Luk 18
18
Deḅọ Koromafị Eremeniḅọ Ma Na Ḅẹrẹkọnḅọ Ḅe Na Kaḅo
1Anịsịkị Jizọs Ḅe gbọrị kaḅo kọn oria ọḅụḍukoapụma pịrịmẹ, se ye se ini ḍie na ini sịkịmamgba tẹkẹ gbẹịnmẹ kuḅie lọkọmaka ḅara ḅụ. 2“Gbọrị ama ḅie gbọrị ḅẹrẹkọnḅọ simemẹ, ọ̀ Tamụnọ ḍikiḅalafakẹ, pịkị tomoni osikẹ. 3Se deḅọ koromafị eremeniḅọ anị ama mị ḅie pịkị simemẹ, á sịkịmamgba ọ̀ damaḅoḅo mẹ, árịa ḅẹrẹ karakara nwọ nyanaḅịa ẹrẹchị, ‘Ḅarachụa ị̀ pịrị, ị̀rị̀ na tarakaḅọ ḅe ḅara ḅie!’ 4Ḅọlọ sịkị lamẹ ḅẹrẹkọnḅọ ḅe ọ̀ gbọrị ḅara sọ mịẹ ḍụkụkẹ, ọkụma anị ḅe kuluma ọ̀ nwọ seni ọ̀ ḅụ ḅẹmẹ, ‘À Tamụnọ ḍikiḅalafakẹ se pịkị tomoni osikẹ nwọḅẹ sọnị, 5ọkụma ma deḅọ koromafị eremeniḅọ ma seni ị̀ pịrịarị ḅụfụka mị gose à mịẹse árị árịa karakara ḅẹrẹ mị nwọ nyanaḅịa. Anịka ọkụma á sịkịmamgba ị̀ damaḅo se ị̀ ḅụ ịnyọ famaḅịa!’”
6Se Nyanaḅọ Ḅe ọkwẹịnma mun se nwọ ḅẹmẹ, “Anị si ḅẹrẹkọnḅọ ḅe ḍukoye mị ọ́ nwọ poki. 7Mịọkụ, Tamụnọ Ḅe ọ̀ ḅẹrẹkọn oria tomonima ḅara iḅima ẹka, ḅarachụa gose ḍin na enekaka na nwọse owu ọ̀ pịrịarị apụma? Ḅarachụa ini pịrị ḅụ ọ̀ tẹtẹ ḅe? 8À ḍuko ọ́ pịrịaḅẹ, ọ̀ ḅẹrẹkọn inia ḅara iḅimaḅịa, ọ̀ pịkị sarama anị mịẹḅịa. Ọkụma Tomoniḅọ Tọkụ Ḅe tomonikiri ḅoḅịa sịkị ò ḅereni nyana apụ ọrị ḅe?”
Farisiḅọ Ḅe Na Amaigbiki Ochoḅọ Ḅe Na Kaḅo Mị
9Jizọs Ḅe pịkị mị kaḅo mị kọn inia ḅụ ma se iḅi apụ kịẹnma se jịn apụ ḍikisimapụma pịrịmẹ. 10“Gbọrị sịkị mama owuapụ mun Tamụnọ opu warị mị ḅie tẹkẹ-ẹ mun mẹ: gbọrịḅọ Farisiḅọ-ẹ, ísíḅọ ḅe amaigbiki ochoḅọ-ẹ. 11Farisiḅọ ḅe ọ̀ ḅụ sikima chịẹ sime se tẹkẹmẹ, ‘À mịẹḅaka se ị́ ḅẹmẹ Tamụnọ, na àrị ngẹrịfị ḍọkịkẹ, à jịnḅọ inuma inumakẹ, anịkanịka sẹ fịfịḅọkẹ, jịn apụ mịẹmịẹ ọkụ mị. À mịẹḅaka se ị́ ḅẹmẹ, na àrị ori amaigbiki ochoḅọ ḅe simeọkụ nwọ simekẹ. 12Wiki mị ḅie à mama ene nwọse ḅuruseḅụḅaama ḅamamẹ, à nyana aye mamgba se oyi-a kiri pu ḅe gbọrị kiri à nwọse ị́ pịrịpịrịmẹ.’ 13Ọkụma amaigbiki ochoḅọ ḅe sasaju ḅụ wẹrị chịẹ simemẹ, ọ̀ tọrụ deki chịẹma so mị dakẹ, ọkụma ḅara se oria ekpe ḅụrọ se nwọ ḅẹmẹ, ‘Tamụnọ, ị̀ ḍikitịḅịfoin, ị̀rị̀ si ḅọ-ẹ!’ 14À ḍuko ọ́ pịrịaḅẹ,” Jizọs Ḅe nwọ ḅẹmẹ, “Amaigbiki ochoḅọ ḅe-ẹ, Farisiḅọ ḅe kẹ, anị Tamụnọ Ḅe na karakara ḅụ simeye-ẹ ọ̀ warị lasịkị. Anịsịkị mịnaḅụ se opuḅọ mịẹḅọ goyegoye ini nwọ iderimaḅịa, se mịnaḅụ iderimaḅọ goyegoye ini nwọse opuḅọ mịẹḅịa.”
Jizọs Ḅe Kala Awọmẹnị Ḅẹlẹmamẹ
(Mat 19.13-15; Mak 10.13-16)
15Dapụ inia ḍọkọḍọkọ awọmẹnị nwọ ọkịḅo Jizọs Ḅe pịrịmẹ ò ḅara seni ini ọgọnọ gbanaḅịa ẹrẹchị. Ọkụma ọḅụḍukoapụma ini ọrị se ini ḍiki ịganịmẹ, ini ọkọ mịẹye gose, 16ọkụma Jizọs Ḅe awọmẹnịma chịn ọ̀ ḅụ pịrị se nwọse ini ḅẹmẹ, “Ye awọmẹnịma ị̀ damaḅo, ómine ini kikima, anịatịḅị Tamụnọ Amanyanakiri mị sime nwọ simeapụ pịrịmẹ. 17Ọ́ mịn se ḅiekoroma! Kala tọkụ ḅara nwọse Tamụnọ Amanyanakiri mị ọkịka ḅọ goyegoye ngịsị anịa ḅie sọ ẹkẹ.”
Ngọ Kọn Ḅọ Ḅe
(Mat 19.16-30; Mak 10.17-31)
18Gbọrị Ju tịḅịnịḅọ Jizọs Ḅe gbelamẹ, “Iḅi yeḍieḅọ, cheye à nwọ mịẹse simegbaso ḍumo nyana ḅe?”
19Jizọs Ḅe nwọse ò gbelamẹ, “Ị́ che gose iḅi ḅọ se ị̀ chịn? Iḅi gbọrịḅọ sọ ofori-ẹ, Tamụnọ Ḅe sikima ọkụma. 20Olokoma ị́ àrị nemimẹ: ‘Sẹfị ma, nweni ḅaa ma, furu ma, iruo kọn ma, ị́ ḍa na ị́ nyengi na osi.’”
21Nweniḅọ ḅe pẹkẹrẹmẹ, “Àrị asẹ ḅụ sime sịkị ngịsị à ma olokoma ḍukoye nwọ mịẹmẹ.”
22Jizọs Ḅe mịn mị naa sịkị, ọ̀ nwọse ọ̀ ḅẹmẹ, “Ị́ mịẹ na iḅi gbọrịye pa omi-ẹ. Ị́ nyana aye mamgba dẹrị, se igbiki mị se igwein apụma pịrị, ị́ pịkị soḅie ngọ nyanaḅịa, anịsịkị vinpịkịḅo ị̀ ḍuko.” 23Ọkụma owuḅọ ḅe mịn mị naa sịkị, ori opuma ngịrịmẹ, anịatịḅị ori opuma ngọ nyanamẹ.
24Jizọs Ḅe ori ngịrị ọkụ ọrị sịkị, ọ̀ nwọ ḅẹmẹ, “Ngọ nyana apụma Tamụnọ Amanyanakiri mị ḅie sọ mị ḅụfụkama ọkụ ḍiki! 25Ngọ kọnḅọ Tamụnọ Amanyanakiri ḅie sọ mị ḅụfụkamatẹịn ike-nambulo ḅe laga tọrụmgbọlụ ḅie tolu ḅọrọ mị nẹngịmẹ.”
26Ò ḍukoye naa apụma gbelamẹ, “Anị ọkụma, tụḅọ re ineda ḍụaḅọrọma nyana ḅe?”
27Jizọs Ḅe pẹkẹrẹmẹ, “Tomoni ineda mịẹ ẹka ye mị, Tamụnọ Ḅe ḅụ sarasaramẹ.”
28Anịsịkị Pita ḅe nwọ ḅẹmẹ, “Ḍiki! Wa mịna warịma wẹrịso se ị́ ḍukoaḅẹ.”
29Jizọs Ḅe nwọse ini ḅẹmẹ, “Iin, se à kọkọmaye ḍuko ọ́ pịrịaḅẹ na Tamụnọ Amanyanakiri mị gose warị, anịkanịka iniḅọ ta, anịkanịka owuapụ mịnapụ, anịkanịka iniḅọ yiapụ, anịkanịka awọ koroma soḅọ goyegoye Tamụnọ Amanyanakiri mị gose 30mịn ḅụọ mị ḅụ, opuma àrị nẹngị aye nwọ nyanaḅịa, ḅoḅịa ḅụọ ḅụ simegbaso ḍumo pịkị nwọ nyanaḅịa.”
Jizọs Ḅe Tẹrẹ-a Sịkị karamaye Nwọse Oria Fị Ḅẹrẹ Ḍukomẹ
(Mat 20.17-19; Mak 10.32-34)
31Jizọs Ḅe oyimaịn ọḅụḍukoapụ fịnjịma ọkị sikima anga pịrị se nwọse ini ḅẹmẹ, “Ó poki! Wa Jerusalẹm mun aḅẹ, ịkịankoroapụma Tomoniḅọ Tọkụ Ḅe gbolomaye ḅụ se ḍiri ḅie gịẹịn yegoyegoye ḅo kọkọmaye nwọ sọḅịa nyọ mị. 32Ini ọ̀ ḅọrọma Jịnsẹapụma pịrịḅịa, ò seni kpọti, ọ̀ wọlọ, se fụla se ọ̀ ḅụ saraḅịa apụma. 33Ini ò fomu, se ọ̀ ḅaaḅịa, ọkụma tẹrẹ-a ḍin karama ene mị ḅụ ọ̀ sịsẹḅịa.”
34Mayema ḅụ gbọrịye sọnị ọḅụḍukoapụma ini kaịnḅokẹ; ọkwẹịnmgbọlụ ma fiearịye ma sọnị ini se ini ḅọịmamẹ, pịkị Jizọs Ḅe ḍukoarịaye ma sọnị ini nemikẹ.
Jizọs Ḅe Tọrụmgbọlụ Pụn Ye Ọmgbọḅọ Gwọmẹ
(Mat 20.29-34; Mak 10.46-52)
35Jizọs Ḅe ḅo Jẹriko na kpeki sịkị, gbọrị tọrụmgbọlụ pụn owuḅọ ateli anga ye ọmgbọ simemẹ. 36Tomonikpo mị ḅọrọarị ḅara ọ̀ nwọ naa sịkị, ò gbelamẹ, “Mịn mị cheye?”
37Ini ḍuko ọ̀ pịrịmẹ na, “Jizọs Nazarẹt ḅọ ḅe ọ̀ ḅọrọaḅẹ.”
38Ori olokumẹ, “Jizọs! Devid Tọkụ! Ị̀ ḍikiḅụgerere!”
39Tọrọkọ sime tomonima ò ḍiki ịganị se nwọse ọ̀ ḅẹmẹ, deinma sime. Ọkụma anịsịkị ori olokutẹịnmẹ, “Devid Tọkụ! Ị̀ ḍikiḅụgerere!”
40Anị Jizọs Ḅe dachịẹ se tọnye-ẹ na ini tọrụmgbọlụ pụn ḅọ ḅe nwọ ọkịḅo ọ̀ pịrị. Ò ḅo kpeki sịkị, Jizọs Ḅe ò gbelamẹ, 41“Cheye à nwọ mịẹ ị́ pịrị ị́ nwọ ḅi?”
Ọ̀ nwọ pẹkẹrẹmẹ, “Sẹnịḅọ, à ḅimẹ à pịkị ye ọrị.”
42Anịsịkị Jizọs Ḅe nwọse ọ̀ ḅẹmẹ, “Ye ọrị! Ị́ya ḅereni mịẹse ị́ ḅụ iḅisam.” 43Anịkirikiri ori ineda ye ọrịmẹ, se ò Jizọs Ḅe ḍuko, mịẹḅaka nwọse Tamụnọ Ḅe ḅẹma mun mẹ. Tomonikpo mị anị ọrị sịkị, inimgba Tamụnọ Ḅe tokonimẹ.
Dewis Presennol:
Luk 18: OBTP
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society of Nigeria