San Marcos 16
16
Ntátiaku Jesús
(Mt. 28:1-10; Lc. 24:1-12; Jn. 20:1-10)
1Tá ni̱ya̱ꞌa ki̱í sáto̱, ña̱ kúú ki̱í i̱í, ñá María Magdalena, ñá María nána ra̱ Jacobo, ra xíꞌin ñá Salomé, xi̱ín‑ná ntiutiá rá támi xáꞌa̱n kua̱ꞌa̱n xíꞌin‑ná ná chika̱a̱‑ná‑rá sa̱tá ikí ku̱ñu̱ Jesús. 2Ra naꞌa va̱ꞌa ña̱ kúú ki̱í nuú semána, ki̱í ntumínko, tá sa̱kán va̱xi kana ni̱ka̱ntií nta̱kiꞌin‑ná kua̱ꞌa̱n‑ná míí nu̱ú íyo kavá nu̱ú ni̱ntu̱xi̱n Jesús. 3Ra nani tá kua̱ꞌa̱n‑ná ichí, káchi xíꞌin táꞌan‑ná saá:
―¿Yoo kúú na̱ chinteé táꞌan xíꞌin‑yó ña̱ ná sákutiaꞌa‑yó yu̱ú ña̱ ntási yuꞌú kavá ikán?
4Suu tá ni̱xa̱a̱‑ná, xi̱ni‑ná ña̱ xa̱ xi̱kutiaꞌa míí yu̱ú ña̱ ntási yuꞌú kavá ikán, ra yu̱ú káꞌnu nti̱va̱ꞌa kúú‑ña̱. 5Tá ni̱ki̱ꞌvi‑ná ini kavá xi̱ni‑ná iin ra̱ tia̱a îtiá íntúꞌú koo‑ra̱ xiyo kuáꞌa, ta ntíxi‑ra̱ iin saꞌmá yaa níi; ta ni̱yǔꞌvi‑ná. 6Suu míí ra̱ tia̱a ikán ka̱chi‑ra̱ saá:
―Küyǔꞌvi‑ntó; xíni̱‑yu̱ ña̱ ntúkún‑ntó Jesús, Ña̱ ñuu Nazaret, Ña̱ xi̱takaa ntaꞌá krûsi̱. Xa̱ nta̱tiaku‑Ña̱; köo ka‑Ña̱ íyo yóꞌo. Kutoꞌni‑ntó nu̱ú nta̱koo‑na̱‑Ña̱. 7Kuáꞌan‑ntó, ra ntatúꞌun‑ntó xíꞌin Pedro xíꞌin ntikuíi ka na̱ sákuaꞌa nu̱ú‑Ña̱: “Xa̱ nta̱kunúú‑Ña̱ kua̱ꞌa̱n‑Ña̱ nu̱ú‑ntó chí Galilea; ta ikán kuni‑ntó‑Ña̱, tá ku̱va ni̱ka̱ꞌa̱n‑Ña̱ xíꞌin‑ntó.”
8Ra ná síꞌi ni̱ta̱ni̱‑ná míí nu̱ú íyo kavá nu̱ú ni̱ntu̱xi̱n Jesús ikán, xínu‑ná kua̱ꞌa̱n‑ná, chi iin kísi mií‑ná ña̱ íyǔꞌvi‑ná, ra köníka̱ꞌa̱n‑ná nii iin ña̱ꞌa xíꞌin nta̱a̱ nii iin‑na̱, chi ni̱yǔꞌvi nti̱va̱ꞌa‑ná.#16:8 Tutu ña̱ tia̱a ntaꞌá‑na̱ tá xi̱naꞌá, köo versíkulo i̱i̱n iin saá nta̱a̱ o̱ko̱ va̱xi.
Kána Jesús nu̱ú ñá María Magdalena
(Jn. 20:11-18)
9[Ra tá nti̱ꞌi nta̱tiaku Jesús tá ni̱tu̱vi naꞌa ki̱í ntumínko, ña̱ kúú ki̱í nuú semána, ra xina ka nuú ka̱na‑Ña̱ nu̱ú ñá María Magdalena, ñá ta̱vá‑Ña̱ u̱xa̱ ta̱chí u̱ꞌvi̱ ini. 10Ra ñá ikán ni̱xa̱ꞌa̱n‑ñá nta̱túꞌun‑ñá xíꞌin na̱ ntíku̱n Jesús, na̱ kúsuchí ini, ra xáku‑na̱ xa̱ꞌá‑Ña̱. 11Ra tá xi̱ni so̱ꞌo‑na̱ ña̱ nta̱túꞌun‑ñá xíꞌin‑na̱ ña̱ tiáku Jesús, ra xi̱ni‑ñá‑Ña̱, köníkantíxa‑na̱‑ñá.
Kána Jesús nu̱ú u̱vi̱ na̱ ntíku̱n ñaꞌá
(Lc. 24:13-35)
12Tá nti̱ꞌi yóꞌo, xa̱ nta̱sa̱ma ku̱va káa Jesús tá ka̱na‑Ña̱ nu̱ú u̱vi̱ na̱ ntíku̱n‑Ña̱ tá kua̱ꞌa̱n‑na̱ yukú. 13Ta na̱ yóꞌo ni̱xa̱ꞌa̱n‑na̱ nta̱túꞌun‑na̱ xíꞌin sava ka‑na̱, suu nii na̱ yóꞌo köníkantíxa‑na̱‑na̱.
Xáꞌntia Jesús chiñu nu̱ú na̱ sákuaꞌa nu̱ú‑Ña̱
(Mt. 28:16-20; Lc. 24:36-49; Jn. 20:19-23)
14Suu tá nu̱ú ntíꞌi, ka̱na Jesús nu̱ú u̱xi̱ iin saá na̱ sákuaꞌa nu̱ú‑Ña̱, tá ntée‑na̱ nu̱ú mésa; ra ntu̱kue̱ꞌe̱‑Ña̱ xíꞌin‑na̱ xa̱ꞌá ña̱ ntakú ini‑na̱, saá chi köníkantíxa‑na̱ na̱ xina nuú ka xi̱ni ña̱ xa̱ nta̱tiaku‑Ña̱. 15Ra ka̱chi‑Ña̱ saá xíꞌin‑na̱:
―Kuáꞌan‑ntó iin níi saá ña̱ yúví, ta ntakani‑ntó tu̱ꞌun va̱ꞌa Ntióxi̱ nu̱ú ntikuíi na̱ yuví. 16Na̱ ná kantíxa, ra kuntiutiá‑na̱, na̱ ikán kuu na̱ ka̱ku; suu na̱ ná käntíxa, na̱ ikán kuu na̱ ntoꞌo ini xa̱ꞌá kua̱chi‑na̱. 17Ta ña̱ yóꞌo kúú ña̱ kuvi kasa na̱ kántíxa yu̱ꞌu̱: xíꞌin nteé‑i̱ tavá‑na̱ ta̱chí u̱ꞌvi̱ ini na̱ yuví; ra ka̱ꞌa̱n‑na̱ iinka tu̱ꞌun; 18ra tiin‑na̱ ko̱ó kue̱ꞌe̱ xíꞌin ntaꞌá‑na̱, ra nii ná koꞌo‑na̱ ña̱ꞌa ña̱ xáꞌní ñaꞌá, köo‑ña̱ ntoꞌo‑na̱ xíꞌin‑ña̱; ta saá tu chinúú‑na̱ ntaꞌá‑na̱ xi̱ní na̱ kúꞌvi̱, ra ntuva̱ꞌa‑na̱.
Ntáa Jesús chí ntiví
(Lc. 24:50-53)
19Ta tá nti̱ꞌi ni̱ka̱ꞌa̱n Xitoꞌo‑yó xíꞌin‑na̱, nta̱kiꞌin Ntióxi̱‑Ña̱ chí ntiví, ra nta̱kuntúꞌú‑Ña̱ xiyo kuáꞌa‑Ña̱. 20Ra na̱ ntíku̱n‑Ña̱ ka̱na‑na̱ kua̱ꞌa̱n‑na̱ ntakani‑na̱ tu̱ꞌun va̱ꞌa iin níi xiyo. Ta chi̱nteé míí Xitoꞌo‑yó‑na̱, ra xa̱ꞌá ña̱ xítúꞌun kíxa‑na̱ xíꞌin nteé mií‑Ña̱ sána̱ꞌa̱‑Ña̱ ña̱ nta̱a̱ kúú ña̱ ntákani‑na̱.]
Dewis Presennol:
San Marcos 16: jmx
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active), Wycliffe Bible Translators, Inc. All rights reserved.