Luke 24
24
Kathi Makheiya Karing
(Matt 28:1-10; Mk 16:1-8; Jn 20:1-10)
1Hapta mansakhet nikhuoni ziingtiang ma-ah inmani'n sariak rim kahoi inminsuuk ngaikha inchoiya thaantiang inleisi. 2Halli inmani'n thaankhar lung lei-inlong kha inleimu. 3Inmani'n thaansuungnga inluut phakhan Pumi Jisu kaluong kha leiommakjei. 4Inmani'n hiwa jarra rildan leijetmuwa inlei omlai, jetlei theileiya puonkachek kasil pasal miring inni inmani koolla inleingir. 5Halli inmani'n inchi heiya neipilla injuo inbok phakhan, pasal inni ngai'n inmani diang inheiti, “Kathi ngai kara karing kha nangni'n angsik ning entokme? 6Ama chu kathi makheiya intheiya hin ommakjei, ama'n Galilee ah omlai nangnidiang angme i-nati kha ngaidonru. Matt 16:21; 17:22,23; 20:18,19; Mk 8:31; 9:31; 10:33,34; Luk 9:22
7“‘Miring sapa kha manu karoon ngaidiang inpesik eii, cross ah inthatsik eii, halli nithum huuini ahongring nooksik eii.’’ ””
8Khawa khan numeisa ngai'n ama chong ngaikha inleingaidon. 9Thaan makheiya inheikirra asiamruoi soomleikhat ngaidiang khat-um aleiilaak rakipdiang kasuok hi injuorilpi. 10Khawa numeisa ngai khachu, Mary Magdalene, Joanna, James nu Mary halli inmanile kasi aleiilaak numeisa ngai'n tirton ngaidiang kasuok omchan ngaikha injuorilpi. 11Takkha tirton ngai'n numeisa ngai chongkha pangrilla inril keeng tia leileipimu. 12Halli Peter'n intheiya taanna thaan tiang aleisi, ama'n akuunna thaankhur suung enpha khan kathi katuomna puon khabit ajuomu ah rilsik jetmak-ah inntiang aheikir nookjei.#24:12: Larik lekkhat ah alam sumleini hapmu.
Emmaus tiang Inleisi
(Mk 16:12,13)
13Halli, khawa nikhuoni khan Jisu nuk kajui ngai karra miring inni Jerusalem makheiya mile inni inlaak Emmaus khuotiang inleisi. 14Inmani inni'n kasuok omchan ngai jarra khatle khatdiang inrilla inleisi. 15Inmani inni'n inleisi phakhan, Jisu'n inmani koolla heinaiya inmanile aleisi suom. 16Inmani'n ama kha inleimu, takkha tume tihi leijet matormu. 17Halli ama'n inmani diang ati, “Ang kachang chongme nangni inni'n nisina ah ningril kha?””
khawa khan kahoimathei maisuoa inmani'n inleingir chetjei. 18Halli araming Cleopas intipa'n Jisu diang aheimasang, “Tuunlaiya nikhuo lekkhat suungnga Jerusalemma kasuok omchan jetleiya khuolmi inkhat na eya natheinuoa niombe tia inleirakel?””
19Halli Jisu'n inmani diang ati, “Angkachang chong suok ah mejei?”” Inmani'n inleimasang, “Nazareth Jisu jarra kasuok chuon eii”” Ama hi Pathian li miring ngai maikuungnga achuontho nali arilna rakip ah ranak kanei Pathian chongkachoi mi eii tia inleingaidon.
20Halli eini thiampu kalian ngaili lamkakei ngai'n thinasik-ah kathamak inminchangga ama kha cross ah inthat. 21Takkha Israel kakatansik mikha ama eii tia keini'n kinleingaidon, hiwa rakip hi asuokna wini le nithum kha hong ejei. 22Keini karra numeisa lekkhat in ziingtiang ma-ah thaanna injuosiya keinihi kinmalung inmindong, 23halli inmani'n akaluong kha injuomumak phakhan, Jisu kha aringjei tia marwaan tirton ngai'n keinidiang mangtalar angnga kinmu tia keinidiang injuoril. 24Keini le kaom miring lekkhat in thaanna injuosiya numeisa ngai'n inti angnga injuomu, takkha inmani innum ama kha juomumu.
25Halli Jisu'n inmani diang ati, “Nangni angtuk ning amme, Pathian chong kachoi ngai'n inleiti rakip ningmalungnga kangamna sik-ah ning insuumjei! 26Christa'n poongna rakip adeisuoli ama lurna khan luutmakniabe?”” 27Jisu'n angrakip ama jarra Moses khat-um Pathian chong kachoi ngai'n inleiril khat-um chong inthiang in ileiti ngaikha rilpina aleinei.
28Khale inruoiya inmani'n intungnasik khuo inheinai phakhan, Jisu'n kasicheisik omchan angnga inmani diang aleithopi. 29Takkha khuo ajuoboi jarra keinile onsuomtui tia inmani'n ama kha ranak-ah khaapna inleinei, halli ama'n inmanile asiya injuoriakjei. 30Ama'n inmanile bubakna sik-ah inlei in-ongsuom phakhan, waipool aleiya Pathian aleiminpaak halli katherra inmani diang aleipei. 31Halli inmani mit hongwarra Jisu ejei tia inleijet, halli inmani maikuung makheiya Jisu'n aleimang deljei. 32Inmani'n khatli khatdiang inlei inti, “Jisu einile lamma thurchi nirillai khat-um ama'n einidiang chong inthiang katha ah niminchulai eini malung kha mei angnga kaang ma-abe?””
33Khawapha takkhan inmani'n Jerusalem tiang inkirnook ah amale kasi siamruoi soomleikhat ngaikha mi ngaile intuup ah inleiom kha injuomu. 34Inmani'n injuoti, “Pumi kha inthiangnga aringjei, halli Simon diang juo inlarjei!””
35Khat-um lamma kasuok chuon ngai jarra khat-um waipool katherkhoi laiya inmani'n ang omchanna ama kha inhongjetme tijarra inmani diang inleirilpi.
Jisu'n Asiamroui ngaidiang Inlar
(Matt 28:16-20; Mk 16:14-18; Jn 20:19-23; Chuon 1:6-8)
36Inmani'n hithowa inrilla inomlai takkhan, jetlei theileiya Pumi'n apumtak inmani karra ajuo ngirra inmani diang aleitipi.#24:36: Larik lek khat ah inmani diang ati, “Nangni chungnga kadai omrase.”” iti chonghi ommak. “Nangni chungnga kadai omrase.””
37Inmani'n ratha kathamak inkhat kimujei tia inleichi theiya inlei-inlai. 38Ama'n inmani diang aheiti, “Angjara ning poongme? Halli angjarra ning malungnga inngamsamna ningneime? 39Enru kakutli kakeii ngaihi, kei ka eii, nakatook inlang na-enru, kei ningnamu angnga ratha kathamak chu taksali saru omnuni.””
40Ama'n inmani diang aleitisuoli inmani diang akutli akeii ngaikha aminmu.#24:40: Larik lekkhat'n alam soommili hapmu. 41Khawa khan inmani'n inngamna leiom maklai, karokli kangak in asiplai, Nipumi'n inmani diang aleiti, hiwahin bakphur inkhat ningneibe? 42Inmani'n ngarou alekkhat inleipeii, 43Ama'n aleiya inmani maikuungnga alei-ei.
44Halli ama'n inmani diang ati, “Hiwahi kei kachong kha eii, kei'n nangni karra kaleiomlai kanati, angrakip Moses Danna, Pathian chongkachoi ngai'n khat-um Minpaakla ah inlei majia rakip huui latungsik eii.””
45Achong inthiang injetnasik-ah inmani malungkha aleimalongpi. 46Halli inmani diang ati, “Hinthoa lei-injia, Christa'n poongna aneisik halli nithum huuini akathi makheiya ahongring nooksik eii. 47Jerusalemma inphut malung thuulnali manu ngaidampina chongngai kha zaat rakipdiang ningrilpi sik eii. 48Nangni hi hiwangai rakip chungnga sakhi ning ejei. 49Enru, kei'n Kapa chongkhitna kha nangni chungnga kanapesik eii; takkha Pathian in nangni kha chungtiangnga ranak khan puon angnga naminsil maklaiseng nangni'n Jerusalemma leiomru.””
Jisu'n Marwaan tiang Kalna
(Mk 16:19,20; Chuon 1:9-11)
50Khawa phakhan inmani kha Bethany katung akeiruoiya halli akut duongpiya inmani kha rawaan aleipei. 51Ama'n inmani kha rawaan aleipeli ama'n inmani kha inthenpui jei, halli ama kha marwaan tiang inruoijei.#24:51: Laarik lekkhat achu Marwaan tiang inruoijei. iti chong hi ommak. 52Jisu kha chubei inthoa Jerusalem tiang karok ah inlei kirjei. 53Halli inmani'n Biak-inna apha rakip ah Pathian kha inleiminpaak ah inleiom.
Dewis Presennol:
Luke 24: KHMNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The New Testament in Kharam © The Word for the World International and NECTAR, 2021.