MATEO 22
22
Jötaanä dö’seeno ecammajäätö’jödö
1Yaawä Jesuuquidiito cönaajäntäi chea yö’seeno ai chäwwäiñe töwa’deuwödö. Töwö cönä’döaacä:
2—Edääje na Wanaadi cajiichaanaje yeichö. Dhanwa cönä’jaacä cajiichaana; töwö tönnedö jötaadö enennamooje soto cönaajä’maicho. 3Töwö tanoonö cönaanontoicho tönne’jo’jödö a’dejjaiñe. Ñanno töweejö’seiñe’da cönä’ja’to. 4Anejjacoomo tanoonö daja cönaanontoicho dea yaawä; cönä’döaacä chäwwäiñe: “Ñanno a’dejja’como wwä ecammatantäcä’de. Edääje caichäcä’de chäwwäiñe: Tameedä tojoodöjä’e na äwänshi. Jaaca ejuiñanö’ca’como namiiñä’caicho. Tameedä chäänönge na. Jötaanä eneetantäcä; quee caichäcä’de;” quee cönä’döaacä ñäädä dhanwa tanoonö wwäiñe. 5Ñanno a’dejja’como aneeta’da dea cöneiya’to. Anejja cöntämä tönaudä’jödö aca, anejja ’quene tötaadawaajui aca. 6Anejjacoomo cönaajoicho ñäädä töwaajä’maamö anoonö; cömmaminchaicho. Cömjajoicho yaawä. 7Yää eta’jäcä töwwä ñäädä cajiichaana cönäätömai jooje. Tösootoi suddau cönaanontoicho yaawä ñanno töja’nenaamo’jödö töjaajodööcomo wetä, immaichomo ucaadö wetä mmaja. 8Yaawä ñäädä cajiichaana cönä’döaacä tösootoi wwäiñe: “Tameedä tojoodöjä’e na jötaanä dötoojo. Yaawääne’ ñanno a’dejja’como’jödö chäänönge’da nä’janto. 9Yääje yeijäcä jata antai ojoncomo, tameedä ääma weichö wa’cä. Tameedä soto a’dejjatääcä’de, äwwäiñe edantädö waadäi, jötaanä eneetaiyeto;” quee cönä’döaacä. 10Shootoi cöntonto yaawä ääma tai. Soto cöna’dejjaicho yaawä tameedä, edantädööcomo waadäi, aashicha’como mmaja, conemjöncomo mmaja. Yaawä soto cöneejoto jooje, jötaanä ene, maa tutu’canno’joone.
11“Yaawä cajiichaana cönoomomöi maa taca, ñanno jötaanä enennamo eneiñe. Dhanwa cöneedantäi yaawä, jötaatojo awä’da yeewontaajä. 12Chäwwä cönä’döaacä: “Weichacoono, ¿aaquene mmaja jötaatojo awä’da mmädä sadä odhoomomöi chea?” quee cönä’döaacä. Ñäädä äucwätä’da cönä’jaacä. 13Yääje mma yaawä ñäädä cajiichaana cönä’döaacä tösootoi wwäiñe: “Dhajäädö jäcä imööjä’täcä, ijoodedö jäcä mmaja; tööjano’taca emaatäcä. Iiña naamoa’de; jooje cone’da na’de;” quee cönä’döaacä. 14Jooje a’dejja’como naatoodö’je; e’ta’como jaiñoone mmaane äächädä mma; quee cönä’döaacä Jesuuquidiito jaadiseeo wwäiñe.
Acu’shänä wwä jödaata utuudu
15Yääje mma yaawä jaadiseeo cöntonto; tönwannoje dea cöna’deuwa’to cone’da Jesuuquidiito a’deudeme’jotoojo jäcä, chääjäcä cone’da töwa’deuwödööcomo wetä yaawä. 16Tönwanno jaadiseeo tönoowanoomadö cönenno’jaicho yaawä Jesuuquidiito döiña, Edoodhe sotoi jadäiñe. Ñanno cönä’döa’to Jesuuquidiito wwä:
—Owaanomaanei, ñaa owaanäcä na chäänöngatooje aweichö, Wanaadi a’deddu jäcä chäänönge tönoowanooma aweichö mmaja. Ooto’jodhe soto ännö’da ma amäädä, ye’wono woije mma anemmenca’da aweijäcä. 17Yääje yeijäcä edääje adheecamma’jo’se ñaa na: ¿Aaquene nichö’taanä äwwä? ¿Aashicha eijai ñai jödaata utuudu acu’shänä wwä, cone’daane? quee cönä’döa’to Jesuuquidiito wwä.
18Jesuuquidiito dhowaanäcä cönä’jaacä cone’da ta’deudeme’jo’se yeichöcoomo. Töwö cönä’döaacä:
—Yääjönö wa’co’como wäänejoodö änwanno. ¿Ane’cotoojo cuyuunacaato? 19Jödaata eneejotääcä, yää acu’shänä wwä tu’emö; quee cönä’döaacä.
Tönwanno jödaata cuntuicho Jesuuquidiito wwä. 20Yää eneea’jäcä töwö cönä’döaacä chäwwäiñe:
—¿Änääcö imennaajä mä’dä chääjäcä naadö, änääcö eetö imennaajä mmaja? quee cönä’döaacä.
21Tönwanno cönä’döa’to:
—Acu’shänä imennaajä mä’dä, töwö chäätö mmaja.
Yaawä Jesuuquidiito cönä’döaacä chäwwäiñe:
—Acu’shänä wwä u’täcä töwö chäwwono. Wanaadi wwono mmaane Wanaadi wwä u’täcä; quee cönä’döaacä Jesuuquidiito.
22Yää eta’jäcä tönwanno cöneeta’jöjäätöicho. Jesuuquidiito cönnämäicho yaawä; cöntonto yaawä.
Töwäämaajo jonno waadoncanä jäcä Jesuuquidiito ecamma’jo’jödö
23Yää anooto awä dea anejjacoomo saadhuseeo cöntonto Jesuuquidiito ene, ñanno töwäämaajo jonno waadoncanä aneecanö’jöncomo. Tönwanno cönä’döa’to:
24—Owaanomaanei, Moisé yääje cönä’döaacä: “Dhanwa enneca’da yääma’jäcä, dhacoonomjödö ijiiñamomjödö dö’tä ä’döjai ña yaawä, töweichacoono atöödö tödöödö wetä:” quee cönä’döaacä Moisé. 25Ñaa owaano cönä’ja’to aacä amoojato dhanwaacomo, ñanno dea. Yuichoncomo cömjötai. Cönäämai yaawä eneeca’dadä. Töjiiñamo cönoowonchai tacoono dö’tä yä’dödö wetä. 26Chäänönge mmaja dhacoonomjödö; yääje mmaja aaduwaawoto, dhacontoncomo yääje mmaja. Tameedä ñanno aacä amoojato’como ñäädä wodi jadä cönä’ja’to. 27Yaawä jeene ñäädä wodi cönäämai. 28¿Aaquene eichai’che yaawä töwäämaajo jonno waadoncanaawä? ¿Äshono jiiñamooje nai’che ñäädä wodi, ñanno aacä amoojato’como ijiiñantoncomo’jödö? quee cönä’döa’to.
29Jesuuquidiito cöneccujä’a’to; cönä’döaacä:
—Änwanno chäänönge’da adha’deuwato odhoowanääcäiñe’da yeijäcä Wanaadi a’deddu imennaajä, Wanaadi jäduudu odhoowanääcäiñe’da yeijäcä mmaja. 30Töwäämaajo jonno waadoncanaawä ijööta’da naato’de yaawä, tönnacontoncomo aniiñonoojo’da mmaja. Amoode caju ñancomo nönge mma naato’de yaawä. 31¿Töwäämaajo jonno waadoncanä jäcä Wanaadi wa’deuwödö imennaajä ana’de’tä’da ca meiya’quene? Töwö Wanaadi cönä’döaacä: 32“Öwö ñäädä Aawadán Wanaadiyö, Isaaca Wanaadiyö mmaja, Jacoowo Wanaadiyö mmaja;” quee cönä’döaacä Wanaadi. Ñanno Aawadán töwä’jajo’jocoomo weichaame nudä naato. Dha’da ei’jo Wanaadi chäädhajootoncomooje ätä’tä’da eichöne’; quee cönä’döaacä Jesuuquidiito saadhuseeo wwäiñe.
33Yää eta’jäcä soto wwäiñe tönwanno cöneeta’jöjäätöicho, töseedujä’ne ñoowanoomadö weijäcä.
Waanontänä cho’jodha’como
34Jesuuquidiito wwä saadhuseeo eta’jöichajo’jödö jäcä eta’jäcä jaadiseeo wwäiñe, tönwanno daja cöne’jummaicho yaawä Jesuuquidiito döiña. 35Yaawä judhío owaanomannamo jimmotoncomo oneejadööje mmädä Jesuuquidiito cöneecamma’joi; cönä’döaacä:
36—Owaanomaanei, ¿äshono yää waanontänä cho’jodha’como jaiñoone? quee cönä’döaacä.
37Jesuuquidiito cönä’döaacä chäwwä:
—“Adheedhajä Wanaadi ijummacä adheewanö jadäädä, odo’tadö jadäädä mmaja, ätö’tajäatödö jadäädä mmaja.” 38Mädä yää waanontänä cho’jodha’como jaiñoone. 39Edä yää yää ’jejaato waanontänä, mädä nöngato mmaja: “Aweichacoono ijummacä amäädä äwä’jummadö nönge dea.” 40Mädä yää tameedä waanontänä ju’jä, yää Moisé nimennä’jödö naadö, tameedä Wanaadi a’deddu ecammajä’nnamo nimenno’jocoomo ju’jä mmaja; quee cönä’döaacä Jesuuquidiito jaadiseeo wwäiñe.
¿Änääcö weichö ñäädä Äwaanacaanei?
41Yaawä Jesuuquidiito jaadiseeo we’jumma’como 42cöneecamma’joicho:
—¿Aaquene ätö’tajä’ato Äwaanacaanei jäcä? ¿Änääcö weichö töwö? quee cönä’döaacä:
—Dawí weichö töwö; quee cönä’döa’to ñanno yaawä.
43Yaawä Jesuuquidiito cönä’döaacä chäwwäiñe:
—Yääje yeiya’jäcä, ¿ane’que’nei Epíiditu Santo woije Dawí tädhaajäje cöne’taacä? Edääje töwö Dawí cönä’döa’dö naane’:
44Cajiichaana cönä’döaacä Yeedhajä wwä:
“Önnäcä ataajimaacä, ämu’demjönö dö’se,
odho’cäi ätu’de’tännamo tödöödö wa’cä öwwä;”
quee Cajiichaana cönä’döaacä; quee cönä’döaacä Dawí.
45¿Aaquene mmaja Dawí nnedööje Äwaanacaanei eijai ñai chea, töwö Dawí tädhaajäje töne’tä yei’jödö weichaame mmaja? quee cönä’döaacä Jesuuquidiito.
46Tönwanno eccujo’tojo ’je’da cönä’ja’to. Yää ncäcäädä Jesuuquidiito tönoiñe töneene cönä’ja’to, ane’cä’cä jäcä ecamma’jo’se’da.
Dewis Presennol:
MATEO 22: MCH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2014 Reservados todos los derechos