JUAN 6
6
Ijaatoodea miide soto ewanshincho’jocoomo
1Yää ’jeje Jesuuquidiito cöntämä Caadideea cu’jäi mänsemjona, yää Tiweediya cu’jäije töne’tä cönä’ja’todö. 2Jooje soto cöntonto chääjadä töwwäiñe ene’jödö weijäcä ene’ju’tojo iiñö’jödö, yää cädäija’como adoncadööcomo. 3Yaawä Jesuuquidiito cöntämä jöö de’cäi; yäätä cönaatajiimai tönoowanoomadö jadäiñe. 4Yaawä amoinche’da cönä’jaacä Weja’dätä’jä anooto, judhíocoomo comjedensiyai’chädö tödöötojo cu’nädö 5Yaawä Jesuuquidiito cöneeneaacä ñanno jooja’como soto töwwadäädä yeejödööcomo. Töwö cönä’döaacä Jediipe wwä:
—¿Äsha ejeemajai caato canno jooja’como uduucomo? quee cönä’döaacä Jesuuquidiito.
6Töwö yääje cönä’döaacä towaanäcä yeichaame töwwä tödöötojo; Jediipe oneejadööje mmädä yääje cöna’deuwacä. 7Yaawä Jediipe cönä’döaacä:
—Amoojadä sotooto ’cäwa’cä jödaata chääwa’cä’da dea eijai ña canno ewanshiñööcomo ejeematoojoje, shemeiñaasai ecaamotaame; quee cönä’döaacä Jediipe.
8Yaawä Antedé cöna’deuwöi; ñäädä cönä’jaacä Jesuuquidiito nowaanomaadö, Simón Peedhodo acoono. Töwö cönä’döaacä Jesuuquidiito wwä:
9—Määdhä mude’cä’cä wwä töweiye na ijaatoodea uu i’yaca’jödö, äiña döaajä; aacä na’cwacaano’cä mmaja. Jooje naato soto, cho’naiñe’da; quee cönä’döaacä Antedé.
10Yaawä Jesuuquidiito cönä’döaacä:
—Soto ajiimajootäcä; quee.
Jooje woi cönä’jaacä yäätä; yää de’wä cönaatajiimaicho tameedä. Wanna dhanwaacomo cönä’ja’to, ijaatoodea miide. 11Yaawä Jesuuquidiito uu cönannäjöi. Chääjäcä töwa’deuwödö’jo cuntui tönoowanoomadö wwäiñe; ñanno cöneecamoicho yaawä soto wataajima’como wwäiñe. Yääje mmaja cönnöi chea na’cwacancomo, imjummadööcomo wa’cä. 12Yaawä yensu’ta’comjäcä Jesuuquidiito cönä’döaacä tönoowanoomadö wwäiñe:
—Yäädetö’jödö amu’täcä; emaacudo’no; quee.
13Tönwanno cönancuicho yaawä; amoojadooto de’wä aacä wöwa cuntu’cannäjöicho uu wäädetö’jödö que, ñanno soto wääwashincho’jocoomo. 14Ñanno soto Jesuuquidiito nödöödö ene’ju’tojo enennamo’jödö cönä’döa’to yaawä:
—Ñäädä määdhä Wanaadi wa’deuwödö ecammanei töwe’emööje cönä’ja’dö; quee cönä’döa’to.
15Jesuuquidiito dhowaanäcä cönä’jaacä töwoije’da cajiichaanaje täwaaca’se yeichöcoomo. Yääje yeijäcä töjääcäjeene cöntämä jöö de’cäi.
Tuna de’wä Jesuuquidiito wötä’jödö
16Yaawä cho’monga’jäcä Jesuuquidiito nowaanomaadö cöntonto chu’jä döiña. 17Cudiiyada aca töwä’ta’comjäcä chu’jä mänsemjo cöne’dä’a’to yaawä, Cajeedamu ñano wwadäädä. Tööje cönä’jaacä yaawä; Jesuuquidiito eejö’da dea cönä’jaacä. 18Yaawä jooje jejeichä weijäcä madaataca cönaajäntäi. 19Numa cönsequiima’to. Yaawä amoinche töwä’döa’comjäcä Jesuuquidiito cöneedantoicho tuna de’wä yeejödö; chäwwadäädäiñe cöne’acä. Tönwanno cönääcatoncaicho. 20Töwö Jesuuquidiito cönä’döaacä chäwwäiñe:
—Öwö mma; tösaade’daane eichäcä; quee cönä’döaacä.
21Tönwanno ta’cwaiñe cönä’ja’to yaawä cudiiyada aca Jesuuquidiito wä’ta’jäcä. Yaawä dea mma nono cöneejodöicho, töötoto’como döiña.
Soto wwäiñe Jesuuquidiito uji’jödö
22Yää jenamma naadöje chu’jä mänsemjo dea soto cönä’ja’to. Tönwanno dhowaanäcäiñe cönä’jaacä tooni mma cudiiyada yäätä yei’jödö, yää ñoowanoomadö dhawä cöntontodö, Jesuuquidiito jadä’da. 23Yääje mma yaawä anejja cudiiyada cönä’döi Tiweediya ñanno. Yäätä cönaajäi, uu jäcä Jesuuquidiito wa’deuwödö’jo soto wääwashincho’jocoomo dö’tä. 24Yaawä Jesuuquidiito ’je’da eneea’jäcä, ñoowanoomadö ’je’da eneea’jäcä mmaja, ñanno soto cönä’toicho cudiiyada aca; cöne’dätoicho yaawä Cajeedamu ña Jesuuquidiito ujiiye.
Jesuuquidiito weichojo uu
25Yääje mma yaawä mänsemjona töwä’döa’comjäcä Jesuuquidiito cöneedantoicho. Tönwanno cöneecamma’joicho:
—Owaanomaanei, ¿ächännauwä’cä me’ne dea sadä? quee cönä’döa’to.
26Jesuuquidiito cöneccujä’a’to:
—Chäänönge yääje wä’döa äwwäiñe, änwanno cujiiyato yää aashichaato wödöönedö töntö’tamme’que aweichöcoomo jäcäinchädä’da, jooje äwääwashincho’jocoomo weijäcääne, yää wu’nedö que. 27Äwanshi töwaatameemö cana’cadööje mma adheetadaawa’cajootäi’che; äwanshi töwaatamemjönö cana’cadööjeene adheetadaawa’cajootäcä, yää yeichöödäje aweicho’comooje. Yääjato äwanshi tunu’e öwö, Soto nnedö; ñäädä Jaaja Wanaadi cuntui öwwä yääje tödöötojo; quee cönä’döaacä Jesuuquidiito.
28Yaawä tönwanno cöneecamma’joicho:
—¿Aaquene Wanaadi tadaawaajui tödööjai ñaa nai? quee cönä’döa’to.
29Jesuuquidiito cönä’döaacä:
—Edä yää Wanaadi tadaawaajui tödöödö, töwö dhanoonö ecamjödö; quee.
30Yaawä tönwanno cönä’döa’to chäwwä:
—¿Ane’cäämö äwääne’ju’tojooje tödööjai manä ñaa neneedöje, ñaa maneecamjöiye yaawä? ¿Ane’cäämö mödöötai? 31Ñaa adai’jödö ädeeja tönäu’cwe cönä’ja’to jata ’jemjönö aca töweichöcoomo, Wanaadi a’deddu imennaajä wä’dödö naadöje dea: “Wanaadi uu caju ñano cuntui chäwwäiñe, yuduucomooje;” quee imennaajä wä’dödö; quee cönä’döa’to ñanno soto Jesuuquidiito wwä.
32Yaawä Jesuuquidiito cönä’döaacä chäwwäiñe:
—Chäänönge yääje wä’döa äwwäiñe, Moiséjönööne cuntui äwwäiñe uu caju ñano; Jaajaane uu caju ñano neene nu’a äwwäiñe. 33Wanaadi nutuudu yää uu caju ñano we’ajä, tameedä soto weicho’comooje; quee cönä’döaacä Jesuuquidiito.
34Yaawä tönwanno cönä’döa’to chäwwä:
—Cajiichaana, ñaa wwä änu’cä yää uu yeichöje.
35Jesuuquidiito cönä’döaacä:
—Öwö ñäädä weichojo uu. Ñäädä öwwadoodono we’ajä ämiije’da na’de; öwö yeecanö’nei emjätö’se’da na’dede. 36Yääje wä’döaaquene äwwäiñe: “Öwö yeene’mataame äwwäiñe, aneecamjö’da maato;” quee. 37Tameedä öwwonooje Jaaja nutuudu ne’a öwwadäädä. Ñäädä öwwadoodono we’ajä änquiiñemeecö’da wa. 38Öwö caju ñanno we’ne öwö woijato tödööe’da, yaanontänei’jödö woijeene. 39Jaaja, yaanontänei’jödö woije dea tooni’chä anennanö’ca’da wa’de ñanno öwwä inchudu; öwö wadoncaato’de yaawä anooto wataamedaawä. 40Ñäädä Iiñedö eneenei, ecaanö’nei mmaja, yeichö töwaatamemjönö töweiye na, yaanontänei’jödö woije dea; öwö wadonca’de yaawä anooto wataamedaawä; quee cönä’döaacä Jesuuquidiito.
41Yaawä judhíocoomo chääjäcä cönenta’me’ca’to, yääje yä’dö’jödö weijäcä: “Öwö ñäädä uu caju ñano we’ajä;” quee yä’dö’jödö weijäcä. 42Tönwanno cönä’döa’to:
—¿Jesuuquidiitojöönö ca määdhä, José nnedö? ¿Cowaanäcäiñe jönca yuumö, yeenö mmaja? ¿Ane’que’nei caju ñanooje nätä’tannea? quee cönä’döa’to.
43Yaawä Jesuuquidiito cönä’döaacä chäwwäiñe:
—Mädääje adhenta’me’täi’che. 44Anejja e’jai’cha na öwwadäädä ñäädä Jaaja yaanontänei’jödö nenno’jadööje’da yeiya’jäcä; öwö wadonca’de yaawä anooto wataamedaawä. 45Edääje nä’döa Wanaadi wa’deuwödö ecammannamo nimenno’jocoomo jäcä: “Tameedä noowanoomajaato’de Wanaadi wwä;” quee nä’döa. Ñäädä Jaaja a’deddu etaanei, Jaaja nowaanomaadö mmaja, ñäädä ne’a öwwadäädä.
46“A’que yeichaame Jaaja eneenei; ñäädä Wanaadi jonnoto we’ajä mmaane töneene. 47Chäänönge yääje wä’döa äwwäiñe, öwö yeecanö’nei wwä töweiye na töwaatamemjönö yeichojo. 48Öwö ñäädä weichojo uu. 49Adhaadai’choncomo cönä’jajoicho ädeeja täcu’jödö weichaame chäwwäiñe jata ’jemjönö aca töweichöcoomo. 50Yää caju ñano we’ajä uu wecammannö täu’nei mmaane ääma’da na’de. 51Öwö ñäädä uu neene, caju ñano we’ajä. Ñäädä edä täu’nei yeichöje töweiye na’de. Öwö yeejö wu’a’de tameedä soto weicho’comooje; quee cönä’döaacä Jesuuquidiito chäwwäiñe.
52Yaawä judhíocoomo tönwannoje dea cöna’deuwa’to:
—¿Aaquene mmaja tujuunu cöwwäiñe äntudu deaade’ tänäädö wetä cöwwäiñe? quee cönä’döa’to.
53Yaawä Jesuuquidiito cöna’döaacä chäwwäiñe:
—Chäänönge yääje wä’döa äwwäiñe, Soto nnedö junu änäänä’da aweiya’comjäcä, dhaquiiyö aneenö’da aweiya’comjäcä mmaja, aweicho’como ’je’da na yaawä. 54Ñäädä juunu tänäänei, yaaquiyö ennei mmaja, töwaatamemjönö yeichojo töweiye na; öwö wadonca’de yaawä anooto wataamedaawä. 55Juunu yää tänäämö neene; yaaquiyö yää wocö neene. 56Ñäädä öwö jääcuinchato, yaaquiyö ennei mmaja, öwö yaaca na, öwö mmaja chaaca wa dea. 57Ñäädä yaanontänei’jödö wwä töweiye na do’ta; öwö töweiye wäänene töwö inchudu que. Yääje mmaja ñäädä öwö jääcuinchato, öwö untudu que yeichojo na’de. 58Yää uu caju ñano we’ajä wecammaadö adhaadai’choncomo cönäu’cwaichodö nönge’da na. Yää ädeeja täcu’jödö weichaame cönä’jajoicho tönwanno. Mädä wecammaadö täu’nei mmaane yeichöje töweiye na’de; quee cönä’döaacä Jesuuquidiito.
59Jesuuquidiito yääje soto cönoowanooma’to Cajeedamu ña, judhío we’jummato’como taca.
Weichojo a’deu
60Yää eta’jäcä ñoowanoomadö wwäiñe tönwanno dhantai cönä’döa’to:
—Äätaque’jönö mädä ecammajäätödö. ¿Änääcö mädä etaajai ñai? quee.
61Jesuuquidiito dhowaanäcä cönä’jaacä yääje ya’deuwödööcomo. Töwö cöneecamma’joicho yaawä:
—¿Cone’da ca ayöödöjaato mädä ecammajäätödö? 62¿Aaquene ä’döjai maato äwwäiñe eneea’jäcä Soto nnedö wäncudu caju ña, töweejö’jödö döiña mmaja? 63Epíiditu Santo ñäädä weichojo u’nei; ajuunu mmaane wa’tätä’da na. Yää äwwäiñe töneecammajä’e wääneneedö, chäänöngato a’deu yää, Wanaadi jäcoono, weichojo a’deu mmaja. 64Yääje yeichaame änwanno dhantai aneecamjö’da dea maato; quee cönä’döaacä Jesuuquidiito.
Töwö Jesuuquidiito jenaadäde dhowaanäcä cönä’jaacä ñanno aneecanö’jöncomo, tu’neije töweiyemö mmaja. 65Töwö cönä’döaacä:
—Yääje yeijäcä yääje wä’döaanä äwwäiñe, anejja e’jai’cha na öwwadäädä Jaaja nenno’jadööje’da yeiya’jäcä; quee cönä’döaacä.
66Yää etaadö’jo ñoowanoomadö wwäiñe tönwanno dhantai cöne’nomjaicho; chääjadä töwei’sheiñe’da cönä’ja’to yaawä. 67Yaawä Jesuuquidiito cönä’döaacä ñanno amoojadooto de’wä aaco’como tönoowanoomadö wwäiñe:
—¿Änwanno mmaja cösancwatantäi’chede? quee.
68Simón Peedhodo cönä’döaacä chäwwä:
—Owaanomaanei, ¿änääcö wwadäädä ñaa tädö deaade’ ? Amäädä äwwä mmaane yeiyajä yeichöödoto weichojo a’deu. 69Ñaa maneecanö’a; ñaa owaanäcä na Äwaanacaaneije aweichö, Wanaadi nudooto nnedööje aweichö; quee cönä’döaacä Simón Peedhodo Jesuuquidiito wwä.
70Yaawä Jesuuquidiito cönä’döaacä chäwwä:
—Öwö dea sootoije mane’tätääne, änwanno amoojadooto de’wä aacä maatoodö. Yääje yeichaame tooni adhantawäiñe odo’shaje na; quee.
71Töwö yääje cönä’döaacä Juudha Icaadiyoote ecammancädä, ñäädä Simón nnedö; ñäädä cönä’jaacä Jesuuquidiito u’neije töweiyemö. Töwö cönä’jaacä ñanno amoojadooto de’wä aaco’como jimmä dea.
Dewis Presennol:
JUAN 6: MCH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2014 Reservados todos los derechos