Mwa 7
7
Mbua ya Kĩw'ũ Kingĩ
1Mwĩai Ngai nĩweeie Noa atĩĩ, “Lika ngalawanĩ we na andũ ma nyũmba yaku onthe, nĩkwĩthĩwa nĩnonete kana we noue wĩ weka mũlũngalu katĩ wa andũ ma ĩvinda yĩĩ. 2Lika ngalawanĩ na ũilikya nyamũ ilĩ ilĩ mavinda mũonza sya mĩthemba yonthe ya nyamũ ila ntheu; ilikye ilĩ ilĩ nũme na nga. O ta ũu likya nyamũ ilĩ ilĩ, nũme na nga sya mĩthemba yonthe ya nyamũ ila ite ntheu. 3O ĩngĩ osa nyũnyi ilĩ ilĩ nũme na nga sya mĩthemba yonthe ya nyũnyi. Ĩka ũu nĩ kana kĩla mũthemba wa nyamũ na nyũnyi ndũkakw'e, ĩndĩ ũendee kũsyaanĩa ĩũlũ wa nthĩ. 4Ĩtina wa mĩthenya mũonza kuma ũmũnthĩ ngausya mbua ĩũlũ wa nthĩ. Mbua ĩsu ĩkaua vandũ va mĩthenya mĩongo ĩna nĩ kana nĩmine vyũ ĩũlũ wa nthĩ syũmbe syonthe ila noombie.” 5Noa nĩweekie maũndũ onthe ala Mwĩai Ngai wamwĩaĩie.
6Noa aĩ na ũkũũ wa myaka maana thanthatũ yĩla mbua ĩsu ya kĩw'ũ kingĩ yauie ĩũlũ wa nthĩ. 7#Mat 24.38-39; Lk 17.27 Noa na mũka, na ana make na iveti syoo nĩmalikile ngalawanĩ, nĩ kana metangĩĩe maikoawe nĩ mbua ĩsu. 8Nyamũ ilĩ ilĩ, nũme na nga sya mĩthemba yonthe ya nyamũ na nyũnyi na tũsamũ tw'onthe tũla twĩ ĩũlũ wa nthĩ, ila ntheu na ila ite ntheu, 9nĩsyaendie syalika ngalawanĩ vamwe na Noa kwĩanana na ũndũ Ngai wamwĩaĩĩte. 10Ĩtina wa mĩthenya mũonza mbua ĩsu ya kĩw'ũ kingĩ nĩyambĩĩie kua ĩũlũ wa nthĩ.
11 #
2Vet 3.6
Yĩla Noa waĩ na ũkũũ wa myaka maana thanthatũ, mũthenyanĩ wa ĩkũmi na mũonza wa mwei wa kelĩ, kũndũ kw'onthe kũla kumaa kĩw'ũ ĩũlũ wa nthĩ na ĩtunĩ nĩkwavingũkangie. 12Mbua mbingĩ nĩyauie ĩũlũ wa nthĩ vandũ va mĩthenya mĩongo ĩna, ũtukũ na mũthenya. 13Mũthenyanĩ o ũsu, Noa na mũka, na ana make Semu, Amu, na Yavethi na aka moo nĩmalikile ngalawanĩ. 14Malikile ngalawanĩ vamwe na syũmbe sya mĩthemba yonthe: Nyamũ sya mũsyĩ na sya kĩthekanĩ, tũsamũ tw'onthe tũnini na nyũnyi sya mĩthemba yonthe. 15Syũmbe syonthe syĩ thayũ, ilĩ kwa ilĩ nũme na nga nĩsyalikile ngalawanĩ vamwe na Noa, 16o tondũ Ngai wamwĩaĩĩte. Noa amina kũlika ngalawanĩ Mwĩai Ngai nĩwavingie mũomo wayo.
17Mbua ĩsu ya kĩw'ũ kingĩ nĩyaendeeie kua vandũ va mĩthenya mĩongo ĩna, na kĩw'ũ kyongeleka ĩũlũ wa nthĩ o na kũvika ngalawa yookĩlw'a nĩ kĩw'ũ kĩu yathambalala kĩw'ũnĩ. 18Kĩw'ũ kĩu nĩkyaendeeie na kwongeleka ĩũlũ wa nthĩ, nayo ngalawa yeethĩwa ĩyĩendela ĩũlũ wa kĩw'ũ. 19Kĩw'ũ nĩkyaingĩvie mũno ĩũlũ wa nthĩ kũvika kyavw'ĩka iĩma syonthe o na ila ndũlu; 20kyaingĩvie kũvika kyavw'ĩka iĩma isu na ũliku wa mita mũonza. 21Syũmbe sya mĩthemba yonthe ĩũlũ wa nthĩ ila syaĩ thayũ; mĩthemba yonthe ya nyũnyi, nyamũ sya mũsyĩ, sya kĩthekanĩ, na syũmbe ila ingĩ syonthe iũlũkaa ĩũlũ wa nthĩ nĩsyakwie; o na andũ onthe nĩmakwie. 22Syũmbe sya mĩthemba yonthe ĩũlũ wa nthĩ ila syĩ thayũ nĩsyakwie. 23Mwĩai Ngai nĩwooaie syũmbe syonthe ila syaĩ thayũ ĩũlũ wa nthĩ: Andũ, nyamũ sya kĩthekanĩ na sya mũsyĩ, tũsamũ tw'onthe na nyũnyi. Noa na ala angĩ maĩ nake ngalawanĩ nĩmo mavĩtie. 24Kĩw'ũ kĩu kingĩ nĩkyekalile ĩũlũ wa nthĩ vandũ va mĩthenya ĩana na mĩongo ĩtano.
Dewis Presennol:
Mwa 7: KAMBA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
BIBLE SOCIETY OF KENYA © 2011