YUHANA 5
5
Gyãre werekɔ̃ana íkpakia
1Abire gbɛra Yudanɔ dikpɛ ke kà, akũ Yesu ɛ̀ra à gɛ̀ɛ Yurusalɛmu. 2Íkpaki kú gwe Sã Gɛ̃ki sarɛ, kũ òdi pi Bɛtɛsɛda kũ Eberu yão. Íkpaki pì kámmaboki vĩ lɛu sɔɔro, 3gyãrenɔ dìgɔ̃ wútɛnan dasidasi, vĩ̀nanɔ kũ ɛrɛnɔ kũ gbɛ̃ kũ ń mɛ̀gu fɛ̃fɛ̃nanɔ. 4-5Gɔ̃gbɛ̃ ke kú gwe àtɛn gyã kɛ à kà wɛ̃̀ bupla plansari. 6Kũ Yesu a è wútɛna gwe, à dɔ̃̀ kũ àtɛn gyã kɛ a gìi kɛ̀ manamana, akũ à pìnɛ: Ń ye ǹgɔ̃ aafia yá? 7Akũ gyãre pìi wèa à pì: Mare, má gbɛ̃ke vĩ à ma da í gũn gɔrɔ kũ à yĩ̀gãro. Tó matɛn gɛ́ gɛ̃n, gbɛ̃ pãnde dì gĩnakɛ à gɛ̃ ma ãmɛ. 8Yesu pìnɛ: Ǹ futɛ ǹ zɛ, ǹ n pɛ̀ sɛ́ ǹ táa o. 9Gwe gɔ̃̀nɔ gɔ̃gbɛ̃ pìi aafiaa lè. À a pɛ̀ɛ sɛ̀ à táa ò. Gɔrɔ pì bi kámmabogɔrɔ zĩmɛ, 10akũ Yuda gbãnadenɔ pì gɔ̃gbɛ̃ kũ à wèrekɔ̃a pìinɛ: Kámmabogɔrɔ zĩn gbãra. À zɛ́ vĩ ǹgɔ̃ n pɛ̀ sɛnaro. 11À wèḿma à pì: Gbɛ̃ kũ à ma gba aafia mɛ́ à òmɛnɛ mà a pɛ̀ sɛ́ mà táa o. 12Akũ ò a là ò pì: Dí mɛ́ à pìnnɛ ǹ n pɛ̀ sɛ́ ǹ táa oo? 13Gbɛ̃ kũ à wèrekɔ̃aa pì dɔ̃ tó dínlo, zaakũ Yesu gɛ̃̀tɛ pari kũ ò kú gwenɔ tɛ́mɛ. 14Abire gbɛra Yesu a lè Luda ɔnn, akũ à pìnɛ: Ǹ ma, n aafiaa lè. Ǹsun durunna kɛ doro, de yã kũ à vãni de abirekũla sún n le doro yãi. 15Akũ gɔ̃gbɛ̃ pìi gɛ̀ɛ à ò Yuda gbãnadenɔnɛ kũ Yesu mɛ́ à tò a aafiaa lè.
16Akũ gbãnade pìnɔ wɛ́ tã̀ Yesua, kũ àdi yã bire takanɔ kɛ kámmabogɔrɔ zĩ yãi. 17Akũ Yesu wèḿma à pì: Ma De dìgɔ̃ zĩ kɛ kámmabonaa sarimɛ, lɛn matɛn kɛ lɛ se. 18Yã bire yãi gbãnade pìnɔ tɛn Yesu wɛtɛ ò a dɛ de káakula. Adi kɛ kũ àdi kámmabogɔrɔ zĩ yã daro ado yãnlo, kũ àdi pi Ludamɛ a De ũ, àtɛn sára kpá kũ Ludao yãimɛ.
Luda Nɛ́ ikoo
19Yesu ɛ̀ra à wèḿma à pì: Yãpuran matɛn oárɛ, Luda Nɛ́ dì fɔ̃ à yãke kɛ kũ a zĩda gbãnaoro, sé yã kũ à è a De tɛn kɛ baasiro, zaakũ yã kũ a De dì kɛ pínki, àkũmɛ a Nɛ́ pìi dì kɛ se. 20Zaakũ De Luda ye a Nɛ́i, àdi yã kũ àdi kɛ pínki mɔnɛ. Ani yã kũ a zɔ̃kɔ̃ de abirekũla mɔnɛ, ani bo á sarɛ. 21Lákũ De Luda dì gɛ̀nɔ vu à wɛ̃̀ndi kpáḿma nà, lɛn a Nɛ́ dì wɛ̃̀ndi kpá gbɛ̃ kũ à yeinɔa lɛ. 22De Luda dì yãkpatɛ kɛ kũ gbɛ̃keoro, à yãkpatɛkɛna gbãna pínki kpà a Nɛ́a, 23de baadi bɛ̀ɛrɛ li a Nɛ́nɛ, lákũ òdi li De Ludanɛ nà. Gbɛ̃ kũ àtɛn bɛ̀ɛrɛ li Luda Nɛ́nɛro, ade tɛn bɛ̀ɛrɛ li a De kũ à a zĩ̀inɛro. 24Yãpuran matɛn oárɛ, gbɛ̃ kũ àtɛni ma yã ma, akũsɔ̃ àtɛn gbɛ̃ kũ à ma zĩ náani kɛ, ade wɛ̃̀ndi kũ àdi lákaro vĩ. Yã ni vutɛaro, ade bò gan à gɛ̃̀ wɛ̃̀ndii gũmmɛ. 25Yãpuran matɛn oárɛ, gɔrɔke tɛn su à kà kɔ̀, kũ gɛ̀nɔ ni Luda Nɛ́ kòto ma, ń gbɛ̃ kũ ò mànɔ ni vu. 26Lákũ De Luda wɛ̃̀ndikpammana gbãna vĩ nà, lɛn à wɛ̃̀ndikpammana gbãna kpà a Nɛ́a lɛ dɔ. 27À yãkpatɛkɛna gbãna kpàa dɔ, kũ à de Bisãsiri Nɛ́ ũ yãi. 28Àsun tó abirekũ bo á sarɛro, zaakũ gɔrɔke tɛn su kũ gɛ̀ kũ ò kú mira gũnnɔ ni a kòto ma 29ò bɔtɛ ń pínki. Yãmanakɛrinɔ ni vu ò gɛ̃ wɛ̃̀ndii gũn, yãvãnikɛrinɔ sɔ̃ yãvutɛmmanaa gũn. 30Madì fɔ̃ mà yãke kɛ kũ ma zĩda gbãnaoro. Madì yãkpatɛ kɛ lákũ à òmɛnɛ nàmɛ, madì yãkpatɛ kɛ a zɛ́a, zaakũ madì ma zĩda pɔyeina wɛtɛro, sé gbɛ̃ kũ à ma zĩ pì pɔ́.
Yesu iko sèedadenɔ
31Tó má de ma zĩda sèedade ũ, de ma yã náani vĩro. 32Sèedade pãnde kun kũ àdi ma yã o, má dɔ̃ kũ ma yã kũ àdi o náani vĩ. 33Bee ákɔ̃nɔ, a gbɛ̃nɔ zĩ̀ Yahayaa, akũ à yãpura òárɛ. 34Mádi mɛ̀ kpá bisãsiri sèedakɛnaaaro, matɛni abirekũ oárɛ de à le à bo zia yãimɛ. 35Yahaya de lán fitila kũ à nana àtɛn gupura kũ bà, akũ a we à pɔnna kɛ̀ a gupurai gɔrɔ pla. 36Yã kũ De Luda dàmɛnɛ mà kɛnɔ, kũ matɛn kɛ pìnɔ deárɛ sèeda ũ, kũ De Luda mɛ́ à ma zĩ. Ma sèedaa pì de Yahaya pɔ́la. 37Ma De kũ à ma zĩ ma yã ò dɔ. Ádi a kòto ma zikiro, ádi wɛ́ kɛ siikɔ̃ kãaoro, 38a yã dí vutɛki le á swɛ̃̀ɛ gũnlo, kũ átɛn gbɛ̃ kũ à a zĩ̀ náani kɛro yãi. 39Adì mɛ̀ kpá Luda yã kyókɛnaaa, zaakũ adìgɔ̃ da gwen áni wɛ̃̀ndi kũ àdi lákaro len. Ma yãn takada pì tɛn o sɔ̃, 40ama átɛn gí su ma kĩnaai de à wɛ̃̀ndii pìi le. 41Matɛn sáabu wɛtɛ bisãsiri kĩnaaro, 42ama má á dɔ̃, má dɔ̃ kũ á ye Ludairo. 43Ma su kũ ma De tɔ́o, akũ ádi ma síro. Tó gbɛ̃ pãnde sù kũ a zĩda tɔ́o, áni a sí. 44Lákũ adì sáabu wɛtɛkɔ̃a nà, ama adì sáabu wɛtɛ Luda mɛ̀n do légelegea lɛro, áni kɛ dera à ma yã síi? 45Àsungɔ̃ da makũ mɛ́ mani gɛ́ kũ á yão ma De kĩnaaro, Musa kũ á wɛ́ dɔi mɛ́ ani gɛ́ kũ á yão. 46Tó a Musa yã sì, de a ma yã sì se, zaakũ ma yãn à kɛ̃̀ Luda yãn. 47Kũ ádi yã kũ à kɛ̃̀ Luda yãnnɔ síro, áni kɛ dera à ma yã síi?
Dewis Presennol:
YUHANA 5: BB2005
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Bisã Bible © SIM International, 2005.