MARKƏ 2
2
Yeesu seere hulum bə hurufiŋ
(Mat. 9.1-8; Liki 5.17-26)
1Bə hətəŋ wəra laki kəyaŋ, Yeesu haraŋ giidə vil də Kapernam na. Kəya kaŋ əskəŋ minti wə akera. 2Yə kooroŋ da bə bi a ge ciiri wəra ada, yə doŋ koŋ wəra lew-lew, ku kuli na warna haa bədoona gəm. Kəya wə əsəŋ bə wəətəy kel kə Pepeŋa. 3Ɗe a goleŋa, kaa tuukuŋ də hulum bə hurufi a nuunu, kaa gə minti bə həluŋ, yə waaɗe. 4Səma yə fəlaŋ ko bə vəɗu a Yeesu kas kaa kə ablaw ba. Yə luŋ duuru apəya cəərə kuliŋ na, yə palwaŋ agal du wəra pəlaŋ anə ɗeker cəərə ko bə minti Yeesu adaŋ, yə əsəŋ bə ziiri gisiŋ da də hulum bə hurufiŋ giidu bəy.
5Bə minti Yeesu ɗeŋ a ase anəkay minti kaa teŋ gə doo-de gud tó ŋaanaanə moŋ, wə waataŋ hulum bə hurufiŋ minti: «Daarənti, baymele nəmtiŋ fəlaŋ vəəgi bə giidu ne.» 6Səma sərdə *kaa kə hate ku gili kə Pepeŋ je'-je'i adaŋ, əsəŋ bə le ku kusri minti: 7«Ana hulum toŋ waate kel teŋ haa naanaanəŋa? Wə sarte sam Pepeŋ! Pepeŋ məna aye vəəgi bə giidu cəərə baymeleŋa haa tó. Mindi baalaŋ neke pə mo?»
8Yeesu asaŋ wəra dər ɗiki du minti yə bə le ku kusri bədoona ana. Wə wəətənəy minti: «Ana aŋ le ku kusrəŋ də sar kel teŋ haa səm mo? 9Gə ji gəəli dəŋaŋ kumsiŋ gud kel té ɓasiŋa haa məntəŋ mo? Ten waataŋ hulum bə hurufiŋ ne minti: ‹Baymele nəmtiŋ fəlaŋ vəəgi bə giidu ne›, ɗalba ‹faa la apəya, haa gisi nəmtiŋ la, ɗee laŋ› mo? 10Səma, ten gaŋ dərəŋ yaŋ wəra hebkəna minti ten, *Kormə Hulúm, də abay cəərə seŋkaŋa kəna bə aye vəəgi bə giiduŋ cəərə baymeleŋa.» 11Kəya wə waataŋ hulum bə hurufiŋ minti: «Ten waatam: faa la apəya, haa gisi nəmtiŋ la, ɗee la akera.» 12Kəya, hulum faŋ, wə haŋ gisi nuutuŋ, wə kəlaŋ wəra, kaŋ bə gulu kirkir gil keɗe. Yə bəsaŋ máŋ kuy gə ha'tə-ha'te laki. Kəya yə əsəŋ bə tokɗe Pepeŋa minti: «Sar kel té kayiŋ, are əsnəy hõy ba!»
Yeesu mante Levi
(Mat. 9.9-13; Liki 5.27-32)
13Kəya Yeesu haraŋ hõy kəsnə kan kəmtəŋ pa; kaŋ keɗe kooroŋ suru na, wə bə hətəya ada gəm. 14A kəkəy bə ɗeŋaŋ, wə asaŋ Levi, kormə Alfeŋ, bə əsə-isi giidə kuli bə taare lambaŋa cin. Wə wəətunu minti: «Bəəda guudən da.» Kəya Levi faŋ apəya, wə kooroŋ guudu faɗi.
15Bə minti Yeesu bə hame ger Leviŋ, kaa ablaw əsəŋ bə hame sar *kaa gə guuduŋa duuru keɗe. Kaa teŋ haa anə *kaa kə tope lambaŋ daana kaa kə jəəti baymeleŋ. Yə ablaw, yə bə ɗeete guudu gəm. 16Bə minti *kaa kə hate ku gili kə Pepeŋ a kaŋ gə gud kaanə *Farisiyeŋ əsnu anəkay bə hame də kaa kə tope lambaŋ daana kaa kə jəəti baymeleŋ, yə əsəŋ bə waate kaa gə guuduŋa faɗi minti: «Ana wə hame də gom də kaa teŋ haa naanaanə mo?» 17Yeesu əskəŋ kel gə minti yə wəətənəy, kəya wə hərnəy kel minti: «Kaa gə minti wəra holoŋ ɗe a golde maa kasi doktora mo? Ɗe suru haa kaa kə ɗemeŋ. Ten bəŋ paapa gud kaa ɗekeriŋa ba, ten bəŋ haa gud kaa kə ji baymeleŋa.»
Yeesu waate sam je bə kuŋ
(Mat. 9.14-17; Liki 5.33-39)
18Dəyaŋ hõy *kaa gə gud Zaŋ daana kaanə *Farisiyeŋ yaakaŋ kusri bə *je də kuy. Yə bəŋ sar Yeesu, yə əsəŋ bə law ku minti: «Kaa kə gud Zaŋ də kaanə Farisiyeŋ, teŋ yaakte kusri bə jaate də kuy, kaa gə guudum paapa bə yaake kusri bə je də kuy ba, haa səm mo?» 19Yeesu wəətənəy minti: «Hulum bə de həlgəŋ, gədəəru gə minti suruŋ neke bə yaake kusri bə je də kuy də ko bə minti wə kəm siri mo? Paapa! Də ko bə minti yə isi naanə me'i mo də kumsiŋ, yə neke bə yaake kusri bə je də kuy ba. 20Səma koŋ bə neke yaŋ minti kaŋ bə daw yaŋ warna, gədəəruŋ neke yaŋ bə yaake kusri bə je də kuy kəm də ko toŋ.
21Hulum mele kepteŋ də dəməəmə təmarwa də minti kəm bay kuɗfi cekiŋ, dər ko bə co'ə-co'e də dəməəmə də gayə-geyeŋa bə õya də kumsə ba. Wə õyna ne bədoona, dəməəmə təmarwaŋ hare bə he wəra a dərə meɗeɗ-ɗeɗi də nayta də gayə-geyeŋ warna ku na. Kəya ko bə caarə-caareŋ ze guudu máŋ wəra ada pisi ze. 22Ana paŋ, hulum neke bə ge kumuy bə atələələm bə minti kəm bə de siipə kimirwi giidə mandəhaŋ golgo pəərəŋki bə gəm. Wə gəənu ne adaŋ, wə naake wəra də kumuy. Kumuy ãyaŋ ne wəra gəm, mandəhaŋ naakaŋ ne wəra gəm. Bədoona ta, kumuy bə minti kəm bə de siipə kimirwiŋ, gaw la giidə mandəhaŋ kimirwi gəm.»
Hi bə faake kə Pepeŋ haa kir kasi Yeesu
(Mat. 12.1-14; Liki 6.1-11)
23Dəyaŋ hõy dər *hi bə faake kə Pepeŋa, Yeesu də *kaa gə guuduŋ hadlaŋ giidə aka də kaasawa gə minti yə məntəy minti «bəle». Kəya kaa gə guuduŋ əsəŋ bə hitiya. 24Kaanə *Farisiyeŋ əsəŋ bə waate Yeesu faɗi minti: «Golə la kəm! Kaa nəmtiŋ ji karman bə minti ku gili kə *Moyisiŋ a waataŋ cuuru minti wə a ji dər hi bə faake kə Pepeŋa baŋ, haa naanaanə mo?» 25Yeesu hərnəy kel minti: «Aŋ aŋkaŋ kel gə minti *Davidi jiiniy hõy də kaa gə guuduŋ də ko bə minti tay bə ɗəməya, karman paapa kəəsi baŋ, bə mo? 26Dər ko bə minti Abiyatar ateŋa *kumna boblo bə keere Pepeŋ, wə kəlaŋ giidə *muryuki kə Pepeŋa. Wə hamaŋ mappa də minti yə a vəənəy a Pepeŋ adaŋ, daana wə ayaŋ a kaa gə guuduŋ bə hame gəm. Anaaŋa ku gili náŋ bə waatə-waate minti həmu la ha'aŋ *kaa kə keere Pepeŋ təwa.» 27Wə wəətənəy pa minti: «Pepeŋ jəŋ kaŋ wəra kəm, adoro wə jiiniy hi bə faakeŋ bə kəyəy. Wə jəŋ hi bə faakeŋ wəra ajew, adoro wə jəŋ kaa kəsarkaŋ minti yə faakə la duruŋ, paapa bədoona ba. 28Bədoona ta, ten *Kormə Hulúm, ten haa bərdə hi bə faakeŋ.»
Dewis Presennol:
MARKƏ 2: KERNT05
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Texte de la Bible: Kera © Alliance Biblique du Tchad, 2004.