UMOZHIGO 9
9
Agwatana peni Noa Uwebiye
1Nazhɛ Agwatana peni Noa uwebiye keeni miaụŋ mu bwa, bɛɛ hiɛŋ aŋ, Na mata ma maa hi gembi ufwugwo, maa ajalalo hiŋ shini cɛnjɛ tu unyizo.#Umoz 1:28 2Usunda ehilo we elele, nụ ụnụnụ we elele, ahiɛba kaa ee utegeni iŋ kpaaŋ, keeni iyi elele nɛ yo hombilo na cɛnjɛ keeni ijɛnɛ ye elele nɛ zweni ni itekwu, i zhɛ na nda inyɛsɛ hiŋ. 3Na ya ma iyi-uumwa ye elele nɛ yo rungo, gana na Ngee hi peni iyi tibila inyɛshɛ, gabata du Ngee hi peni iŋ maa i shɛ iyimɛyɛ hiŋ.
4Hiɛ shɛ shɛ hi na ya usunda te mehieŋ mu bwa o, ne mehieŋ ata uraiŋ namɛ.#Liv 7:26,27; 17:10-14; Undwa 12:16,23; 15:23 5No olugwo bụtụ Ngɛɛ zhɛ ma dwalakaka mehieŋ mu uraiŋ usunda we elele tilɛɛ, no olugwo bụtụ kaa Ngɛɛ zhɛ ma dwalakaka uraiŋ yɛu-bino bwa.
6Bụtụ be elele na duduji mehieŋ ma bụtụ, bụtụ du zhɛ bo dudugo mehieŋ mu bwa, iwɛnɛ ta Agwatana njɛ bụtụ nụ ụsụbwa ubwa.#Umoz 1:26; Ụban 20:13
7Na mata ma maa hi na kaana ufwugwo tugombo maa ajalalo hiŋ shini cɛnjɛ tu unyizo.#Umoz 1:28
Agwatana Twa-unu na Noa
8Nazhɛ Agwatana hiɛŋ Noa na miaụŋ mu bwa, 9Hioko ma, N shikicinji unu mu tutwa ne hiŋ keeni miaụŋ mi hiŋ me ekwunyi 10keeni iyi-uumwa ye elele nɛ aa karɛ nɛ namɛ ne hiŋ, ta shanụnụ she elele, ti iyimabiga ye elele keeni isundɛ ehilo ye elele nɛ namɛ na cɛnjɛ tu unyizo, ibɛ shɛ ufwugwo iyi elele nɛ banɛ nụ ụhaŋtụ. 11N shikicinji unu mu tutwa ne hiŋ, maa meni mi zha shɛ ma zhagajɛ ya sasana maa mi iricinji iyi-uumwa kwukwuŋ, meni kaa mi zha shɛ ma zhagajɛ sasana maa mi iricinji cɛnjɛ tu unyizo kwukwuŋ.
12Agwatana hiɛŋ, Useyida unu unyizo-nom na Ngaa twa ne hiŋ keeni iyi-uumwa ye elele nɛ namɛ ne hiŋ keeni iwɛ uwaŋnɛ we elele na te e ci geri-be-eshe na, 13M beci buhwa mi na tụla, ubwa zhɛ ba sha useyida unu mu tutwa na namɛ na ashashɛ mi na atwa cɛnjɛ tu unyizo. 14Aka na Ngee suje odomu Ngee ubi na tụla nazhɛ ɛɛ zhɛ a kwụba buhwa ata na tụla. 15N zhɛ me teyinje unu mu tutwa na namɛ na ashashɛ mi ne hiŋ keeni iyi-uumwa ye elele, maa meni mi zha shɛ ma zhagajɛ ya sasana maa mi iricinji iyi-uumwa kpaaŋ kwukwun. 16Aka na ta buhwa bacɛ no odomu, N zhɛ ma ngbaraka bụ maa me teyinje unu-tutwa unyizo-nom na namɛ na ashashɛ mi keeni iyi-uumwa ye elele nɛ namɛ na cɛnjɛ tu unyizo.
17Agwatana hiɛŋ Noa, Inɛ gɛ ibɛ shɛ useyida unu mu tutwa na Ngee shikicinji na ashashɛ mi ni iyi-uumwa ye elele nɛ namɛ na cɛnjɛ tu unyizo.
Ga Noa Keleni Kenan unu, Bee Peni Shɛm Uwebiye
18Gɛ Shɛm, na Ham, keeni Jɛfɛt, aba shɛ miaụŋ mu Noa mu na mu banɛ nụ ụhaŋtụ. Ga Ham meci Kenan. 19Aba tatụ ga, aba shɛ miaụŋ mu Noa, no olugwo aba atwa elele na namɛ hwayɛ na cɛnjɛ tu unyizo ga banɛ.
20Ga Noa shɛ bufwashɛ, ubwa kwuni itimɛ ya afwafwa tuhwaŋ hiiŋ. 21Bee swe meni mụ tụ'walụ ta afwafwa, maa 'imɛ bụ, bee weci mohondo nu udulo ubwa tugwuno. 22Ga Ham na shɛ bishi Kenan kwụbɛ mohondo me bishi bwa, bee beni bee mbishe atagwụ ubwa eyebi a na namɛ no tupohondo. 23Nazhɛ gɛ Shɛm keeni Jɛfɛt suji tugwuno tu tu'urugono tu ko ee berishiji tu, ee peteni no shitutu sha aba ebeyebi, ee zhe tahaŋnụ mabaaba, aa ngbaracɛ nyapadụ maa kede a kwụbɛ mohondo mu bwa o, ee urigeni mohondo me bishi ba aba. 24Aka na te meni ma ata mụ tụ'walụ ta afwafwa mi hiŋ Noa, nazhɛ bee mepi iyi nɛ yɛu ibwɛ imɛwɛɛ njɛ bụ. 25Bɛɛ hiɛŋ,
Go unu-tukalana 'imɛ Kenan, bi zhɛ ba sha bujama ba ajama atagwụ ubwa.
26Bɛɛ hiɛŋ sasana, Go o zhemonjino AGWANGWAMA na shɛ
Agwatana Shɛm, ga ge Kenan shɛ bujama bu bwa.
27Ga Agwatana keeni atwa Jɛfɛt#9:27 Jɛfɛt: Egini tɛ Jɛfɛt i shɛ, ugombo tukaana. ofwugwo!
Ga ajalalo ubwa nama hwuŋ na ajalalo Shɛm, ga ge Kenan shɛ bujama bu bwa.
28Ga Noa zhɛrɛ shiywa kpakwụ-ni-dipi-tɛtu na aba na te meni mi zhagajɛ. 29Shiywa shɛ Noa hwɛɛ shɛ namɛ akpakwụ-eneshi-ni-dipi-tɛtu, (950) nazhɛ bee 'wi.
Dewis Presennol:
UMOZHIGO 9: RBT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Rubassa Bible © Bible Society of Nigeria, 2008