Emiighom 15
15
Ịyo phọ Ẹnaan eghiran bọ rꞌEbram
1Ịphen phọ reten, kụ Ebram ạmiin uḍien kụ ạnaghan dị Ọmoogh-we phọ ạḅeni nyọdi mọ, “Ebram, kákiilaan. Mị kụ ọsuaram ikpo ạna. Aruunmo phọ mị kạngo bọ nyịna kẹbugh ni iboom.”
2Kụ ọlo Ebram ạḅem mọ, “Ogbogh Ọmoogh-we, eeghe ịyaar kụ ẹdi nạ kụngo bọ ịmi, ịduon phọ mị ụ́moogh bọ nmụny, omuton Eliezer ọony-otu phọ ạmi ọpo ạDamaskos phọ? 3Nạ ịmi nmụny ụ́ngo, kụ oniin ọnyo ẹbene phọ ạmi kụ kale erua ạmina.”
4Kụ ikpo ọnhu Ọmoogh-we phọ eru ẹteeny Ebram kụ ẹḅeni mọ, “Ọphon phọ kụ kále erua ạna; ọkaraghi ọony ạna kụ kale ni erua ạna.” 5#Rom 4.18; Hib 11.12Kụ Ọmoogh-we phọ ạpham nyọdi amitenom erugh kụ ạḅeni nyọdi mọ, “Pogh okuaḍio phọ. Bạl rạanaan phọ, mụghumo nạ katue ni, agbi amuneni. Ịdipho kụ ẹdi ẹemara ẹemara ạna koleeny.”
6 #
Rom 4.3; Gal 3.6; Jems 2.23 Ebram ameeraam ni Ọmoogh-we phọ, kụ loor esi omeeraam mọ ọdi kụ Ọmoogh-we phọ ạsighenom nyọdi mọ ọdi oye aruukuan ni.
7Kụ Ọmoogh-we phọ ạḅile ạḅeni nyọdi, “Mị kụ Ọmoogh-we phọ ọpo ạsighe bọ nyịna ẹpe Ur ẹmha phọ ạBabilon amitiom ọngo ạna de phọ ạḍien mọ mọogh.”
8Kụ Ebram apuru mọ, “Ogbogh Ọmoogh-we, eeghe ịyaar eḍeenaan kụ ẹdi mị kạsighe bọ alegheriom mọ mị kụ kạmoogh de phọ ạḍien?”
9Ọmoogh-we phọ ạphagharanaan mọ, “Kịa ạsighe uruom ịmi ḍịya ạnam, ạtu-ọga, rꞌodughuna tọrotoro ọnyo ạbidi ạman ghan ịraar-rạar ạsia, ạḅaram ọkurughozo rꞌọgaami eekumude.” 10Kụ Ebram ạghi ạsighe oomo ạraraar phọ ịphen phọ ạsighe aruom Ẹnaan; kụ aalemi ghan ịnam mọ ạay ịyal yạl ipoḍi, kụ aseere ghan ịdi opoḍi asoman opoḍi ịyal ạsikool; ịnun phọ kụ ẹdi ọdi ụ́baay aani. 11Ạredelhe esoorom ịnam mọ, kụ Ebram aphorogh.
12 #
Job 4.13, 14 Mem dị erumuḍio remeel ighool, akugbogh ạralha ạphu Ebram. Ebram rạnaani kụ ọkikiph ufiri aḍiigu aḍigh aakpereghiom nyọdi. 13#Ẹḍua 1.1-14; Iiḍ 7.6Kụ Ọmoogh-we phọ ạḅeni Ebram mọ, “Legheri ịphen phọ mọ ẹemara ẹemara ạna koḍighi ni ruuruen ẹpe ẹnon eelhe dị ítu ẹlo ạbidi. Bịdi koḍighi rẹbene ẹpe phọ kụ kọmiine ni bịdi iboom esi inya okuron ạsia. 14#Ẹḍua 12.40, 41; Iiḍ 7.7Kụ ọlo mị kạliom ni eelhe phọ ẹpe koḍighi bọ bịdi rẹbene phọ. Ḅịle kẹn mem dị bịdi kọḍua bọ eelhe phọ ẹpe phọ, bịdi kọḍuanam ni igbogh aruphua. 15Kụ ọlo nạ rꞌaloor kạkpo ni igeny kụ nạ amugh rꞌẹepho kụ oḍi nyịna. 16Keḍighi ni inya oghiil kụ ẹemara ẹemara phọ ạna oḅula sịen phọ, loor esi dị mị káporogh Ạmorait phọ, tụtu ọḅaar ẹmhu phọ ạbidi ạbugh asi esi dị kótue ọbile dị ụliom bịdi.”
17Mem dị ọmu maḍim kụ meghul, ekperenom bịn aguugh ạnian rꞌạmughi dị rạdumughu amite, rꞌobula-bula ọmure aamor ạdaph igbo aritigh ịnam mọ aten. 18#Iiḍ 7.5Ḍio phọ ạḍiphe phọ Ọmoogh-we phọ aghiran ịyo rꞌEbram, kụ ạḅeni nyọdi mọ, “Mị aguanaan ọngo ẹemara ẹemara ạna de phọ ạḍien, emiigh ẹpe Ọphiiny aNail phọ kụ esiemi ẹpe oboom Ọphiiny phọ aYufratis 19ẹḅaram de aKenait, rꞌade aKenizait, rꞌade aKadmonait, 20rꞌade ạHitait, rꞌade ạPerezait, rꞌade Refaim, 21rꞌade Ạmorait, rꞌade aKenanait, rꞌade aGirgasait, rꞌade aJebusait.”
Dewis Presennol:
Emiighom 15: ẠḌI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS