JUAN 3
3
Jesosa miminequiapoa Nicodemonijje
1Oe dejja Nicodemo bajjani fariseo dejja poa. Oya pea judío dejja etiicuananijje jjapeequipoquiapoa. 2Majoya aje quijje oe mecajje Nicodemo Jesosaque poquiapoa o huohuiajjaa. Jama acañaquiapoa ba'a: —Esohuihuohuijji, Eyacuiñajjiya miya dejjaja ajjima'neineicuana ameesahuacani. Jamajjeya ecuanaja eba Eyacuiñajjiya miya huoojeacanaje jiquiacua ecuana sohuihuohuiya. Miya Eyacuiñajjija huoojea pojjeamajojjemo miquea dejjaja ajjima'neineicuana eajjitii pojjeama pome.—
3Jesosaa oya huohuicapoa jama ba'a: —Eyaya miya e'ejojonei esohui huohuiaña. Bacue, Eyacuiñajjija miya cuayameeo'oyajjima nequi ma ohua ojjaña huoojeacapoquianitii meshi Eyahuasijje miquea ebañaqui'yojji pojjeamatii poaje.—
4Jesosaa oya jama huohuicajje Nicodemohua huohuiajjacapoa oya jama ba'a: —¿A'a cuae se dejja etii nequi cuayao'oyame? ¿A'a cuae eseya enaeseja yoneyasijje ba'enobiquio'oyame so'o ebacuasho'i jama ecuayao'oyajji?— Jama epoaje'yo poso jjabaquiapoa.
5Jesosaa oya saja-acapoa jama ba'a: —Nicodemo, e'ejojonei eyaya miya huohuiaña. Ojjaña joya ecuaya o'oya pojjeama enajo, Edojjoshahuapamejo pea-ai, enobiqui'yojji pojjeamatii poaje Eyacuiñajjiya ojjaña huoojeacapoquianitii meshi Eyahuasijje. 6Ojjaña joya enaeseja mejo cuayani yahueja jea oja chii jayojja pea-ai poani, yamijji. Ojjaña joya Eyacuiñajjija Edojjoshahuapamejo cuayao'oyani ca Eyacuiñajjija bacua poanitii. Edojjoshahuapame yamijji poani comacuanaya. 7A'a queaquehua jjashahuabaquijji ecuea esohuijo eyaya miya jama aña ba'a: “Ojjañacuana cuayacao'oyajji.”— 8Jesosa jama pea-ai poa onijje ba'a: —Miyaya beni poequi shajja-ajjaña, jamatii ache huesha beni poeani miquea bajjima. Achacua beni poquije miquea bajjima pea-ai. Jiquio ecua beni achejje shai poeani miquea bajjima jamaya Eyacuiñajjija Edojjoshahuapameya dejja cuayameecao'oyani. Miquea bajjima achajja shai, jamatii e'ejojonei poani.—
9Majoya Nicodemohua Jesosa huohuiajjacao'oyapoa jama ba'a: —E'e pojja'a, ¿achajjajo acuae jama acao'oyame?—
10Jesosaa oya saja-acapoa jama ba'a: —Nicodemo, miya judiocuana sohuihuohuijji poani. Jamajjeya, ¿yajjajo acuaejje jiquio esohui ecuayao'oyajjijo miquea queaquehua poani so'o? 11E'ejojonei eyaya miya huohuiaña. Eyaya miquiana queaja'anee huohuiaña quio ecuanaja eba huisotii esohui. Ma ecuaa queaja'anee banequinaje ecuanaja ecojjaa huohuiaña pea-ai. Jamatii ecuanaja esohui e'ejojonei pojjeama poso miquiaa aña. 12Eyaya quiana huohuiaña achajja ba'epoquiani cuana jiquio meshijo. Jamatii e'ejojonei pojjeama poso ecuea esohui aña quiaa. Jamajjeya, ¿achajja acuae miquiana ecuea esohui Eyahuasijje epoqui'yojjijo jjashahuabaqui'yome poaje?
13—Chama'neinei dejja Eyahuasijje poqui jiquio meshiyasijje poe'yo nequi ese huohuiña'yojji epojji Eyajo. Eyanei caca oe che Eyajje poeapoa jiquio meshiyasijje ma bajjani ba'a: Dejjapojji epo. 14Ma ecua yahuajonei se-ejjama' meshijo aniya Moisesya oja ne peyonisho ba'ehuanasohuajeacapoa acuijo jama pea-ai eya Dejjapojji epo ba'ehuanasohuajeacaje cuaa. 15Jamajjeya ojjaña joya e'ejojonei ejo jjashahuabaquije'yo huisotii Eyacuiñajjiya oya ba'etiitiimeecaje'yo onijje Eyajo— jama huohuimeya Jesosaa Nicodemo acapoa.
Eyacuiñajjija ojjaña meshijo ba'ecacuana queajeaneenee poani
16Jesosaa huohuicapoa cuana jama ba'a: —Eyacuiñajjiya ojjaña meshijo ba'ecacuana queajeaneenee acani. Jamajjeya oja Bacuaejja oenei huoojeacapoa meshiyasijje ojjañacuanaja mimishijo mano'yohua. Jamajjeya ojjaña joya e'ejojonei ojo jjashahuabaqui'yanicuana ba'etiitiije'yo onijje Eyajo, ejjasejjaquitii epojji pojjeama poaje'yo Eyacuiñajjijo. 17Eyacuiñajjiya oja Bacuaejja huoojeacapoa ojjaña meshijo ba'ecacuana Cuaqui-aiyasijje huoojea'yohua pojjeama. Oya caca huoojeacapoa ojjaña meshijo ba'ecacuana Cuaqui-aijo nahue'yohua.
18—Jamajjeya ojjaña joya Eyacuiñajjija Bacuaejjajo jjashahuabaqui'yani huisotiicuana e'ejojonei Cuaqui-aiyasijje epoqui'yojji pojjeamatii poaje. Ojjaña joya Eyacuiñajjija Bacuaejjajo jjashahuabaquiajjatii poanicuana caca oe Cuaqui-aiyasijje poquije'yo oya oja Bacuaejja oeneijo mijjashahuabaqui'yonajejjejojoya. 19Eyacuiñajjija huoojea ojjañacuana jeaja'apoquiajji poani poeapoa jiquio meshiyasijje nequiya so'o. Queahuisocuaa oja mimishi queanahuejojoya ojjaña jeaja'apoquiajji poani cajaanei acapoa. Jiquio ecua meca quea-aaponee poani jama pea-aitiiya ba'epoquisatiipoa cuana. Jamajjeya ojjaña joya o jeaja'apoquiajji poani cajaa ajji poanajecuana Cuaqui-aiyasijje ba'etiitiije'yo. 20Ojjaña joya queamimishitii ba'epoquianicuana Eyacuiñajjija huoojea o jeaja'apoquiajji poani cajaanei acani. Oque jjanequichipiquiajja poani oya queamimishinee ba'e peacuaa ebaca poanijje. 21Jamajjeya ojjaña joya esohui e'ejojoneijo jjashajja-ajjaquianicuana jiquio ojjaña jeaja'apoquiajji poaniyasijje nequipoquianitii queachipinee ojee. Jamajjeya o chipineijo nequiajo queaja'a bacaje cuaa Eyacuiñajjiya oya queaja'a ba'emeesahuacapoquiani— jamaya Jesosaa esohui acanequiapoa cuana.
Juan ona iñajeanobiajji poaniya huohuicao'oyapoa Jesosajo
22Majoya aje Jesosa Jerusalén meshijo nequi poquiapoa o shajja-ajjajji poanicuananijje provincia Judea meshiyasijje. Ma meshijo ba'ecacuana Jesosaa o shajja-ajjajji poanicuana pea-aiya iñajeanobiacapoa cuana enaojjohuasijje. 23Juanya pea-ai iñajeanobiacapoa cuana Enón meshijo nequiya ena ma meshijo queahuiso aniapoajojoya. Enón meshi Salim meshichipineijo jaapoa. Dejja queahuisopishana, eponacuana pea-ai Juan nequiyasijje poquiapoa jjaiñajeanobiameequiya. 24Jamaya Juanya acapoquiapoa cuana oya soldadocuanaja ejjajeanobiaquijji equiyasijje jeanobiajjimahua nequiya.
25Majoya aje Juan shajja-ajjajji poanicuana jjamimicuiajeanobiaquiapoa oe judío dejjanijje ejjaiñajeanobiameequijji esohuijo enaojjohuasijje. 26Jamajjeya Juanque poquiapoa o shajja-ajjajji poanicuana onijje mimiya jama ba'a: —Esohuihuohuijji, ma minijje nequinaje dejja Jordán ojjemijiyasijje, ma miyaya ecuana ojo esohui huohuinaje dejja, ma dejjaaya jjeya iñajeanobiapea-aicani cuana enaojjohuasijje. Queahuisoneecuaa oya equijje acani.—
27Juanya o shajja-ajjajji poanicuana saja-acapoa jama ba'a: —Jamaya Eyacuiñajjiya pomeecani cuana Jesosa shajja-ajjajji epo'yojji. Eyacuiñajjija jama pomeejjimajojjemo o shajja-ajjajjicuana chama' pome. 28Miquiaaya eya shajja-ajjanaje queaja'anee eyaya huohuinaje jama ba'a: “¡Eya caca iña quio Eyacuiñajjija huoojea ojjaña nahue'yojji epojji pojjeama! Eyacuiñajjiya eya ebionei huoojeacanaje ojjaña nahue'yojji epojjijo jjeya oya poeje huohuiya” jamaya eyaya quiana huohuinaje. 29Eyaya pea esohui huohuije miquianaja queaja'a ebajjijo. Bacue, dejja jjahuanaquije ahuema' ani eponajo. Oja ehuanase poaje ojo jjahueaquimajje. Jjahuanaquijeja epeejjicuana oya mimije oja emesenanijje o huanajjijo shajja-ajjamajje queabihui poani. Jiquio ecua dejja oja epeejjicuana o jjahuanaquije bamajje queabihuinee poani ojo, jama pea-aiya eya poani jjeya. Eyacuiñajjija huoojea ojjaña nahue'yojji epojji bamajje eya queabihuineenee poani Jesosajo. 30Ojjañacuaa Jesosa cashajja-ajjatiitiicahua. Eque ca capoepajea'yahua cuana. Oya queaca'aneenee, eya ca iña ca'a-ama.—
Joya Eyajje poe
31Juanya o shajja-ajjajji poanicuana huohuitiicapoa jama ba'a: —Eyacuiñajjija huoojea ojjaña nahue'yojji epojji Eyajo nequi jiquio meshiyasijje poeapoa. Jamajjeya oya queaca'aneetii poani. Eseya ca jiquio meshijo cuaya, dejjaja jea ca'a-amanei. Jamajjeya eseya jiquio meshijoneitii ani aquianacuanajo mimipoquiani. Oya ca Eyajje poe eojjañamese poanitii. 32Ohuaya huohuicani quio oja eba huisotii esohui, quio oja shajja-ajja huisotii esohui pea-ai. Jamatii ojaya esohui e'ejojonei pojjeama poso acani queahuisocuaa. 33Joya Jesosaja esohuijo jjashahuabaqui'yanicuana Eyacuiñajjija esohui e'ejojonei poani pea-ai ohuaya bacani. 34Eyacuiñajjija huoojeaa Jesosaa Eyacuiñajjija esohui oopana e'ejojonei huohuicani. Nahueamanei quiame acanaje cuana Eyacuiñajjiya oja Edojjoshahuapame o queaja'a huohuimeesahuapoquiajji epojji. 35Echii-aiya oja huoojea Ebacuaejja queajeanee acapoquianitii. Ohuaya oya eojjañacuanamese epojji pomeecapoa oya queaca'aneetii poaniyajjejojo. 36Jamajjeya ojjaña joya Eyacuiñajjija Bacuaejjajo jjashahuabaqui'yanicuana ohuaya ba'etiitiimeecaje'yo onijje Eyajo. Ojjaña joya ojo jjashahuabaquisapo-ajjatii poani ca eba'etiitii'yojji pojjeama poaje Eyajo. Comacuana ca Eyacuiñajjiya huoojeacaje'yo Cuaqui-aiyasijje queaneeneetii ponequi'yohua— jamaya poa.
Dewis Presennol:
JUAN 3: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006