Yohana 2
2
Ladər Gha Malakə vu Kana
1Njo gha malakə vu mələm Kana, a tə hə'i Galili, ya amanya Yesu tə yi nda. 2A nar nyi tə nji nə Yesu ka shawa nyi tsəu, 3aku sakanda ɓitir anap tə wura, ngə amanya Yesu tə nar nyi, “A tsə'u ɓitir anap kənda da wa.”
4Ngə Yesu tə nar nyi, “Ama, manə ko nar ɗa sənga? Aka bəji ɗa da taa ɗa ka yo chabiya kərɗa wa.”
5Ngə amanya Yesu tə nar nyi nə mavi'i inda kwa mər tlər ladər nda, “Dəhə sə nda Cha nar hi, hya məra.”
6Tangnda giɗa wawa'a da kwah nda nja ɓatlətə ana hangu ga piya, nda kwa hətə gwashala wi fwaɗə fwaɗəu, nda njir Yahuda kwa maka chihi ana chi kwa təvi nda kwa həsəli.
7Ngə Yesu tə nar nda, “Nyandə ma giɗa ingə na ɓiti dəhəu.”
8Ahir nga cha nar nda, “Gətsə ma hya yi na nyi nə adar ladər.” Kəl nda gətsə ga yi ni.
9Nda adar ladər nda dləutsə ɓiti nda Yesu tə shandə ka ɓitir anap nda, cha ɗari paməu a da cha zəndə vi nda nja uyatə wa, kəl ja, mavi'i inda zəndəti, ngə cha ɓwanya na sal gambəl, 10cha na, “Madawa nja nga ka ladər, cho ghəya nə nda ɓitir anap nda məsəɗakəu. Ahir manda sa ga nyi, njo nda udiya na ɗimi nyi, janə nakə nəngha, ka fiya məsəɗakə nyi kəl sakana!”
11Nənnə ngə tangərmar səshinshin nda Yesu tə məra, ya cha mər nyi avu Kana a tə hə'i Galili, ana əngə cha chabiya səli nda cha ni. Shawa nyi tsəu nda nənyi jiri. 12Ahir nda ladər nda tə wura cha hya'atə ga təra yi Kafarnahum nanda ka ama nyi, ka zamə nyi ana shawa nyi, nda yi hanyar pəchi kushə hinda.
Yesu tə Gədləbiya Njir Mər Səɗimi ku Mbwa'alə Hyel
(Mat 21:12-13; Mar 11:15-17; Luk 19:45-46)
13Sakanda bəjir ladər Dləgəlnda nə njir Yahuda kaɗa ɗa, kəl ngə Yesu tə hya'atə ga təra yi Urshalima. 14Nda cha gwa ku babal nə Mbwa'alə Hyel nda, cha həya alenya nji kwa ɗəlnda ka tla, ka kətəng, ka mbətla Masar, ana alenya nji tə ngya kwa bəlanda kwaba pampaməu. 15Kəl ngə cha ləmətə wuɗa nyi na pa ga gədləbiya nda ku mbwa'ala, ka tla inda, ka kətəng inda, ga uchinda kwaba nji'inda biya dəhə ka teɓər kənda. 16Ngə cha tsə njir ɗəlnda mbətla Masar inda, “Fa'abiya ma sə'ina, ngwa hya da shandə ki Ada ɗa, ka suku wa.”
17Ngə shawa nyi inda ɗənghatə ənda tsəfətsəfə nyi cha ku likatəkatə nə Hyel ənda, “Nyidar vi nghə kwa ndzəɗa ku ɗufwa ya 'ual'ualəu.” 18Alenya njir Yahuda tə wum ga nar nyi, “Səshinshin mi ko nau char ea, tsa'aka ea zəndə ənda gyalkur mər sə ingə da tsa ka?” 19Kəl Yesu tə wum ga nar nda, “Huɓənda ma mbwa'alə nga, aku hanyi makər yo hya'andi.” 20Njir Yahuda tə na, “Mi! Fa fwaɗəkumənyi parnya kwah nja mər tə mbwar hər Mbwa'alə nga, nə ko na ya, aku hanyi makər tanyi ko nau hərta?” 21Kəl ja, mbwa'alə ngə Yesu tə ɓwanya təkər nga dza kərnyi nga. 22Ahir nda Tlakə tə hya'andə Yesu ku hwa, kəl ɗəɗəu tanyi shawa nyi inda ɗənghatə Yesu nar nda tə ənga, kəl nda nənyi jiri ana sə nda likatəkatə Hyel tə na ana ɓwanya nda Yesu tə dəkar nda.
Yesu Zəndəbiyatə Ɗufwa Nji Dəhəu
23Sakanda Yesu vu Urshalima ka Ladər Dləgəlnda nə njir Yahuda nda, nji ɗang tə nənyi jiri nə tləm nyi aka səshinshin nda mər cha. 24Kəl ja, a Yesu da dləukər na nda wa, aka a zəndətə cha sə nda ku ɗufwa nda, 25A da cho gwa'a nja dəkarnyi sə təkəra nji wa, aka zəndətə cha sə nda ku ɗufwa ndəu.
Dewis Presennol:
Yohana 2: hbbNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Wycliffe Bible Translators, Inc. and © The Nigeria Bible Translation Trust 2018