jiruusalimmuaqpallialiqput Qaangiqtauviup sivuningani, salummaqsaqtaunirmik aturumallutik. 56Jiisusimik qinilauramik, uqaqatigiililauqput katillutik Tuksiarvigjuami, “Qanurli isumavisi? nalliunniqsiutunut qainiaquunngimmat.” 57Tunirrusiqtitsijiilli angajuqqaangit Paarisillu piqujilauqput nalliatuinnaq Jiisusiup naniinninganik qaujijuq, qaujititsiquvat, tigujauniarmat.
Dewis Presennol:
Juanasiup Aglangit 11: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.