Yikri 3
3
Wẽnnaam yãka a Moyiis t'a fãag Israyɛlle
1A Moyiis rag n kɩɩmda a rɛɛmb a Zetro sẽn yaa Madiyã maan-kʋʋdã rũmsi. Yẽnda talla rũmsã n kẽng we-raoogã wã n ta Horɛɛbe, Wẽnnaam tãngẽ wã. 2#Tʋʋm 7.30-34La Sẽn-Ka-Saab malɛɛkã vẽnega a meng ne a Moyiis bug-witim pʋgẽ tuug sʋka. A Moyiis rag n getame, la ade, bugum n dag n wit tuugã sʋka, la a ka rɩt tuugã ye. 3A Moyiis yeelame: «Mam na n bʋdg n gesa yel-solem-kãngã. Yaa bõe tɩ bugmã ka rɩt tuugã?» 4La Sẽn-Ka-Saab sẽn yãnd tɩ yẽnda bʋdgame n na n gese, bãmb koɛɛgã yii tuugã sʋk n yeele: «Moyiisi! Moyiisi!» La yẽnda sakame n yeele: «Ad maam!» 5Dẽ, Wẽnnaam yeelame yaa: «Da kolg ka ye. Piid f neooda wã, bala, zĩig ning fo sẽn yɛsã yaa zĩig sẽn welg toore.» 6Bãmb leb n yeelame: «Mam yaa fo ba wã Wẽnnaam, n yaa a Abrahaam ne a Izak la a Zakoob Wẽnnaam.» La a Moyiis luda a nenga, bala, yẽnda rag n zoeta rabeem n ka rat n ges Wẽnnaam ye.
7Sẽn-Ka-Saab yeelame yaa: «Sɩdã, mam yãnda m nebã sẽn be Ezɩptã namsgã. Mam wʋma bãmb kelemsã, tʋʋm-soaadbã sẽn namsd bãmb tɩ b kelemdẽ wã. N-yẽe! Mam mii toog ning sẽn tar bãmbã. 8Mam sigame n na n fãag bãmb Ezɩpt nebã nusẽ, la m yiis bãmb soolem-kãng pʋgẽ n tall bãmb n kẽng tẽn-sõng sẽn yaa bedr pʋgẽ. Yaa tẽng sẽn pid ne bĩisim la sɩɩd wʋsgo. Yaa tẽng ning Kana-rãmbã ne Hɛt-dãmbã la Amoor-dãmbã ne Ferɛɛz-rãmbã la Hevi-rãmbã ne Zebuus-rãmbã sẽn be wã. 9Moasã, Israyɛll nebã kelems taa maam. La sẽn paas me, mam yãnda namsg ning Ezɩpt nebã sẽn namsd bãmbã. 10Moasã, bɩ f kẽnge. Mam tʋmda foom Faarõ nengẽ tɩ f tɩ yiis mam nebã sẽn yaa Israyɛll kambã Ezɩpt soolmã pʋgẽ.»
11La a Moyiis yeela Wẽnnaam yaa: «Maam la ãnda n na n kẽng Faarõ nengẽ n tɩ yiis Israyɛll nebã Ezɩpt soolem pʋgẽ?» 12Wẽnnaam yeelame: «Mam na n zĩnda ne foom. La ad bãnd ning sẽn na n kɩt tɩ fo bãng tɩ yaa maam n tʋm foom. Fo sã n tõog n tall nebã n yi Ezɩpt soolmẽ wã, bɩ y waoog Wẽnnaam tãn-kãngã zugu.»
13 #
Yik 6.2,3 Dẽ, a Moyiis yeela Wẽnnaam yaa: «Beneere! Wa mam sã n kẽng Israyɛll nebã nengẽ n tɩ yeel bãmb tɩ bãmb yaab-rãmbã Wẽnnaam n tʋm maam b nengẽ, tɩ bãmb sok maam a yʋʋre, mam na n leok-b lame tɩ bõe?» 14#Vẽn 1.4,8La Wẽnnaam yeela a Moyiis yaa: «Mam yaa m sẽn yaa-a soabã.» La bãmb leb n yeela yẽnda n paase: Tɩ yeel Israyɛll nebã a woto: «A ‹Mam yaa› n tʋm maam yãmb nengẽ.» 15Wẽnnaam leb n yeela a Moyiis t'a tɩ yeel Israyɛll nebã yaa: «Sẽn-Ka-Saab sẽn yaa yãmb yaab-rãmbã Wẽnnaam, n yaa a Abrahaam ne a Izak la a Zakoob Wẽnnaamã n tʋm maam yãmb nengẽ.» Yõwã na n yɩɩ mam yʋʋr wakat fãa. Nebã na n boonda maam ne yʋ-kãng zamaan woo zamaane. 16Kẽng n tɩ tigs Israyɛll nebã kãsem-dãmbã n yeel-b yaa: «Sẽn-Ka-Saab sẽn yaa yãmb yaab-rãmbã Wẽnnaamã puka b meng ne maam. Bãmb yaa a Abrahaam ne a Izak la a Zakoob Wẽnnaam. Bãmb yeela maam yaa: «Mam waame n na n sõng yãmba, b sẽn maand yãmb bũmb ning Ezɩpt tẽngã yĩnga. 17Mam yeelame tɩ m na n yiisa yãmb namsg ning b sẽn namsd yãmb Ezɩpt tẽngã pʋgẽ wã pʋga, n tall yãmb n kẽng Kana nebã ne Hɛt-dãmbã la Amoor-dãmbã ne Ferɛɛz-rãmbã la Hevi-rãmbã ne Zebuus-rãmbã tẽngẽ. Yaa tẽng sẽn pid ne bĩisim la sɩɩd wʋsgo.» 18Dẽ, bãmb na n kelga fo koɛɛgã. Bɩ foom ne Israyɛll kãsem-dãmbã kẽng Ezɩpt rĩmã nengẽ n tɩ yeel yẽnda yaa: Sẽn-Ka-Saab sẽn yaa Ebre nebã Wẽnnaamã waa tõnd nengẽ. Dẽ, tõnd kota yãmb sor moasã n kẽng rasem a tãab kẽnd we-raoogã pʋgẽ n tɩ maan maoong Sẽn-Ka-Saab sẽn yaa tõnd Wẽnnaamã yĩnga. 19Mam mii hakɩɩk tɩ sã n ka tũ ne nug sẽn tar pãnga, Ezɩpt rĩmã ka na n sak n bas yãmb tɩ y loog ye. 20La mam na n tẽega m nug n wẽ Ezɩpt ne bõn-bãn nins fãa mam sẽn na n maan bãmb sʋkã. Dẽ poore, a na n basa yãmb tɩ y looge. 21#Yik 12.35,36Mam na n kɩtame tɩ Ezɩpt nebã nong nin-kãensã. Yãmb sã n wa na n looge, y ka na n loog zaalem ye. 22Pag fãa na n kos a yaka, ne pag ning sẽn be yẽnda zakẽ wã wanzuri teed ne sãnem teedo, la futu, tɩ y yeelg y kom-dibli wã ne y kom-pugli wã. Yaa woto la yãmb na n pɩɩs Ezɩpt nebã paoongã.
Dewis Presennol:
Yikri 3: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.