LUCAS 17
17
A'a peacuana queamimishi pomeesa-ajji
(Mt 18.6-7,21-22; Mc 9.42)
1Jesosaa o shajja-ajjajji poanicuana pea esohui huohuitiicapoa jama ba'a: —Yani queahuisonee jiquio meshijo dejja, eponacuana pea-ai pea queamimishi pomeesapojji poani. Joya dejja pea queamimishi pomeesapojji poani caca oe ¡queaneenee nequimeecaje'yo! 2Ojjaña ecuea epeejji joya ca'a-ama eyacua queamimishi pomeesapojjicuana comaya canaajeyocahua mei-aijo bae-ai enaojjo queadoeneeyasijje edojonobiajeameequi'yojji ohua o queamimishi epomeeca cuahuajo. Jamaya queapame pome ojaya pea queamimishi pomeejjima yajji, Eyacuiñajjija oya queaneeneetii pomee'yojjima yajji. 3Jamajjeya, ¡jjabaneiquicue quiana oe achajja ba'epoquiani!—
Jesosaa huohuipea-aicapoa cuana jama ba'a: —Mique dohue minijje queamimishi poajo, niñesheacue oya pea jjashahuabaquime epo'yojji oja mimishijo. Ohua oja mimishi cajaa acajo oja mimishi pajea'yocue. 4Oya minijje queamimishi pomajamajani oya pojjajotii, siete huisome pojja'a, oja mimishi pajea'yocue o siete huisome minijje mimi'yajo oja mimishi cajaa yajjijo.— Jama huohuimeya acapoa Jesosaa.
Eyacuiñajjija esohuijo jjashahuabaquica'yojji queaca'a eba'ejji
5Majoya Jesosaja babaca ona sohuihuohuiquinequijji poanicuaa oya huohuiajjacapoa jama ba'a: —Ecuana queaja'anee jjashahuabaquimee'yocue mijo queaca'a etiipoquijji.—
6Jamajjeya Emeshimesenei Jesosaa saja-acapoa cuana jama ba'a: —Miquianaya e'ejojonei ejo jjashahuabaqui'yani. Jamatii oepojjinei jiquio ecua mostaza eso'bisonei quemoajjaya e'ejojonei ejo jjashahuabaqui'yani jjabaquimajje jiquio acui huohuije jama ba'a: “Jjajjequichiyojeaquicue bae-ai enahuasijje enequi'yojji.” Jama huohuime miya ajje oya cuamaya nequije'yo— jamaya huohuicapoa Jesosaa.
Achajja peacuana ba'emeesahuapoquiajji epojji
7Jesosaa huohuitiicapoa cuana jama ba'a: —Joya mijo chacochacopoquiani dejja queahuesha poqui meshi teohua, ovejacuana jaahuanaa o poe'yajo, ¿a'a acuae miyaya esohui jama aje ba'a: “Anioquecue eijjiaijjiajji. Ma-aje bobi?” 8Chojja, miyaya oya jama aje ba'a: “Jjeya ecuea bobi cuacuacue. Majoya bobi apoa'ya eque yecue iyacuayamajje. E ijjiaijjiajeyoajo, majoya miya ijjiaijjiapea-aije” jamaya miyaya oya aje. 9Joya mijo chacochacopoquiani dejja miquea esohuijo jjashajja-ajjaquiani bamajje, ¿yajjajo miyaya oya jama aje ba'a: “Jamaya queapamenee miyaya aña?” Yajjajopishana. 10Oya jayojjaya Eyacuiñajjija esohuijo jjashajja-ajjaquipoquiani jjabaquimajje jama jjashahuabaquime pocue ba'a: “Eseya ca Eyacuiñajjijo chacochacopoquiani jamajjeya oja esohuijo jjashajja-ajjaquipoquiani, mahuisotiiya. Jamajjeya eseya queapamenee poani jjabaquica-ajja.” Jama jjashahuabaquime oe pocue— huohuicapoa Jesosaa.
Jesosaa diez dejjacuana queamano ani leprajo jjajeameequica'yapoa
11Majoya aje Jesosa Jerusalén meshiyasijje ejeojjijje poquije Samaria meshimijisahuajje Galilea meshimijisahuajje pea-ai jjayejjequinanapoa. 12-13Majoya oe aldeahuasijje poquijeya Jesosaa diez dejjacuana queamanonee nequi leprajo oque poeje bacajjequiapoa. Jesosa queahueshatii poeje bamajje taaapoa cuana jama ba'a: —Jesosa, esohuihuohuijji, ¡ecuanajo che queayenonee pocue ecuana jjajeameequi'yojji!—
14Majoya aje Jesosaa oya bamajje saja-acapoa cuana jama ba'a: —Poquisocue Eyacuiñajjija equi-aijo chacochacopoquiani dejjacuanaque jjabameequiya.—
Majoya cuama poquijetiiya Jesosaa jjajeameequica'yapoa cuana. 15Oenei dejja ma queamano poanaje leprajo jjajeameequica'yonaje jjabaquimajje, huacuaya Jesosaque poeje'yohua Eyacuiñajji bihuiacajebe'yapoa janobajjimanei. 16Jamajjeya oya Jesosa nequipejjejotii oja ecuioshajjajo anioqueña'yomajje bahua jaaoqueapoa meshiyasijje o huohui'yojji jama ba'a: —Jamaya Jesosa, miyaya queapamenee eya jjajeameequi'yonaje.— Ma dejja Samariacuiñajji poa.
17Majotii nequiya Jesosaa oya huohuiajjacapoa jama ba'a: —Ojjañatii diez huisome dejjacuana lepra epo eyaya jjajeameequi'yonaje. ¿Achacua shai ma pea nueve dejja nequi? 18Oenei jiquio judío pojjeama dejja huacuaya poeo'oyanaje Eyacuiñajji bihuiaa. Peacuana ca huacuaya poe'yojjima.— 19Majoya Jesosaa oya jama acapoa ba'a: —Nequisohua'yocue. Majoya poqui'yocue miquea equiyasijje. Miya e'ejojonei ejo jjashahuabaqui'yonajejojoya eyaya miya leprajo jjajeameequi'yonaje.—
Achajja poaje Eyacuiñajjiya ojjaña huoojeacapoquianitii epojja poeajo
(Mt 24.23-28,36-41)
20Fariseo dejjacuaa Jesosa huohuiajjacapoa jama ba'a: —¿Acheshono shai Eyacuiñajjiya ojjañacuana huoojeacapoquianitii epojja poeje?—
Ohuaya saja-acapoa cuana jama ba'a: —Ojjaña meshijo ba'ecacuanaja ecojjaja ebajji pojjeama Eyacuiñajjiya ojjaña huoojeacapoquianitii epojja poeajo. 21Chama'neinei dejja jiquio meshijo queaja'a jiquio jama epojjijo ojaya ese ehuohuijji jama ba'a: “Bacue, jiquiojotii Eyacuiñajjiya ojjañacuana huoojeacapoquiani apoa, poeyanaje.” Jama pojja'a ba'a: “Bacue, cuamaya Eyacuiñajjiya ojjañacuana huoojeacapoquiani apoa, poeyanaje.” Chojja, jjeyanei Eyacuiñajjiya miquiananijje nequiya ojjañacuana huoojeacapoquianitii. Oya jjeyanei epoe nequi.—
22Majoya Jesosaa o shajja-ajjajji poanicuana huohuicapoa jama ba'a: —Quijje miquianaya eya, Dejjapojji epo, queaca'aneetii queasajajanee nequi poeje o'oya basaneineipoaje, jamatii eya ebajji pojjeamatii poaje jama poeje'yo. 23Quijje becacuaa esohui acaje ejo jama ba'a: “Jiquiacua oya jjeya epoe.” Pea jama poaje ba'a: “Jocuama ca oya jjeya epoe.” Jamatii a'a onijje poquijji o baa, eya Dejjapojji epo sa-ajjaa ohua siajje acajje. 24Eya caca oe e'ejojonei Dejjapojji epo poeo'oyajo queaja'anee ojjañacuaa bacaje. Jiquio ecua baasiyohua ojjaña eyatahuatahuahuasijje queahueshayee jeaja'ajeacani, jama pea-ai eya poeje o'oya bacaje ojjaña meshijo ba'ecacuaa. 25Ebionei eya, Dejjapojji epo, jiquio meshijo jjeya eshe nequicacuaa queaneenee acaje, eya cajaaneinei apea-aicaje cuaa. 26Eya, Dejjapojji epo, poeo'oyajo queahuisocuana jamatiiya e ishoapojjima'tii ba'ecapoquije. Ma ecua yahuajoneinei Noenijjejaajjicuana ba'ecapoquiapoa jamatii ena queaquemonee eoquejjijo jjashahuabaquijjimatii ba'e, jama pea-aiya pocaje queahuisocuana e poeo'oyajo. 27Yahuajoneinei ena queaquemonee oja oquemeejjimahuajo Noenijje ba'eca ojjañacuana ijjiaijjiapoquiapoa, ishi-ishipoquiapoa, jjahuanaquicapoquiapoa pea-ai queabihui jayojja. Jama ba'emeya pocapoquiapoa cuana Noé bishe'aiyasijje nobiquijji epojja poeajo Eyacuiñajjija esohuijo jjashahuabaquijjimatii ba'ecapoquiapoa. Majoya Noé bishe'aiyasijje enobiqui anijo ena queaquemonee oquemeecapoa. Jamajojoya ojjañatii ma esecuejotii nequicacuana hui'ijeaca'yapoa. 28Oya jayojja yahuajoneinei Lotnijje jaajjicuana ijjiaijjiapoquiapoa, ishi-ishipoquiapoa, aquianacuana jjeshecapoquiapoa, quiacapoquiapoa pea-ai, eso'cuana banacapoquiapoa, equicuana iyacapoquiapoa pea-ai Eyacuiñajjija esohuijo jjashahuabaquijjimatii ba'eya. 29Majoya Lot Sodoma meshijo ba'e o cuayaqui'yonaje epojjajotii Eyacuiñajjiya eyajje queahuisoneenee cuaquijiji meitejjee oquemeecapoa. Ojjaña Sodomacuiñajjicuana dahuajeaca'yapoa. 30Oya jayojjaya poaje cuana Eyacuiñajjija esohuijo jjashahuabaquijjimatii ba'ecapoquije epojja e Dejjapojji epo poecuajio'oyajo.
31—Ma epojja apoa poajo, miquianaya queahueshanee poquicuajinanacue. Joya equiquibo esecuejo nequi, a'a miquea equiyasijje nobiqui'yojji aquiana equijotii ani jjequicuayaa. Joya quejo chacochacoquicuana a'a equiyasijje poe'yojji. 32A'a pajea'yojji yahuajoneinei Lotja ehuanase yajja oya po'yapoa. 33Ojjaña joya ojayanei eba'ejjijo jjanahuequipoquianicuana ecuea echacojji eajji pojjeama, comacuanaja eba'ejji peajja bacaje Eyacuiñajjiya. Ojjaña joya jjanahuequiajja poanicuana ecuea echacojji yajjijo Eyacuiñajjiya comacuanajaya eba'ejji queapamenee bacaje.
34—Eyaya quiana e'ejojonei huohuiaña e poeo'oyajjijo mecajjetii jama poaje ba'a: Beca oya camajo jaa, oe jjequisohuacuajicaje'yo, pea ca camajotii jaajeaje. 35-36Oya jayojja pea-ai epojjajo jama poaje ba'a: Beca eponaa anosoai quecuapashacanijo, oe epona jjequisohuacuajicaje'yo, pea ca majotii anijeaje.— Jamaya Jesosaa huohuicapoa cuana.
37Majoya oya huohuiajjacapoa cuaa jama ba'a: —¿Achacua jama poaje'yo, Emeshimesenei?—
Oya saja-acapoa jama ba'a: —Miquiaaya be'ocuana queahuisonee cuabesa ba'e bamajje jjashahuabaquiani cuamaya oe emano'yo ihui jaa. Oya jayojja jiquio jama poaje shajja-ajjamajje queaja'a baje quiaa achacua shai jama acaje.—
Dewis Presennol:
LUCAS 17: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006