Yohanes Tumoro ung kitap kenu
Tumoro ung kitap kenu
Lakez sé tou tulap ung Kaol kimua sa ung kitap kenu ém pinantik ni Yohanes, zozo' im witu ung kitap kenu zéi'kan méikua sa séi si nimantik. Si Yohanes kenu én esaané im wia sé pahtuzu'en ni Yesus. Ni sia si pahtuzu'en totoz ikararaaté ni Yesus (Yoh. 13:23, 19:26, 20:2, 21:2-7, 20-24). Mengiit sé tonaas né tou sarani im puuna, si pahtuzu'en totoz ikararaaté ni Yesus é si Yohanes. Ni siamo si rimumez nimarétéan karia ni Yesus i sé pahtuzu'en ni Yesus limé'os um perjamuan ing kamurian (Yoh. 13:23, 20:2). Si Yohanes wo si Yakobus én oki' ni Zebedeus. Ni séra zua nginaranala ni Yesus im Boanerges pahpaan ni séra én tanu un erut (Mrk. 3:17). Si Yohanes kangkasii si puuna nima'éman i si Yesus é nimatoumomé sumaup wo si puuna nima'ula si Yesus i ni séra witi louz Tiberias (Yoh. 21:1-7).
Ung kitap kenu pinantik, wo péléng sé tou ma'éman i si Yesus é si Mesias wo Oki' ni Opo Empung (Yoh. 20:30-31). Sa sé tou ma'éman ni Sia, ni séra é makailek ung katou-touan wo mamenou-nou karia-Na makaz ing kauré-uré. Witu ung kitap kenu kangkasii si Yesus makalakez mahtuzu' karia un aandéan. Si Yesus kangkasii mahkua: “Ni Aku kenumo u roti mahwéhé ung katou-touan” (Yoh. 6:35), “Ni Akumo si sena' ung kaayahan” (Yoh. 8:12), “Ni Akumo si pepenet” (Yoh. 10:7), “Ni Akumo si memimiara sé domba si lé'os uman” (Yoh. 10:11), “Ni Akumo si tumou sumaup sé nimatémo” (Yoh. 11:25), “Ni Akumo si lalan i mangé wia si Opo Empung wo mapata'u ung kaulitan tumoro si Opo Empung” (Yoh. 14:6) wo kangkasii “Ni Aku én tanu un uli-ulit tuuz un anggor wo si Ama'-Ku si memimiara niitu” (Yoh. 15:1). Witu ung kitap kenu kasii méikua sa puunala si Abraham im wia, si Yesus ém wiamo (Yoh. 8:58). Um pinantik itii én tumuzumé sa si Yesus ém wiamo rengané ung kaayahan im winangun wo ni Sia ém wia makaz ing kauré-uré.
Dewis Presennol:
Yohanes Tumoro ung kitap kenu: LAITOM
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda