UJƆ́NI Omafú kú ɔ̄kā kú ipú ɔkpá ā
Omafú kú ɔ̄kā kú ipú ɔkpá ā
Ɔ̄kōōlɔhi kú Ujɔ́ni ā ma Ujísɔ̄si fú kóō wɛ “Ɛlā” kú Ɔwɔicō oyēeyī piyóó, nōo “kwú pīya ɔ̄cɛ ɔlamu nōo lā mla alɔ. (1.14) Ɛ́gɛ́nɛ̄ é tá ipú ɔkpá abɔ̄yī nū lɛ ā, é tá ɔkōōlɔhi nyā ká ācɛ nēe í jé ɔkpá ā kéē cɛ̄ ka, Ujísɔ̄si ɔ́ɔ wɛ ohɔ́nyɛtá, “Ɔyí kú Ɔwɔicō nēé cokónu ka ɔ́ɔ géē wā gbojī ɛɛ́ mā á. Cɛ́ɛ́ oŋmá lɛ o cɛ̄ɛ̄lā nū kéē géē lɛ oyēeyī opiyóó (20.31).
Igbīhi ɛlā ōmafú, nēé jé ɛlā ō yēeyī piyóó kú Ɔwɔicō ā éjúma ka ɔ́ɔ wɛ Ujísɔ̄si á. Āyā aflɛ́yí kú ɔkōōlɔhi ā kɛlā ohígbū ɔdā ō hídáagó ɛyɛ́ɛyɛ́yí nōo mafú ka Ujísɔ̄si ɔ́ɔ wɛ ohɔ́yɛtá, ɔyí Ɔwɔicō nɛ̄ ó tɛtɛ cokónu gbojī gbojī ka ɔ́ɔ géē wā ā. Ɔdā nēe gboce ɛ̄nyā ā wɛ ɛlā nēé nwū nōo kɛlā lɛyíkwu ɔdā nɛ̄ úklɔ́ ō hídáagó ā mafú ā. Āyā kú ɔkpá nyā kɛlā ɛ́gɛ́nɛ̄ ācɛ ōhī cɛ̄ɛ̄lā kú Ujísɔ̄si kwú pīya ayíkpó kú nū ā, ɛ́gɛ́nɛ̄ ācɛ ɔhá bɛ́yíkwu ɔ́, klla tá kéē cɛ̄ɛ̄lā kú nū ā. Ɛyí 13-17 kā ɔ̄kā kú obáyátɔ̄há kú Ujísɔ̄si mɛ́mla ayíkpó kú nū, otú kú eko nēé gaá kwú ɔ̄ ā, mɛ́mla ɛlā kóō tútū mɛ́mla ɛlā ō tɔ́ ācɛ ɔtū kwɔtū nōó ka lɛ uwā, ɛ̄cī nōo gboce ɛ̄cī nēé je ɔ́ nyɔ́kpá ā. Ámōmɛ kú ɛyíyɔ́kpá kú Ɔ̄kōōlɔhi ka ka é le Ujísɔ̄si kwú, mɛ́mla ɛpɔ̄ nēé ka tū ɔ̄, é le ɔ́ nyɔ́kpá mla o héyī ŋmá ɔlékwū kú nū. Ó ma iyī nū fú lɛ ayíkpó kú nū, igbīhi ō héyī ŋmá ɔlékwū kú nū ā.
É le ɔ̄kā kú ɔnyā éyi nēé kwú yɔ̄ í gbaajā ā (8.1-11) fukɔ̄ ohígbū ka ɔkpá alɛwa nēé pīya tá ɔkɔ kú ucē ɔhá kú eko aflɛ́yí ā, lɛ ō hɛ́ tá ajɛ, amáŋ ɔkpá alɛwa ɔhá ā kwú ɔ̄ ú tá ipú ɔ̄kā kú uwā. Ujɔ́ni ā kɛlā kpɔ́cíí lɛyíkwu ɛhi kú oyēeyī opiyóó, ka ɔ́ yɔ̄ ɛgíyí Ohɔ́nyɛtá ōfōōfūnū. Ɛhi ā yɔ̄ abālɔbányā kē í wā gé lɛ ācɛ nēe cɛ̄ ka Ujísɔ̄si wɛ, ɔkwɛ̄yi mɛ́mla oyēeyí á. Ɛlā okpɔ́cíí ɔhá kú Ujɔ́ni wɛ obī ɔdā ɔlamu le mafú kú úklɔ́ kú alelékwū kú Ɔwɔicō pélúú ŋmá eyīnyā ga eyīnyā ā. Ɔdā o lɛbɛ̄ɛka éŋkpɔ̄, igbō, ɔlá-ōfíyajɛ, ɔ̄cogbāálá mɛ́mla álá kú nū mɛ́mla ɔcí ufáyin mɛ́mla īkpō nōó gwá ā.
Dewis Presennol:
UJƆ́NI Omafú kú ɔ̄kā kú ipú ɔkpá ā: IFBCL
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda