Tice 12
12
Tidilo Jokirisito Omeede
1Tetu kare nono, Abaka Erode oko cako tidilo jo mogo kikom ekodet me jokirisito. 2En eko neko Yakobo omin me Yokana kede epima. 3Kakame eneno kede be gi nono oyomo cuny Iyudayan, en eko mino komako Petero da. (Mano bin otimere i kare me ebaga me Mugati kame Arup li kiye.) 4#Yai 12.1-27Kakame bin etieko mako kede Petero, en eko rwake i otkol, di eko mine i cing ikodeta ongwon me isirikalen pi dare, di oudo etie kede tam me kele i nyim jo pi pide ingei Ebaga me Kalamo. 5Di do oko mino Petero obedo i otkol, do ekodet me jokirisito oko donyo ilega but Rubanga pire kede cuny gi lung.
Kogonyo Petero ki Otkol
6Iwor kame ru ceng kame Erode oudo oyaro do woto kede Petero pi pide i nyim jo, Petero oudo tie nino i diere me isirikalen are di kotwee kede irikoi are, doko di isirikalen ace are da tie daro ekeko me dog erute me otkol. 7Kikano, malaika ka Rwot oko neeno, di asara oko caro agola me otkol, en eko babapo nget Petero, eko cene di ewaco ne be, “Yai malo awakawaka.” Cucuto nono di irikoi popoto ki cing Petero. 8Di malaika oko waco ne be, “Aso ngap igoen ni iko ngapo amuka da.” Petero oko timo kamanono. Di malaika nono oko waco ne be, “Aso rwai egoe ni me adoka di iko luba.” 9Petero oko donyo ooko di oko lube. Petero oudo likame ngeo be gikame malaika nono otimo oudo tie me ateni; oudo eparo be etie neno gianyuta. 10Kakame kikalamo kede isirikalen jodar me agege kede me are da, kiko do tuno i ekeko me lilim me dog erute me bomba. Di ekeko nono oko yabere ne gi en kene, di gin kiko donyo ooko, kiko cako lubo yongayo moro acel; cucuto di do malaika nono oko rwenyo oweke.
11Di do wi Petero oko yabere di eko waco be, “Nan do atieko ngeno kiber be Rwot en kame oudo ocwao malaika mere pi laka ki cing Erode kede ki gi dedede kame Iyudayan oudo oikere pi timo i koma.”
12Kakame Petero oniang kede gikame otimere noni, en eko ot paco ka Maria toto me Yokana, kame nyinge ace oudo Marako; jo atot oudo ocokere tie ilega kuno. 13Kakame bin Petero okukungo kede ekeko me dog erute, nyako moro ngatic me ot, kame nyinge Roda oko bino pi yabo ne ekeko. 14Do kakame ewinyo kede di eko niang be dwan Petero inonono, en eko ringo edok cen abongo yabo ekeko pi yomcuny, di eko waco ne jo be Petero oudo tie cungo i dog ekeko me erute. 15Do gin kiko waco ne be, “In ipoi.” Do en eko cere ne gi di ewaco be Petero oudo tie cungo ooko. Gin di do kiko waco be, “Mano malaika mere!”
16Do Petero oko meede kukungo ekeko. Kakame kiyabo kede ekeko, kiko nene di kiko uro. 17Do en eko poro ne gi kop kede cinge be kilingi, di eko tatamo ne gi i yore i yore epone kame Rwot owote kede ki otkol. En eko waco ne gi be, “Tatamunu kop ni ne Yakobo karacel kede imiegu i Kirisito.” En eko yai eoto kabedo ace.
18Kakame do piny oru kede, wi isirikalen jodar oko dubere pi gikame oudo otimere ne Petero. 19Di bin Erode omoo Petero di likame eko twero udo, en eko donyo pepenyo isirikalen jodar, di eko mino cik be poore nek gi.
Erode di do oko yai ki Yudea eoto bedo Sisiria.
Erode Oto
20Kikano, Erode oudo olilo kede jo me Taya kede Sidon. Gin kiko ot bute di kitie i ekodet acel; kiko ber cako kede loko tam ka Bulasito, kame bin oudo gwoko paco me abaka, di kikwae pi konyo gi yamo kede abaka kop me mulem, pien cam me piny gi oudo wok ki piny kame abaka pugo.
21I ceng kame koiko, Erode oko ngapo engape mere me abaka, eko bedo i kom mere me ajakanut, di eko cako yamo kede gi. 22Di jo oko lelemo be, “Etie yamo kede dwan rubanga, do likame dwan dano!” 23Cucuto nono di malaika ka Rwot oko mino tuwo odipo Erode, pien oudo likame emio Rubanga deyo. Kudiling oko came di eko to.
24Do kop ka Rubanga oko meede nyai, di jo atot oko yei.
25Baranaba kede Saulo oko yai do ki Yerusalem ingei ngetakino tic gi, di kiko tero Yokana kame kolwongo be Marako kidok kede.
Dewis Presennol:
Tice 12: BILKDC13
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Baibuli I Leb Kumam © Bible Society of Uganda, 2013.