Genesis 2
2
Arlta 7-el Akngey ltyerrek
1Alker-then ahern-then ingkerrenh anenh.
2Arlta 7 ikwerel-antey Akngeyel warrk ikwerenh ywerrelhilek. Ltyerrek-anem. Ra ipmelhek-anem. 3Akngeyel arlta 7 anyentan akngakek ltyerrey-angker, impenan arlta ikwerel ra ltyerrenh.
4Alakenh-anyem Akngeyel alker-then ahern-then ingkerrenh arrpmernek.
Eden apmer arrwekeleny
5Lyertenyenp, alker-then, ahern-then Akngey INGKART ra arrpmernek-penh arwerl-weny, atherrk-weny. Kwaty ra thweney-angenh-antey ahern-warl, ingwer aney-angenh-kety amern lyapelheletyek. 6Kwaty apeynt lherrparnpenh ahern-they. Ahern-anem ra apelyilek.
7Akngey INGKARTel ahern-anem inek, artwa anyent-anem mpwarek ahern-penh. Ra ahern-areny renh itethilek-anem, pewilemel. Awer-anem anthek. Ahern-areny ra itethirrek-anem, weyangkemel. Iteth-anem irrek ra.
8Akngey INGKARTel akngerrakw-ampenyek arwerl ilek-ilek-anem rnkernek, apmer itnan Eden. Artwa renh-anem ra arrernek apmer ikwer-itwek. 9Arwerl ilek-ilek rnkernek ra, arwerl lyapelemel, amern-akert-rnem-then. Arwerl atherr apmer ampep-itwek lyapek.
10Arwerl ingweran mwerr itethiley-angkerarl, arwerl ingweran akalty-anthey-angker. Amern ntwa arlkwenty arwerl ikwer-penh nga apmwek-then mwerrek-then akaltyirrem, atherr-angkwarr-antey. Apmer Eden-they kwaty atnyerr ankalhenh, arwerl-rnem atherrkenyil-ayntetyek. Lher anyent-they ra irrpety-anem irrek, irlkwenty-anem. ...
15Akngey INGKARTel artwanem amern-angketyarr ikwer-itwek arrernek, ra arntarnt-arayntetyek. 16Akngey INGKARTel renh ilek, “Arwerl ingwer-rnem-itwek ntwa arlkwayntetyek. 17Arwerl ingwer apmwek-then mwerrek-then akaltyirreyel, menty arlkwey-angenh. Ntwa arwerl yanh-penh arlkwentyan, nga arlta ikwerel-antey ilwem.”
18Akngey INGKART angkek, “Ahern-areny anyent anerl-anekerr, atha ilkwatherr ikwer mpwarey.”
19Akngey INGKARTel ahern-anem inek arrpemarl, ra atnwenth ilek-ilek, thip ilek-ilek-anem mpwarek ahern-penh. Ra artwewarl akngetyek, ra itna renh-rnem itnewetyek. 20Ahern-areny ranem itneweynek atnwenth ateralth-rnem-then, mwerr-rnem-then, thip-rnem-then, ingkerrenh-antey. Alakenh-anyem ahern-arenyel itnewek-penh itnakert ingkerr-anem rernem anek. Ahern-areny ament-areny ilkwatherr-weny anenh, atnwenth rernem ament anenh arrpemarl, ingwer-lkwer. 21-22Akngey INGKARTel ahern-areny renh ankwayntetyek athenek. Artwa ra apelp-anem ayntek. Artwa ikwer-penh ngkerraly anyent ra inek. Renh ampwerrkileynek, ra arelh-anem ikwer mpwarek ilkwatherr, ngkerraly anyent-penh. Akngey INGKARTel arelh renh atnwenhek artwa ikwer-warl. 23Ra arek-penh arelh renh, ra angkek, “Nhenh atyeng-apenyarl, nhenh arlka atyeng-penh, ngkwern atyeng-penh arnwarnekarl. Atha renh itnewem ‘arelh’, ra atyeng-penh artwepenh arnwarnekarl wenh!”
24Aleyarl alakenh aynteyel ra. Artwa anyentel aynikw-then amikw-then iwerl-alhem. Ra arelh ikwer-itwek itengirrem, anyent-apeny-antey ratherr aynteyel. Alakenh-anyem Akngey INGKARTel arrernek.
25Arrwekeleny ratherr arnkweweny anenh, nyerrirrey-angenh-antey.
Dewis Presennol:
Genesis 2: aly
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, Wycliffe Bible Translators, Inc. All rights reserved.