Sɩngre 38
38
A Zʋʋda ne a Tamaar kibare
1Wakat-kãnga, a Zʋʋda zãagame n bas a ba-biisã n kẽng Adulam tẽng rao a yembr yʋʋr sẽn boond t'a Ira nengẽ. 2La beenẽ, a Zʋʋda yãnda Kana ned a Suwa bi-pugl n peeg n maan a paga, la a kẽe ne-a. 3La pagã rɩka pʋg n dog bi-ribla, la b pʋda biigã yʋʋr t'a Ɛɛre. 4Pagã leb n dɩka pʋg yɛs n dog bi-ribla, la b pʋda bi-kãng yʋʋr t'a Onan. 5Pagã leb n doga bi-ribl a to n pʋd a yʋʋr t'a Sela. Pagã sẽn wa na n dog bi-kãngã, rẽ t'a Zʋʋda rag n bee Keziibi.
6A Zʋʋda peega pag yʋʋr sẽn boond t'a Tamaar n kõ a bi-ribl-kãseng a Ɛɛr t'a maan a paga. 7A Zʋʋda bi-ribl-kãseng a Ɛɛr ka maan sẽn noom Sẽn-Ka-Saab ye. La Sẽn-Ka-Saab kɩtame t'a ki. 8Dẽ, a Zʋʋda yeela a Onan t'a peeg a kẽem a Ɛɛr pagã, n kẽ ne-a n dog kamb a kẽemã yʋʋr yĩnga. 9La a Onan sẽn ges tɩ kambã ka na n yɩ yẽnda kambã yĩnga, a sã n na n kẽ ne a kẽemã paga, a basdame tɩ rogmã bõn-buud koom raagd tẽnga, sẽn na n yɩlẽ n da rog kamb a kẽemã yʋʋr yĩng ye. 10La yẽnda sẽn dag n maan bũmb ningã rag n ka noom Sẽn-Ka-Saab sũur ye. La Sẽn-Ka-Saab kɩtame tɩ yẽnda me ki. 11Dẽ, a Zʋʋda yeela a bi-pag a Tamaar yaa: «Kell n tɩ zĩnd pʋg-kõt f ba wã zakẽ, hal tɩ mam biig a Sela bɩ.» A Zʋʋda rag n tagsdame tɩ yẽnda biig a Sela me na n kii wa a kẽem-dãmbã sẽn ki wã. Woto, a Tamaar lebg n kuila a ba wã zakẽ n tɩ zĩndi.
12La kaoosg pʋgẽ, a Suwa bi-puglã sẽn yaa a Zʋʋda pagã wa n kiime. La a Zʋʋda sũ-sãangã sẽn wa n sɛ, yẽnda ne a zoa a Ira sẽn yaa Adulam nedã tũu taab n kẽng Timna, zĩig ning b sẽn wõrsd a Zʋʋda rũm-bãoonegã. 13La b togsa a Tamaar t'a sɩdã ba rabda Timna n na n tɩ wõrs a rũm-bãoonego. 14Woto, a Tamaar yikame n yees a pʋg-kõtã fut n dʋʋge, la a bao fuug n pil a mengã n kẽng n tɩ zĩnd Enayim tẽnga noore, Timna sorã zugu. Bala, pagã yãame t'a Sela bɩɩme, la b ka rɩk yẽnda n kõ a Sela t'a maan a pag ye.
15A Zʋʋda sẽn yãnd-a wã, yẽnda tagsame tɩ yaa pʋg-yoodre. Bala, a nengã rag n pilame. 16La a Zʋʋda bʋdgame n bao-a n yeel-a yaa: «Wa tɩ mam data foom.» Bala, a Zʋʋda ka bãng tɩ yaa yẽnda bi-pagã ye. La pagã soka a Zʋʋda yaa: «Yãmb na n kõo maam bõe la y yaool n kẽ ne maam?» 17La a Zʋʋda leokame: «Mam na n yãka bull mam rũmsã sʋk n tʋm tɩ b wa kõ-fo.» La pagã yeelame: «Mam datame tɩ yãmb bao bũmb n gãneg ne maam hal tɩ ta yãmb sẽn na n tʋm bullã tɩ wa wã!» 18La a Zʋʋda sokame: «Bõe la fo rat tɩ mam gãneg ne foom?» La pagã yeelame: Mam datame tɩ yãmb rɩk y nugbĩngã, y sẽbdgã ne y rasaarã y sẽn zãadã n gãneg ne maam la y yaool n kẽ ne maam.» A Zʋʋda sɩd gãnega bõn-kãens fãa ne-a, la a kẽ ne-a, la a rɩka a Zʋʋda pʋga. 19La pagã yikame n looge, n tɩ yees a futã, n dɩk pʋg-kõtã fut n lebs n yeelge.
20A Zʋʋda yõka bullã, n tʋm a zoa wã sẽn yaa Adulam nedã, n yeel-a t'a tɩ kɩs pagã, la a reeg a te-gãnegdsã pagã nengẽ n wa. La a zoa wã kẽngame n ka tɩ yãnd pagã ye. 21La yẽnda soka tẽngã neb yaa: «Wẽn-naands zĩigẽ pʋg-yoodrã sẽn dag n be Enayim tẽngã noor n zĩ sorã kɩrengã bee yɛɛnẽ?» Bãmb leoka yẽnda tɩ wẽn-naands zĩigẽ pʋg-yoodr ka be beenẽ ye. 22La a lebg n leba a Zʋʋda nengẽ n tɩ yeel-a: «Mam ka yãnd pagã ye. Zĩ-kãng nebã meng yeelame tɩ bãmb ka yãnd wẽn-naands zĩigẽ pʋg-yoodr beenẽ ye.» 23Dẽ, a Zʋʋda yeelame: «Bɩ a tall bũmb ning sẽn be yẽnda nengẽ wã! Wa tɩ d ra bao yãnd n kõ d meng ye. Ade, mam tʋma bullã, la fo ka tɩ yãnd-a ye.»
24La sẽn wa n zems kiuug a tãab rẽ zugẽ, b wa n togsa a Zʋʋda t'a bi-pag a Tamaar yoome n dɩk yoob pʋga. Dẽ, a Zʋʋda yeelame tɩ b tall-a n yi tẽngã kɩreng n yõog-a bugum. 25La b sẽn wa n tar-a n yitã, a tʋmame tɩ b tɩ yeel a sɩdã ba yaa: «Yaa ned ning sẽn so te-bãmbã wã n kõ maam pʋgã! Mam kot-y lame tɩ y ges yaa ãnda n so nugbĩngã, sẽbdgã ne dasaarã.» 26A Zʋʋda sẽn yãnd teedã, a bãngame. Dẽ, a yeelame: «Pagã yaa nin-tɩrg n yɩɩd maam. Bala, mam ka rɩk-a n kõ m biig a Sela ye.» La a Zʋʋda ka leb n kẽ ne-a yɛs ye. 27Pagã rogem wakat sẽn ta, b mikame tɩ yaa kinkirs n be pʋgẽ wã. 28La a sẽn wa n dogdẽ wã, a yembr n tud a nugu, la pʋg-roagsã gãd-a lame n bao gĩs-miuug n loe a nugã, n yeel tɩ yaa yõwã n deng n yi pipi. 29La a sẽn foog a nugã, a to wã me yiime. La pʋg-roagsã yeelame: «Fo modgame n yi ne pãnga!» Dẽ, b pʋda a yʋʋr t'a Perɛtse#38.29 Perɛtse: Yʋʋrã rat n yeelame tɩ ‹modg n yiime.›. 30Rẽ poore, biig ning nug b sẽn loe ne gĩs-miuugã yaool n yiime. La b pʋda yẽnda yʋʋr t'a Zeera.
Dewis Presennol:
Sɩngre 38: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.