Emiighom 7
7
Aḍigho phọ
1Ọmoogh-we phọ ạḅeni Noa mọ, “Nạ rꞌoomo ọto kꞌạna, ịki eḍigh sịphe ologhi oghuugh phọ. Mị mạwa ạmiin mọ ogina ạna bịn kụ oye sịen oghiil phọ ọphon dị raḍighi ghan ịdi ẹnighe. 2Kịa ạsighe oḍual ạtorotoro ọdo ẹnam dị eseleman, ẹya rꞌelephiri, ạḅile ạsighe ịyal ọdo ẹnam lọ íseleman, ẹya rꞌelephiri, 3ạḅile kẹn ạsighe oḍual ạtorotoro ọdo ẹnun ẹya rꞌelephiri. Ḍighi ịduon phọ ọbo tọrotoro ẹnam rꞌẹnun ẹtol dị kẹmar ẹḅile eseere sịen ade phọ. 4Esi oḍual aḍughul-otu mị kaseere ọlophia dị kạloph sịen aḅirini phọ inyadi aḍughul-otu. Mị kapiemi oomo ạraraar phọ ịpe ẹmoogh bọ ghuḍum mị ạlhem bọ edi bọ sịen aḅirini phọ.” 5Kụ aNoa ạtuugh oomo ịpe Ọmoogh-we phọ ạto bọ ạḅeni nyọdi aḍighi.
6ANoa mạman odiiny okuron ạsia, kụ aḍigho phọ eḍigh bọ de phọ. 7#Mat 24.38, 39; Luk 17.27Ọdi rꞌạnir ọdi, rꞌạnmuny ọdi, rꞌạnmariir ạbidi kụ uḍigh bọ ologhi oghuugh phọ, okpetenaan ạmuum-aḍigho phọ. 8Ịnam mọ, ịpe eseleman bọ rꞌịpe íseleman bọ, rꞌịnun phọ, rꞌoomo ịpe rekuura ghan bọ sịen ade phọ, 9ịyal yạl ẹya rꞌelephiri, kụ iḍigh bọ sịphe ologhi oghuugh phọ ẹtuonom Noa ịdipho Ẹnaan ẹto bọ ẹḅeni nyọdi. 10Oḍual aḍughul-otu phọ reten bọ kụ ạmuum-aḍigho phọ amiigh oḍigh ookpereghiom aḅirini phọ.
11 #
2 Pit 3.6
Mem dị aNoa mạman odiiny okuron ạsia, ḍioph rꞌoḍual aḍughul-otu ụnwanyu dị amuneniom ịyal, oomo asikol ạmuum ọlha-ude phọ ekpuphaan, kụ arughuugh ạrunhu-aḍibuo aḍigho ẹpe kꞌạke phọ eghunyonu. 12Kụ ọlophia ạloph inyadi aḍughul-otu sịen aḅirini phọ. 13Eniin phọ aḍio phọ kụ ẹdi aNoa rꞌạnir phọ ọdi, rꞌịraar phọ ạnmuny phọ ọdi Sẹm rꞌạHam rꞌaJafet rꞌạnmariir phọ ạbidi, oḍigh bọ oghuugh phọ. 14Eḍigh aani bọ tọrobo ẹnam ẹlo orughom, rꞌịlo elegheḍum, rꞌạtorobo ẹnun, ịbam rꞌigbogh. 15Ẹya rꞌelephiri ạtorobo ịyaar dị ẹmoogh ghuḍum kụ iḍigh bọ ologhi oghuugh phọ ẹtuonom Noa, 16ịdipho Ẹnaan ẹḅeni bọ nyọdi. Kụ Ọmoogh-we phọ aghughi oghuugh phọ aNoa.
17Aḍigho phọ iru ni ẹbugh esi inyadi aḍughul-otu, kụ oghuugh phọ aphooph ạnyu ạmuum mọ. 18Kụ ạḍikel ạmuum mọ ẹbugh kụ oghuugh phọ aphooph, 19ạmuum mọ ạtophoron, ạminoghom ruugum dị ooleeny ịtol, 20tụtu apeleghiom ạnyu aruugum mọ ịdi rẹkiom ni ịyaldi rꞌịraar ạrada ḍịkel. 21Tọrobo ịyaar dị ẹmoogh ghuḍum sịen ade phọ imugh ni; tọrobo ẹnun rꞌẹnam rꞌoye. 22Tọrobo ịyaar dị ẹmoogh ḍiphooghu sịen ade phọ imugh ni emuneen. 23Ọmoogh-we phọ aphiemi ni oomo ạraraar dị ẹmoogh ghuḍum sịen ade phọ: we rꞌịnam rꞌịnun. Awe dị osugha uḍighi Noa rꞌạbuphe rꞌọdi oḍigh bọ oghuugh phọ bịn. 24Ạmuum mọ ómiigh osoorom tụtu ẹman oniin okuron rꞌooghdi aḍughul-otu.
Dewis Presennol:
Emiighom 7: ẠḌI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS