Emiighom 14
14
Ebram ạtagharan Lọt
1Inya ạbudaam, Ạmrafel ọlo ạBabilon rꞌẠriok ọlo Elasa rꞌaKedorlomer ọlo Ilam rꞌaTidal ọlo aGoyim, 2ụghi oruphiom ẹgham rꞌoogh ạbunon ạbudaam: Bera ọlo ạSodom rꞌaBirsa ọlo aGomora rꞌaSinab ọlo Adma rꞌaSemeber ọlo aZeboyim rꞌaBela, (oghol aani bọ mọ aZoar). 3Oogh ạbudaam mọ ạbuen phọ ọḅoph ọnhu ẹpe Eḍiiny aSidim, ẹpe Ọphiiny-Ạla phọ. 4Bịdi mokumunaan rukumuan Kedorlomer ḍioph rꞌịyal ạsia, kụ ọlo omuneniom aḍioph rꞌịraar ạsia kụ bịdi ọḅaar ẹmhu esi ọdi. 5Omuneniom aḍioph rꞌinya ạsia, kụ aKedorlomer aḅetenu rꞌạbudaam mọ bụphe rꞌọdi oḍighan bọ ọḅoph ọnhu kụ ọka bụo Refaim mọ ẹpe Asterot Kanaim, bụo aZuzim ẹpe Hạm, bụo Emim ẹpe ẹdala phọ aKiriataim, 6rꞌạbuo aHorait ẹpe aruugum mọ Idom, ophorogh bịdi ọghi osi ẹpe Ẹl Pạran etuman bọ ẹpe ẹdala phọ. 7Kụ bịdi ogbi oḅula, ọghi ẹpe Kades oghol ghan bọ Enmispat. Bịdi ozuom ẹgham kụ ọkpar opu oomo awe ạramha Ạmalekait phọ rꞌoomo awe Ạmorait phọ orugh bọ ẹpe Hazazon Tạmar.
8Kụ ạbudaam mọ ạSodom rꞌaGomora rꞌAdma rꞌaZeboyim rꞌaBela ọghi ookpomoghan ịlo ee ẹgham ẹpe Eḍiiny phọ aSidim, 9ọghi ozuom ẹgham Ạmrafel ọdaam mọ ạBabilon rꞌẠriok ọdaam mọ Elasa rꞌaKedorlomer ọdaam mọ Ilam rꞌaTidal ọdaam aGoyim, oogh ạbudaam kụ eenan inya ạbudaam. 10Eḍiiny phọ aSidim, ariḅidiph kụ iḍiza. Kụ mem dị Ọdaam mọ ạSodom rꞌọdaam mọ aGomora ọnya osuma, bịdi ụghi osumughu riḅidiph phọ, kụ ọlo bụeri phọ ịraar ạbudaam mọ oghilighu osuma ọghi ẹpe aruugum mọ. 11Kụ inya phọ ạbudaam mọ owum oomo ạraraar phọ ạSodom rꞌaGomora kụ ọḅaram riiḍien phọ kụ osumanam. 12ẠLot ọony umor phọ Ebram arugh ghan ẹpe Sọdom, kụ bịdi ọsighenom aani nyọdi rꞌoomo aruphua phọ ọdi ọḍuanam.
13Kụ oniin oye dị akpetenaan aru ạghaaph oomo phọ ịphen phọ ạḅeni Ebram oye ọlo aHibru phọ. Ọdi arugh ghan ẹpe ireeny iigbia phọ ịpe aMamre ọnyo Ạmorait phọ. AMamre rꞌabumor ọdi, Eskol rꞌAner uḍighan Ebram kụ ọḅophoghan rꞌEbram. 14Mem dị Ebram ạnaghan bọ mọ bụo ẹgham mosiph ọony umor phọ ọno, ọdi aakpomoghi ni oomo awe ẹgham dị ọrol rꞌọdi, ịraar okuron rꞌiḍioph rꞌọphaanya awe, kụ ophorogh inya phọ ạbudaam mọ tụtu ọghi osi kꞌẹpe Dạn. 15Kụ ọdi adi we ẹgham mọ ọdi sịadam kụ ozuom ẹpomoghian phọ ḍughul. Ọdi rꞌabutelhedom mọ odi osophoghom bịdi, ophorogh bịdi osi Hoba, ẹpe ḍịghaagh ephunom ạDamaskos, 16kụ ạanyi oomo aruphua phọ orool bọ. Ọdi ạḅile ạteeny Lọt ọony umor phọ ọdi rꞌaruphua phọ ọdi rꞌạnmariir rꞌạbueri phọ awe phọ ọdi, ạpham agheelom.
ẠMelkizedek ạseph Ebram
17Mem dị Ebram aḅula bọ ẹgham mọ ọdi ạkpar bọ apu Kedorlomer rꞌạbueri phọ ạbudaam mọ, ọdaam mọ ạSodom ạghi ạteeny nyọdi ẹpe Eḍiiny aSave (ughol ghan mọ Eḍiiny Ọdaam mọ). 18#Hib 7.1-10Kụ ạMelkizedek ọdaam mọ aSelem, ọpo aḍighi bọ oyil ạrikia phọ Ọkaraghi Egbogh Ẹnaan phọ, ạsighe brẹd rꞌamiim ạngo Ebram. 19Kụ ọdi ạseph Ebram kụ ạḅem mọ, “Ạḍiseph Egbogh Ẹnaan phọ ẹlhem bọ kẹ phọ rꞌade phọ, ẹrolonaan nyịna Ebram. 20Ạḍiseph ẹrolonaan Egbogh Ẹnaan phọ ẹḅogh bọ mụlogh-ḍien phọ ạna ẹlhogh ḍịghaagh ạna.” Kụ Ebram adi ruphua phọ ịpe odi awum bọ ạsighe ẹpe ẹgham mọ ḍioph abin, kụ ạsighe bin ạngo Mẹlkizedek.
21Kụ ọdaam mọ ạSodom ạḅeni Ebram mọ, “Ụngo ịmi oomo awe phọ ạmi, ạsighe aani ruphua phọ.”
22Kụ Ebram ạḅeni ọdaam mọ ạSodom, “Mị akunya ghisigh Ọmoogh-we phọ, Egbogh Ẹnaan phọ, Ọlemia ạke rꞌade phọ, 23mọ mị kạ́pam ịyaar lọ eru ẹlo ạna mụghumo iri mꞌiḍigh arokoro, ọbo nạ kạḅem ghan bọ mọ, ‘Mị kụ uḍume bọ Ebram.’ 24Mị kạ́sighe ịyaar ẹlo aloor ạmi omuton ịpe awe phọ ạmi molhe bọ, rꞌabin awe phọ ạbuphe ụdaph bọ ịmi ọghi aani. Bịle Aner rꞌEskol rꞌaMamre ọsighe bin phọ ạbidi.”
Dewis Presennol:
Emiighom 14: ẠḌI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS