LUCAS 10
10
Jesosaa 72 huisome dejjacuana huoojeacapoa ojjaña meshicuanahuasijje esohui huohuiya
1Majoya aje Jesosaa pea dejjacuana 72 huisome babacacapoa. Macuanaya ohuaya huoojeacapoa queahuiso meshicuanahuasijje ebionei esohui huohuiya Jesosa cuama poquijjimahuajo. Beca dejja ojee, pea beca dejja ojee epoquijji, jamaya ohuaya huoojeacapoa cuana. Majoya quijje Jesosa ma meshicuanahuasijje poquipea-aije.
2Ma dejjacuana huoojeajjimahua Jesosaa huohuicapoa cuana jama ba'a: —Ojjaña meshijo queahuisoneenee Eyacuiñajjija esohui shajja-ajjapojjima'nei ba'eca, jamatii oepojjinei dejja enequi o sohuihuohuiquijji poani. Jiquio ecua bobi ebanacuana queahuisoneenee jahuanaje, apoa poanaje esejja'yojji, jamatii oepojjinei dejja enequi esejja'yojji jama pea-aiya poani majo ba'eca. Eyacuiñajji equemese jayojja poani, jamajjeya Eyacuiñajjinijje mimicue oja dejjacuana queahuiso ehuoojeajjijo ona sohuihuohuiquiya. 3Jamajjeya poquicue quiana. Eyaya quiana huoojeaña queacamajanee poaje meshiyasijje. Jiquio ecua ovejaja bacuacuana ebiocuiñajji queamasenee nequiyasijje poquiani jama pea-aiya quiana poaje. 4A'a bejjo, bobi, bolsa aquiana biojji pea-ai dojojji. Jeojjishejee pea-ai a'a beca dojojji. A'a peacuananijje ejeojjijje poquije nequiñaquijji onijje emimimimijji. 5Peaja equiyasijje nobiquimajje ebionei esohui ojo queapame añaquicue jama ba'a: “Miquiana jiquio equijo ba'eca queaquijijjijaji Eyacuiñajjiya capomeecahua.” 6Ma equijo ba'ecacuana queapame queneama poanijo, miquianaja esohui o queaquijijjijaji ba'ejjijo Eyacuiñajjiya jama pomeesahuacaje oya. Ma equijo ba'eca queapame pojjeama poajo ca Eyacuiñajjija miquea esohui o queaquijijjijaji ba'ejjijo pomeejjima acaje. 7Oe equijotii anipoquicue. Ojaya bobi ijjiapoquiacue, eishijjicuana ishipoquiacue. Jiquio ecua dejjaa pea dejja ojo chacochacoani sosequiacani jamaya ohuaya miya bobiacaje miya oque esohui huohuije sosejje. A'a pea equiyasijje anipoquijji. 8Pueblo bañaquimajje onaja equiyasijje quiana jjequinobiacajjequiajje, oja quia bobicuana ijjiacue queabihuiya. 9Ma meshijo emanocuana jaaca jja-ajameequi'yocue. Majoya huohuicue cuana esohui jama ba'a: “Eyacuiñajjiya ojjañacuana huoojeacapoquijetii epojja beshahuanei apoa, poechipinaje.” 10Majaajjicuaa quiana cajaa acajje, miquianaja esohui shajja-ajjasapo-ajjajjejojo, ¡a'a ma meshijotii nequijji! Oja equijo ani cuayaqui'yomajje jama acue cuana ba'a: 11“Miquianaja meshi ecuanaja ejeojjijo ani meshipohui cuia'iyajajeanaje'yo miquiana jjabaquijji shajjama'nei jayojja poanijo. Miquiaaya ecuana cajaa aña, jamajjeya ecuanaja miquiana esohui ehuohuijji pojjeama. Jamatii jiquio esohui shajja-ajjaneicue. Eyacuiñajjiya ojjaña huoojeacapoquijetii epojja beshahuanei apoa, poechipinaje” jamaya acue cuana. 12E'ejojonei miquianaya huohuiaña jama ba'a: Ma epojja Eyacuiñajjiya ojjaña huoojeacapoquijetii poeajo, ma meshicuiñajjicuana shajjama'nei jayojja poanaje Eyacuiñajjiya queaneenee pomeecaje'yo, jiquio ecua Sodomacuiñajjicuana queaneepishana pomeecaje'yo jama pojjeama queaneenee pomeecaje'yo cuana.
Queahuisocuana ma pueblocuanajo ba'eca Eyacuiñajjija esohui shajja-ajjasapo-ajja poa
(Mt 11.20-24)
13—¡E'ejojonei miquianaya Corazincuiñajjicuana, Besaidacuiñajjicuana queaneenee Eyacuiñajjiya pomeecaje'yo miquianaya pea jjashahuabaquime po'yoajjatii poanajejojoya miquianaja mimishijo! Ecuea dejjaja ajjima'neineicuana Tirocuiñajjicuanaja ebajji, Sidoncuiñajjicuanaja ebajji pea-ai ea poanajejojjemo macuiñajjicuana pea jjashahuabaquime poca'yoquiae oja mimishijo. Macuiñajjicuaa daquisha'a o queayeno poani oja mimishijo jjabaquijji huoshocaquiae, cuaquipohui pea-ai oja sapajo iyacaquiae. 14Quijje ojjaña meshijo ba'ecacuanaja mimishi ja'anei Eyacuiñajjiya huohuicaje'yo o queaneenee pomee'yojji epojja poeajo miquianaya Corazincuiñajjicuana, Besaidacuiñajjicuana pea-ai Eyacuiñajjiya queaneenee pomeecaje'yo. Ma ecua ohuaya Tirocuiñajjicuana, Sidoncuiñajjicuana queaneepishana pomeecaje'yo jama pojjeama pomeecaje'yo. 15Miquianaya pea-ai Capernaúm meshijo ba'ecacuana queaca'a jjabaquiani Eyahuasijje epoqui'yojji nisho. Chojja de, jama pojjeama quiana poaje'yo. Jeajeameecaje'yo quiana Cuaqui-aiyasijje Eyacuiñajjiya— jamaya Jesosaa huohuicapoa.
16Majoya Jesosaa oja esohuihuohuijji poanicuana huohuicao'oyapoa jama ba'a: —Ojjaña joya miquiaaya huohuije esohui shajja-ajjajji poani ecuea esohui ohuaya shajja-ajjapea-aicani. Joya miquiana cajaa ajji poani, e cajaa ajji poani pea-ai. Comacuaaya e huoojeajji epo Eyacuiñajji cajaa apea-aicani.— Majoya Jesosaa esohui huohuijeyocajo ma 72 huisome dejjacuana poquicapoa.
72 dejjacuana Jesosaja huoojea poeca'yapoa
17Majoya aje quijje ojjaña ma 72 dejjacuana queabihuiya poe'yomajje Jesosa jama huohuime acaña'yapoa ba'a: —Emeshimesenei, ojjaña eshahuamasecuana pea-ai ecuanaja esohuijo jjashajja-ajjaquinaje miquea bajjanijo ecuaa huohuiajje.—
18Majoya Jesosaa huohuicapoa cuana jama ba'a: —E'ejojonei jamaya miquiaaya eshahuamasecuana a'yonaje ebionei eshahua Satanás bajjani Eyajo ani meshiyasijje oque'yapoajojoya. Jiquio ecua pojjejje queaquemonee meshiyasijje oqueani jama eyaya oya bapoa. 19Eyaya quiana queaca'anee pomeenaje peyocuanajo, ajicuanajo miquiaaya poquijeya quishiajje, jamatii ojaya miquiana queanee pomeejjima poanaje. Eshahuamasecuanaja pea-ai miquiana queanee epomeejji pojjeama poanaje. Chama' poanaje miquiana queanee pomeejji. 20Jamatii ¡a'a mahuisojotiinei queabihuinee pojji eshahuamasecuana miquianaja esohuijo jjashajja-ajjaquiani jjabaquimajje! Miquianaya ca oe queabihuinee pocue miquianaja bajjani Eyajo etehue jaajojoya eba'etiitiipoqui'yojji.—
Ebacuaejja oeneija eba oja Chii
(Mt 11.25-27; 13.16-17)
21Manei eshequi nequijotii ani Edojjoshahuapameya Jesosa queabihuinee pomeecapoa, jamajjeya oya Eyacuiñajjinijje jama mimime poa ba'a: —Ecue Chii, miya Emeshimesenei poani, eojjañamese ojjaña Eyajo nequica, meshijo anica pea-ai miyaya huoojeapoquiañatii. Dejjacuana joya oyaneitii queasapaja'a poani jjabaquiajjacuana, esho'iquiana jama, miyaya comacuanaya bameesahuanaje miquea ejjashahuabaquijjicuana. Joya oyaneitii queasapaja'a poani jjabaquianicuana joya etii poanija huohuimajamaja poanicuana pea-ai ca miquea ejjashahuabaquijjicuana bameesahuajjima anaje. Jama pomeesaya miyaya anaje ma dejjacuanaya. Jamajjeya eyaya miya bihuiaña— jama mimime poa Jesosa oja Chiinijje.
22Majoya Jesosaa o shajja-ajjajji poanicuana huohuicapoa jama ba'a: —Ecue Chiiya ojjañatii aquianacuana eya quiacanaje. Chama'neinei dejja eya Ebacuaejja baneineijji poani. Ecue Chii oeneija caca oe eya ebaneinei. Oya jayojja che oema'nei cuanaja ecue Chii ebaneinei pea-ai. Ecuea oeneija Ebacuaejjaja caca oe oya ebaneinei. Ecuea epeejjicuanaja cua eya bameesa-anaje cuanaja ecue Chii eba queaja'a.—
23Majoya Jesosaa o shajja-ajjajji poanicuanahuasijje jjabajeaquimajje huohuicapoa jama ba'a: —Miquianaya caca oe queabihuinee poani miquianaja ecojjaneiya jjeya queahuiso bañajojoya. 24E'ejojonei eyaya quiana esohui huohuiaña queahuiso Eyacuiñajjija esohuihuohuijji poacuaa, pea emeshimesecuaa queaja'a basa-acapoa jiquio miquiaaya jjeya queaja'a baña huisotiiya. Yahuajonei bajjimaneitii poa cuanaja. Jiquio miquiaaya queaja'a shajja-ajjaña esohui ohuaya shajja-ajjasa-acapoa, oya esohuiya. Yahuajonei ojaya shajja-ajjajjimaneitii poa.—
Jesosaa esohui ebameesahuajji huohuipea-aicapoa cuana Samariacuiñajji dejja queapamejo
25Majoya aje oe Moisesja tehuehuohuijji poani dejja poquiapoa Jesosanijje mimiya. A'a Jesosa queaquehua mimije ebajji nisho huohuiajjaquicapoa jama ba'a: —Esohuihuohuijji, ¿yajja acuae iña che pocajji Eyahuasijje eba'etiitii'yojji?—
26Jesosaa oya saja-acapoa jama ba'a: —¿Yajja poani Moisesja tehue? ¿Ache esohui Moisesja tehuecuana miyaya chacoaña?—
27Moisesja tehuehuohuijji poani dejjaa oya saja-acapoa jama ba'a: —Jama poani Eyacuiñajjija esohui Moisesja tehue ba'a: “Emeshimesenei, mique Eyacuiñajji poani, comaya queajeaneenee apoquiacue ojjaña miquea equijijjijo, miquea ejjashahuabaquijjijo, mique eyamijo pea-ai queajeanee oya apoquiacue. Ojjaña mipejjejo ba'eca pea-ai queajeanee acue jiquio ecua miya queajeanee jjanahuebaquiani jama pea-aiya oya apoquiacue”.—
28Jamajjeya Jesosaa oya saja-acapoa jama ba'a: —E'e, queaja'anee eya saja-anaje. Jamajjeya miya jiquio ecua saja-anaje jama ba'yanijotii miya Eyahuasijje ba'etiitiije'yo.—
29Majoya Moisesja tehuehuohuijjiya oyaneitii mimishima' poani peajo ejjabameequijji nisho Jesosa huohuiajjacao'oyapoa jama ba'a: —¿A'ya acuae epejjejo ba'e poani?—
30Jesosaa oya saja-acapoa jama ba'a: —Ee, eyaya miya huohuije. Oe dejja Jerusalén meshijo nequi ejeojjijje poquinaje Jericó meshiyasijje. Majoya aje ejeojjijje poquiani siipojji dejjacuaa oya cuianeineiajjaca'yonaje. Oja daqui huijjeacanaje, ojjaña ojaya aquianacuana siica'yonaje pea-ai. Cuianeineiajjaca'yajje dejja beshahuanei manopoqui'yani jeacana'yonaje cuaa. 31Majoya aje oe Eyacuiñajjija equi-aijo echacochacopoquijji poani dejja oya ejeojjijje poquipea-ainaje. Dejja queaneenee jaa manopoqui'yani bamajje o jaasahua ejeojjijje jamatii jjajeatepenanaquinaje o yejjenanajji. 32Majoya aje quijjepishana pea dejja Levija osecua poani poquipea-ainaje oya ejeojjijje. Dejja queaneenee jaa manopoqui'yani bamajje o jaasahua ejeojjijje pea-ai jamatii jjajeatepenanaquinaje o yejjenanajji. 33Majoya aje quijje pea, Samariacuiñajji dejja poquipea-ainaje oya ejeojjijje.#10.33 Nota: Judiocuanaja samariacuiñajjicuana botiamanei poa.* Dejja queaneenee jaa manopoqui'yani bamajje oya queayenonee jjashahuabaquinaje ma dejjajo o shicuijji. 34O jaahuasijje poquimajje ojaya esicuana shicuicanaje eseiya, uvajjajjasesenaa. Shicuimajje oja sicuana bebocanaje daquisisiya. Majoya dejja oja mapichijo huanasohua'yomajje dojocanaje peaja equiyasijje bejjo sosejje ma mecajje ecahuichichajji. Majo jaaya samariacuiñajji dejjaa oya jaahuanacanaje. 35Majoya pea pojjajo Samariacuiñajji dejjaa equimese beca eso'dojjo quiamajje jama acanananaje ba'a: “Jiquio dejja jaahuanacue ecuea cuentajo. Jiquio bejjojo sosequiajeyojjimajo, eyaya ojaya cuenta sosequiajeyohuaje'yo miya o jaahuanaje sosejje.”— 36Majoya Jesosaa Moisesja tehuehuohuijji poani huohuiajjacapoa jama ba'a: —Tres dejjaa dejja queaneenee jaa manopoqui'yani, siipojjicuanaja cuia-ajja'yo jaa, bacanaje. ¿Ache dejjaa queapame oya acanaje, oya opejjejo ba'e jayojja acanaje?—
37Moisesja tehuehuohuijji poani dejjaa oya saja-acapoa jama ba'a: —Joya dejjaa ma pea queaneenee jaa manopoqui'yani bamajje queayenohua asahuacanaje, comaaya.—
Majoya Jesosaa oya huohuitiicapoa jama ba'a: —Jamajjeya oe miyaya oya jayojja Samariacuiñajji dejjaa acanaje jayojja apoquiacue cuana.—
Jesosa Martaja, Mariaja equiyasijje poquiapoa
38Majoya Jesosaa o shajja-ajjajji poanicuananijje ejeojjijje poquijeya oe aldea bacañaquiapoa. Oe eponaa, Marta bajjaniya, oya ja'acajjequiapoa oja equiyasijje. 39Martaja eshehuemese aniapoa María bajjani. Oya Jesosa bamajje o ani jeojjipejjeneijo anioqueñapoa oja esohui ohuaya huohuicaje shajja-ajjajji. 40Marta ca quea-echacojjihuiso poa ma poeyanaje cuana bobiajji. Jamajjeya oja shehue Jesosanijje eanioque ani bamajje jjanequichipiquiapoa Jesosanijje emimijji. Marta jama poa ba'a: —Emeshimesenei, ecue shehue jiquiojo minijje aniya eya chacosahuapajeacanaje. Jamaya queapame pojjeama. Che oya huohuicue e chacosahuao'oyajji.—
41Jesosaa Marta saja-acapoa jama ba'a: —Marta, Marta, shajja-ajjacue mo. Miya queayeno jjashahuabaquipoquianitii miquea echacojji queahuiso anijo. 42Oenei ma queapameneejo jjashahuabaquicajji. Mariaa maya babacacanaje. Jamajjeya jiquio queapamenee ojaya poani peaja ejjeshe'yojji pojjeamatii poaje.—
Dewis Presennol:
LUCAS 10: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006