Luuka 23
23
Yinsa onlawaniwa wa Pilaatu
1Khulankha khuntti yooshi khunthuula Yinsa khunlawana wa Pilaatu. 2Noofiya khunlokoveza yoori: “Nansikana otu awaalikhisaka atthu eetthu oripha lumpuru la Seezari, ajilupezaka yoori ti Al-Masiihu na mfwalume.”
3Aphano Pilaatu khumuuzela yoori: “Ti weeyo mfwalume wa mayaahuuti?”
Yinsa khujipu yoori: “Weeyo walupa.”
4Pilaatu khuwooza mahaakhimu a tiini apale na khuntti ya atthu etile yaariivo yoori: “Miiyo akinimoonana hatha paathuli.”
5Atthu apale khusala akhanyarela olupa yoori: “Otu ontta owaakhupa atthu a Yudeya yooshi eti, aaza Kalileya mpakha ofiya okhuno.”
6Paata yoosiila mattakhuzi apale, Pilaatu khuuzela yoori: “Otu aya nkalileya?” 7Pilaatu ajuwiyeevo yoori Yinsa aari wa nti wa mfwalume Herooti, khuruma olawaniwa ottuukho. Wakathi aya opo Herooti naye ari Yeruzaleemu.
8Herooti noomoona Yinsa, khwiiya woofurahi venkivene maana aaziye raku otakha omoona, mwaasa woosiila vitthu aari orettaazo, khusala aweja woona minjuza arettaka. 9Aphano khusala amuuzela vitthu zawaatta, ila ye khuhisala anjipu hatha etthu. 10Mahaakhimu a tiini na anamanozela a kano aari attaaphale, anlokovezaka mattakhuzi mawulu mawulu. 11Herooti na anajanka awe khwaaza onveyisa Yinsa na ontarawu, khunwalisa ajapi yoofwalume khuruma yoori arutiseliwe wa Pilaatu. 12Raku Herooti na Pilaatu khaari osiilanaka, ila siikhu ethiito khupuwa oshirikha.
Yinsa wa Pilaatu swaafu ya phiiri
13Aphano Pilaatu khuwaakhuwela mahaakhimu a tiini, anamaphuka milattu na atthu, 14khuwooza yoori: “Mwakitiisela otu mwinlupezaka yoori ontta owaakhupa atthu, ila miiyo kamuuzela vakatthi venu mweeyo, akimoonaneeni hatha paathuli khwa vitthu epo mwininlupezaazo. 15Herooti naye khamoonaneeni hatha paathuli, tiito arumiyeeyo orutiseliwa okhuno. Eto enthoonyeza yoori kharetteeni etthu yoosuhi wuuliiwa. 16Miiyo kintta nhukhumu nawiisha kinleve.” 17Noofiya siikhu ya njampo la Paashikowa, Pilaatu aarina sharuthi ya owaafukulela atthu napherezu mmote.#23:17 Warakha za raku khina aaya eti ya 17.
18Attaaphale atthu ooshi khusala anyakula araka: “Mwimuule! Mwinifukulele Barapa!” 19Barapa aafukeliwe mwaasa woolaza onazompere nsitati na khumuula ntthu.
20Aphano Pilaatu khurutela owooza atthu, atakhaka onleva Yinsa. 21Ila atthu khusala anyakula venkivene araka: “Akhomeliwe, akhomeliwe!”
22Pilaatu khuuzela swaafu ya ttaatthu: “Niini arettiyeeyo yootakhala? Miiyo akinimoonana hatha paathuli yoosuhi wuuliiwa. Kinruma yoori mwinhukhumu nawiisha kinfukule.”
23Ila yo khusala anyakulaka avekaka yoori Yinsa alawe akhomeliwe, akhanyarela onyakula. 24Aphano Pilaatu khukhupalela oretta etile aari otakhaaye atthu apale. 25Ye khunleva Barapa otule aafukeliweeyo mwaasa woolaza onazompere na ohusuti, khuwenkha Yinsa, otule anvekiyeeyo, yoori alawe anrettele etile aari ontakhelaaye.
Simawu onthuulisiwa nsalapa wa Yinsa
26Yinsa khuthuuliwa olawaniwa, eettaka olawaniwa etthiipile, khusikaniwa mwinyi mmote wa Sireene aari wiitthiwaaye Simawu, aari olankhaaye omashapa. Khukholiwa khuthuulisiwa nsalapa opule yoori anlottisele Yinsa. 27Aari olottiwa pi atthu awaatta na aarivo aakha aari onlilelaaye ankhupanyeraka. 28Yinsa khuzukuluwa khuweekesa aakha apale khuwooza yoori: “Aakha a Yeruzaleemu, mwihikililele miiyo, ila mwijililele mweeyo na aaneenu. 29Maana zinteela ofiya siikhu mwinttelaaye olupa yoori: ‘Aparikhiyiwa aakha apale ohivokoli na ahinaamwise.’
30“Siikhu ethiito mwinlawa mwalupe yoori:
“ ‘Nyaako zinikwele
kulu zinisirele!’
31Maana, miiyo mwinikitthantta khwa nanna eti, muutthi nwishi, onttela wiiya toovi opule wawuuma?”
32Khuthuuliwa theenya anazompere awiri yoori alawe ooliiwe vamote na Yinsa. 33Noofiya puuro eniitthiwaaye Kalavaariyu#23:33 Kalavaariyu lina maana la likurakuza la eeshwa ya ntthu woofwa., Yinsa khukhomeliwa na anazompere apale awiri, mmote nkhono nlume nkina nkhono nkha. 34Aphano Yinsa khulupa yoori: “Paapa, owaaswaamihi atthu apa maana khanjuwa etthu anrettaaye.”#23:34 Warakha za raku khina aaya eti ya 34. Elottelanaka yo khwaawanyana kuwo epile za Yinsa nkatthi wa nasipu.
35Atthu aari attaaphale aari woona zooshi. Attunkhulu a Yudeya khusala antarawu Yinsa araka: “Ye awoosuru atthu akina, mwinlikhe ajuusuru mweenyewe nkhama khweele ti Al-Masiihu, nanthawuliwa ti Nluku.”
36Anajanka na yo khusala antarawu Yinsa antiiselaka viinyu yoonyuunya, 37na omuuza yoori: “Nkhama khweele weeyo o mfwalume wa mayaahuuti, ojuusuru omweenyewe.”
38Vansalapa attaaphale aakhomeliweevo, khutthiiwavo lipawu laatikhiweeyo yoori: “Otu Mfwalume wa Mayaahuuti.”
39Anazompere apale aakhomeliweeyo vamote na Yinsa, mmote aya khusala anveyisa amuuzaka yoori: “Nkhama weeyo o Al-Masiihu, ojuusuru na onuusurwaka na fweeyo.”
40Otule nkina khujipu ammaruwelaka nzaawe araka: “Weeyo khunimoova Nluku, ye na fweeyo hukhumu yeetthu moote? 41Fweeyo khweele ninsuhi ohukhumweliwa epile nirettiyeezo, ila ye kharetteeni hatha etthu yootakhala.”
42Aphano khulupa yoori: “Yinsa, okuupuwele amana ofiya muufwalume mwawo.”
43Yinsa khujipu yoori: “Miiyo kiniwuuza khweele yoori leelo eti weeyo onttela wiiya vamote na miiyo jannathi.”
Ofwa wa Yinsa
44Esaleelaka ofiya elukuluku njuwa khuzima, khupuwa yiiza olumwenku wooshi mpakha makaaripi. 45Phazira khuluyeene yaafinikhiyeeyo omwimpari khuvaruwa vakatthi. 46Aphano Yinsa khukhuwa na kuvu araka: “Paapa, rooho yaka kininkhelela mmakhono mwawo.” Noolupa nttakhuzi ntthile, khwiittha phuumu.
47Nrooma mmote aari nttunkhulu wa anajanka, nawoona vitthu epile zaarettikhaniyeezo, khunsifu Nluku araka: “Weekhweele otu aari ntthu aari weettettisaaye shariya.” 48Ooshi apale aari attaaphale, nawoona vitthu epile zaarettikhaniyeezo, khuruti apiyaka vifuwa zaya athoonyezaka huzuni. 49Ashirikha a Yinsa ooshi na aakha apale anlottiyeeyo a Kalileya, aarettiye ari peetiwene eettaka woona vitthu epile.
Ozikhiwa wa Yinsa
50Aarivo mwinyi mmote aari wiitthiwaaye Yuusufu wa sitati ya Arimateeya nti wa Yudeya. Ye aari wooshapweya rooho na wa shariya. Aari wa khuntti ya mashawuriiya, 51ila ye khaakhupaleliye epile mashawuriiya aawaziyeezo na aarettiyeezo, na aari weekesela ota wa ofwalume wa Nluku. 52Ye khulawa wa Pilaatu oveka mwiili wa Yinsa. 53Khulazavo vansalapa aphale, khuputaputela va joora khulawa khuzikha nliphotto la mwaako laari ahinazikhiwemo hatha ntthu. 54Yaari Siikhu ya Ojitthenkeza, na yaari osaleela waaza Saapatu.
55Aphano, aakha apale aataniyeeyo Yinsa Kalileya, khunlottelela Yuusufu omwaako okhule eetteliyeewo ozikha mwiili wa Yinsa, olawa woona khapuri na mwiili nanna waazikhiweezo. 56Nawiisha, khurutela owaya olawa waattalela mafuttha oonukhela yoori alawe avaaze mwiili wa Yinsa. Saapatu yo khuvumula nkhama etthiipo enrumaazo kano.
Dewis Presennol:
Luuka 23: eko
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, Wycliffe Bible Translators, Inc. All rights reserved.