MATEO 20
20
Tadaawaaju tödönnamo dö’seeno
1“Wanaadi cajiichaanaje yeichö na edä nono de’wono tönaudäcaato töweiye naichöje. Yaawaanadaawä ñäädä cöntämä tönaudä’jödö awä töweetadaawa’cajaamo wetä. 2Töweetadaawa’cajaamo wwäiñe töwö cöneecammai ejeemato’como töwwä chääwaadäiñe tooni jödaata tooni anooto wetadaawa’cajo’jä. Tönaudä’jödö aca cönaanontoicho yaawä, etaadawa’cajo. 3Cawä shii wä’döa’jäcä töwö cöntännea yaawä jata antaca. Yäätä soto cöneedantoicho, tötaadawaajuichemjöncomo. 4Töwö cönä’döaacä chäwwäiñe: “Änwanno mmaja ojoncomoode naudä’jödö aca. Chäänönge maneejemaato’de yaawä;” quee cönä’döaacä. Tönwanno cöntonto yaawä etaadawa’cajo. 5Anunnaque yeichö ñäädä tönaudäqueemö soto wetäiñe cöneiya’dea, yää ’jeje i’ya’wä yeichö mmaja. 6Cho’momöödawä cöntännea jata antaca mmaja; anejjacoomo cöneedantoicho tötaadawaajuichemjöncomo. Töwö cönä’döaacä chäwwäiñe: “ ¿Ane’que’nei ano ñadäädä eetä maato etaadawa’cajo’da?” 7Ñanno cönä’döa’to yaawä: “Ñaa anontänei ’je yeichöjöönö;” quee. Yääje mma yaawä ñäädä dhanwa cönä’döaacä: “Änwanno mmaja ojoncomoode naudä’jödö aca. Chäänönge maneejemaato’de yaawä;” quee cönä’döaacä. 8Chööjanga’jäcä yaawä audaajä edhaajä cönä’döaacä tötaadawaajui döjoonei wwä: “Tadaawaaju dönnamo a’dejjacooto, mejeemaiyeto chaadawaajuichomo’jödö. Möcääcä’ja’como wääwaaca’jocoomo ejeemacooto awa’de, yää ’jeje awa’de’como waajänto’jocoomo;” quee cönä’döaacä. 9Yaawä ñanno cho’momöödawo’como waajänto’jocoomo wä’döa’comjäcä töwaadäiñe cönääjemaajojäätöicho tooni jödaata. 10Ñanno awa’de’como waajänto’jocoomo jooje’cä täjeemaatäiñe cöneecanö’a’to. Yaawä chäädhajootoncomo cunu’jätöi chääwaadäiñe tooni nshai jödaata mmaja. 11Yää cönaajoicho tönwanno yaawä, töwaacö’comje’da. Audaajä edhaajä jäcä cönenta’me’ca’to; 12cönä’döa’to: “ ¿Aaquene canno eduuwaiche mma nääwaacaichodö ejeema’jocoomo ’cäwa’cä mmaja ñaa mejeemai chea, ano ñadäädä ñaa wetaadawa’cajo’jödö weichaame ta’nato awä?” quee cönä’döa’to. 13Yääwä ñäädä audaajä edhaajä cönä’döaacä ijimmotoncomo wwä: “Weichacoono, adhennanö’cadööcomoojönö mädä öwwä. ¿Tooni jödaata que täjeemaamöje jönca määwaacai? 14Ajöödatai tödööcä; äjääne. Adheejema’jödö nönge mmaja wejeemaato dea canno möcääcä’ja’como wääwaaca’jocoomo. 15¿Umjummadö woije u’jai’cha ja ca’ wanä jöödatai? ¿Awaacö’je’da nai aashicha weichö?” quee cönä’döaacä ñäädä audaajä edhaajä. 16Mädääje na. Ñanno wentumja’como’jödö täneejuque naato’de. Ñanno täneejuca’como’jödö mmaane ema’jödööje naato’de. Jooje a’dejja’como naatoodö’je; e’ta’como jaiñoone äächädä mma; quee cönä’döaacä. Jesuuquidiito.
Töwäämatoojo jäcä Jesuuquidiito necammajäätö’jödö mmaja
17Yaawä Jeduusadén ña töötädaawäiñe Jesuuquidiito töudäje cönaadoicho tönoowanoomadö, ñanno amoojadooto de’wä aaco’como. Töwö cönä’döaacä chäwwäiñe:
18—Jeduusadén ña cöötaato eduuwa. Iiña Soto nnedö nä’tuja’de Wanaadi wwä töwa’deuwaamo edhaajotoncomo wwäiñe, judhío owaanomannamo wwäiñe mmaja. Tönwanno emaadö na’de’taato’de. 19Judhíojöncomo wwäiñe nu’aato’de yaawä enno’jätöödö wetä chäwwäiñe, aiju’jätöödö wetä mmaja, cuduusa jäcä ajoijodö wetä mmaja. Yaawä aaduwaawä anoototo ai töwö naadonca’de; quee cönä’döaacä Jesuuquidiito.
Jacoowo, Juan dhenöötoncomo ne’catä’jödö
20Yääje mma yaawä Seewedheeo nnacoomo dhenö cöneejä Jesuuquidiito wwadäädä tönnacoomo jadä, ñanno Jacoowo, Juan. Tä’mudhe cönä’döi ije’taca, chäwwä e’catäädö wetä. 21Jesuuquidiito cönä’döaacä chäwwä:
—¿Ane’cäämö mijummaanä?
Ñäädä wodi cönä’döaacä yaawä:
—Cajiichaanaje äwä’döa’jäcä canno önnacoomo aacä naatoodö ännäcä nataajima’ña’to’de, ääjato; quee cönä’döaacä.
22Jesuuquidiito cöneccujä’acä; cönä’döaacä:
—Odhoowanoojöncomo me’ca’ato. ¿Öwö neenödööje töweiyemööje naadö emjai maato dea änwanno, yää wäntunaanö’tojo? ¿Öwö wautisaaje wä’döjootojo que mmaja ca wautisaaje ä’döjoojai maato dea?
Tönwanno cönä’döa’to:
—Ee, ä’döjai mmaja.
23Yaawä Jesuuquidiito cönä’döaacä chäwwäiñe:
—Yääje dämma na. Öwö neenödö mmaja mengato’de; öwö wautisaaje wä’döjootojo que mmaja wautisaaje mä’döjaato’dede. Yääje yeichaame önnäcä awaatajiimato’como ecammajai’cha wa äwwäiñe. Ñanno wwäiñe mmaane yää nä’tua’de, chääjäcäinchädäiñe Jaaja nishoomadö naadö wwäiñe; quee cönä’döaacä Jesuuquidiito chäwwäiñe.
24Yää eta’jäcä ñanno amoojado’como Jesuuquidiito nowaanomaadö wwäiñe tönwanno cone’da cönä’ja’to Jacoowo, Juan jäcäiñe. 25Jesuuquidiito tönoowanoomadö cöna’dejjaicho yaawä; cönä’döaacä:
—Änwanno odhoowanääcäiñe Wanaadi dhowaanojöncomo edhaajotoncomo o’jodhe töwei’she yeichöcoomo. Ñanno cajiichaanacoomo tösootoichomo jäduuje tönaanontäjä’e weneeneto. 26Änwanno mmaane yääje eijai’cha maato. Ñäädä adhantawäiñe o’jodhe töwei’shato töjimmä anoonöcoomoje eijai ña. 27Ñäädä adhantawäiñe cajiichaanaje töwei’shato töjimmä wwäiñe tödööjä’neije nei’ñojo. 28Soto nnedöödä cöneejäne’, soto anontäneichomooje’da, chäwwäiñe tödööneije mmaane, töwä’tudu wetä mmaja jooje soto wääwanaacato’comooje; quee cönä’döaacä Jesuuquidiito.
Aacä tänuuquemjöncomo enu’tä’jödö
29Yääje mma yaawä Jeedicó ñanno iichädaawäiñe, jooje soto chääjadäiñe cönta’to. 30Aacä tänuuquemjöncomo yäätä cönä’ja’to, äämä taawä yaatajiima’como. Töwwäiñe eta’jäcä tödö’täcäiñe Jesuuquidiito wötäädö tönwanno cöncä’tömöicho yaawä:
—Wentumje ñaa eneecä Cajiichaana, amäädä Dawí weichö; quee cönä’döa’to.
31Ñanno jooja’como soto cöneeta’jöichaja’to. Yääje yeichaame tönwanno jooje’cä mma cöncä’tömjä’a’to:
—Wentumje ñaa eneecä Cajiichaana, amäädä Dawí weichö; quee.
32Yaawä Jesuuquidiito cöneedennai; ñanno tänuuquemjöncomo cöna’dejjaicho; cönä’döaacä chäwwäiñe:
—¿Aaquene äwä’döjo’se maato öwwä?
33Tönwanno cönä’döa’to chäwwä:
—Äwwä töwäänu’tojo’se ñaa na, Cajiichaana; quee cönä’döa’to.
34Jesuuquidiito wentumje cöneenea’to; chäänuduucomo cönaajojoi. Yaawä dea mma tönwanno töneene cönä’döicho. Jesuuquidiito jadä cönta’to yaawä.
Dewis Presennol:
MATEO 20: MCH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2014 Reservados todos los derechos