LUCAS 7
7
Jesosaa romano soldado capitanja tiimee jja-ajameequica'yapoa
(Mt 8.5-13; Jn 4.43-54)
1Majoya aje Jesosa esohui ojjaña majo anica huohuijeyomajje poquiapoa Capernaúm meshiyasijje. 2Ma pueblojoya nequiapoa oe dejja romano soldado capitán etii poani. Oja tiimee ma meshijoya queamanoneenee jaapoa, beshahuanei manopoqui'yani. Ma capitanja oja tiimee queajeanee poa. 3Ma meshijo queahuisocuana Jesosajo mimimimiani shajja-ajjamajje ohuaya judío dejja etii poanicuana huoojeacapoa Jesosa huohuiajjaa o poejjijo oja tiimee jja-ajaquimee'yohua. 4-5Jamajjeya judío etii poanicuaa Jesosaque poquimajje oya huohuiajjacañaquiapoa jama ba'a: —Jesosa, romano soldado capitanya ecuana huoojeacanaje mique mi huohuiajjaa. Ohuaya eseya judiocuana queajeanee acapoquiani. Esejaya equi-ai ejjachichaquijji ohuaya iyameecanaje, jamajjeya che oya queapame aquicue. Poquicue oja tiimee jja-ajaquimee'yohua.—
6Majoya Jesosa onijje poquiajjapoa romano capitanja equiyasijje. Jesosaa beshahuanei oja equi bacañaquianijo capitán dejjaa ojaya epeejjicuana majo nequi huoojeacapoa oque ojaya esohui huohui'yohua jama ba'a: —Emeshimesenei, miya queapameneenee, eya ca iña queapame pojjeama mi jjequinobiajjequijji epojji ecuea equiyasijje. 7Jamajjeya eya mipoquinaje mi sa-ajjaa. A'a ecuea equiyasijje poejji. Miyaya majotii nequiya esohui che acue ecue tiimee quea-aja pomee'yojji. Majotii nequiya ecue tiimee jja-ajaquimee'yojji esohui miya ajo oya jja-ajaquije'yo. 8Ecuea etii enequi, jamajjeya eyaya ojaya esohui jayojja aña. Oya jayojja eyaya pea-ai soldadocuana huoojeapoquiaña. Eya esohui o poquijjijo huohuiajje, oya poquiani. Eya esohui pea o poejjijo huohuiajje, oya poeani. Ejo chacochacopoquiani dejja ejjeshe eya chacocue ajje oya chacochacoani queapame jiquio ecua eyaya huohuiaña jamaya. Oya jayojjaya miya esohui queapame ajo ecue tiimee jja-ajaquije'yo.— Jama huohuimeequimeya capitanya oya Jesosa acapoa.
9Jesosa romano dejja capitanja esohui shajja-ajjamajje jjabaneineiquiapoa ojo. Majoya Jesosaa ma onijjetii poquianicuana bamajje jama acapoa ba'a: —Eyaya quiana e'ejojonei esohui aña. Jiquio romano dejja e'ejojonei jjashahuabaqui'yani ejo joya ecua eyaya baña judiocuana jama pojjeama, oepojji jjashahuabaquiani.—
10Majoya aje capitanja epeejjicuana ma Jesosaque poquinajecuaa equiyasijje poe'yomajje bacañaqui'yapoa capitanja tiimee quea-ajanee apoa epo'yo ani, ejja-ajaqui'yo.
Jesosaa eahuemano'yoja bacuaejja shequimeeca'yapoa
11Majoya aje quijje Jesosa poquiajjapoa pueblo Naín meshiyasijje. O shajja-ajjajji poani dejjacuana, peacuana queahuisonee pea-ai onijjetii poquiajjacapoa. 12Naín meshi bañaquijjimahuajo oe emano'yo jaa dojocaje mojeaa bacañaquiapoa cuaa. Ma dejja emano'yo jaa eahuemano'yoja bacuaejja oenei poa. Queahuiso Naincuiñajjicuana epona eahuemano'yonijje poquipea-aicapoa oja bacuaejja mojeaa. 13Epona eahuemano'yo paneiani bamajje Jesosa queayenonee jjashahuabaquiapoa ojo. Majoya oya huohuicapoa jama ba'a: —¡A'a pajji!—
14Jesosaa emano'yo huananobiajji'ya cajón nequiñaquimajje napacapoa oja emeya. Jamajjeya ma dejja emano'yo dojojji poanicuana nequiñaquiapoa. Majotiiya Jesosaa dejja emano'yo jaa huohuicapoa jama ba'a: —Dejja, eyaya miya huohuiaña, ¡anisohua'yocue!—
15Jesosaa jama huohuime acajeahuajotii, oya shequinana'yapoa. Majoya anisohua'yomajje mimi'yapoa. Majoya Jesosaa oja bacua eshequi'yo nequi enaese quiaca'yapoa. 16Jesosaa dejja emano'yo jaa shequimeeca'yonaje bamajje ojjaña majo nequicacuana jjajjasohuaneineiquiapoa ojo. Jamajjeya majotii nequiya Eyacuiñajji bihuiacapoa cuaa jama ba'a: —Oe esohuihuohuijji queaca'aneenee jjanequija'aquinaje ese ani cojjaneijo.— Jama bihuiame apea-aicapoa cuaa jama ba'a: —Eyacuiñajji poeyanaje oja babaca judioneicuana ba'emeesahuaa.—
17Jamajjeya ojjaña provincia Judea meshijo ba'ecacuaa, pea meshi queachipijo ba'ecacuaa pea-ai esohui Jesosaa dejja emano'yo jaa shequimeeca'yonajejo shajja-ajjacapoa.
Juan ona iñajeanobiajji poaniya dejjacuana Jesosaque huoojeacapoa o huohuiajjaa a'ya oya
(Mt 11.2-19)
18-19Juan ona iñajeanobiajji poanaje dejja ejjajeanobiaquijji equijo ejeanobia aniapoa. Majo aniya Juanya queahuiso esohui o shajja-ajjajjicuaa yecaje shajja-ajjaca-aniapoa Jesosajo ma ohua dejjaja ajjima'neineicuana acaquijo. Jamajjeya Juanya beca o shajja-ajjajji poani iyaameecapoa ehuoojeajji Emeshimesenei Jesosa nequiyasijje o huohuiajjañaquiya jama ba'a: —¿A'a miya ma yahuajonei Eyacuiñajjija esohuihuohuijji poacuaa huohuicapoquiapoa dejjaya poeyanaje? ¿A'a miya ma pojjeamajo, pea ishoacajji pojja'a?— Jama Juanya beca dejja acapoa Jesosa huohuiajjaquijji. 20Jamajjeya Juanja huoojea beca dejjaa Jesosa huohuiajjacañaquiapoa jama ba'a: —¿A'a miya ma yahuajonei Eyacuiñajjija esohuihuohuijji poacuaa huohuicapoquiapoa dejjaya poeyanaje? ¿A'a miya ma pojjeamajo, pea ishoacajji pojja'a? Juan ona iñajeanobiajji poaniya ecuana huojeacanaje mi jama huohuiajjaa.—
21Manei eshequi nequijotiiya Jesosaa queahuisoneecuana jja-ajameequica'yapoa. Queahuiso eshahuamase yamijjicuana oya shahuamase yamima' pomeeca'yapoa. Queahuiso cojjama'cuana jjacojjaja'ameequica'yapoa pea-ai. 22Majoya quijjepishana Jesosaa ma beca dejja saja-acapoa jama ba'a: —Huacuaya quiana poqui'yocue Juan huohuiñaqui'yohua ojjaña jiquio miquiaa baña huisotii eya aña, ojjaña eya huohuiaña jiquio miquiaa shajja-ajjanaje huisotii esohui pea-ai. Oya huohuiñaqui'yocue eyaya cojjama'cuana queacojjaja'a pomee'yonaje. Jeo'yoajja anicuana eyaya jeomee'yonaje. Lepra epocuana eyaya oja yami jjajeameequi'yonaje. Jjashajja-ajjaquiajja poanajecuana queba eyaya jjashajja-ajjameequi'yonaje. Emano'yo jaacuana shequimee'yonaje. Aema'cuana poani eyaya esohui queapame huohuinaje Eyacuiñajjija huoojea poeyanaje o nahue'yohua. 23Queabihuinee poanicuana joya pea jjashahuabaquime queaquehua po'yoajja ejo eya jama poani bamajje.— Jamaya Jesosaa acapoa ma beca dejja Juan huohuiñaqui'yojji.
24Majoya aje Juanja huoojea beca dejja poqui'yajo, Jesosaa majo anicacuana huohuicapoa Juanjo jama ba'a: —Miquianaya se-ejjama' meshiyasijje yahuajopishana poquinaje Juan baa. Majoya ¿ache dejja jayojja shai oya poaje jjashahuabaquinaje quiana? ¿A'a oya jiquio ecua siponeao beniya jeahuenacani jama oya poanaje? Oya ca jama pojjeama poanaje, pea jjashahuabaquime pocuaji'yoajja oya.— 25Jesosaa huohuitiicapoa jama ba'a: —¿A'a ohuaya daqui queanahuenee huoshocani baa quiana poquinaje? Chojja. Miquianaja eba joya daqui queanahuenee huoshojji poanicuana caca oe emeshimeseja equijotii aniani. 26Eyaya quiana huohuiajjaje o'oya. ¿Ache dejja jayojja shai oya poaje miquiana jjashahuabaquinaje? E'e pojja'a miquiana jjashahuabaquinaje oya Eyacuiñajjija esohuihuohuijji poani. E'e, oya e'ejojonei Eyacuiñajjija esohuihuohuijji queapamenee nequinaje. Ohuaya ma ecua yahuajonei Eyacuiñajjija esohuihuohuijji poacuaa esohui huohuicanequiapoa jama pojjeama ohuaya huohuicanequinaje. Juanya caca oe pea esohui Eyacuiñajjija huoojea epoejjijo huohuicanequinaje cuana meteamaneiya. 27Yahuajonei Eyacuiñajjija esohuihuohuijji poacuaa esohui Juanjo huohuicapoa jama ba'a:
“Mi huoojeajjimahuajo oe dejja huoojeaje mijo huohui epojji ebionei.
Jiquio ecua dejjacuaa ejeojji chacocani epijajinei queapojjenee pea poejji,
jama pea-aiya ohuaya mi poejjijo huohuicaje cuana mijo ejjashahuabaqui'yojji”
jamaya Eyacuiñajji poani ojo. 28E'ejojonei eyaya quiana huohuiaña chama'neinei pea dejja jjeya, yahuajonei pea-ai joya ecua Juan ona iñajeanobiajji poani jama pea-ai epojji. Eyacuiñajjiya Juan queapamenee bacani. Jamatii ojjaña joya Eyacuiñajjija huoojeajo jjashahuabaqui'yojji poanicuana ma ohua ojjañacuana huoojeacapoquianitii meshi Eyahuasijje epoqui'yojji cuanaya queapamenee Eyacuiñajjiya bacaje jiquio ecua ohua Juan bacanaje jama pojjeama.— Jamaya Jesosaa huohuicapoa Juanjo.
29Jesosaa esohui huohuicaje shajja-ajjamajje queahuiso majo ejjachichaqui anicacuaa, Roma emeshimeseja bejjo chichapoquiajji poanicuaa pea-ai bacapoa ma Eyacuiñajjiya acapoquiani queapamenee. Yahuajo Juanya esohui huohuicajje jjaiñajeanobiameequicapoa cuana Juanjo. 30Fariseocuana, Moisesja tehuehuohuijji poanicuana pea-ai ca yahuajo Juanjo jjaiñajeanobiameequijjima poa Eyacuiñajjija ejjashahuabaquijji o queapame pomee'yojji cajaa amajje.
31Jesosaa huohuitiicapoa jama ba'a: —Jiquio jjeya eshe ba'ecacuana, ¿ae shai jayojja poani? ¿Achajja ba'yani? Eyaya quiana huohuije. 32Jiquio eshe ba'ecacuana jiquio ecua esho'iquiana jayojja plazajo quebanei po-ani jama. Onijje esho'inijje jama taaame poani ba'a: “Ecuaaya dehue mianaje miquiana queabihui pojji, jamatii miquianaya majamajajjima poanaje. Chama' miquiana queabihui pomeejji. Majoya ecuana queayeno emano'yojo sohuicuayanaje miquiana queayeno pojjijo, jamatii miquiana pajjima poanaje” jamaya poani esho'iquiana. Oya ojjañajo queabihui po-ajja. Jiquio jjeya eshe ba'ecacuana joya ecua esho'iquiana poani jama pea-aiya.— 33Majoya Jesosaa fariseocuana, Moisesja tehuehuohuijjicuana huohuipea-aicapoa jama ba'a: —Juan ona iñajeanobiajji poani bobi ijjiapojjima' nequinaje so'o Eyacuiñajjinijje emimijji. Uvajjajjana' ishijjima acanaje ohuaya. Jamatii miquiaaya oya queapame pojjeama banaje. Oya eshahuamase yamijji poani quiaa anaje. 34Majoya eya Dejjapojji epo poeyanaje. Eyaya pea pea bobicuana queabihuiya ijjiaña. Uvajjajjana' pea-ai ishiaña. Jamatiijojoya ejo pea-ai queabihui pojjeama poani quiana. Jama quiana poani ejo ba'a: “Oya queabobinee. Oya quea-uvajjajjana'se. Oya jjapeequiani dejjamimishicuananijje, Roma emeshimeseja yajji bejjo chichapoquiajji poaninijje pea-ai.” 35Miquianaya jama jjaniñebaquime poani ecuanajo. Jamatii ecuanaja chaco queapame poani bamajje eya, Juan pea-ai Eyacuiñajjiya queajjashahuabaquija'a pomeecani miquianaja bacajji poanaje.—
Jesosa poquiapoa fariseo Simón bajjani dejjaja equiyasijje onijje ijjiaijjiaa
36Majoya aje oe dejja fariseo poaniya Jesosa iyaacapoa onijje eijjiaijjiajji. Jesosa oja equiyasijje poquimajje mesapejjejo jaaoqueñaquiapoa. 37Ma pueblojo pea-aiya aje oe epona queamimishinee, peacojjojji poani ba'yapoa. Jesosa fariseo Simón bajjanija equiyasijje poquinaje shajja-ajjamajje, ma epona oja equiyasijje poquipea-aiapoa shiyeshiye meitahuoojo queacuata nequi mejji. 38Jesosa jaahuasijje nobiquimajje ma epona Jesosaja jeojjipejjeneijo nequiñapoa. Majoya oya paneineiapoa. Oja ecojjana Jesosaja ejeojjibiajjeyasijje oquequiapoa. Jamajjeya oja esao-aohuatii jeojji cui'yomajje Jesosa jeojji tojjoca-aniatiiapoa oya queapameneenee bacanijojoya. Majotii aniya shiyeshiye queasosehuisoneeneeya oja ejeojji shacapoa. 39Ma eponaa Jesosa jama acani bamajje Jesosa iyaajji poanaje fariseo oja esohuiquipajjetii jjashahuabaquiapoa queaquehua jama ba'a: —Jiquio Jesosa Eyacuiñajjija esohuihuohuijji e'ejojonei poanijojjemo ojaya eba pome ma epona o jeojji shacuajji poani queamimishinee, jjanapameequiajja ojo pome— jamaya jjashahuabaquiapoa fariseo dejja.
40Jamajjeya Jesosaa ma fariseo jama acapoa ba'a: —Simón, eyaya miya jjeya jiquio esohui huohuisa-aña.—
Ohuaya saja-acapoa jama ba'a: —Ee, huohuicueya mo.—
41Jesosaa jama huohuime acapoa oya ba'a: —Beca dejja cuentajji poa oe dejja bejjo quiajjijo. Oe dejjaja cuenta queahuisoneenee poa, 500 huisome eso'dojjo. Peaja ca iyehuiso poa, 50 huisome eso'dojjo. 42Coma beca dejjaja bejjo chama'neinei poa oja cuenta sosequia'yojji. Jamajjeya ma beca dejja cuentajji jamatii sosequiamee'yojjima acapoa, oja cuenta pajeaca'yapoa bejjo quiajji poanaje dejjaa. Jjeya eyaya miya huohuiajjaña jama ba'a: ¿Ache dejja shaiya maya dejja bejjo quiajji epo queajeaneenee acaje? ¿A'a queacuentahuisonee poanajeya, a'a iyehuiso cuentajji poanajeya pojja'a? ¿Acheya queajeanee acaje?—
43Simonya Jesosa saja-acapoa jama ba'a: —Jamaya eya jjashahuabaquiani ba'a: ma dejjaa oja cuenta queahuisoneenee poanajeya queajeaneenee acaje.—
Jamajjeya oya Jesosaa huohuicapoa jama ba'a: —E'ejojonei, maaya.—
44Majoya Jesosaa epona bamajje Simón huohuicapoa jama ba'a: —¿A'a jiquio ani epona baña? Eya mique equiyasijje jjequinobiamajje ena miquea quiajjima poanaje ecue jeojji shacuajji. Jiquio eponaa ca ecuea ejeojji oja ecojjanatii shacuacanaje, ojaya esao-aohua cuica'yonaje. 45Mique equiyasijje nobiajo miquea eya shemotojjojjequijjima poanaje eya queapameneenee ajjequijji. Jiquio eponaa miquea equiyasijje nobimajje ca ecue jeojji tojjoca-anitii. 46Ecue sapa eseiya miquea shajjima poanaje. Jiquio eponaa ca ecue jeojji shacanaje shiyeshiye queasosehuisoneeneeya. 47Jamajojoya eyaya miya huohuiaña, jiquio eponaa eya queajeaneenee acani oja mimishi queahuisoneenee eyaya cuijea'yonajeyajjejojo. Pea dejjaa ca eya queajeapishana acani, eyaya oja mimishi oepojji cuijea'yonajeyajjejojo.—
48Majoya aje Jesosaa epona huohuicapoa jama ba'a: —Mique mimishicuana cuijea'yonaje, chama'yo.—
49Ma peacuana Simonja equiyasijje poecuana ijjiaijjiaa, ojee mimimimica-aniapoa jama ba'a: —¿Ae dejja shai jiquio? Ohuaya mimishicuana cuijeaca'yani pea-ai.—
50Jesosaa epona huohuicao'oyapoa jama ba'a: —Miya e'ejojonei ejo jjashahuabaqui'yonajejojoya mique mimishi cuijea'yonaje. Poqui'yocue miya queabihuinee.—
Dewis Presennol:
LUCAS 7: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006