Jɔɔŋ 8
8
Ba kɛŋ haal-la sɩ pɩŋ nʋʋ bala
1Ŋɩɩ nɛ ka Yesu ma lɩɩ nɩmɛ a jɩl peel kʋbala baa yɩrɛ Olif nyuŋ. 2Taŋ sɩ pʋla chʋchʋɔ-fɩɛla, ʋ bɩra mɩɩra mʋ a jʋʋ Wɩa dɩɩ-bal-la. Nɩaa kʋ gbaarʋ, ʋ hɔŋ a suomo dɩdagɛba. 3Ŋɩɩ nɛ Wɩa teniŋ kerichiba arɩ Farisii tɩŋŋaa kɛŋ haal kʋbala kʋ jʋʋ. Ba kɛŋ haal-la dɩ ʋ pɩŋ nʋʋ bala nɛ. Ba leŋ ʋ chɩŋ ba sɩpaaŋ. 4Ŋɩɩ nɛ ka ba bʋla pɩ Yesu, “La kʋhɩaŋ, la kɛŋ haala deeŋ dɩ ʋ chɛ nʋʋ bala nɛ. 5Wɩalɩŋ Mosis fa sɩ bile dɩ nɩaa tuto daga arɩ nʋʋkala nɛ ŋaa ŋɩɩ, dɩ la yagʋ kpʋ nɛ arɩ tabɩaa. Bɛɛ nɛ ŋ ma bʋl?” 6Ba bʋl ŋɩɩ dɩ ba ŋmoo Yesu fehe lɛ nɛ, a wuo na wombiiŋ a bʋl ʋ teeŋ.
Ŋɩɩ nɛ Yesu kɛŋ ʋ nyuŋ chugili tinteeŋ aŋ kɛŋ ʋ neniiŋ tutuuri tinteeŋ. 7Ka ba ha chɩŋ a pɩpɩɛsɛ wɩaa. Ŋɩɩ nɛ Yesu kɛŋ ʋ nyuŋ wʋl wɩa-nyuŋ a bʋla pɩba, “Ma kʋ-la kala ha sɩ bɩ wʋbɔŋ ŋaa, má leŋ dɩ ʋ laa sɩpaaŋ joŋ tabɩɩŋ a yagɛ haal-la, dɩ kʋkaanaa pɛ.” 8Ŋɩɩ nɛ ʋ bɩra kɛŋ ʋ nyuŋ chugili a bɩra kɛŋ ʋ neniiŋ a tutuuri tinteeŋ.
9Ba sɩ nɩɩ wɩalɩŋ ʋ sɩ bʋla, ba kala lɩɩ kʋŋ kʋŋ. Ba tʋɔŋ nɩhɩasɩ-la nɛ laa sɩpaaŋ lɩɩ, ka kʋkaanaa tuto, aŋ ka Yesu arɩ haal-la dʋndʋŋa lee-la. 10Ŋɩɩ nɛ Yesu kɛŋ ʋ nyuŋ jee a pɩɛsɛ haal-la, “Nɩɩ nɛ nɩalɩŋ hɛ? Nʋʋkala tuo dɩ ʋ yagɩŋ kpʋʋ?” 11Haal-la sɩ dɩ nʋʋkala tuo. Ŋɩɩ nɛ Yesu bʋla pʋ, “Tɔɔ, mɩ ma bɩ jaŋ ŋaaŋ wɩɩkala. Viiri aŋ bɩra sɩ́ wʋbɔŋŋɔɔ ŋaa.”
Yesu sɩ dɩ ʋ nɛ ŋaa dʋnɩa nɩaa pʋlʋmʋŋ
12Ŋɩɩ nɛ Yesu bɩra suomi a dɩdagɛ nɩaa, a bʋla pɩba, “Mɩ nɛ ŋaa dʋnɩa nɩaa pʋlʋmʋŋ, nɩɩ-la kala sɩ tomi, ʋ bɩ jaŋ vɛŋ birimiŋ tʋɔŋ. Ama ʋ jaŋ kɛŋ pʋlʋŋ sɩɩ pɩ nɩaa mɩɩsɩŋ.” 13Ŋɩɩ nɛ Farisii tɩmma-la bʋla pʋ, “Ŋ tɩtɩa nɛ ŋaa ŋ pɛ-naara, wɩalɩŋ saa ŋ sɩ bʋla bɩ wʋtɩtɩɩ ŋaa.” 14Ŋɩɩ nɛ Yesu bʋla pɩba, “Dɩ mɩ tɩtɩa nɛ ŋaa mɩ pɛ-naara ma, wɩɩ-la mɩ sɩ bʋla ŋaa wʋtɩtɩɩ nɛ, bɛɛ wɩaa mɩ jɩŋ lee-la mɩ sɩ lɩa nɛ, a jɩŋ lee-la mɩ sɩ jaŋ mʋ. Ama ma-na bɩ lee-la mɩ sɩ lɩa jɩŋ, a bɩra bɩ lee-la mɩ sɩ jaŋ mʋ ma jɩŋ. 15Ma yie to nuhuobiine wombiiŋ nɛ a dii nɩa sarɩya a joŋ cheeriŋ pʋ. Mɩ-na bɩ nʋʋkala sarɩya ka dii. 16Ama dɩ mɩ nɛ paala dii nʋʋ sarɩya ma, mɩ diiu ʋ bʋa lɛ nɛ, bɛɛ wɩaa mɩ dʋndʋŋa dee, mɩ dɩ mɩ Nyɩmma-la sɩ tɩmmɛ nɛ. 17Wɩalɩŋ Mosis fa sɩ bile dɩ nɩaa tuto daga arɩ nɩaa balɩa nɛ ŋaa pɛ-naaraa wɩɩ lɛ, ʋ ŋaa wʋtɩtɩɩ nɛ. 18Mɩ ŋaa mɩ tɩtɩa pɛ-naarʋ nɛ, mɩ Nyɩmma-la ma sɩ tɩmmɛ nɛ ŋaa mɩ pɛ-naara.” 19Ŋɩɩ nɛ ba pɩɛsʋ, “Nɩɩ nɛ ŋ nyɩmma hɛ?”
Yesu bʋl, “Ma bɩ mɩ jɩŋ, ŋɩɩ wɩaa ma bɩ mɩ Nyɩmma ma jɩŋ. Dɩ ma nɛ fa jɩmmɛ, ma fa jaŋ jɩŋ mɩ Nyɩmma ma.” 20Yesu bʋl wɩaa deemba kala bʋa-la lɛ ʋ sɩɩ dagɛ nɩaa Wɩa dɩɩ-bal-la lɛ nɛ, lee-la ba sɩ yie joŋ Wɩɩsʋlʋŋ kɩaa bil. Ka nʋʋkala bɩ ʋ kɛnɛ, bɛɛ wɩaa bʋa-la lɛ ba sɩ jaŋ kɛnʋ ha bɩ yie.
Yesu sɩ dɩ nɩaa bɩ jaŋ wuo mʋ lee-la ʋ sɩ jaŋ mʋ
21Ŋɩɩ nɛ Yesu bɩra bʋla pɩ nɩalɩŋ, “Mɩ jaŋ viiri, ma jaŋ chɛ mɩ ka, ma saa jaŋ sʋʋ arɩ ma wʋbɔŋŋɔɔ. Lee-la mɩ sɩɩ mʋ, ma bɩ jaŋ wuo mʋ nɩmɛ.”
22Ŋɩɩ nɛ Juu tɩmma-la pɩɛsɛ dɔŋɔ, “Ʋ sɩ, la bɩ jaŋ wuo mʋ lee-la ʋ sɩɩ mʋ. Ʋ saa bʋlaa magɩsɛ arɩ ʋ jaŋ kpʋ ʋ tɩtɩa nɛ koo ɛɛ nɛ ʋ bʋl ŋ-la?”
23Ŋɩɩ nɛ Yesu bɩra bʋla pɩba, “Ma lɩɩ dʋnɩa deeŋ nɛ, ka mɩ ma lɩɩ Wɩa-jaŋ. Ma lɩɩ dʋnɩa nɛ, aŋ ka mɩ ma bɩ dʋnɩa lɩa. 24Mɩ laa sɩpaaŋ bʋla pɩma arɩ ma jaŋ sʋʋ arɩ ma wʋbɔŋŋɔɔ, dɩ ma nɛ bɩ laa dii arɩ mɩ nɛ ŋaa nɩɩ-la mɩ sɩ sɩ mɩ ŋaa.”
25Ŋɩɩ nɛ ba pɩɛsʋ, “Ŋ nɛ kʋbɛɛ?” Ŋɩɩ nɛ Yesu bʋla pɩba, “Mɩ nɛ Nɩɩ-la mɩ sɩ sɩ mɩ ŋaa faafaa kala. 26Mɩ kɛŋ wɩaa yʋgɛ nɛ dɩ mɩ bʋl a tɩgɛ ma lɛ, a wuo to wɩalɩŋ lɛ a joŋ cheeriŋ pɩma. Nɩɩ-la sɩ tɩmmɛ, ʋ sɛnɛ ŋaa wʋtɩtɩɩ Tɩɩna nɛ. Wɩalɩŋ mɩ sɩ nɩa ʋ niiŋ lɛ, ba nɛ mɩ bʋlaa pɩ dʋnɩa nɩaa.”
27Ʋ sɩɩ bʋl ŋɩɩ, nɩalɩŋ fa bɩ jɩŋ arɩ ʋ Nyɩmma wɩaa nɛ ʋ bʋlaa pɩba ŋɩɩ. 28Ŋɩɩ nɛ Yesu bʋla pɩba, “Dɩ ma nɛ kɛŋ mɩ-na Nuhuobiine Bie kpaasɛ daagɛsɛ nyuŋ, ma jaŋ jɩŋ arɩ mɩ nɛ ŋaa Nɩɩ-la mɩ sɩ sɩ mɩ ŋaa. Ŋɩɩ ma lɛ nɛ ma jaŋ to jɩŋ arɩ mɩ bɩ wɩɩkala ŋaa mɩ tɩtɩa doluŋ lɛ, ama mɩ yie bʋl wɩalɩŋ mɩ Nyɩmma sɩ dagɛmɛ nɛ. 29Nɩɩ-la ma sɩ tɩmmɛ hɛ mɩ teeŋ nɛ, ʋ bɩ mɩ dʋndʋŋa leŋe, bɛɛ wɩaa mɩ yie ŋaa wɩalɩŋ sɩɩ tɔrɛ ʋ tʋɔŋ nɛ.” 30Ʋ sɩ bʋl wɩalɩŋ, nɩaa yʋga a laa ʋ wɩaa dii.
Nɩalɩŋ sɩ sɛnɛ ŋaa Abɩraham doho nɩaa
31Ŋɩɩ nɛ Yesu bʋla pɩ Juu tɩmma-la sɩ laa ʋ wɩaa dii, “Dɩ ma nɛ kɛŋ wɩalɩŋ mɩ sɩɩ dagɛ kaa tɩtɩŋ, ma sɛnɛ ŋaa mɩ harɩ-tooroo nɛ. 32Ma jaŋ jɩŋ wʋtɩtɩɩ. Wʋtɩtɩɩ-la saa jaŋ laama ta dɩ ma tɩɩ ma tɩtɩa.” 33Juu tɩmma-la sɩ laa Yesu wɩaa dii ma bʋl, “La paala ŋaa Abɩraham doho nɩaa nɛ. La ha bɩ nʋʋkala yosi ŋaa. Bɛɛ nɛ saa tɩɩ ŋ bʋl dɩ Wɩa jaŋ laala ta dɩ la tɩɩ la tɩtɩa?”
34Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, nʋʋ na-kala sɩ ŋaa wʋbɔŋ, ʋ tɩɩna ŋaa wʋbɔmʋŋ yoŋ nɛ. 35Dɩ yomo nɛ hɛ nʋʋ dɩa lɛ, ʋ bɩ dɩa-la lɛ jaŋ hɛ deeŋ deeŋ. Ama dɩ dɩa-la tɩɩna nɛ kɛŋ bii, ʋ-na jaŋ hɛ dɩa-la lɛ a kaa mʋ wuu. 36Dɩ mɩ-na Wɩa Bie nɛ saa laama ta, mɩ sɛnɛ laama ta nɛ dɩ ma tɩɩ ma tɩtɩa. 37Mɩ jɩma arɩ ma ŋaa Abɩraham doho nɩaa nɛ, aŋ ka ma chɩchɛ dɩ ma kpʋmɛ, bɛɛ wɩaa wɩalɩŋ mɩ sɩ dagɛma bɩ ma dɩgɩlaa jʋa. 38Mɩ-na yie bʋl wɩalɩŋ mɩ Nyɩmma sɩ dagɛmɛ nɛ, ma ma ŋɩŋaa wɩalɩŋ ma nyɩmma sɩ dagɛma dɩ ma ŋɩŋaa.”
39Ŋɩɩ nɛ ba bʋla pʋ, “Abɩraham nɛ ŋaa la nyɩmma.”
Yesu ma bʋl, “Dɩ ma nɛ sɛnɛ fa ŋaa Abɩraham biiriŋ, ma fa jaŋ ŋɩŋaa wɩalɩŋ Abɩraham fa sɩ ŋaa. 40Mɩ bʋl wʋtɩtɩɩ nɛ pɩma, wɩalɩŋ Wɩa sɩ dagɛmɛ. A tɩŋ wɩɩŋ deeŋ wɩaa nɛ maa chɛ dɩ ma kpʋmɛ. Abɩraham fa bɩ ŋɩɩ ŋaa. 41Maa ŋaa wɩalɩŋ ma nyɩmma sɩɩ ŋaa nɛ.” Ŋɩɩ nɛ ba bʋl, “La bɩ mɛŋgaa-biiri ŋaa. La kala Nyɩmma ŋaa kʋbala nɛ, ʋ nɛ Wɩa.” 42Ŋɩɩ nɛ Yesu bʋla pɩba, “Dɩ Wɩa nɛ sɛnɛ fa ŋaa ma Nyɩmma, ma fa jaŋ chomi, bɛɛ wɩaa, Wɩa teeŋ nɛ mɩ lɩɩ a kɔ daha. Mɩ tɩtɩa doluŋ lɛ dee mɩ kɔ. Ʋ nɛ tɩmmɛ. 43Bɛɛ nɛ saa tɩɩ ma bɩ wɩalɩŋ mɩ sɩ bʋla bʋbʋɔŋ jɩŋ? Ma bɩ chɛ dɩ ma jegile nɩɩ wɩalɩŋ mɩ sɩɩ bʋl. Ŋɩɩ nɛ tɩɩ ma bɩ ba bʋbʋɔŋ jɩŋ. 44Ma nyɩmma nɛ ŋaa Sɩtaanɩ. Ma saa cho dɩ maa ŋaa ʋ tʋɔtɔrɛ wɩaa nɛ. Dʋnɩa dɩ-suomuŋ kala lɛ nɛ ʋ ŋaa nɩkpʋʋrʋ. Ʋ tɩtɩa bɩ wʋtɩtɩɩ kɛnɛ. Ŋɩɩ nɛ tɩɩ ʋ bɩ wʋtɩtɩɩ ka to. Dɩ ʋ nɛ nyɩɛ wɩaa ma, ʋ nagɩsɩŋ nɛ paala ŋɩɩ. Ʋ ŋaa wʋnyɩɛrʋ nɛ, a paala ŋaa wʋnyɩɛraa kala nyɩmma ma. 45Ama a tɩŋ mɩ sɩɩ bʋl wʋtɩtɩɩ wɩaa nɛ ma bɩ mɩ wɩaa laa dii. 46Ma kʋbɛɛ nɛ jaŋ wuo dagɛ arɩ mɩ ŋaa wʋbɔŋ? Dɩ mɩ nɩɩ bʋl wʋtɩtɩɩ, bɛɛ nɛ saa tɩɩ ma bɩ mɩ wɩaa laa dii? 47Nɩɩ-la kala sɩ lɩɩ Wɩa teeŋ yie jegile nɩɩ wɩalɩŋ Wɩa sɩɩ bʋl nɛ. Ma bɩ Wɩa teeŋ lɩa, ŋɩɩ nɛ tɩɩ ma bɩ wɩalɩŋ ʋ sɩɩ bʋl jegile nɩɩ.”
48Ŋɩɩ nɛ Juu tɩmma-la bʋla pɩ Yesu, “La bɩ wʋtɩtɩɩ bʋlaa, la sɩ sɩ ŋ ŋaa Samarɩa tɩɩna nɛɛ, jɩŋ-bɔmʋŋ ma kɛnɩŋ?”
49Ŋɩɩ nɛ Yesu bʋla pɩba, “Jɩŋ-bɔŋ bɩ mɩ kɛnɛ, ama mɩɩ zil mɩ Nyɩmma nɛ, aŋ ka ma-na bɩ mɩ ka zil. 50Mɩ bɩ yɩrɩŋ chɛ pɩpɩ mɩ tɩtɩa. Ama nʋʋ nɛ hɛ nɩmɛ a chɛ yɩrɩ-la pɩpɩmɛ. Ʋ nɛ saa jaŋ dii nɩalɩŋ sɩ vɩa mɩ wɩaa sarɩya. 51Wʋtɩtɩɩ nɛ mɩ bʋlaa pɩma, nɩɩ-la kala sɩɩ to mɩ niiŋ wɩaa, ʋ bɩ jaŋ sʋʋ.”
52Ŋɩɩ nɛ Juu tɩmma-la bʋla pʋ, “Lɛɛlɛ la jɩma arɩ ŋ kɛŋ jɩŋ-bɔŋ nɛ. Abɩraham sʋba nɛ. Wɩa wʋlaabʋllaa ma sʋʋ. Aŋ ka ŋ bʋl dɩ nɩɩ-la kala sɩɩ to ŋ niiŋ wɩaa bɩ jaŋ kɔ dɩ ʋ sʋba. 53La nyɩmma Abɩraham sʋba nɛ. Ŋ saa bɩɩna ŋ kɩɩʋ nɛɛ? Wɩa wʋlaabʋllaa ma sʋʋ. Ŋ saa bɩɩna ŋ nɛ kʋbɛɛ?”
54Ŋɩɩ nɛ Yesu bɩra bʋla pɩba, “Dɩ mɩ nɩɩ pɩ mɩ tɩtɩa yɩrɩŋ, yɩrɩ-la ŋaa yɩrɩ-pɛɩ nɛ. Mɩ Nyɩmma nɛ nɩɩ-la sɩɩ pɩmɛ yɩrɩŋ, nɩɩ-la ma sɩ sɩ ʋ ŋaa ma Wɩa nɛ. 55Ma bɩ ʋ jɩŋ, ama mɩ-na jɩmʋ nɛ. Dɩ mɩ nɛ jaŋ bʋl arɩ mɩ bɩ ʋ jɩŋ, mɩ jaŋ ŋaa wʋnyɩɛrʋ, arɩ ma sɩ ŋaa wʋnyɩɛra ŋɩɩ. Mɩ saa jɩmʋ nɛ a tuto ʋ niiŋ. 56Ma naabalɩma Abɩraham faa jʋɔsʋ nɛ ʋ sɩ nɩa arɩ mɩ jaŋ kɔ dʋnɩa. Ʋ sɩ na ŋɩɩ, ʋ tʋɔŋ fa tɔrɔ nɛ.”
57Ŋɩɩ nɛ Juu tɩmma-la bʋla pʋ, “Ŋ ha paala bɩ jɩsɩŋ mahɩŋ balɩa arɩ fii yie. Ɛɛ nɛ saa ŋ ŋaa a na Abɩraham?”
58Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, ka dɩ ba-na lʋl Abɩraham, mɩ fa hɛ nɩmɛ nɛ.” 59Ŋɩɩ nɛ ba paa tabɩaa dɩ ba yagʋ. Ʋ kɛŋ ʋ tɩtɩa faa a lʋara lɩɩ Wɩa dɩɩ-bal-la tʋɔŋ.
Dewis Presennol:
Jɔɔŋ 8: SIS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Ghana Institute of Linguistics Literacy and Bible Translation 1984, 2014