ɛYohana 2
2
ɛYɛso gha kɛ Hyere iNɛn Teye iNɛn ɛNap
1Kɛ ne sɛ nituk ifaa kɛ phee, idira ne tom ɛyɛl kaa sonɛ ɛgarang ne iKaana ne ɛ so ne ivel ne iGalili. ɛGyinɛ ɛYɛso gha kaa ne so ɛnggyɛ wo, 2ne ma mɔng ɛYɛso yegha nɛ ninɔn ne icwam ɛbhɛ na idira de ne mang. 3Kɛ ne sɛ inɛn ɛnap ne idira da kɛ taal le, ɛgyinɛ ɛYɛso gha ne yaak ɛbhɛ, “Sɔng nibhɛ tɔ ne inɛn ɛnap nang.”
4ɛYɛso gha ne kyii nɛ ɛ yɔngɔ, “ɛDɛ, sɔng ɛ yɛk me ne ɛdɛ ɛkɔn na nang, sɔng nten nge de kɛ ku tuu nang.”
5ɛGyinɛ ɛYɛso gha ne yaak ninaa ne hosop inɛn ɛnap ba, “Mɔn ɛn gbik ɛkɔn na ne ɛ kɛ yɔng wu te ne ɛ mɔn ɛn.”
6Cɛcɛk ɛnggyɛ wo, idɛ idong ngge, ne kɛ ryɔng ne ikpɛɛ, kaa ne sonɛ iphɛ ɛtaraa nɛ niYahodawa na kaa teesek ne inɛn ne tes itso nibhɛ wɛwɛy ɛli ne ikpii nibhɛ bol. iZong ijwaan saa ne i re ilwangga nzuwubɔ icwat.
7ɛYɛso gha ne yaak ninaa ne hosop inɛn ɛnap ba, “Yaak ɛn idong ngɛdee wo ne inɛn hyɔrɔ”; nibhɛ ne yaak inɛn da ne idong ngge njɛnjɛt.
8Ne ɛ ji yaak nibhɛ, “Ne ɛ ji tok ɛn ne inɛn nɛdaa wo ɛbhɛ nang ɛn ɛhaa ne wɛɛ inɛn ɛnap ba.”
Nibhɛ ne mɔn ɛlɛy, 9ɛhaa ne wɛɛ inɛn ɛnap ba ne phɔghɔ inɛn da ne kɛ hyere mpɛ teye inɛn ɛnap ba. Sɔng ne ɛ seng ɛlɔ gha ne lenɛ nang, (ninaa ne hosop inɛn ɛnap ba, nɛ nibhɛ kɛ towos inɛn da kaa ne i yɛɛ). Ne ɛ ji yel-le ɛyiyaam ne yɛl la gɔɔ, 10ɛ yaak ɛbhɛ, “Nzi shii bo ɛnyi gha tsa ɛ nang ninyi na inɛn ɛnap ba ne mpɛ kɛ jam, yaa ne ji sɛ mpɛ kɛ hɔn ɛrɔngɔ ne ɛ ji bhɛ tul mbaa ne mpɛ kɛ sang jam mo. Sɔng ɛ kɛ ne mɔn ɛlɛy yang, ɛ kɛ tsa ɛ tul mbaa ne hame mpɛ kɛ jam, iphɛ dee ɛ kɛ ne ji bhɛ tul nyɛnɛng ngɛ ɛlyilyɛghaa.”
11ɛKɔn ne kparat tɛghaa wo ɛbhɛ kaa so ɛhaa ne ɛYɛso gha kɛ tsa ɛ mɔn, ɛ kaa ne mɔn ɛbhɛ ndɔ ɛgarang ne iKaana ne ɛ so ne ivel ne iGalili. Ɛ kaa ne tɔɔl ito-ndiinday ɛbhɛ, ninɔn ne icwam ɛbhɛ na ne nang ne itin nɛ ne ɛbhɛ.
12ɛTsim mɛ ɛlɛy, ɛYɛso gha ne ɛgyinɛ nɛ nigwaa ɛbhɛ gbik nɛ ninɔn ne icwam ɛbhɛ na ne phɛ ɛgarang ne iKafanahum nibhɛ bhɛ shɛɛ ɛnggyɛ wo nituk ncɛt.#2.12 Ta yɛɛn: ɛMac 4.13.
ɛYɛso gha Kɛ Roos Ninaa ne Bees iDeng
(ɛMac 21.12-13; ɛMar 11.15-17; ɛLuk 19.45-46)
13Kɛ ne sɛ nituk kɛ yek cɛcɛk nɛ niYahodawa na yaa re idira ne tes iDee de Tsak#2.13 idira ne Tes iDee de Tsak: iDira ne Tes iDee de Tsak ko kaa so idira de nɛ niYahodawa na kaa tas ɛli ne ɛTaanggbey ya kaa phɔt nibhɛ ndɔ ne iwɔ ɛHyiridus. Ndɔ ne iDira yɛdee nggyɛ wo, ɛrɔngɔ kaa ne i hyɛ ninɔn ne iFarak. Yɛɛn ndɔ ɛWee ne iWur 12.1-14. ko nang, ɛYɛso gha nɛ ninɔn ne icwam ɛbhɛ na ne waray nibhɛ phɛ ne iYɛrushɛlɛm. 14Ndɔ ɛsaa ne ideng nga, ɛYɛso gha kaa ne bhɛ sɛ ninyi na nibhɛ lɛbhɛl irwandɔng, ne ᐩigyol ntsabhak, gbik ne ihywihywaa, ɛ ta sɛ nidɛng kɛ sooset nibhɛ bok nitɛɛbul nibhɛ sunusi ijam. 15ɛYɛso gha ne bo ikpɛrɛt ɛ bante ne irwik, ne ɛ ji bhɛ roos ninaa ne lɛbhɛl irwandɔng ngga gbik nɛ ninaa ne lɛbhɛl ne ᐩigyol ntsabhak ka ɛ tul nibhɛ gɔɔ ne izay. Ɛ ji sanga ijam be nɛ ninyi na sunusi wo ɛ tes nitɛɛbul lɛ gup. 16Ne ɛ yaak ninaa ne lɛbhɛl ihywihywaa de, “Wuusi ɛn ndɔ ɛbɛ wo! Aa mɔn ɛn ɛli ɛ bo ɛn ijwee ɛKyɛɛ nge wo ifɛ teye ɛlɔ ne dad iza ghaa?”
17Ninɔn ne icwam ɛYɛso na ne taate ne ibol de ne kɛ haa ndɔ ne iWee ne ibol ɛTaanggbey yo i bo, “iShwim ba ne n bok daa ne ideng mo de i re me irway te igboo.”#2.17 Ta yɛɛn: Ghel 69.9.
18nindiinday niYahodawa na ne yaak ɛbhɛ, “Wu ɛTaanggbey ya ɛbhɛ kɛ tom mɛ wo ne ɛ mɔnte ɛdɛ ɛkɔn ne kparat ne aa tɔɔrek njwii wu ɛlɛy ne iphɛ so ɛtsak.” 19ɛYɛso gha ne kyii nibhɛ nɛ ɛ yɔngɔ, “Tobhos ɛn ideng ngedee wo, naa ne kyii ta lɔl iphɛ ndɔ nituk itwat.”#2.19 Ta yɛɛn: ɛMac 26.61; 27.40; ɛMar 14.58; 15.29.
20niYahodawa na ne yaak ɛbhɛ, “Njwi kɛ bo ishay de ne iphɛ kɛ hɔn nzuwubɔ nwaas ne iphɛ ɛtaraa njwii lɔl ideng ngɛdee wo, ɛɛ ne bo wu sɛɛ lɔlɔ ndɔ nituk itwat ree?”
21Kaabi ɛYɛso gha kaa bo wu ideng ngge so ibek ne. 22Kaa ne ji sɛ ɛtsim mɛ ne kɛ yiisik ɛbhɛ tsik ndɔ ne ikpuu da, ninɔn ne icwam ɛbhɛ na ne ji taate ne ibol de ne ɛ gha kaa boote wo. Nibhɛ ne ji nang ne itin nɛ daa ne ibol de ne kɛ haa ndɔ ne ɛWee ne iBol ɛTaanggbey yo gbik ne ivol da ne ɛ kaa bol lo.
ɛYɛso gha Yɛɛ iRway Ninyi da Gbik
23Kaa ne sɛ ɛli ne ɛYɛso gha so ne iYɛrushɛlɛm be, nten ne iDira ne Tes iDee de Tsak ko, ninyi na gbom kaa ne yaang nikɔn ne kparat ta ne ɛ kɛ mɔn no, nibhɛ nang ne itin nɛ ne ɛbhɛ. 24Sɔng ɛYɛso gha ne jung nang nibhɛ irway ɛbhɛ gbik nang, daa ɛli ne ɛ ku yɛɛ nibhɛ gbik. 25Sɔng ɛYɛso gha ji ta tɔk te ɛten ɛsii bhɛ tɔng ɛbhɛ ɛkɔn negha ne ɛ so ndɔ ne irway ɛnyi ba nang, daa ɛli ne ɛbhɛ ku yɛɛ irway ninyi da gbik.
Dewis Presennol:
ɛYohana 2: etxNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project