Matthew Lefi 11
11
1Pan orphenasai Iesu hyfforddi ei ddeg a dau ddysgybl, efe á ymadawodd oddyno i ddysgu a rhybyddio yn y dinasoedd.
DOSBARTH VI.
Nodwedd yr Amseroedd.
2-6Ac Iöan, wedi clywed yn y carchar, am weithredoedd y Messia, á ddanfonodd ddau o’i ddysgyblion, y rhai á ofynasant iddo, Ai tydi yw yr hwn sydd yn dyfod, ynte á raid i ni ddysgwyl un arall? Iesu gàn ateb, á ddywedodd wrthynt, Ewch, a mynegwch i Ioän, y pethau à glywsoch ac á welsoch. Gwneir i’r deillion weled, i’r cloffion gerdded; gwahangleifion á lanêir; y byddariaid á glywant, y meirw á gyfodir; a newydd da á ddygir i’r tylodion; a dedwydd yw y sawl, na byddaf yn dramgwyddfa iddo.
7-15Gwedi iddynt ymadael, Iesu á ddywedodd wrth y bobl am Ioän, Pa beth yr aethoch allan i’r anialwch iddei weled? Ai corsen yn cael ei hysgwyd gàn y gwynt? Ond pa beth yr aethoch allan iddei weled? Ai dyn wedi ei ddilladu yn fwythus? Palasau breninoedd y mae y cyfrai yn eu cynniwair. Beth ynte yr aethoch allan iddei weled? Ai proffwyd? Ië, meddaf i chwi, a rhywbeth uwch na phroffwyd; canys hwn yw efe, am yr hwn yr ysgrifenwyd, “Wele, mi á anfonaf fy angel o’th flaen, yr hwn á barotöa dy ffordd.” Yn wir, yr wyf yn dywedyd wrthych, yn mhlith y rhai à aned o wragedd, ni chododd neb mwy nag Ioän y Trochiedydd. Eto y lleiaf yn Nheyrnasiad y Nefoedd sy fwy nag ef. Oddar ymddangosiad cyntaf Ioän y Trochiedydd hyd yn awr, yr ydys yn goresgyn teyrnas y nefoedd, a goresgynwyr sydd yn cymeryd meddiant drwy drais. Canys hyd onid ymddangosodd Iöan, yr holl broffwydi a’r gyfraith oeddynt eich hyfforddwyr: ac os goddefwch ddywedyd wrthych, dyma yr Elias yr hwn oedd i ddyfod. Pwybynag sy ganddo glustiau i wrandaw, gwrandawed.
16-19Ond i ba beth y cyffelybaf y genedlaeth hon? Tebyg ydyw i fechgyn yn y farchnadfa, wrth y rhai y cwyna eu cydchwarëyddion, gàn ddywedyd, Chwarëasom i chwi àr y bibell, ond ni ddawnsiasoch; canasom i chwi alargerddi, ond ni chwynfanasoch. Canys daeth Iöan yn ymattal oddwrth fwyd a diod, a dywedant, Y mae cythraul ganddo: daeth Mab y Dyn yn arfer bwyd a diod, a dywedant, Carwr gwleddau a gwin ydyw, cydymmaith tollwyr a phechaduriaid. Ond doethineb á gyfiawnêir gàn ei phlant.
20-24Yna y dechreuodd efe edliw i’r dinasoedd, yn y rhai y gwnaethid y rhan fwyaf o’i wyrthiau ef, am na ddiwygiasant. Gwae di, Chorazin! Gwae di, Bethsaida! Canys pe gwnaethid yn Nhyrus a Sidon, y gwyrthiau à wnaethwyd ynoch chwi, hwy á ddiwygiasent èr ys talm mewn sachlian a lludw. Gwybyddwch, gàn hyny, y bydd cyflwr Tyrus a Sidon, yn nydd y farn, yn fwy goddefadwy, na’r eiddoch chwi. A thithau, Capernäum, yr hon á ddyrchafwyd hyd y nef, á dynir i lawr hyd Hades; canys pe gwnaethid yn Sodoma, y gwyrthiau à wnaethwyd ynot ti, buasai yn aros hyd yn awr. Gwybydd, gàn hyny, y bydd cyflwr Sodoma, yn nydd y farn, yn fwy goddefadwy na’r eiddot ti.
25-26Ar yr achlysur hwnw, dywedodd Iesu, yr wyf yn dy foliannu di, O Dad, Arglwydd nef a daiar, o herwydd, wedi celu o honot y pethau hyn oddwrth ddoethion a’r dysgedigion, i ti eu dadguddio hwynt i fabanod; ïe, O Dad, oblegid dyna yw dy ewyllys.
27-30Pob peth á roddwyd i mi gàn fy Nhad; a nid edwyn neb y Mab, ond y Tad; a nid edwyn neb y Tad, ond y Mab, a’r hwn yr ewyllysio y Mab ei ddadguddio iddo. Deuwch ataf fi, bawb ag ydych yn ymboeni a gwedi eich beichio, a mi á esmwythâf arnoch. Cymerwch fy iau i arnoch, a dysgwch genyf fi; canys addfwyn ydwyf ac iselfrydig, a’ch eneidiau á gânt esmwythâad. Canys fy iau i sydd esmwyth, a’m baich i sydd ysgafn.
Dewis Presennol:
Matthew Lefi 11: CJW
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Yr Oraclau Bywiol gan John Williams 1842. Cafodd y testun ei ddigideiddio gan Gymdeithas y Beibl yn 2021.