Johani 20
20
A kuvuka ka Jesu.
1Hi siku go ranga ga viki, Maria wa le Magdala i lo famba xilahleni ni mpunzu, na ga ha te mphu, a wona ribye na gi susilwe nkeleni. Mat. 28:1; Mar. 16:1; Lu. 24:1
2I lo tsutsuma aya ka Simoni Pedro, ni ka munwani mupizani loyi a nga kari a ranziwa hi Jesu, aku ngalo kabye: Va yi susile Hosi nkeleni, a hi ku tivi laha va yi vekileko kona. Xip. 13:23; 19:26; 21:7, 20, 24
3Pedro ni munwani mupizani va lo suka, vaya xilahleni. Lu. 24:12
4Va lo tsutsuma hi wumbiri gabye; kanilezi munwani mupizani i lo siya Pedro, a ranga a chikela laha nkeleni;
5na a koramile a hlomela lomo nzeni, i lo wona a tinguwo to basa na ti hi kona laha hasi, kanilezi a nga enghenangi lomo nzeni. Xip. 19:40
6Zonake Simoni Pedro a mu lanzela a chikelawu, a enghena nkeleni, a wona tinguwo na ti hi kona laha hasi,
7ni lesu kambe leyi yi nga hi hlokweni yakwe, na yi nga hi zinwe ni tinguwo to basa, kanilezi na yi petsilwe yi vekiwa yoce tlhelweni.
8Zonake i lo enghenawu a munwani mupizani, loyi a nga ranga a chikela nkeleni, i lo wona a kholwa.
9Hakuva va wa nga se ku wu pima a mutsalo, lowu wu nge ngalo i fanele a ku vuka hi ka vafileko. Tis. 16:10; Miti. 2:25-31
10Zonake a vapizani va lo tlhela kaya kabye.
Jesu a woneka ka Maria wa le Magdala.
11Kanilezi Maria i wa yimile lahandle ka nkele na a rila; kota lezi a nga rila, i lo korama a hlomela nzeni ka nkele, Mar. 16:5
12a wona tingelosi timbiri leti ti ambeleko to basa na ti tshamile, yinwe hi le hlokweni, ni yinwani hi le mikonzweni, laha xirumbi xa Jesu xi nga tshamile kona.
13Ti ku ngalo ka yena: Wasati, u rilela yini ke? Aku ka tona; Hilezi va susileko a Hosi ya mina, a nzi ku tivi laha va yi vekileko kona.
14Laha na a wulile lezo, i lo hunzuluka, a wona Jesu na a yimile; kasi i wa nga zi tivi lezaku hi Jesu. Mat. 28:9; Mar. 16:9; Lu. 24:16
15Jesu aku ngalo kakwe: Wasati, u rilela yini ke? Maria na a alakanya lezaku hi murimi wa simu, aku ka yena: Hosi, loku u mu susile laha, nzi byele laha u mu vekileko kona, nzi ta ya mu teka.
16Jesu aku ngalo kakwe: Maria! Yena i lo hunzuluka, aku ka yena hi xiHeberu: Raboni; hi ku ngalo: Mugonzisi.
17Jesu aku ngalo kakwe: U nga nzi khumbi; hakuva a nzi se ku kanziha a kuya ka Dadani; kanilezi famba ka vanakulori, u yaku ka vona: Nza kanziha ka Dadani wa mina ni Dadani wa nwina, a Nungungulu wa mina ni Nungungulu wa nwina. Tis. 22:22; Mat. 28:10; Rom. 8:29; Maheb. 2:11; Xip. 16:28
18Maria wa le Magdala i lo ya byela vapizani, aku: Nzi yi wonile Hosi, niku yi mu byelile timhaka leto. Mat. 28:10; Lu. 24:10
Jesu a woneka ka vapizani.
19Laha gi nga hlwile gwalego siku, gi nga siku go ranga ga viki, na ti valilwe tivati laha vapizani va nga hi kona hi ku chava vaJuda, Jesu i lota a ta yima xikari kabye, aku ngalo: A kurula a kuve ka nwina. Mar. 16:14; Lu. 24:36; 1 Kor. 15:5
20Laha na a wulile lexo, i lo va komba a mandla yakwe ni reve gakwe. A vapizani va lo tsaka hi ku wona Hosi. Xip. 16:22
21Jesu i lo engeta aku kabye; A kurula a kuve ka nwina! Kota lezi Dadani a nzi rumileko, hizalezo na minawu nza mu ruma nwina. Mat. 28:18; 2 Tim. 2:2; Maheb. 3:1
22Laha na a wulile lezo, i lo va pupuxela, aku ka vona: Amukelani Moya wa ku Basa.
23Lava mu va tsetselelako zionho zabye, va tsetselelwe zona; ni lava a zionho zabye mu zi bohako, zi bohelwe. Mat. 16:19; 18:18
24Kanilezi Tomasi, a vitwako Didimusi, a munwe wa vakhume ni vambiri, i wa nga hi navo a kuteni ka Hosi. Xip. 11:16
25Zonake a vanwani vapizani vaku ngalo kakwe: Hi wonile Hosi. Kanilezi yena aku ngalo kabye: Loku nzi nga woni a timbanga ta tikhokho mandleni yakwe, nzi enghenisa a litiho la mina timbangeni ta tikhokho, nzi enghenisa a canja ga mina reveni gakwe, cima nzi nga ta kholwa.
26Loku ku hunzile a ntlhanu wa masiku ni manharu, a vapizani vakwe va wa hi lomo ndlwini, na hi kona Tomasi. Na ti valilwe tivati, Jesu i lo ta yima xikari kabye, aku ngalo: A kurula a kuve ka nwina.
27Zonake aku ngalo ka Tomasi: Tisa litiho la wena laha, a mandla ya mina hi laya; tisa a canja ga wena, u gi enghenisa laha reveni ga mina; u ngavi loyi a nga kholwiko, kanilezi kholwa. 1 Joh. 1:1
28Tomasi i lo hlamula, aku kakwe: Hosi ya mina ni Nungungulu wa mina.
29Jesu aku ngalo kakwe: U kholwa hilezi u nzi wonileko; va katekile lava va kholwako na va nga wonangi. 2 Kor. 5:7; 1 Ped. 1:8
30Zinyingi a ziwoniso zinwani lezi Jesu a nga zi maha mahlweni ka vapizani, lezi zi nga tsaliwangiko bhukwini legi; Xip. 21:25
31Kanilezi lezi zi tsalilwe, aku kasi mu fela ku kholwa lezaku Jesu hi Kristu, a Nʼwana wa Nungungulu; ni ku hi kukholwa mu fela kuva ni kuhanya vitweni gakwe. Lu. 1:4; Xip. 3:15, 16; 1 Ped. 1:8, 9
Dewis Presennol:
Johani 20: TSC72
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Tshwa Bible © Bible Society in Mozambique, 1972, 2007.