LUCAS 19
19
Jesosa Zaqueo bajjani dejjanijje mimiapoa
1Majoya Jesosa ciudad Jericó meshi bañaquimajje, ejeojjijje jjayejjequiapoa. 2Ma meshijoya aje oe dejja quea-aquianahuisonee Zaqueo bajjani nequiapoa. Oya oe Roma emeshimeseja yajji bejjo chichapoquiajjicuanaja etii poa. 3Zaqueo Jesosa jjayejjequije basaneineipoa, jamatii queahuisoneecuaa Jesosanijje poeya oya queyacapoa. Zaqueo queachi'a poajjejojo Jesosa mibacapoa. 4Jamajjeya oya ehuineiyasijje cuajicuajimajje acuiyasijje sohuaquiñaquiapoa majjeya Jesosa poeje bajjequijji eyajo aniya. 5Majoya Jesosaa jjayejjequijeya Zaqueo acuijo esohuaqui ani bajeasohuacapoa. Oya huohuicapoa jama ba'a: —Zaqueo, jjeyahuanei nequioque'yocue. Eya jjeyanei miquea equiyasijje poquije ijjiaijjiaa, cahuiya pea-ai.—
6Jamajjeya Zaqueo nequioquecuaji'yapoa. Ohuaya queabihuiya Jesosa oja equiyasijje jjequinobiacajjequiapoa.
7Jesosa cuama poquije bamajje queahuisocuaa oya niñebacapoa jama ba'a: —Oya dejjamimishija equiyasijje poquiani ijjiaijjiaa, cahuiya pea-ai— jamaya acapoa cuaa.
8Majoya quijjepishana Jesosa oja equijo ani Zaqueohua nequisohuamajje Emeshimesenei Jesosa huohuicapoa jama ba'a: —Emeshimesenei, bacue. Ojjaña ecuea aquianacuana, bejjo pea-ai sicoje. Majoya eyaya ojjaña iyatepeje beca oya huisoajjaya epojji. Oe ecueatii poaje, pea ca aema'cuana quiaje'yo. Eyaya peacuanaja bejjo siipoquianaje eya jjabaquiani. Jamajjeya eyaya oya bejjo quiaje'yo queahuisonee jama ba'a: Oe eso'dojjo siinaje sosejje eyaya quiaje'yo cuatro eso'dojjo. Jamaya eyaya quiaje'yo cuana.—
9Majoya aje Jesosaa oya huohuicapoa jama ba'a: —Jjeyanei Eyacuiñajjiya jiquio equijo ba'ecuana nahueca'yonaje jiquio dejja Abrahamja osecua jayojja queaja'anee jjashahuabaquianijojoya. 10Eya, Dejjapojji epo, caca majoya poeyanaje queahuisoneecuana ecuaquisho jayojja ba'eca sa-ajjaa, ona nahue'yohua.—
Jesosaa huohuipea-aicapoa esohui ebameesahuajji tres dejjacuaa bejjo jjeshecanajejo
11Jesosaa esohui huohuicanitii shajja-ajjapoquiajji poanicuana queahuiso queaquehua jjashahuabaquicapoa Jesosajo. Ohua Jerusalén meshi bacañaquiajo Eyacuiñajjiya Jesosa ojjañacuana huoojeapoquiajji epomeecaje'yo poso acapoa. Jamajjeya Jesosaa esohui ebameesahuajjijo huohuicapoa cuana.
12Jama huohuime acapoa cuana ba'a: —Oe dejja etii poani emeshimeseja osecua nequinaje. Oe pojjajo oya poquinaje pea meshiyasijje jocuama pea etii poanicuanaja oya emeshimese epomeejji. Majoya pea etiiya oya emeshimese pomeecajje poeje'yo. 13Ohuaya poquijjimahua diez ojo chacochacoani dejjacuana iyaacanaje ojaya eso'dojjo queasosehuiso quiajji ojaya queahuiso epomeejji. Ohuaya huohuicanananaje cuana jama ba'a: “Jiquio eso'dojjo queasosehuisojo chacomeeneicue cuana pea eso'dojjo queahuiso jjeshepoquiajjijo e epoquijo.” 14Jamatii oja meshijo ba'ecacuanaja dejja oja emeshimese epojji botiamanei poanaje. Jamajjeya huoojeacanaje cuaa pea dejjacuana ma oya poquije meshiyasijje dejja etii poanicuana huohuiñaquiya jama ba'a: “Jiquio dejja ecuanaja emeshimese epojji cajaa. A'a oya ecuanaja emeshimese epojji pomeejji.”
15—Jamatiijojoya dejja ma onaja botiamanei etii poanicuaa oya oja emeshimese epojji pomeecanaje. Majoya ohuaya huacuaya poe'yomajje oja meshiyasijje, ma diez ojo chacochacoani dejjacuana, oja eso'dojjo queasosehuiso jjeshejji poanajecuana, iyaameeca'yonaje. Ohuaya huohuiajjaca'yonaje cuana ache huiso eso'dojjo jjeshecapoquinaje cuaa oja chacomee sosejje eba'yojji. 16Ebionei ojo chacochacoani dejjaa o cojjaneijo nequimajje huohuica'yonaje jama ba'a: “Emeshimese, miquea eso'dojjo queasosehuiso chacomeemajje eyaya pea diez oya huisoajjaya eso'dojjo queahuiso jjeshenaje.” 17Emeshimeseya oya saja-acanaje jama ba'a: “Jamaya queapame, miya ecuea yajjijo chacochacoani queapame. Miya queapamenee hueya-ama chacochaconaje ecue quia eso'dojjojo, jamajjeya eyaya miya etii epojji pomeeje, diez huisome pueblo meshicuana huoojeapoquiajji miya pomeeje.” 18Majoya pea ojo chacochacoani dejjaa o cojjaneijo nequimajje huohuica'yonaje jama ba'a: “Emeshimese, miquea eso'dojjo queasosehuiso chacomeemajje eyaya pea cinco oya huisoajjaya eso'dojjo queahuiso jjeshenaje.” 19Jamajjeya emeshimeseya oya huohuicanaje jama ba'a: “Eyaya miya etii epojji pomeeje, cinco huisome pueblo meshicuana huoojeapoquiajji epojji miya queapame chacochaconajejojoya.”
20—Majoya pea ojo chacochacoani dejjaa ca o cojjaneijo nequimajje huohuica'yonaje jama ba'a: “Emeshimese, ma-aje miquea eso'dojjo. Eyaya daquisisijo bebomajje jaahuananeineinaje. 21Miyaya queacamajanee chacomeeme apoquiaña cuana, o jomishocameeajjaneinei miya poani. Miyaya peacuanaja bana queahuisonee sejjamee'yaña cuana miqueanei epojji. Majoya miya peacuanaja chacojo quea-aquianahuisonee popoquiani. Jamajjeya eya queametenee poanaje mique quia eso'dojjojo echacomeejji.” 22Jamajjeya emeshimeseya oya huohuicanaje jama ba'a: “De, miya queajjashahuabaquiquehuanee. Miyaya eya jama anaje eyaya queacamajanee chacomeeaña cuana, jomishocameejjimaneinei. Eya peaja sejja'yojo, peaja chacojo pea-ai quea-aquianahuisonee popoquiani. Jamaya miyaya eya baña. 23Jamajjeya eya jama poani bamajje miquea ecue quia eso'dojjo queasosehuiso, ¿yajjajo shai mihuanaquinaje ma pea dejjacuaa bejjo huanacani equi queaca'anee ani banco bajjaniyasijje? Miquea cuama ehuana pea-ai poanajejojjemo ecuea eso'dojjo queahuisopishana tiiquiae majo jaajjejojoya.” 24Majoya emeshimeseya pea ojo chacochacoanicuana majo ani jama acanaje ba'a: “Jiquio nequi dejjaja eso'dojjo jjeshe'yocue. Majoya joya diez huisome eso'dojjo jjeshejji poanaje dejja quia'yocue.” 25Majoya aje emeshimese huohuicanaje cuaa jama ba'a: “¡Emeshimese, ma dejjaja eso'dojjo queahuisonee ani, diez huisome!” 26Emeshimeseya saja-acanaje cuana jama ba'a: “Joya queapame chacochacoanicuaa o chacomeejjija esohui jayojja queahuiso aquianacuana jjeshecapoquije o sosejje. Joya queapame pojjeama chacochacoanicuaa o chacomeejjija esohui jama pojjeama ca oja aquianacuana jamatii oepojjinei ani jjeshejeacaje'yo cuaa. 27Emeshimeseya huohuipea-aicanaje jama ba'a: Jjeya jjequicue ojjaña joya e botiamanei poanicuana. Macuanaya miminaje pea etii poanicuananijje e emeshimese pomeejjima yajji nishojo. Majoya e cojjaneijo nequi quecua'yocue.” Jama huohuime emeshimeseya acapoa cuana.— Jamaya Jesosaa esohui ebameesahuajjijo huohuicapoa cuana.
Jesosa poquije o'oya Jerusalén meshiyasijje
(Mt 21.1-11; Mc 11.1-11; Jn 12.12-19)
28Majoya ciudad Jericó meshijo nequi esohui huohuijeyomajje, Jesosa ejeojjijje Jerusalén meshiyasijje epoquijji jjajjeshequiapoa. 29Majoya quijje Jesosa pueblo Betfagé meshi, pueblo Betania meshi pea-ai iyehueshanei nequi Olivos bajjani eyiyoiyeao nequiquibopejjeneijo nequiñaquiapoa. Majo aniya Jesosaa beca o shajja-ajjajji poani jama huohuime acapoa huoojeajjimahua ba'a: 30—Poquicue so'o jiquio ese nequi cojjaneijo ani pueblohuasijje. Majo nequiya oe mapichija bacuayahuesho'i ejeyo nequi, dejjaja eanijji ajjima'nei baje. Maya mapichi pichomajje yecue jiquiacua eque. 31Majo anicacuaa miya jama huohuiajjacajje ba'a: “¿Apiojji quiaa mapichi pichoaña?” ohua jama acajje, jama acue quiaa ba'a: “Emeshimeseneiya oya sacani.”—
32Majoya aje Jesosa shajja-ajjajji beca poquiapoa. Ma Jesosaa o huohuicanaje huisotiiya oja esohui jayojjaya acapoa. 33Mapichi pichocanijo emapichimesecuaa oya huohuiajjacapoa jama ba'a: —¿Apiojji quiaa ecuanaja mapichi pichoaña?—
34Ohuaya saja-acapoa jama ba'a: —Emeshimeseneiya oya sacani.—
35Majoya mapichisho'i Jesosaque dojocapoa. Oja daqui-ao mapichisho'ija daasabiajje iyamajje Jesosa anisohuaquimeecapoa. 36Jesosa mapichisho'ija daasabiajje ani ejeojjijje Jerusalén meshiyasijje poquianijo queahuisocuaa oja daqui-ao huanacapoa ejeojjijo o queapame bihuiajjequijji. 37Majoya Jesosa Jerusalén meshiyasijje poquiani Olivos bajjani eyiyoiyeao nequijje nequioquequiapoa. Ma doce Jesosa shajja-ajjajji poani dejjacuaa, peacuana Jesosanijje poquianicuaa pea-ai po-oquequianiya Eyacuiñajji janobajjimanei bihuiacapoquiapoa queabihuineeya. Jamaya acapoa cuaa queaba'ihuiso Jesosaa dejjaja ajjima'neinei acapoquinaje bamajje. 38Jama bihuiame acapoquiapoa cuaa ba'a: —Eyacuiñajji Emeshimeseneiya queapamenee ca-acahuatii oja huoojea Emeshimese epojji. Oya Eyajo nequi ojjaña nahue'yojji esohui jiquio meshiyasijje yejji poani. ¡Eyacuiñajji Eyajo nequi ejjabihuiaquitii!—
39Majoya aje iyehuiso fariseocuaa majo anicacuananijje nequiya Jesosa huohuicapoa jama ba'a: —Esohuihuohuijji, minijje poquicanicuana tecueacue, a'a cuana jama taaame pomeejji.—
40Jesosaa saja-acapoa fariseocuana jama ba'a: —Eyaya quiana huohuiaña, jiquio enijje poquicanicuana jama taaajjimajojjemo jiquio ani meicuana caca oe taaame e bihuiajji— huohuicapoa Jesosaa.
41Jerusalén meshichipinei bañaquimajje Jesosa queayenonee poñapoa. Oya papoa Jerusalén meshicuiñajjicuanajo. 42Jama mimime poa macuanajo ba'a: —Jjeyanei eyaya miquiana queaja'a bameesa-aña ojjaña Eyacuiñajjiya acani miquiana nahue'yojji. Jamatii miquianaja queaquehuatii poani, ebajji pojjeama pea-ai quianaja poaje. 43Quijje epojja poeje miquiana queacamajanee po'yojji. Miquiana botiamanei poani soldadocuaa jiquiacua Jerusalén meshiyasijje poemajje miquianaja ciudad meija peei nequi queyajeyocañaje. Majoya miquiana queyaneineicaje ojjañacuana jiquio meshijo ba'eca ecuayaqui poanijje. 44Majoya quijje jiquio ciudad meija peei, equicuana pea-ai quecuajeabichajeajeyocaje'yo cuaa. Che oema'nei mei pea meibiajje nequije. Queahuisonee jiquio meshijo ba'ecacuana quecuajeyocaje'yo cuaa pea-ai. Jamaya miquianaya acaje'yo miquiana ojo jjanahuemeequisapo'yoajjatii poanijojoya. Eyacuiñajjiya miquiana nahue'yojji nisho huoojeacapoajo jamatii jjabaquijjima poanaje— Jesosaa huohuicapoa cuana.
Jesosaa dejjacuana ehuone enaa jehui'yojji quiapoequi huoojeacuayajeacapoa oja Chiija equi-aiquiquibojo nequica
(Mt 21.12-17; Mc 11.15-19; Jn 2.13-22)
45Majoya aje quijje Jesosa nobiquiapoa Eyacuiñajjija equi-aiquiquibohuasijje. Ma equiquibojoya Jesosaa dejjacuana ehuonecuana enaa jehui'yojji quiapoequi bamajje huoojeacuayajeacapoa. 46Jesosaa jama tecueama acacuanapoa ba'a: —Eyacuiñajjija esohui jama poani: “Jiquio equi-ai ecuea enijje emimipoquijji ani. Miquiaaya caca siipojjicuana anijji anaje.”—
47Ojjaña pojjajo Jesosaa Eyacuiñajjija equi-aiquiquibojo aniya esohui huohuica-aniapoa cuana. Jamatii Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa, Jerusalencuiñajji etii poanicuaa pea-ai Jesosa quecuapanacapoa quehuajje. 48Jamatii bajjima poa cuanaja achajja o quecuamee'yojji acajji queahuisoneecuaa Jesosaja esohui shajja-ajjaneitiisa-acapoajojoya.
Dewis Presennol:
LUCAS 19: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006