MATEO 8
8
Woi ’jano ejiichö’tä’jödö
1Jöö de’coiño’jödö Jesuuquidiito wä’ta’jäcä jooje soto cönä’ja’to chääjadä. 2Yaawä dhanwa cöneejä, woi ’jano. Tä’mudhe cönä’döi Jesuuquidiito je’taca; cönä’döaacä chäwwä:
—Cajiichaana, yeejichö’tä’se aweiya’jäcä yeejichö’täjai ma; quee cönä’döaacä.
3Yaawä Jesuuquidiito tamäädö que cönaajojoi; cönä’döaacä chäwwä:
—Adheejichö’tä’se wa; nännamjö’ñojo mädä owoichö; quee cönä’döaacä.
Yaawä dea mma yoichö cöne’jöi. 4Yaawä Jesuuquidiito cönä’döaacä chäwwä:
—Eneecä’ma, soto wwäiñe maneecammajäätöi’che mädä; Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.
Suddau edhaajotoncomo anoonö adonca’jödö
5Cajeedamu ña Jesuuquidiito wä’döa’jäcä suddau edhaajotoncomo chäwwadäädä cöneejä; domaanoje töwö cönä’jaacä. 6Töwö cönä’döaacä Jesuuquidiito wwä:
—Cajiichaana, yaanonö ä’saca na tä’wötö jo; secumje na; jooje näntunaanö’a.
7Jesuuquidiito cönä’döaacä chäwwä:
—Wadoncata’ñojo; quee.
8Yaawä ñäädä suddau edhaajotoncomo cöneccujä’acä:
—Cajiichaana, aashichaatojöönö öwö; ye’saca omomjai’cha ma. Töwa’deuwe mmaane adha’deucwä, yaanonö aadoncaiye. 9Tädhaajäcaato mmaja öwö dea. Yaanonö mmaja töweiye naicho dea, suddau. “Äjääne;” ca’jäcä öwwä anejja wwä, töötä yaawä ñäädä. “Ä’cäde;” ca’jäcä, töwe’e yaawä, “Mädä tödööcä;” ca’jäcä öwwä yaanonö wwä, tönnöe yaawä töwö; quee cönä’döaacä ñäädä suddau edhaajotoncomo Jesuuquidiito wwä.
10Jesuuquidiito wacö’je cönäätaacä yääje ya’deuwödö. Yaawä töjaadoncomo wwä cönä’döaacä:
—Chäänönge yääje wä’döa äwwäiñe, mädääjato ecaanö’nei aneene’da wäänene, iisadaaediitacoomo jadä’jödöödä. 11Yääje wä’döa äwwäiñe, jooje soto ne’aato’de shii weja’catoojo dö’senno, shii womontojo dö’senno mmaja. Tönwanno Wanaadi jataacäi nääwashinchaato’de Aawadán jadä, Isaaca jadä mmaja, Jacoowo jadä mmaja. 12Ñanno Wanaadi sotoije eijai’chomo’jödö mmaane jödo’na nätäämajaato’de tööjano’taca. Iiña naamoaato’de; jooje cone’da naato’de; quee cönä’döaacä Jesuuquidiito töjaadoncomo wwäiñe.
13Yaawä Jesuuquidiito cönä’döaacä suddau edhaajotoncomo wwä:
—Äjääne adhe’saca; aneecamjödö nönge neja’dä’a’de; quee.
Yäätä shii weichö dea mma ñäädä suddau edhaajotoncomo anoonö cönaadoncai.
Peedhodo wo’jödö adonca’jödö
14Yaaje mma yaawä Peedhodo mmai chaca Jesuuquidiito womonga’jäcä, yo’jödö cöneedantäi tä’wötö jo, wedö’näje. 15Yaawä Jesuuquidiito dhamäädö cönaajojoi. Eccö’da Peedhodo wo’jödö cönä’döi yaawä. Töwö cönammöi; chääwanshiñööcomo cöneejodöi yaawä.
Jooje soto adonca’jocoomo
16Yaawä cho’momöödawä Jesuuquidiito döiña soto cönnejooto odo’sha ’ja’como. Töwö cömja’canö’joicho odo’shancomo tooniye töwa’deuwö’jödö que mma. Tameedä cädäija’como mmaja cönaadoncaicho dea. 17Mädääje cöneeja’dätäi chäänönge Isaía nimennä’jödö yä’dödö wetä, ñäädä Wanaadi wa’deuwödö ecammanei: “Töwö dea cöcäädäichöcoomo cöneejichö’täi, jäduuje’da cöweichöcoomo mmaja;” quee immennä’jödö naadö.
Jesuuquidiito jadä töwei’sha’como’jödö
18Tawoodhecääcä soto we’jumma’como eneea’jäcä Jesuuquidiito wwä, töwö cönä’döaacä:
—Ma’chomo; cöötätäiye chu’jä mänsemjo; quee.
19Yaawä dhanwa cöneejä chäwwadäädä; judhío owaanomaaneichomooje cönä’jaacä. Töwö cönä’döaacä Jesuuquidiito wwä:
—Ajaadä wötäiye, Owaanomaanei. Äätäjäätödö waadäi täjä’jai wa ajaadä; quee cönä’döaacä.
20Jesuuquidiito cönä’döaacä chäwwä:
—Que’cweedu täwö’que töweiye naicho, tadiiñaamo mmaja taiñanque töweiye naicho dea. Soto nnedö mmaane iiñö’tojo ’je’da na; quee cönä’döaacä Jesuuquidiito.
21Yääje mma yaawä anejja Jesuuquidiito nowaanomaadö cöna’deuwöi; cönä’döaacä chäwwä:
—Cajiichaana, jaaja weneeta’ñojo awa’de, yääma’jäcä wewaacaiye’de; quee cönä’döaacä.
22Jesuuquidiito cönä’döaacä:
—Ma’che jaadä. Yä’ja’a’como dea mmaane newaaca’ña’to töwä’ja’a’como; quee cönä’döaacä.
Jesuuquidiito wwä jejeichä edennanö’jo’jödö
23Jesuuquidiito wä’ta’jäcä cudiiyada aca ñoowanoomadö mmaja cönä’toicho inchäcä. Cönääma’toicho yaawä. 24Yääje mma yaawä jejeichä cönaajäntäi, joojato. Cudiiyada cönaadö’taacä madaataca que. Jesuuquidiito mmaane wönö’näje cönä’jaacä. 25Ñoowanoomadö conemjacaicho yaawä; cönä’döa’to:
—Cajiichaana, ñaa ewaanacaacä; cönnadöödöcoomo dajaane mädä.
26Jesuuquidiito cönä’döaacä:
—¿Ane’que’nei tösaade maato dea? ¿She’caasa mma ca aneecamjödööcomo nai? quee.
Yääje mma yaawä töwö cönammöi. Jejeichä cöneedennanö’joi, tuna mmaja. Tameedä uncwe’da cönä’jaacä yaawä. 27Ñanno chääjadoncomo cönääcatoncaicho yaawä; cönä’döa’to:
—¿Änääcöömääne määdhä? Jejeichä jadä’jödöödä dha’deddu töneeta, tuna mmaja; quee cönä’döa’to.
Odo’sha ’ja’como Cadhaada ñancomo adonca’jocoomo
28Yaawa chu’jä mänsemjona cönä’döicho, Cadhaada ña. Yaawä aacä dhanwaacomo odo’sha ’ja’como cöneeja’caicho Jesuuquidiito wwadäädä, äwa döiñanno. Ñanno dhanwaacomo tönoiñe cönä’ja’to, yää ai weja’do’to’me’da tödööjoone. 29Tönwanno töcä’de cöna’deuwa’to Jesuuquidiito wwä; cönä’döa’to:
—¿Ane’cotoojo ñaa maquiimaanä, amäädä Jesuuquidiito, Wanaadi nnedö? ¿Ñaa mamincha ca meejä chu’nädö aca ä’dö’dadä mmädä? quee cönä’döa’to.
30Yäätä amoinche’da jooje cuushi cönääwashincha’to. 31Yaawä ñanno odo’shancomo cönä’döa’to Jesuuquidiito wwä:
—Ñaa ja’canö’ja’jäcä äwwä, cuushi acaiñe ñaa amonno’jocä; quee cönä’döa’to.
32—Ojoncomoone ’quene; quee cönä’döaacä Jesuuquidiito chäwwäiñe.
Odo’shancomo cöneeja’caicho yaawä ñanno dhanwaacomo acannoiñe; cuushi acaiñe cönoomomöicho. Ñaano cuushi cöneeca’tömöicho yaawä yaataca’jödö wwadäädä. Chu’jä aca cönä’meicho yaawä, na’cwaca töwä’jajoodöcoomoje mma.
33Cuushi edai’chännamo’jödö cönäänejeicho yaawä tösaadöcoomoje. Jataaca cöntonto. Tameedä yää cöneecammajäätöicho, odo’sha ’ja’como jäcäiñe yeeja’dätä’jödö mmaja. 34Yääje mma yaawä tameedä yää jataawoncomo cöntonto Jesuuquidiito ene. Tönwanno Jesuuquidiito cönenno’ja’to yaawä töjaatawonnoiñe.
Dewis Presennol:
MATEO 8: MCH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2014 Reservados todos los derechos